Source Browser

{
  "title": "Targum Jonathan on Ezekiel",
  "index": {
    "title": "Targum Jonathan on Ezekiel",
    "categories": [
      "Tanakh",
      "Targum",
      "Targum Jonathan",
      "Prophets"
    ],
    "schema": {
      "nodeType": "JaggedArrayNode",
      "depth": 2,
      "addressTypes": [
        "Perek",
        "Pasuk"
      ],
      "sectionNames": [
        "Chapter",
        "Verse"
      ],
      "match_templates": [
        {
          "term_slugs": [
            "targum-jonathan",
            "ezekiel"
          ]
        }
      ],
      "lengths": [
        48,
        1273
      ],
      "titles": [
        {
          "lang": "en",
          "text": "Targ. Ez."
        },
        {
          "lang": "en",
          "text": "Targ. Ezek."
        },
        {
          "text": "תרגום יונתן על יחזקאל",
          "lang": "he",
          "primary": true
        },
        {
          "text": "Targum Jonathan on Ezekiel",
          "lang": "en",
          "primary": true
        }
      ],
      "title": "Targum Jonathan on Ezekiel",
      "heTitle": "תרגום יונתן על יחזקאל",
      "heSectionNames": [
        "פרק",
        "פסוק"
      ],
      "key": "Targum Jonathan on Ezekiel"
    },
    "authors": [],
    "enDesc": "Targum Jonathan is an Aramaic translation of the Neviim (Prophets). Authorship of the Targum is attributed to Jonathan ben Uzziel, a prime student of the great Talmudic sage Hillel. In Talmudic times, the Targum was read verse-by-verse, alternating with the Hebrew text of the haftarah.",
    "hasErrorMargin": true,
    "compDate": [
      -150,
      350
    ],
    "compPlace": "Talmudic Israel/Babylon",
    "era": "T",
    "dependence": "Targum",
    "base_text_titles": [
      {
        "en": "Ezekiel",
        "he": "יחזקאל"
      }
    ],
    "base_text_mapping": "one_to_one",
    "collective_title": {
      "en": "Targum Jonathan",
      "he": "תרגום יונתן"
    },
    "is_cited": true,
    "heTitle": "תרגום יונתן על יחזקאל",
    "titleVariants": [
      "Targ. Ez.",
      "Targ. Ezek.",
      "Targum Jonathan on Ezekiel"
    ],
    "heTitleVariants": [
      "תרגום יונתן על יחזקאל"
    ],
    "sectionNames": [
      "Chapter",
      "Verse"
    ],
    "depth": 2,
    "heCategories": [
      "תנ\"ך",
      "תרגומים",
      "תרגום יונתן",
      "נביאים"
    ],
    "compDateString": {
      "en": " (c.150 BCE  – c.350 CE)",
      "he": " (150 לפנה\"ס  – 350 לספירה בקירוב)"
    },
    "compPlaceString": {
      "en": "Talmudic Israel/Babylon",
      "he": "ישראל / בבל התלמודית"
    }
  },
  "text": {
    "he": [
      [
        "וַהֲוָה בִּתְלָתִין שְׁנִין לִזְמַן דְאַשְׁכַּח חִלְקִיָה כַּהֲנָא רַבָּא סִפְרָא דְאוֹרַיְתָא בְּבֵית מַקְדְשָׁא בַּעֲזַרְתָּא תְּחוֹת אוּלָמָא בְּפַלְגוּת לֵילְיָא בָּתַר מַעֲלָנֵי סִיהֲרָא בְּיוֹמֵי יֹאשִׁיָה בַר אָמוֹן מְלַךְ שִׁבְטָא דְבֵית יְהוּדָה בְּתַמוּז בְּחַמְשָׁא לְיַרְחָא אֲמַר נְבִיָא וַאֲנָא בְגוֹ בְנֵי גָלוּתָא עַל נְהַר כְּבָר אִתְפְּתַחוּ שְׁמַיָא וַחֲזֵית בְּחֵיזוּ נְבוּאָה דִי שְׁרָת עֲלֵי חֵיזוּ יְקָר שְׁכִנְתָּא דַיָי:",
        "בְּחַמְשָׁא לְיַרְחָא הִיא שַׁתָּא חֲמֵשְׁתָּא לְגָלוּת מַלְכָּא יוֹיָכִין:",
        "מֶהֱוֵי הֲוָה פִּתְגָם נְבוּאָה מִן קֳדָם יְיָ עִם יְחֶזְקֵאל בַּר בּוּזִי כַהֲנָא בְאַרְעָא דְיִשְׂרָאֵל תָּב תִּנְיָנוּת וְאִתְמַלֵל עִמֵיהּ בִּמְדִינַת אֲרַע כַּסְדָאֵי עַל נְהַר כְּבָר וּשְׁרָת עֲלוֹהִי תַּמָן רוּחַ נְבוּאָה מִן קֳדָם יְיָ:",
        "וַחֲזֵית וְהָא רוּחַ עַלְעוֹלָא אָתֵי מִן צִפוּנָא עַנָן רַב וְאֶשְׁתָּא מִשְׁתַּלְהָבָא וְזֵיהוֹרָא לֵיהּ סְחוֹר סְחוֹר וּמִגוֹ עֲנָנָא וּמִגוֹ עַלְעוֹלָא כְּעֵין חַשְׁמָלָא מִגוֹ אֶשְׁתָּא:",
        "וּמִגַוָהּ דְמוּת אַרְבַּע בִּרְיָן וְדֵין חֶזְוֵיהוֹן דְמוּת אֱנָשָׁא לְהֵין:",
        "וְאַרְבְּעָא אַפִּין לַחֲדָא וְאַרְבַּע אַפִּין לְכָל חַד וְחַד שִׁתָּא עֲסַר אַפִּין לְבִרְיָתָא חֲדָא מִנְיַן אַפַּיָא דְאַרְבַּע בִּרְיָן שִׁתִּין וְאַרְבְּעָא אַפִּין וְאַרְבְּעָה גַפִּין לַחֲדָא וְאַרְבְּעָא גַפִּין לְכָל חַד וְחַד שִׁתָּת עֲסַר לְכָל אַפָּא וְאַפָּא שִׁתִּין וְאַרְבָּעָא גַפִּין לְבִרְיָתָא חֲדָא וַהֲווֹ מִנְיָן גַפַּיָא דְאַרְבַּע בִּרְיָן מָאתָן וְחַמְשִׁין וְשִׁתָּא גַפִּין:",
        "וְרִגְלֵיהוֹן רִגְלִין כֵּיוָנָן וּפַרְסַת רִגְלֵיהוֹן כְּפַרְסַת רִגְלִית סְגַלְגְלָן וּמְזִיעָן עַלְמָא בִּמְהָכְהֵן וּמְנַצְנְצָן כְּעֵין נְחָשׁ מְצַלְהַב:",
        "וִידִין כִּידֵי אֱנָשָׁא עֲבִיד לְהוֹן מִתְּחוֹת גַפֵּיהוֹן עַל אַרְבַּע סִטְרֵיהוֹן לְמֶחְתֵּי בְהֵן גוּמְרִין דְאֵשָׁא מִבֵּינֵי כְרוּבַיָא מִתְּחוֹת רְקִיעָא דְעַל רֵישֵׁיהוֹן לְמִתַּן עַל חוּפְנֵי סַרְפַּיָא לְמִזְרַק עַל אֲתַר רַשִׁיעַיָא לְאַבָּדָא חַיָבַיָא עָבְרֵי מֵימְרֵיהּ וְאַפֵּיהוֹן וְגַפֵּיהוֹן שַׁוֵי לְאַרְבַּעְתְּהֵן:",
        "מְכַוְנָן חֲדָא לִקְבֵיל חֲדָא גַפֵּיהוֹן לָא מִתְחַזְרִין בְּמִיזַלְהֶן בִּרְיָא לִקְבֵיל אַפָּהָא אָזְלַן:",
        "וּדְמוּת אַפֵּיהוֹן אַפֵּי אֱנָשָׁא וְאַפֵּי אַרְיָא עֲבִיד מִימִינָא לְאַרְבַּעְתְּהֵן וְאַפֵּי תוֹרָא עֲבִיד מִסְמָלָא לְאַרְבַּעְתְּהֵן וְאַפֵּי נִשְׁרָא לְאַרְבַּעְתְּהֵן:",
        "וְאַפֵּיהֵן וְגַפֵּיהֵן פְּרִישִׁין מִלְעָלָא לַחֲדָא תַּרְתִּין מְכַוְנָן חֲדָא וְתַרְתֵּין מְכַסָן יַת גְוִיָתְהֵין:",
        "וּבִרְיָא לִקְבֵל אַפָּהָא אַזְלָא לַאֲתַר דְתֶהֱוֵי תַמָן רַעֲוָא לְמֵיזַל אָזְלָל לָא מִתְחַזְרָן בְּמֵיזַלְהֵן:",
        "וּדְמוּת בִּרְיָתָא חֲזְוֵיהֶן כְּגוּמְרִין דְאֶשָׁא בָּעֲרָן כְּחֵזוּ בְעוּרַיָא אֶשְׁתָּא מִשְׁתַּלְהֲבָא בֵּין בִּרְיָתָא וְזֵיהוֹרַיָא לְאֶשְׁתָּא וּמִן אֶשְׁתָּא נָפֵיק בַּרְקָא:",
        "וּבִרְיָתָא בְּאִשְׁתַּלְחוּתְהֵין לְמֶעְבַּד רְעוּת רִבּוֹנְהֵן דְאַשְׁרֵי שְׁכִינְתֵּיהּ בִּמְרוֹמָא עֵלָא מִנְהֵן בַּאֲנָפָא עֵינָא לְמֶחֱזֵי חֶזְרָן וּמַקְפַן וּמְכַסָן יַת עַלְמָא וְתָיְבִין בִּרְיָתָא כַּחֲדָא וְקַלִילָן כְּחֵיזוּ בַרְקָא:",
        "וַחֲזֵית בִּרְיָתָא וְהָא גַלְגַל חַד מִשְׁתְּוֵי בְּמִלְרַע לְרוּם שְׁמַיָא בִּסְטַר בִּרְיָתָא לְאַרְבַּע אַפּוֹהִי:",
        "חֵיזוּ גִלְגְלַיָא וְעוֹבָדֵיהוֹן כְּעֵין אֲבַן טָבָא וּדְמוּת חַד לְאַרְבַּעְתְּהֵן וְחֶזְוֵהֶן וְעוֹבָדֵיהֶן כְּמָא דַהֲוֵי גַלְגַל בְּגוֹ גַלְגָל:",
        "עַל אַרְבְּעָא סִטְרֵיהֶן בְּמִיזַלְהֵן אָזְלִין לָא מִתְחַזְרִין בְּמֵיזַלְהֵן:",
        "וְגַבֵּיהֶן שָׁוָן לְקִיבְלָא רָקִיעָא וְרוּמָא לְהֶן וּדְחִילִין אִנוּן וְגַבֵּיהֶן מְלָן עַיְנִין סְחוֹר סְחוֹר לְאַרְבַּעְתְּהֶן:",
        "וּבְמֵיזַל בִּרְיָתָא אָזְלִין גַלְגְלַיָא לְקִבְלֵיהֶן וּבְאִתְרָמָא בִרְיָתָא בְּמִלְרַע לְרוּם שְׁמַיָא מִתְרְמִין לְגַלְגְלַיָא:",
        "עַל אֲתַר דַהֲוֵי תַמָן רַעֲוָא לְמֵיזַל אָזְלִין לְתַמָן רַעֲוָא לְמֵיזַל וְגַלְגְלַיָא מִתְרְמִין לְקִבְלֵהֶן אֲרֵי כְּרוּחַ בִּרְיָתָא בְּגַלְגְלַיָא:",
        "בְּמֵיזַלְהוֹן אָזְלִין וּבִמְקָמְהוֹן קְיָמִין וּבְאִתְרָמְהוֹן כְּמִלְרַע לְרוּם שְׁמַיָא מִתְרְמִין גַלְגְלַיָא לְקִבְלֵיהוֹן אֲרֵי כְּרוּחַ בִּרְיָתָא בְּגַלְגְלַיָא:",
        "וּדְמוּת עַל רֵישֵׁי בִּרְיָתָא רְקִיעָא כְּעֵין גְלִיד חֲסִין מַרְכֵן עַל רֵישֵׁיהוֹן מִלְעֵלָא:",
        "וּתְחוֹת רְקִיעָא גַפֵּיהוֹן מְכַוְנָן חֲדָא לִקְבֵיל חֲדָא לַחֲדָא תַּרְתֵּין מְכַסִין לְהֵן וְלַחֲדָא תַּרְתֵּין מְכַסִין לְהֵן יַת גְוִיָתְהֵן:",
        "וּשְׁמָעִית יַת קַל גַפֵּיהֶן כְּקַל מַיִין סַגִיאִין כְּקָלָא מִן קֳדָם שַׁדַי בִּמְהָכְהֵן קָל מִלוּלֵיהֶן כַּד מוֹדָן וּמְבָרְכִין יַת רִבּוֹנְהוֹן קַיָמָא מֶלֶךְ עָלְמַיָא כְּקָל מַשִׁרְיָת מַלְאֲכֵי מְרוֹמָא בִּמְקָמְהֶן מְשַׁתְקָן גַפֵּיהֶן מִן קֳדָם דִבּוּרָא:",
        "וּבִזְמַן דַהֲוֵי רַעֲוָא קֳדָמוֹהִי לְאַשְׁמָעָא דִי דִבּוּרָא לְעַבְדוֹהִי נְבִיֵי יִשְׂרָאֵל הֲוֵי קָלָא וּמִשְׁתְּמַע מֵעִלַוֵי רְקִיעָא מִבֵּין כְּרוּבַיָא מִתְּחוֹת רְקִיעָא דִי עַל רֵישֵׁיהוֹן בִּמְקָמְהֵן מְשַׁתְקָן גַפֵּיהֵן מִן קֳדָם דִבּוּרָא:",
        "וּמֵעִלַוֵי רְקִיעָא דִי עַל רֵישֵׁיהוֹן כְּחַזוּ אֲבַן טָבָא דְמוּת כּוּרְסַיָא וְעַל דְמוּת כּוּרְסַיָא דְמוּת כְּחֵיזוּ אֱנָשָׁא עֲלוֹהִי מִלְעֶלָא:",
        "וַחֲזֵית כְּעֵין חַשְׁמָלָא כְּחֵיזוּ אֶשְׁתָּא מִגָיו לָהּ סְחוֹר סְחוֹר חֵיזוּ יְקָר דְלָא יְכִילָא עֵינָא לְמֶחֱזֵי וְלָא אֶפְשַׁר לְאִסְתְּכִּלָא בֵיהּ וּלְעֵלָא חֵיזוּ יְקָר דְלָא יְכִילָא עֵינָא לְמֶחֱזֵי וְלָא אֶפְשַׁר לְאִסְתַכָּלָא בֵיהּ וּלְרַע חֲזֵיתִי כְּחֵיזוּ אֶשְׁתָּא וְזֵיהוֹרָא לֵיהּ סְחוֹר סְחוֹר:",
        "כְּחֵיזוּ קַשְׁתָּא דַהֲוֵי בַעֲנָנָא בְּיוֹמָא דְמִטְרָא כֵּן חֵיזוּ זֵיהוֹרָא סְחוֹר סְחוֹר הוּא חֵיזוּ דְמוּת יְקָרָא דַייָ וַחֲזֵית וְאִשְׁתַּטְחֵית עַל אַפַּי וּשְׁמַעִית קַל דְמִתְמַלֵל:"
      ],
      [
        "וַאֲמַר לִי בַּר אָדָם קוּם עַל רִיגְלָךְ וַאֲמַלֵל עִמָךְ:",
        "וְעַלַת בִּי רוּחָא כַּד מַלֵיל עִמִי וַאֲקַמְתַּנִי עַל רִגְלַי וּשְׁמַעֵית יַת דְמִתְמַלֵל עִמִי:",
        "וַאֲמַר לִי בַּר אָדָם שָׁלַח אֲנָא יָתָךְ לְוַת בְּנֵי יִשְׂרָאֵל לְוַת עַמְמַיָא סַרְבָנַיָא דְסָרִיבוּ עַל מֵימְרִי אִינוּן וַאֲבָהָתְהוֹן מְרָדוּ בְמֵימְרִי עַד כְּרַן יוֹמָא הָדֵים:",
        "וּמִתְקְרַן בְּנַיָא אִינוּן חֲצִיפֵי אַפַּיָא וְתַקִיפֵי לִבָּא אֲנָא שָׁלַח יָתָךְ לְוַתְהוֹן וְתֵימַר לְהוֹן כִּדְנַן אֲמַר יְיָ אֱלֹהִים:",
        "וְאִינוּן אִם יְקַבְּלוּן אוּלְפַן וְאִם יִתְמַנְעוּן מִלְמֶחְטֵי אֲרֵי עַם סַרְבָן אִינוּן וְיֵדְעוּן דִי נְבִיָא הֲוָה בֵינֵיהוֹן:",
        "וְאַתְּ בַּר אָדָם לָא תִדְחַל מִנְהוֹן וּמִפִּתְגְמֵיהוֹן לָא תִדְחַל אֲרֵי מְסָרְבִין וּמַקְשִׁין לְקִבְלָךְ וּבְגוֹ עַמָא דְעוֹבָדֵיהוֹן דָמָן לְעַקְרַבִּין אַתְּ יָתֵיב מִפִּתְגָמֵיהוֹן לָא תִדְחַל וּמִן קֳדָמֵיהוֹן לָא תִתְּבַר אֲרֵי עַם סַרְבָן אִינוּן:",
        "וְתִתְנַבֵּי יַת פִּתְגָמֵי נְבוּאֲתִי לְהוֹן אִם יְקַבְּלוּן אוּלְפָן וְאִם יִתְמַנְעוּן מִלְמֶחְטֵי אֲרֵי עַם סַרְבָן אִינוּן:",
        "וְאַתְּ בַּר אָדָם קַבֵּל יַת דִי אֲנָא מְמַלֵיל עִמָךְ לָא תְהֵי סַרְבָן כְּעַמָא סַרְבָנָא אַרְכִין נַפְשָׁךְ וְקַבֵּיל יַת דִי אֲנָא יָהֵיב לְךְ:",
        "וַחֲזֵית וְהָא דְמוּת יַד מִתּוֹשְׁטָא לְצַד לְוָתִי וְהָא בֵּיהּ מְגִלַת סַפְרָא:",
        "וּפְרַס יָתָהּ קֳדָמַי וְהָא כְתִיבָא מֵאַפָּהָא וּמֵאֲחוֹרָהָא מַה דַהֲוָה מִן שְׁרוּיָא וּמַה דְעָתִיד לְמֶהֱוֵי בְּסוֹפָא וּכְתִיב בָּהּ דְאִם יֶעְבְּרוּן בֵּית יִשְׂרָאֵל עַל אוֹרַיְתָא יִשְׁלְטוּן בְהוֹן עַמְמַיָא וְאִם יַעַבְדוּן יַת אוֹרַיְתָא יְסוּף מִנְהוֹן אִלְיָא וּדְוָנָא וְתֵינַחְתָּא:"
      ],
      [
        "וַאֲמַר לִי בַּר אָדָם יַת דְמִתְיְהִיב לָךְ קַבֵּיל קַבֵּיל מַה דִכְתִיב בִּמְגִלְתָא הָדָא וַאֲזֵיל וְאִתְנַבֵּי עַל בֵּית יִשְׂרָאֵל:",
        "וְאַרְכִינֵית יַת נַפְשִׁי וְאַחְכִּימֵינִי מַה דִכְתִיב בִּמְגִלְתָא הָדָא:",
        "וַאֲמַר לִי בַּר אָדָם נַפְשָׁךְ תִּסְבַּע וּמֵעָךְ תְּמַלֵי אִם תְּקַבֵּיל מַה דִכְתִיב בִּמְגִלְתָא הָדָא דִי אֲנָא יָהֵיב לָךְ וְקַבֵּילְתָּהָא וַהֲווֹ פִּתְגָמָהָא בְּפוּמִי כִּדְבָשׁ חֲלִי:",
        "וַאֲמַר לִי בַּר אָדָם אֱתָא אֲזִיל לְוַת בְּנֵי יִשְׂרָאֵל וְתִתְנַבֵּי בְּפִתְגָמֵי נְבוּאֲתִי לְהוֹן:",
        "אֲרֵי לָא לְוַת עַם עִמְקֵי מְמַלֵל וְיַקִירֵי לִישָׁן אַתְּ שְׁלִיחַ לְאִתְנַבָּאָה אֱלָהֵין לְוַת בֵּית יִשְׂרָאֵל:",
        "לָא לְוַת עַמְמַיָא סַגִיאִין תַּקִיפֵי מַמְלֵל וְיַקִירֵי לִישָׁן דְלָא תִשְׁמַע פִּתְגָמֵיהוֹן אִלּוּ לְוַתְהוֹן שְׁלַחְתָּךְ אִינוּן יְקַבְּלוּן מִנָךְ:",
        "וּבֵית יִשְׂרָאֵל לָא יֵיבוּן לְקַבְּלָא מִנָךְ אֲרֵי לֵית אִינוּן צָבָן לְקַבָּלָא לְמֵימְרִי אֲרֵי כָּל בֵּית יִשְׂרָאֵל חֲצִיפֵי אַפִּין וְתַקִיפֵי לִבָּא אִינוּן:",
        "הָא יַהֲבֵית יַת אַפָּךְ תַּקִיף כִּקְבֵּיל בֵּית אַפֵּיהוֹן וְיַת בֵּית עֵינָךְ חֲסִין כִּקְבֵיל בֵּית עֵינֵיהוֹן:",
        "כְּמָא דְשָׁמִירָא תַּקִיף מִטִינָרָא כֵּן יַהֲבֵית יַת בֵּית עֵינָךְ חֲסִין כִּקְבֵיל בֵּית אַפֵּיהוֹן לָא תִדְחַל מִנְהוֹן וְלָא תִתְבַּר מִן קָדָמֵיהוֹן אֲרֵי עַם סַרְבָן אִינוּן:",
        "וַאֲמַר לִי בַּר אָדָם יַת כָּל פִּתְגָמֵי דַאֲמַלֵיל עִמָךְ קַבֵּיל בְּלִבָּךְ וּבְאוּדְנָךְ שְׁמַע:",
        "וֶאֱתָא אֱזֵיל לְוַת בְּנֵי גָלוּתָא לְוַת בְּנֵי עַמָךְ וְתִתְנַבֵּי לְהוֹן וְתֵימַר לְהוֹן כִּדְנַן אֲמַר יְיָ אֱלֹהִים אִם יְקַבְּלוּן אוּלְפַן וְאִם יִתְמַנְעוּן מִלְמֶחֱטֵי:",
        "וּנְטַלְתַּנִי רוּחָא וְשִׁמְעֵית בַּתְרֵי קַל זִיעַ סַגִי דִמְשַׁבְּחִין וְאָמְרִין בְּרִיךְ יְקָרָא דַייָ מֵאֲתַר בֵּית שְׁכִינְתֵּיהּ:",
        "וְקַל גַפֵּי בִּרְיָתָא נַקְשָׁן חַד לְחַד וְקַל גַלְגְלַיָא לְקִבְלֵהוֹן וְקַל זִיעַ סַגִי:",
        "וְרוּחָא נְטָלַתְנִי וּנְסֵיבְתַּנִי וַאֲזֵלֵית בִּמְרִיר בִּתְקוֹף רוּחִי וּנְבוּאָה מִן קֳדָם יְיָ עֲלַי תַּקִיפַת:",
        "וְאָתֵית לְוַת בְּנֵי גָלוּתָא לְתֵל אָבִיב דְיָתְבִין עַל נְהַר כְּבָר וְנָחֵית בֵּינֵיהוֹן וְאִינוּן יַתְבִין תַּמָן וִיתִיבֵית תַּמָן שַׁבְעָא יוֹמִין שָׁתִיק בֵּינֵיהוֹן:",
        "וַהֲוָה מִסוֹף שַׁבְעָא יוֹמִין וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם מַלֵיף מַנִיתָךְ לְבֵית יִשְׂרָאֵל וּתְקַבֵּיל מִמֵימְרִי פִּתְגַם וְתַזְהֵיר יַתְהוֹן מִלְמֶחֱטֵי קָדָמָי:",
        "כַּד אֲמָרֵית לְרַשִׁיעָא מֵימַת תְּמוּת וְלָא אַזְהַרְתֵּיהּ וְלָא מַלֵילְתָּא לְאַזְהָרָה רַשִׁיעָא מֵאוֹרְחֵיהּ דְרִשְׁעָא לְקַיָמוּתֵהּ הוּא רַשִׁיעָא בְּחוֹבֵיהּ יְמוּת וּדְמֵיהּ מִן יְדָךְ אֶתְּבַע:",
        "וְאַתְּ אֲרֵי אַזְהַרְתָּא רַשִׁיעָא וְלָא תָב מֵחוֹבֵיהּ וּמֵאוֹרְחֵיהּ דְרִשְׁעָא הוּא בְּחוֹבֵיהּ יְמוּת וְאַתְּ יַת נַפְשָׁךְ שֵׁיזַבְתָּא:",
        "וְכַד יְתוּב זַכָּאָה מִזְכוּתֵיהּ וְיַעֲבֵיד שְׁקַר וְאֶתֵּן תַּקְלַת חוֹבִין קֳדָמוֹהִי הוּא יְמוּת אֲרֵי לָא אַזְהַרְתֵּיהּ בְּחוֹבֵיהּ יְמוּת וְלָא אִדַכְּרָן זַכְוָתֵיהּ דַעֲבַד וּדְמֵיהּ מִן יְדָךְ אֶתְּבַע:",
        "וְאַתְּ אֲרֵי אַזְהַרְתְּ לְצַדִיקָא בְּדִיל דְלָא לְמֶחֱטֵי צַדִיקָא וְהוּא לָא חָטֵי מַחֵי יְחֵי אֲרֵי אִזְדָהֵר וְאַתְּ יַת נַפְשָׁךְ שֵׁיזַבְתָּא:",
        "וּשְׁרַת עֲלַי תַּמָן רוּחַ נְבוּאָה מִן קֳדָם יְיָ וַאֲמַר לִי קוּם פּוּק לְבִקְעֲתָא וְתַמָן אֲמַלֵיל עִמָךְ:",
        "וְקָמֵית וּנְפָקֵית לְבִקְעֲתָא וְהָא תַמָן יְקָרָא דַייָ שַׁרְיָא כִּיקָרָא דַחֲזֵיתִי עַל נְהַר כְּבָר וְאִשְׁתַּטְחֵית עַל אַפָּי:",
        "וַעֲלַת בִּי רוּחָא וַאֲקֵימַתְנִי עַל רִגְלָי וּמַלֵיל עִמִי וַאֲמַר עוּל אִטַמַר בְּגוֹ בֵיתָךְ:",
        "וְאַתְּ בַּר אָדָם הָא גְזָרֵית פִּתְגָמֵי פוּמִי עֲלָךְ כֶּאֱסוֹר גְדִילַן דְאָסְרִין בָּהֶן וְלָא תִפּוֹק בֵּינֵיהוֹן:",
        "וְלִישָׁנָךְ אַדְבֵּיק לְחִכֵּךְ וְתִשְׁתּוֹק וְלָא תְהֵי לְהוֹן לִגְבַר מוֹכַח אֲרֵי עַם סַרְבָן אִינוּן:",
        "וּבְמַלְלוּתִי עִמָךְ אַרְכִין יַת נַפְשָׁךְ וְתֵימַר לְהוֹן כִּדְנַן אֲמַר יְיָ אֱלֹהִים דִמְקַבֵּיל יְקַבֵּיל אוּלְפַן וְדִי יִתְמְנַע יִתְמְנַע מִלְמֶחֱטֵי אֲרֵי עַם סַרְבָן אִינוּן:"
      ],
      [
        "וְאַתְּ בַּר אָדָם סַב לָךְ אַבְנָא וְתִתֵּן יָתָהּ קָדָמָךְ וּתְצוֹר עֲלָהּ קַרְתָּא יַת יְרוּשְׁלֵם:",
        "וְתִתֵּן עֲלָהּ צְיָר וְתִבְנֵי עֲלָהּ מִלְיָתָא וְתִשְׁרֵי עֲלָהּ מַשִׁרְיָן וּמַנֵי עֲלָהּ אֶפְדוֹרְוָן סְחוֹר סְחוֹר:",
        "וְאַתְּ סַב לָךְ מַסְרֵית בַּרְזֵל וְתִתֵּן יָתָהּ כּוֹתֶל בַּרְזֶל בֵּינָךְ וּבֵין קַרְתָּא וְתַתְקֵן יַת אַפָךְ לָהּ וּתְהֵי בְצַיְרָא וּתְצוּר עֲלָהּ אָת הִיא לְבֵית יִשְׂרָאֵל:",
        "וְאַתְּ שְׁכוּב עַל סִטְרָךְ דִסְמָלָא וּתְשַׁוֵי יַת חוֹבֵי בֵית יִשְׂרָאֵל עֲלוֹהִי מִנְיַן יוֹמַיָא דְתִשְׁכּוֹב עֲלוֹהִי תְּקַבֵּל יַת חוֹבֵיהוֹן:",
        "וַאֲנָא יְהָבִית לָךְ עַל חַד תְּרֵין בְּחוֹבֵיהוֹן לְמִנְיַן יוֹמַיָא תְּלַת מְאָה וְתִשְׁעִין יוֹמִין וּתְקַבֵּיל חוֹבֵי בֵית יִשְׂרָאֵל:",
        "וְתַשְׁלִים יַת אִלֵין וְתִשְׁכּוֹב עַל סִטְרָךְ דִיְמִינָא תִּנְיָנוּת וּתְקַבֵּיל יַת חוֹבֵי בֵית יְהוּדָה אַרְבְּעִין יוֹמִין יוֹמָא לְשַׁתָּא יוֹמָא לְשַׁתָּא יְהַבְתִּינוּן לָךְ:",
        "וְלִצְיָר יְרוּשְׁלֵם תְּתַקֵין אַפָּךְ וְדַרְעָךְ תַּתְקֵיף וְתִתְנַבֵּי עֲלָהּ:",
        "וְהָא גְזָרֵית פִּתְגָמֵי עֲלָךְ כֶּאֱסוּר גְדִילָן וְלָא תִתְהַפֵּיךְ מִסִטְרָךְ לְסִטְרָךְ עַד אַשְׁלְמוּתָךְ יוֹמֵי צַיְרָךְ:",
        "וְאַתְּ סַב לָךְ חִטִין וּסְעוֹרִין וּפוֹלָא וּטְלוֹפְחִין וְדוֹחָן וְכוּנְתִּין וְתִתֵּן יַתְהוֹן לָךְ לְמֵיכַל מִנְיַן יוֹמַיָא דְאַתְּ שְׁכִיב עַל סִטְרָךְ תְּלַת מְאָה וְתִשְׁעִין יוֹמִין תֵּיכְלִינֵיהּ:",
        "וּמֵיכְלָךְ דְתֵיכְלִינֵיהּ בְמַתְקַל עַסְרִין פִּילֵס לְיוֹם מֵעִדַן עַד עִדָן תֵּיכְלִינֵיהּ:",
        "וּמַיָא בִּמְכִילָא תִשְׁתֵּי חַד מִן שַׁתָּא בְּהִינָא מֵעִדַן עַד עִדַן תִּשְׁתֵּי:",
        "וַחֲרָרָא דִלְחַם שְׂעוֹרִין תֵּיכְלִינָהּ וְהִיא עַל גְלֵי מַפְקַת אֱנָשָׁא תַּחְרְרִינָה לְעֵינֵיהוֹן:",
        "וַאֲמַר יְיָ כְּדֵין יֵיכְלוּן בְּנֵי יִשְׂרָאֵל יַת מֵיכַלְהוֹן מְסָאַב בֵּינֵי עַמְמַיָא דְאַגְלִינוּן לְתַמָן:",
        "וַאֲמָרֵית קַבֵּיל בָּעוּתִי יְיָ אֱלֹהִים הָא נַפְשִׁי לָא מְסָאֲבָא וּנְבֵילָא וּתְבִירָא לָא אֲכָלֵית מִזְעוּרֵי וְעַד כְּעַן וְלָא אֲכָלֵית בְּסַר מְרָחָק:",
        "וַאֲמַר לִי חֲזֵי דִיהָבֵית לָךְ יַת גְלֵי תוֹרַיָא חֲלַף גְלֵי אֱנָשָׁא וְתַעֲבֵיד יַת מֵיכְלָךְ עֲלֵיהוֹן:",
        "וַאֲמַר לִי בַּר אָדָם הָא אֲנָא תָבֵר סְעִיד מֵיכְלָא בִּירוּשְׁלֵם וְיֵכְלוּן לַחְמָא בְּמַתְקַל וּבְיִצְפָּא וּמַיָא בְּצָדוּ וּבְאִשְׁתְּמָמוּ יִשְׁתּוּן:",
        "בְּדִיל דְיַחְסַר לְהוֹן מֵיכַל וּמִשְׁתִּי וְיִצְדוֹן גְבַר וַאֲחוּהִי וְיִתְמְסוּן בְּחוֹבֵיהוֹן:"
      ],
      [
        "וְאַתְּ בַּר אָדָם סַב לָךְ חַרְבָּא חֲרִיפָא מַסְפַּר גַלְבַיָא תִּסַב לָךְ וְתַעְבֵּד עַל רֵישֵׁךְ וְעַל דִקְנָךְ וְתִסֵב לָךְ מוֹזְנָיָן דְמַתְקַל וְתַפְלְגִינוּן:",
        "תִּלְתָּא בְּנוּרָא תַדְלֵיק בְּגוֹ קַרְתָּא כְּמִשְׁלַם יְמֵי צַיְרָא וְתִסַב יַת תִּלְתָּא תִּקְטֵיל בְּחַרְבָּא סָחֲרָנָהָא וְתִלְתָּא יִתְבַּדְרוּן וּדְקַטְלִין בְּחַרְבָּא אֱגָרֵי בַּתְרֵיהוֹן:",
        "וְתִסֵב מִתַּמָן זְעֵיר בְּמִנְיַן וּתְצוּר יַתְהוֹן בִכְנָפָךְ:",
        "וּמִנְהוֹן עוֹד תִּסַב וְתַרְמֵי יַתְהוֹן לְגוֹ נוּרָא וְתוֹקִיד יַתְהוֹן בְּנוּרָא בְּכֵן תִּפּוֹק אֶשְׁתָּא עַל כָּל בֵּית יִשְׂרָאֵל:",
        "כִּדְנַן אֲמַר יְיָ אֱלֹהִים דָא יְרוּשְׁלֵם בְּגוֹ עַמְמַיָא שַׁוִיתָהָא וּסְחוֹר סְחוֹר לָהּ מְדִינָתָא:",
        "וְאַשְׁנִיאַת יַת דִינִי לִמְחַבְּבֵיהוֹן מִן עַמְמַיָא וְיַת קְיָמִי מִן מְדִינָתָא דִי בְּסֶחֱרָנָהָא אֲרֵי בְּדִינַי קָצוּ וּקְיָמַי לָא הֲלִיכוּ בְהוֹן:",
        "בְּכֵן כִּדְנַן אֲמַר יְיָ אֱלֹהִים חֲלַף דְחַבְתּוּן מִן עַמְמַיָא דִי בְסַחֲרָנֵיכוֹן בִּקְיָמַי לָא הֲלֵכְתּוּן וְיַת דִינַי לָא עֲבַדְתּוּן וּכְנִימוּסֵי עַמְמַיָא דִי בְסַחְרָנֵיכוֹן לָא עֲבַדְתּוּן:",
        "בְּכֵן כִּדְנַן אֲמַר יְיָ אֱלֹהִים הָא אֲנָא שָׁלַח רוּגְזִי עֲלָךְ אַף אֲנָא וְאַעֲבֵּיד בְּגַוִיךְ פּוּרְעֲנוּת דִינִין לְעֵינֵי עַמְמַיָא:",
        "וְאַעְבֵּיד בִּיךְ יַת דְלָא עֲבַדֵית וְיַת דְלָא אַעְבֵּיד דִכְוָתֵיהּ עוֹד חֲלַף כָּל תּוֹעֲבָתָיִךְ:",
        "בְּכֵן אֲבָהָן יֵיכְלוּן בְּסַר בְּנֵיהוֹן בְּגַוִיךְ וּבְנַיָא יֵיכְלוּן בְּסַר אֲבָהָתְהוֹן וְאַעְבֵּיד בִּיךְ פּוּרְעֲנוּת דִינִין וַאֲבַדַר יַת כָּל שְׁאָר עַמִיךְ לְכָל רוּחַ:",
        "בְּכֵן קַיָים אֲנָא אֲמַר יְיָ אֱלֹהִים אִם לָא חֲלַף דְמָקְדְשֵׁי סָאֵבְתְּ בְּכָל שִׁקוּצָיִךְ וּבְכָל תּוֹעֲבָתָיִךְ וְאַף אֲנָא אֶקְטוֹף תְּקוֹף דַרְעִיךְ וְלָא יָחוּס מֵימְרִי וְאַף אֲנָא לָא אֲרַחֵם:",
        "תִּלְתִּיךְ בְּמוֹתָא יְמוּתוּן וּבְכַפְנָא יִשְׁתֵּיצוּן בְּגַוִיךְ וְתִלְתָּא בְּחַרְבָּא יִתְקַטְלוּן סַחֲרָנַיִךְ וְתִלְתָּא לְכָל רוּחַ אֲבַדַר וּדְקָטְלִין בְּחַרְבָּא אֱגָרֵי בַּתְרֵיהוֹן:",
        "וְיָחוּל רוּגְזִי וַאֲנִיחַ חֵימְתִי בְהוֹן וַאֲסִיף וְיֵדְעוּן אֲרֵי אֲנָא יְיָ גְזַרֵית בְּמֵימְרִי וַאֲקַיֵים כַּד יָחוּל רוּגְזִי בְּהוֹן:",
        "וְאֶתְּנִנָךְ לְחַרְבָּא וּלְחִסוּדִין בֵּינֵי עַמְמַיָא דִי בְסַחְרָנָךְ לְעֵינֵי כָּל דְעָדֵי:",
        "וּתְהֵין לְחִסוּדִין וּלְאִתְרַבְרְבָא עֲלָךְ צָדוּ וְאִשְׁתְּמָמוּ לְעַמְמַיָא דִבְסָחֳרָנִיךְ כַּד אַעְבֵיד בִּיךְ פּוּרְעֲנוּת דִינִין בִּרְגַז וּבְחֵמָה וּבִתְקוֹף רְגַז אֲנָא יְיָ גְזַרֵית בְּמֵימְרִי:",
        "בְּגָרָיוּתִי יַת מְחַת כַּפְנָא מַכְתָּשִׁין בִּישִׁין דִמְתַקְנִין לְחַבָּלָא דַאֲשַׁלַח יַתְהוֹן לְחַבָּלוּתְכוֹן וְכַפְנָא אוֹסִיף עֲלֵיכוֹן וְאִתְבַּר לְכוֹן סְעַד מֵיכְלָא:",
        "וַאֲשַׁלַח עֲלֵיכוֹן כַּפְנָא וְחַיְתָא בִישְׁתָּא וְיִתְכְּלוּנַיִךְ וּמוֹתָא וּקְטָלָא יַעְדוּן בִּיךְ וּדְקָטְלִין בְּחַרְבָּא אַיְתֵי עֲלָךְ אֲנָא יְיָ גְזָרֵית בְּמֵימְרִי:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם קַבֵּל נְבוּאָה עַל טוּרֵי יִשְׂרָאֵל וְאִתְנַבֵּי עֲלֵיהוֹן:",
        "וְתֵימַר טוּרֵי יִשְׂרָאֵל קַבִּילוּ פִתְגָמָא דַייָ אֱלֹהִים כִּדְנַן אֲמַר יְיָ אֱלֹהִים לְטוּרַיָא וּלְרָמָתָא וּלְפַצִידַיָא וּלְחֵילַיָא הָא אֲנָא מַיְתֵי עֲלֵיכוֹן דְקַטְלִין בְּחַרְבָּא וְאוֹבִיד בָּמָתֵיכוֹן:",
        "וְיִצְדוּן אֱגוֹרֵיכוֹן וְיִתְבְּרוּן חֲנִיסְנְסֵיכוֹן וְאַרְמִי קְטִילֵיכוֹן קֳדָם פִּגוּר טַעֲוַתְכוֹן:",
        "וְאֶתֵּן יַת פִּגְרֵי בְּנֵי יִשְׂרָאֵל קֳדָם פִּגּוּר טַעֲוַתְהוֹן וַאֲבַדֵר יַת גַרְמֵיכוֹן סִחְרָנוּת אֱגוֹרֵיכוֹן:",
        "בְּכֵל מוֹתְבָנֵיכוֹן קִרְוַיָא יֶחֱרְבָן וּבְמָתָא יִצְדְיָן בְּדִיל דְיֶחֱרְבוּן וְיִצְדוּן אֱגוֹרֵיכוֹן וְיִתְבְּרָן וְיִבְטְלָן טַעֲוַתְכוֹן וְיִתְקַטְפוּן חֲנִסְנְסֵיכוֹן וְיִתְמְחוּן עוֹבָדֵיכוֹן:",
        "וְיִתְרְמוּן קְטִילִין בֵּינֵיכוֹן וְתֵדְעוּן אֲרֵי אֲנָא יְיָ:",
        "וְאַשְׁאַר בְּמֶהֱוֵי לְכוֹן מְשֵׁזְבֵי חַרְבָּא בֵּינֵי עַמְמַיָא בְּאִתְבַּדָרוּתֵיכוֹן בִּמְדִינָתָא:",
        "וְיִדְכְּרוּן מְשֵׁיזְבֵיכוֹן דְחַלְתִּי בֵּינֵי עַמְמַיָא דְאִשְׁתְּבִיאוּ לְתַמָן דִתְבַרֵית יַת לִבְּהוֹן טִפְּשָׁא דִסְטָא מִבָּתַר פּוּלְחָנִי וְיַת חֵיזוּ עֵינֵיהוֹן דִטְעָא בָּתַר טַעֲוַתְהוֹן וְיִדַנְקוּן וִיהוֹן חָזַן עַל בִּישְׁתָּא דַעֲבַדוּ לְכָל תּוֹעֲבַתְהוֹן:",
        "וְיֵדְעוּן אֲרֵי אֲנָא יְיָ לָא לְמַגָן גְזֵרֵית בְּמֵימְרִי לְמֶעְבַּד לְהוֹן בִּישְׁתָּא הָדָא:",
        "כִּדְנַן אֲמַר יְיָ אֱלֹהִים טְפַּח בִּידָךְ וּרְפוֹס בְּרַגְלָךְ וַאֲמַר וַי עַל כָּל תּוֹעֲבָתָא בִּישְׁתָא בֵּית יִשְׂרָאֵל דִי בְּחַרְבָּא בְּכַפְנָא וּבְמוֹתָא יִתְרְמוּן:",
        "דְרָחִיק בְּמוֹתָא יְמוּת וּדְקָרִיב בְּחַרְבָּא יִתְקְטֵיל וּדְיִשְׁתְּאַר וּדְיֵעוֹל לִכְרַכֵּי צַיְרָא בְּכַפְנָא יְמוּת וְיָחוּל רוּגְזִי בְּהוֹן:",
        "וְתִדְעוּן אֲרֵי אֲנָא יְיָ בְּמֶהֱוֵי קְטִילֵיהוֹן בְּגוֹ פִּגוּר טַעֲוַתְהוֹן סַחֲרָנוּת אִגוֹרֵיהוֹן עַל כָּל רָמָא מְנַטְלָא בְּכָל רֵישֵׁי טוּרַיָא תְּחוֹת כָּל אִילָן עַבּוּף וּתְחוֹת כָּל בּוּטְמָא מְעַפְיָא אֲתַר דִיהַבוּ תַמָן קוּרְבָּנִין לְפוּלְחַן לְכָל טַעֲוַתְהוֹן:",
        "וְאָרִים יַת מְחַת גְבוּרְתִּי עֲלֵיהוֹן וְאֶתֵּן יַת אַרְעָא לְצָדוּ וְאִשְׁתְּמָמוּ מִמִדְבַּר דִבְלָת בְּכָל מוֹתְבָנֵיהוֹן וְיֵדְעוּן אֲרֵי אֲנָא יְיָ:"
      ],
      [
        "וַהֲוָה פִּתְגָם נְבוּאָה מִן קֳדָם יְיָ עִמִי לְמֵימָר:",
        "וְאַתְּ בַּר אָדָם כִּדְנַן אֲמַר יְיָ אֱלֹהִים לְאַרְעָא דְיִשְׂרָאֵל קִצָא מְטָא מְטַת פּוּרְעֲנוּת קִצָא לְמֵיתֵי עַל אַרְבַּע רוּחֵי אַרְעָא:",
        "כְּעַן מְטַת פּוּרְעֲנוּת קִצָא לְמֵיתֵי עֲלָךְ וְאֶשְׁלַח רוּגְזִי בִּיךְ וְאִתְפְּרַע מִנִיךְ כְּאוֹרְחָתַיִךְ וְאֶתֵּן עֲלָךְ יַת כָּל תּוֹעֲבָתָיִךְ:",
        "וְלָא יְחוּס מֵימְרִי עֲלָךְ וְלָא אֶרְחַם אֲרֵי חוֹב אוֹרְחָתָיִךְ עֲלָךְ אֶתֵּן וּפוּרְעֲנוּת תּוֹעֲבָתַיִךְ בְּגַוִיךְ יֶהֶוְיָן וְתֵידְעוּן אֲרֵי אֲנָא יְיָ:",
        "כִּדְנַן אֲמַר יְיָ אֱלֹהִים בִּישְׁתָא בָּתַר בִּישְׁתָא הָא אַתְיָא:",
        "קִצָא מְטָא מְטַת פּוּרְעֲנוּת קִיצָא לְמֵיתֵי עֲלַךְ הָא אַתְיָא:",
        "אִתְגְלִיאַת מַלְכוּתָא עֲלָךְ יָתֵיב אַרְעָא מְטָא עִדַן תְּבִירַת קָרֵיב יוֹם אִתְרְגוּשָׁא וְלֵית לְאִשְׁתֵּיזָבָא בִּמְצָדֵי טוּרַיָא:",
        "כְּעַן מִקָרֵיב אֶשְׁפּוֹךְ חֵימְתִי עֲלָךְ וְיֵחוֹל רוּגְזִי בִּיךְ וְאִתְפְּרַע מִנִיךְ כְּאוֹרְחָתָיִךְ וְאֶתֵּן עֲלָךְ יַת כָּל תּוֹעֲבָתָיִךְ:",
        "וְלָא תְחוֹס מֵימְרִי וְלָא אֶרְחִים כְּחוֹבֵי אוֹרְחָתַיִךְ עֲלָךְ אֶתֵּן וּפוּרְעֲנוּת תּוֹעֲבָתַיִךְ בְּגַוִיךְ יֶהֱוְיָן וְתִדְעוּן אֲרֵי אֲנָא יְיָ אַיְתֵיתִי עֲלֵיכוֹן מְחָא:",
        "הָא יוֹם פּוּרְעֲנוּתָא מְטָא הָא אַתְיָא אִתְגְלִיאַת מַלְכוּתָא צְמַח שׁוּלְטָנָא הוֹפַע רַשִׁיעָא:",
        "חֲטוֹפִין קָמוּ לְמִסְעַר רַשִׁיעִין לָא מִנְהוֹן וְלָא מְאִתְרְגוּשְׁתְּהוֹן וְלָא מִבְּנֵיהוֹן וְלָא מִבְּנֵי בְּנֵיהוֹן:",
        "מְטָא עִדָן תּוּשְׁלְמַת חוֹבִין קָרִיב יוֹם פּוּרְעֲנוּת חֶטְאִין זָבְנָא לָא יֶחֱדֵי וּמְזוֹבְנָא לָא יִדְוֵי אֲרֵי רְגַז מִן קֳדָמַי עַל כָּל אִתְרְגוּשַׁתְהוֹן:",
        "אֲרֵי מְזוֹבְנָא לִזְבִינָא לָא יְתוּב וְעַד דְאִינוּן חַיָן יִרְדִינוּן בִּגְוִיָתְהוֹן אֲרֵי נְבִיַיָא מִתְנַבָּן עַל כָּל אִתְרְגוּשַׁתְהוֹן לְמֵיתַב בִּתְיוּבְתָּא וְלָא תָיְבִין גְבַר בְּחוֹבֵי נַפְשֵׁיהּ מִתְרְעָן וְעַד דְאִינוּן קַיָמִין בִּתְיוּבְתָּא לָא מִתַּקְפִין:",
        "נַפְקִין בְּאַצְוָחַת קַרְנָא מִתַקְנִין בְּמָנֵי זְיָנָא וְלֵית דְאָזִיל לִקְרָבָא אֲרֵי רְגַז מִן קֳדָמַי עַל כָּל אִתְרְגוּשַׁתְהוֹן:",
        "חַרְבָּא מִלְבָרָא וּמוֹתָא וְכַפְנָא מִלְגָיו דִבְחַקְלָא בְּחַרְבָּא יִתְקְטֵיל וְדִי בְקַרְתָּא כַּפְנָא וּמוֹתָא יְשֵׁיצִינֵיהּ:",
        "וּמְשֵׁיזְבַיָא יִשְׁתֵּיזְבוּן מִנְהוֹן וִיהוֹן עַל טוּרַיָא כְּיוֹנֵי חֵילַיָא כּוּלְהוֹן מְנַהֲמִין גְבַר בְּחוּבֵי נַפְשֵׁיהּ:",
        "כָּל יְדַיָא יִתְרַשְׁלָן וְכָל רְכִיבַיָא יִתְאַשְׁדָן מַיָא:",
        "וְיֵסְרוּן סַקִין וְתַחְפֵי יַתְהוֹן אִתְכְּנָעוּתָא וְעַל כָּל אַפֵּיהוֹן בַּהֲתָא וּבְכָל רֵישֵׁיהוֹן מְרַט:",
        "כַּסְפֵּהוֹן בְּשׁוּקִין יִרְמוֹן וּדְהַבְהוֹן לְבוּסְרָן יְהֵי כַּסְפֵּיהוֹן וּדְהַבְהוֹן לָא יִכּוּל לְשֵׁיזָבוּתְהוֹן בְּיוֹם רוּגְזָא דַייָ נַפְשֵׁיהוֹן לָא יִסְבְּעוּן וּמֵעֵיהוֹן לָא יִמְלוּן אֲרֵי לְתַקְלַת חוֹבִין יְהֵי:",
        "וְחֶדְוַת תִּקוּנֵיהּ לִיקַר יְהַבְתֵּיהּ וְאִינוּן צַלְמֵי תוֹעֲבַתְהוֹן שִׁקוּצֵיהוֹן עֲבַדוּ בֵיהּ עַל כֵּן יְהַבְתֵּיהּ לְהוֹן לְבוּסְרָן:",
        "וְאֶמְסְרִנֵיהּ בְּיַד רַשִׁיעִין לְמִבַז וּלְחַיָבֵי אַרְעָא לַעֲדִי וְיַחֲלוּנֵיהּ:",
        "וַאֲסַלֵיק שְׁכִינְתִּי מִנְהוֹן עַל דְאָחִילוּ יַת אַרְעָא בֵּית שְׁכִינְתִּי וְיַעֲלוּן בָּהּ רַשִׁיעִין וְיַחֲלוּנָהּ:",
        "עֲבֵיד שִׁלְשְׁלָן אֲרֵי אַרְעָא אִתְמְלִיאַת חַיָבֵי קְטוֹל וְקַרְתָּא אִתְמְלִיאַת חֲטוֹפִין:",
        "וְאַיְתֵי מַבְאִשֵׁי עַמְמַיָא וְיַחְסְנוּן יַת בָּתֵּיהוֹן וַאֲבַטֵיל רְבוּת רַשִׁיעִין וְיִתָּחֲלוּן מִקְדָשֵׁיהוֹן:",
        "אִתְקְפָדַת מְטַת וְיִבְעוֹן שְׁלָמָא וְלֵית:",
        "תְּבַר עַל תְּבַר יֵיתִי וּכְסוֹרְתָּא עַל בְּסוֹרְתָּא תְּהֵי וְיִבְעוּן אוּלְפַן מִסָפֵר וְאוֹרָאָה תִּפְסוֹק מִכָּהֵן וּמְלַךְ מְחַכִּים:",
        "מַלְכָּא יִתְאַבַּל וְרַבָּא יִלְבַּשׁ צָדוּ וִידֵי עַמָא דְאַרְעָא יִתְבַּהֲלָן מֵאָרְחֵיהוֹן אַעְבֵיד עִמְהוֹן וּבְנִימוּסֵיהוֹן אִתְפְּרַע מִנְהוֹן וְיֵדְעוּן אֲרֵי אֲנָא יְיָ:"
      ],
      [
        "וַהֲוָה בְּשַׁתָּא שְׁתִיתֵי בִּשְׁתִיתָאָה בְּחַמְשָׁא לְיַרְחָא אֲמַר נְבִיָא אֲנָא יָתֵיב בְּבֵיתִי וְסָבֵי בֵּית יְהוּדָה יָתְבִין קֳדָמַי וּשְׁרַת עֲלַי תַּמָן רוּחַ נְבוּאָה מִן קֳדָם יְיָ אֱלֹהִים:",
        "וַחֲזֵית וְהָא דְמוּת כְּחֵיזוּ אֶשְׁתָּא חֵיזוּ יְקַר דְלָא יָכְלָא עֵינָא לְמֶחֱזֵי וְלֵית אֶפְשַׁר לְאִסְתַּכָּלָא בֵּיהּ וּלְרַע חֵיזוּ אֶשְׁתָּא וְחֵיזוּ יְקָר דְלָא יָכְלָא עֵינָא לְמֶחֱזֵי וְלָא אֶפְשַׁר לְאִסְתַּכָּלָא בֵּיהּ וּלְעֵילָא כְּחֵיזוּ זָהֳרָא כְּעֵין חַשְׁמַל:",
        "וְאוֹשִׁיט דְמוּת יַד וְאַחֲדַנִי בִּסְעַר רֵישִׁי וּנְטָלַת יָתִי רוּחָא בֵּין אַרְעָא וּבֵין שְׁמַיָא וְאָעֲלַת יָתִי לִירוּשְׁלֵם בְּחֵיזוּ נְבוּאָה דִשְׁרַת עֲלֵי מִן קֳדָם יְיָ בְּמַעֲלָנָא דְתַרְעָא גַוָאָה דִפְתִיחַ לְצִפּוּנָא דְתַמָן מוֹתַב צְלַם קִנְאֲתָא דְמַרְגְזִין:",
        "וְהָא תַמָן יְקַר אֱלָהָא דְיִשְׂרָאֵל כְּחֵיזְוָא דַחֲזֵיתִי בְּבִקְעֲתָא:",
        "וַאֲמַר לִי בַּר אָדָם זְקוֹף כְּעַן עֵינָךְ לְאוֹרַח צִפּוּנָא וּזְקָפֵית עֵינַי לְאוֹרַח צִפּוּנָא וְהָא מִצִפּוּנָא לִתְרַע מַדְבְּחָא צְלַם קִנְאָתָא הָדֵין בְּמַעֲלָנָא:",
        "וַאֲמַר לִי בַּר אָדָם חֲזֵי אַתְּ מַה דְאִינוּן עָבְדִין תּוֹעֵיבָן רַבְרְבָן דְבֵית יִשְׂרָאֵל עָבְדִין בָּא לְאִתְרַחֲקָא מֵעַל מַקְדְשִׁי וְעוֹד תְּתוּב תֶּחֱזֵי תוֹעֵיבָן רַבְרְבָן:",
        "וְאָעֵיל יָתִי לִתְרַע דָרָתָא וַחֲזֵית וְהָא חוֹרָא חַד בְּכוֹתְלָא:",
        "וַאֲמַר לִי בַּר אָדָם חֲתוֹר כְּעַן בְּכוֹתָלָא וַחֲתָרֵית בְּכוֹתְלָא וְהָא תַּרְעָא חָד:",
        "וַאֲמַר לִי עוּל וַחֲזֵי יַת תּוֹעֲבָתָא בִישָׁתָא דְאִינוּן עָבְדִין בָּא:",
        "וַעֲלֵית וַחֲזֵית וְהָא כָל דְמוּת רְחִישׁ וּבְעִירָא שִׁקוּצִין וְכָל טַעֲוָתָא דְפָּלְחִין לְהוֹן בֵּית יִשְׂרָאֵל מְצַיְרִין עַל כִּתְלָא סְחוֹר סְחוֹר:",
        "וְשַׁבְעִין גַבְרָא מִסָבֵי בֵית יִשְׂרָאֵל וְיַאֲזַנְיָה בַּר שָׁפָן קָאֵם בֵּינֵיהוֹן קַיְמִין קֳדָמֵיהוֹן וּגְבַר מַחְתְּיָתֵיהּ דִקְטַרְתָּא בִּידֵיהּ וִיטוּר עֲנַן קְטַרְתָּא סְלִיק:",
        "וַאֲמַר לִי הַחֲזֵיתָא בַּר אָדָם דְסָבֵי בֵית יִשְׂרָאֵל עָבְדִין בְּקִבְלָא גְבַר בְּאִידְרוֹן בֵּית מִשְׁכְּבֵיהּ אֲרֵי אָמְרִין לָא גְלַן עוֹבָדָנָא קֳדָם יְיָ רָחִיק יְיָ יַת אַרְעָא:",
        "וַאֲמַר לִי עוֹד תְּתוּב תֶּחֱזַי תּוֹעֵיבָן רַבְרְבָן דְאִינוּן עָבְדִין:",
        "וְאָעֵיל יָתִי בְּמַעֲלָנָא דִתְרַע בֵּית מַקְדָשָׁא דַייָ דִפְּתִיחַ לְצִפּוּנָא וְהָא תַמָן נְשַׁיָא יָתְבָן מְבַכָּן יַת תִּמוּזָא:",
        "וַאֲמַר לִי הַחֲזֵיתָא בַר אָדָם עוֹד תְּתוּב תֶּחֱזֵי תּוֹעֵיבָן רַבְרְבָן מֵאִלֵין:",
        "וְאָעֵיל יָתִי לְדָרַת בֵּית מַקְדְשָׁא דַייָ גְוִיָתָא וְהָא תְרַע הֵיכְלָא דַייָ בֵּין אוּלָמָא וּבֵין מַדְבְּחָא כְּעַשְׂרִין וְחַמְשָׁא גַבְרָא אֲחוֹרֵיהוֹן לְהֵיכְלָא דַייָ וְאַפֵּיהוֹן לְמַדִינְחָא וְהָא אִינוּן מִתְחַבְּלִין וְסָגְדִין לְמַדִינְחָא לְשִׁמְשָׁא:",
        "וַאֲמַר לִי הָא חֲזֵיתָא בַּר אָדָם הַזְעֵיר לְבֵית יְהוּדָה מִלְמֶעֱבַּד יַת תּוֹעֶבְתָּא דַעֲבָדוּ כָא אֲרֵי מְלוֹ יַת אַרְעָא חֲטוּפִין וְתָבוּ לְאַרְגָזָא קֳדָמַי וְהָא אִינוּן מַיְתָן בַּהֲתָא לְאַפֵּיהוֹן:",
        "וְאַף אֲנָא אַעְבֵּיד בִּרְגַז לָא יָחוּס מֵימְרִי וְלָא אֶרְחַם וִיצַלוּן קֳדָמַי בְּקַל רָב וְלָא אֲקַבֵּל צְלוֹתְהוֹן:"
      ],
      [
        "וְאִכְלֵי וַאֲנָא שְׁמַע קַל רַב לְמֵימָר אִתְקְרָבוּ דִמְמַנָן עַל קַרְתָּא וּגְבַר מָן חִבּוּלֵיהּ בִּידֵיהּ:",
        "וְהָא שִׁתָּא גַבְרִין אָתָן מֵאוֹרַח תַּרְעָא עִלָאָה דִפְתִיחַ לְצִפּוּנָא וּגְבַר מִן כִּידוּרֵיהּ בִּידֵיהּ וְגַבְרָא חָד בֵּינֵיהוֹן לָבֵישׁ לְבוּשִׁין וּפִנְקֵס סַפְרָא בְּחַרְצֵיהּ וַעֲלוּ וְקָמוּ בִּסְטַר מַדְבְּחָא דִנְחָשָׁא:",
        "וִיקָר אֱלָהָא דְיִשְׂרָאֵל אִסְתַּלָק בִּכְרוּבָא דַהֲוָה שָׁרֵי עֲלוֹהִי בֵּית קוֹדֶשׁ קוּדְשַׁיָא וּשְׁרָא מֵעֵיל לָקֳבֵיל סְקוּפַת בֵּיתָא וּקְרָא לְגַבְרָא דְלָבִישׁ לְבוּשַׁיָא דְפִנְקֵס סַפְרָא בְּחַרְצֵיהּ:",
        "וַאֲמַר יְיָ לֵיהּ עֲבַר בְּגוֹ קַרְתָּא בְּגוֹ יְרוּשְׁלֵם וְתִרְשׁוֹם תְּוָא עַל בֵּית עֵינֵי גַבְרַיָא דִמְאַנְחִין וְדִמְאַנְקִין עַל כָּל תּוֹעֶבְתָּא דְאִתְעֲבִידָא בְּגַוָהּ:",
        "וּלְאִילֵן אֲמַר וַאֲנָא שָׁמַע עֲבָרוּ בְּקַרְתָּא בַּתְרוֹהִי וּקְטוּלוּ לָא תֶחוּס עֵינֵיכוֹן וְלָא תְרַחֲמוּן:",
        "סָב עוּלֵם וּבְתוּלָה טַפְלָא וּנְשַׁיָא תִּקְטְלוּן לְחַבָּלָא וְעַל כָּל גַבְרָא דַעֲלוֹהִי רוּשָׁם תְּוָא לָא תִקְרְבוּן וּמִבֵּית מַקְדְשִׁי תִּשְׁרוּן וּשְׁרִיאוּ בְּגַבְרַיָא סָבַיָא דְקָדָם בֵּיתָא:",
        "וַאֲמַר לְהוֹן סָאִיבוּ יַת בֵּיתָא וּמְלוֹ יַת דָרָתָא קְטִילִין פּוּקוּ וּנְפַקוּ וּקְטַלוּ בְקַרְתָּא:",
        "וַהֲוָה כְּקַטָלוּתְהוֹן וְאִשְׁתְּאַרֵית אֲנָא וְאִשְׁתַּטְחֵית עַל אַפֵּי וּצְוַחֵית וַאֲמַרֵית קַבֵּיל בָּעוּתִי יְיָ אֱלֹהִים הַמְחַבֵּל אַתְּ יַת כָּל שְׁאָרָא דְיִשְׂרָאֵל בְּמִשְׁפְּכָךְ יַת חֵימְתָךְ עַל יְרוּשְׁלֵם:",
        "וַאֲמַר לִי חוֹבֵי בֵּית יִשְׂרָאֵל וִיהוּדָה תַּקִיפוּ בָּהּ לַחֲדָא אִתְמְלִיאַת אַרְעָא חַיָיבֵי קְטוֹל וְקַרְתָּא אִתְמְלִיאַת אַסְטָיוּת דִין אֲרֵי אֲמַרוּ רָחִיק יְיָ יַת יָתְבֵי אַרְעָא וְלֵית דְאִיגַלְיָא קֳדָם יְיָ:",
        "וְאַף אֲנָא לָא אָחוּס מֵימְרִי וְלָא אַרְחֵים פּוּרְעֲנוּת אוֹרְחַתְהוֹן בְּרֵישֵׁיהוֹן יְהָבִית:",
        "וְהָא גַבְרָא דְלָבֵישׁ לְבוּשָׁא דְפִנְקָסָא בְּחַרְצֵיהּ מֵתִיב פִּתְגָמָא לְמֵימַר עֲבָדֵית כְּמָא דְפַקֵדְתָּנִי:"
      ],
      [
        "וַחֲזֵית וְהָא בִרְקִיעָא דִי עַל רֵישׁ כְּרוּבַיָא כַּאֲבַן טָבָא כְּחֵיזוּ דְמוּת כּוּרְסְיָא אִתְחַזֵי עֲלֵיהוֹן:",
        "וַאֲמַר לְגַבְרָא דְלָבֵישׁ לְבוּשַׁיָא וַאֲמַר עוּל לְבֵינֵי גִלְגְלַיָא לִתְחוֹת כְּרוּבָא וּמַלֵי חוּפְנָךְ גוּמְרִין דְאֶשָׁא מִבֵּינֵי כְרוּבַיָא וּזְרוֹק עַל קַרְתָּא וְעַל וַאֲנָא חָזֵי:",
        "וּכְרוּבַיָא קַיְמִין מִדָרוֹם לְבֵיתָא בְּמֵיעַל גַבְרָא וַעֲנַן אֲמִיטְתָא אִתְמְלִיאַת יַת דַרְתָּא גַוַיְתָא:",
        "וְאִסְתַּלֵק יְקָרָא דַייָ בִּכְרוּבָא דַהֲוָה שָׁרֵי עֲלוֹהִי וּשְׁרָא מֵעֵיל לָקֳבֵיל סְקוּפַת בֵּיתָא וְאִתְמְלִיאַת בֵּיתָא יַת עֲנַן אֲמִיטְתָא וְדַרְתָּא אִתְמְלִיאַת יַת זְהוֹר יְקָרָא דַיָי:",
        "וְקַל כַּנְפֵי כְרוּבַיָא אִשְׁתְּמַע עַד דַרְתָּא בִּרְיָתָא כְקָלָא מִן קֳדָם שַׁדַי בְּמִלוּלָא:",
        "וַהֲוָה בְּפַקְדוּתֵיהּ יַת גַבְרָא דְלָבֵישׁ לְבוּשַׁיָא לְמֵימַר סָב אֶשְׁתָּא מִבֵּינֵי גַלְגְלַיָא מִבֵּינֵי כְרוּבַיָא וְעַל וְקָם בִּסְטַר גַלְגְלָא:",
        "וְאוֹשִׁיט כְּרוּבָא יַת יְדֵיהּ מִבֵּינֵי כְרוּבַיָא לְאֶשְׁתָּא דִי בֵּינֵי כְרוּבַיָא וּנְסֵיב וִיהַב לְחָפְנִי דְלָבֵישׁ לְבוּשַׁיָא וּנְסִיב וּנְפַק:",
        "וְאִתְחַזֵי לַכְרוּבַיָא דְמוּת יַד אֱנָשָׁא תְּחוֹת גַפֵּיהוֹן:",
        "וַחֲזֵית וְהָא אַרְבְּעָא גַלְגְלַיָא בִּסְטַר כְּרוּבַיָא גַלְגַל חַד בִּסְטַר כְּרוּבָא חָד וְגַלְגַל חַד בִּסְטַר כְּרוּבָא חָד וְחֵיזוּ גַלְגְלַיָא כְּעֵין אֲבַן טָבָא:",
        "וְחֶזְוֵיהוֹן דְמוּת חָד לְאַרְבַּעְתְּהוֹן כְּמָא דַהֲוֵי גַלְגַל בְּגוֹ גַלְגַל:",
        "בְּמֵיזַלְהוֹן עַל אַרְבַּעַת סִטְרֵיהוֹן אָזְלִין לָא מִתְחַזְרִין בְּמֵיזַלְהוֹן אֲרֵי לְאַתְרָא דְמִתְפְּנֵי קַדְמָאָה בַּתְרוֹהִי אָזְלִין וְלָא מִתְחַזְרִין בְּמֵיזַלְהוֹן:",
        "וְכָל בִּסְרֵיהוֹן וְגַבֵּיהוֹן וְאֶשְׁדַתְהוֹן וְכַנְפֵיהוֹן וְגַלְגְלַיָא מְלַן עַיְנִין סְחוֹר סְחוֹר לְאַרְבַּעְתְּהוֹן דְגַלְגְלַיָא:",
        "לְאוֹפְנַיָא לְהוֹן אִתְקְרֵי גַלְגְלָא וַאֲנָא שְׁמַע:",
        "וְאַרְבָּעָא אַפִּין לְחַד אַפֵּי חַד אַפֵּי כְרוּבָא וְאַפֵּי תִנְיָנָא אַפֵּי אֱנָשָׁא וּתְלִיתָאָה אַפֵּי אַרְיָא וּרְבִיעָאָה אַפֵּי נִשְׁרָא:",
        "וְאִתְרָמוּ כְּרוּבַיָא אִינוּן בִּרְיָתָא דִי חֲזֵיתִי בִּנְהַר כְּבָר:",
        "וּבְמֵיזַל כְּרוּבַיָא אָזְלִין גַלְגְלַיָא לְקִבְלֵיהוֹן וּבְמִטַל כְּרוּבַיָא יַת גַפֵּיהוֹן לְאִתְרָמָא כְּמִלְרַע לְרוּם שְׁמַיָא לָא מִתְחַזְרִין גַלְגְלַיָא אַף אִינוּן מִקִבְלֵיהוֹן:",
        "בִּמְקָמְהוֹן קַיְמִין וּבְאִתְרָמוּתְהוֹן מִתְרְמִין עִמְהוֹן אֲרֵי בְרוּחַ בִּרְיָתָא בְּהוֹן:",
        "וְאִסְתַּלֵק יְקָרָא דַייָ דַהֲוָה שָׁרַי עֲלוֹהִי מֵעֵיל לָקֳבֵיל סְקוּפַת בֵּיתָא וּשְׁרָא עַל כְּרוּבַיָא:",
        "וּנְטַלוּ כְּרוּבַיָא יַת גַפֵּיהוֹן וְאִתְרָמוּ כְמִלְרַע לְרוּם שְׁמַיָא וַאֲנָא חָזֵי בְּמִפַקְהוֹן וְגַלְגְלַיָא לְקִבְלֵיהוֹן וְקָם בְּמַעֲלָנָא דִתְרַע בֵּית מַקְדְשָׁא דַייָ מַדִינְחָאָה וִיקָר אֱלָהָא דְיִשְׂרָאֵל עֲלֵיהוֹן מִלְעֵלָא:",
        "אִינוּן בִּרְיָתָא דַחֲזֵיתִי תְּחוֹת יְקַד אֱלָהָא דְיִשְׂרָאֵל בִּנְהַר כְּבָר וִידָעִית אֲרֵי כְרוּבַיָא אִינוּן:",
        "אַרְבַּע אַרְבַּע אַפִּין לְחַד וְאַרְבַּע גַפִּין לְחַד וּדְמוּת יַד אֱנָשָׁא תְּחוֹת גַפֵּיהוֹן:",
        "וּדְמוּת אַפֵּיהוֹן אִינוּן אַפַּיָא דִי חֲזֵיתִי עַל נְהַר כְּבָר חֶזְוֵיהוֹן וְאִינוּן בִּרְיָא לָקֳבֵיל אַפָּהָא אָזְלָא:"
      ],
      [
        "וּנְטָלַת יָתִי רוּחָא וְאָעַלָת יָתִי לִתְרַע בֵּית מַקְדְשָׁא דַייָ מַדִינְחָאָה דִפְתִיחַ לְמַדִינְחָא וְהָא בְּמַעֲלָנָא דִתְרַע עַסְרִין וְחַמְשָׁא גַבְרִין וַחֲזֵית בֵּינֵיהוֹן יַת יַאֲזַנְיָה בַּר עַזֻר וְיַת פְּלַטְיָא בַּר בְּנָיָא רַבְרְבֵי עַמָא:",
        "וַאֲמַר לִי בַּר אָדָם אִלֵין גַבְרַיָא דִמְחַשְׁבִין לְמֵינַס וּדְמָלְכִין מְלַךְ בִּישׁ בְּקַרְתָּא הָדָא:",
        "דְאָמְרִין לָא בְקָרִיב לְמִבְנֵי בָתִּין הִיא חֲשִׁיבָא לָנָא כְדוּדָא וַאֲנַחְנָא חֲשִׁיבִין בְּגַוָהּ כְּבִסְרָא דִבְשִׁיל בְּגוֹ דוּדָא:",
        "בְּכֵן אִתְנַבֵּי עֲלֵיהוֹן אִתְנַבֵּי בַּר אָדָם:",
        "וּשְׁרַת עֲלֵי רוּחַ נְבוּאָה מִן קֳדָם יְיָ וַאֲמַר לִי אֱמַר כִּדְנַן אֲמַר יְיָ כֵּן אֲמַרְתּוּן בֵּית יִשְׂרָאֵל וְדִי אַתּוּן מְהַרְהֲרִין וְדִסְלִיקַת עַל לִבְּכוֹן קֳדָמַי גְלַן:",
        "אַסְגֵיתוּן קְטִילֵכוֹן בְּקַרְתָּא הָדָא וּמְלֵיתוּן שׁוּקָהָא קְטִילִין:",
        "בְּכֵן כִּדְנַן אֲמַר יְיָ אֱלֹהִים קְטִילֵיכוֹן דְשַׁוִיתוּן בְּגַוָהּ אִינוּן כְּבִסְרָא וְהָא כְדוּדָא וְיַתְכוֹן אַגְלֵי מִגַוָהּ:",
        "מִן קֳדָם דְקָטְלִין בְּחַרְבָּא דְחַלְתּוּן וּדְקָטְלִין בְּחַרְבָּא אַיְתִי עֲלֵיכוֹן אֲמַר יְיָ אֱלֹהִים:",
        "וְאַגְלֵי יַתְכוֹן מִגַוָהּ וְאֶמְסַר יַתְכוֹן בְּיַד נוּכְרָאִין וְאַעְבֵּיד בְּכוֹן פּוּרְעֲנוּת דִינִין:",
        "בְּחַרְבָּא תִּתְקַטְלוּן עַל תְּחוּם אַרְעָא דְיִשְׂרָאֵל אִתְפְּרַע מִנְכוֹן וְתֵידְעוּן אֲרֵי אֲנָא יְיָ:",
        "הִיא לָא תְהֵי לְכוֹן כְּדוּדָא בְּרַם אַתּוּן תְּהוֹן בְּגַוָהּ כְּבִסְרָא דִבְשִׁיל בְּגוֹ דוּדָא עַל תְּחוּם אַרְעָא דְיִשְׂרָאֵל אֶתְפְּרַע מִנְכוֹן:",
        "וְתֵידְעוּן אֲרֵי אֲנָא יְיָ דִי בִקְיָמַי לָא הַלֵיכְתּוּן וְדִינַי לָא עֲבַדְתּוּן וּכְנִימוּסֵי עַמְמַיָא דִי בְסָחְרָנֵיכוֹן עֲבַדְתּוּן:",
        "וַהֲוָה כְּאִתְנַבָּיוּתִי וּפְלַטְיָה בַר בְּנָיָה מִית וְאִשְׁתַּטְחֵית עַל אַפֵּי וּצְוָחֵית בְּקַל רַב וַאֲמָרֵית קַבֵּיל בָּעוּתִי יְיָ אֱלֹהִים גְמִירָא אַתְּ עֲבִיד עִם שְׁאָרָא דְיִשְׂרָאֵל:",
        "וַהֲוָה פִּתְגָם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אֲחַךְ אֲחַךְ אֱנַשׁ קָרִיבָךְ וְכָל בֵּית יִשְׂרָאֵל כּוּלְהוֹן דְאָמְרִין לְהוֹן יַתְבֵי יְרוּשְׁלֵם אִתְרְחָקוּ מִדְחַלְתָּא דַייָ דִילָנָא הִיא אִתְיְהִיבַת אַרְעָא לְמֵירְתָּה:",
        "בְּכֵן כִּדְנַן אֲמַר יְיָ אֱלֹהִים אֲרֵי אַרְחֵיקְתִּינוּן לְבֵינֵי עַמְמַיָא וַאֲרֵי בְדַרְתִּינוּן בִמְדִינָתָא וִיהָבֵית לְהוֹן בָתֵּי כְנִשְׁתָּא תִּנְיָן לְבֵית מַקְדְשִׁי וְאִינוּן כִּזְעֵיר בִּמְדִינָתָא דְאִתְגִלִיאוּ לְתַמָן:",
        "בְּכֵן אֲמַר כִּדְנַן אֲמַר יְיָ אֱלֹהִים וַאֲקָרֵיב יַתְכוֹן מִן בֵּינֵי עַמְמַיָא וְאַכְנֵישׁ יַתְכוֹן מִן מְדִינָתָא דְאִתְבַּדַרְתּוּן בְּהֵן וְאֶתֵּן לְכוֹן יַת אַרְעָא דְיִשְׂרָאֵל:",
        "וְיֶעֱלוּן לְתַמָן וְיַעְדוּן יַת כָּל שִׁקוּצָא וְיַת כָּל תּוֹעֲבָתָא מִנָהּ:",
        "וְאֶתֵּן לְהוֹן לֵב דְחִיל וְרוּחַ דְחִילָא אֶתֵּן בְּמֵעֵיהוֹן וְאֶתְּבַר לִבָּא דְרַשִׁיעָא דְהוּא תַּקִיף כְּאַבְנָא מִבִּסְרֵיהוֹן וְאֶתֵּן לְהוֹן לֵב דָחִיל קֳדָמַי לְמֶעְבַד רְעוּתָי:",
        "בְּדִיל דְבִקְיָמַי יְהָכִין וְיַת דִינַי יִטְרוּן וְיַעַבְּדוּן יַתְהוֹן וִיהוֹן קֳדָמַי לְעַם וַאֲנָא אֶהֱוֵי לְהוֹן לֶאֱלָהָא:",
        "בָּתַר פּוּלְחַן שִׁקוּצֵיהוֹן וְתוֹעֲבָתְהוֹן לִבְּהוֹן טָעֵי פּוּרְעֲנוּת אוֹרְחֵיהוֹן בְּרֵישֵׁיהוֹן יְהָבֵית אֲמַר יְיָ אֱלֹהִים:",
        "וּנְטָלוּ כְרוּבַיָא יַת גַפֵּיהוֹן וְגַלְגְלַיָא לְקִבְלֵיהוֹן וִיקָר אֱלָהָא דְיִשְׂרָאֵל עֲלֵיהוֹן מִלְעֵילָא:",
        "וְאִסְתַּלֵק יְקָרָא דַייָ מִן גוֹ קַרְתָּא וּשְׁרָא עַל טוּר זֵיתָא דְמִמִדְנַח לְקַרְתָּא:",
        "וְרוּחַ נְטַלְתַּנִי וְאֹבִילַתְנִי לִמְדִינַת אַרְעָא כַסְדָאֵי לְוַת בְּנֵי גָלוּתָא בְּחֶזְוָא בְּרוּחַ נְבוּאָה דִי שְׁרָת עֲלֵי מִן קֳדָם יְיָ וְאִסְתַּלֵק מִנִי חֲזְוָא דַחֲזֵיתִי:",
        "וְאִתְנַבֵּיתִי לִבְנֵי גָלוּתָא יַת כָּל פִּתְגָמַיָא דַייָ דְאַחְזִינִי:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם בְּגוֹ עַמָא סַרְבָנָא אַתְּ יָתֵיב דִי עַיְנִין לְהוֹן לְמֶחֱזֵי וְלָא חָזָן וְאוּדְנִין לְהוֹן לְמִשְׁמַע וְלָא שָׁמְעִין אֲרֵי עַם סַרְבָן אִינוּן:",
        "וְאַתְּ בַּר אָדָם אַתְקִין לָךְ מָנֵי גָלוּתָא וּגְלֵי בִימָם לְעֵינֵיהוֹן וְתִגְלֵי מֵאַתְרָךְ לַאֲתַר אוֹחֲרָן לְעֵינֵיהוֹן מָאִים יִדְחֲלוּן אֲרֵי עַם סַרְבָן אִינוּן:",
        "וְתַפֵּיק מָנָךְ כְמָנֵי גָלוּתָא בִּימָם לְעֵינֵיהוֹן וְאַתְּ תִּפּוֹק בְּרַמְשָׁא לְעֵינֵיהוֹן כְּמַפְקָנֵי גָלוּתָא:",
        "לְעֵינֵיהוֹן חֲתַּר לָךְ בְּכוּתְלָא וְתִפּוֹק בֵּיהּ:",
        "לְעֵינֵיהוֹן עַל כַּתְפָא תִטוֹל בְּקִבְלָא תִפּוֹק אַפָּךְ תְּכַסֵי וְלָא תֶחֱזֵי יַת אַרְעָא אֲרֵי אָת יְהָבְתָּךְ לְבֵית יִשְׂרָאֵל:",
        "וַעֲבָדִית כֵּן כְּמָא דְאִתְפַקֵדִית מָנֵי אַפְקֵית כְּמָנֵי גָלוּתָא בִּימָם וּבְרַמְשָׁא אִתְחַתְּרֵית לִי בְּכִתְלָא בְּיַד בְּקִבְלָא נַפְקֵית עַל כַּתְפָא נְטָלֵית לְעֵינֵיהוֹן:",
        "וַהֲוָה פִּתְגַם נְבוּאָה מִן קֳדָם יְיָ עִמִי בְצַפְרָא לְמֵימָר:",
        "בַּר אָדָם הֲלָא אִם יֵימְרוּן לָךְ בֵּית יִשְׂרָאֵל עַמָא סַרְבָנָא מָא אַתְּ עָבֵיד:",
        "אֱמַר לְהוֹן כִּדְנָן אֲמַר יְיָ אֱלֹהִים עַל רַבָּא מַטַל נְבוּאֲתָא הָדָא בִירוּשְׁלֵם וְכָל בֵּית יִשְׂרָאֵל דְאִינוּן בֵּינֵיהוֹן:",
        "אֲמַר אֲנָא אָתְכוֹן כְּמָא דַעֲבָדֵית כֵּן יִתְעַבֵיד לְהוֹן בְּגָלוּתָא בְּשִׁבְיָא יְהָכוּן:",
        "וְרַבָּא דְבֵינֵיהוֹן עַל כַּתְפָא יִטוֹל בְּקִבְלָא יִפּוֹק בְּכוּתְלָא יַחְתְּרוּן לְאַפָּקוּתֵיהּ בֵּיהּ אַפּוֹהִי יְכַסֵי חֲלַף דְחַב הוּא וְלָא יֶחֱזֵי יַת אַרְעָא:",
        "וְאֶפְרוֹס יַת מְצֻדָתִי עֲלוֹהִי וְיִתְאֲחַד בִּסְרִגְתִי וְאַגְלֵי יָתֵיהּ לְבָבֶל לִמְדִינַת אַרְעָא כַסָדָאִי וְיָתָהּ לָא יֶחֱזֵי וְתַמָן יְמוּת:",
        "וְכֹל דִי בְּסָחֳרָנוֹהִי סַעֲדוֹהִי וְכָל מַשִׁרְיָתֵיהּ אֲבַדֵר לְכָל רוּחָא וּדְקַטְלִין בְּחַרְבָּא אֲגָרֵי בַתְרֵיהוֹן:",
        "וְיֵדְעוּן אֲרֵי אֲנָא יְיָ כַּד אַגְלֵי יַתְהוֹן לְבֵינֵי עַמְמַיָא וַאֲבַדֵר יַתְהוֹן בִּמְדִינָתָא:",
        "וְאַשְׁאַר מִנְהוֹן גַבְרִין דְמִנְיַן מֵחַרְבָּא מִכַּפְנָא וּמִמוֹתָא בְּדִיל דְיִשְׁתָּעוּן יַת כָּל תּוֹעֲבָתְהוֹן בְּעַמְמַיָא דְאִתְגְלִיאוּ לְתַמָן וְיֵדְעוּן אֲרֵי אֲנָא יְיָ:",
        "וַהֲוָה פִּתְגָם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם מֵיכְלָךְ בְּזֵיעַ תֵּיכוֹל וּמִשְׁתָּךְ בְּצָדוּ וּבְאִשְׁתְּמָמוּ תִּשְׁתֵּי:",
        "וְתֵימַר לְעַמָא דְאַרְעָא כִּדְנַן אֲמַר יְיָ אֱלֹהִים לְיַתְבֵי יְרוּשְׁלֵם עַל אַרְעָא דְיִשְׂרָאֵל מֵיכַלְהוֹן בְּזִיעַ יֵיכְלוּן וּמִשְׁתְּהוֹן בְּאִשְׁתְּמָמוּ יִשְׁתּוּן בְּדִיל דְתִצְדֵי אַרְעָא מִמְלוֹאָהּ מֵחֲטוֹף כָּל דְיַתְבִין בָּהּ:",
        "וְקִרְוַיָא דַהֲוָאָה יָתְבָן יֶחֱרְבָן וְאַרְעָא לְצָדוּ תְהֵי וְתִידְעוּן אֲרֵי אֲנָא יְיָ:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם מָא מַתְלָא הָדֵין לְכוֹן עַל אַרְעָא דְיִשְׂרָאֵל לְמֵימַר יוֹרְכוּן יוֹמַיָא וּתְבַטֵיל כָּל נְבוּאָה:",
        "בְּכֵן אֲמַר לְהוֹן כִּדְנַן אֲמַר יְיָ אֱלֹהִים אֲבַטֵל יַת מַתְלָא הָדֵין וְלָא יִמְתְלוּן יָתֵיהּ עוֹד בְּיִשְׂרָאֵל אֱלָהֵין אִתְנַבֵּי לְהוֹן אִתְקְרָבוּ יוֹמַיָא וּפִתְגַם כָּל נְבוּאָה:",
        "אֲרֵי לָא תְהֵי עוֹד כָּל נְבוּאָה שְׁקַר וּכְזַב כָּדְבִין בְּגוֹ בְנֵי יִשְׂרָאֵל:",
        "אֲרֵי אֲנָא יְיָ אֲמַלֵיל יַת דַאֲמַלֵיל פִּתְגְמָא וְיִתְקַיֵם וְלָא יִבָּטֵיל עוֹד אֲרֵי בְיוֹמֵיכוֹן עַמָא סַרְבָנָא אֲמַלֵיל פִתְגָמָא וַאֲקֵימִינֵיהּ אֲמַר יְיָ אֱלֹהִים:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם הָא בֵּית יִשְׂרָאֵל אָמְרִין אוּלְפַן דְהוּא מַלֵף לְיוֹמִין סַגִיאִין וּלְעִדַן רָחִיק הוּא מִתְנַבֵּי:",
        "בְּכֵן אֲמַר לְהוֹן כִּדְנַן אֲמַר יְיָ אֱלֹהִים לָא יִבָּטֵל עוֹד כָּל פִּתְגָמֵי דַאֲמַלֵיל פִּתְגָמָא וְיִתְקַיֵם אֲמַר יְיָ אֱלֹהִים:"
      ],
      [
        "וַהֲוָה פִּתְגָם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אִתְנַבֵּי עַל נְבִיֵי שִׁקְרָא דְמִתְנַבֵּן וְתֵימַר לִדְמִתְנַבֵּן בִּרְעוּת לִבְּהוֹן קַבִּילוּ פִתְגָמָא דַיָי:",
        "כִּדְנַן אֲמַר יְיָ אֱלֹהִים וַי עַל נְבִיֵי שִׁקְרָא דְמִשְׁתַּטָן דְאָזְלִין בָּתַר הִרְהוּר לִבְּהוֹן וּמִדַעַם לָא חָזָן:",
        "כִּתְעָלִין בְּחָרְבָתָא נְבִיֵי שִׁקְרָךְ יִשְׂרָאֵל הֲווֹ:",
        "לָא קַמְתּוּן בְּתַרְעֲתָא וְלָא עֲבַדְתּוּן לְכוֹן עוֹבָדִין טָבִין לְמִבְעֵי עַל בֵּית יִשְׂרָאֵל לְמֵיקָם לְמִבְעֵי עֲלֵיהוֹן רַחֲמִין בְּעִדַן דַאֲתוֹ עֲלֵיהוֹן עָבְדֵי קְרָבָא בְּיוֹם רוּגְזָא דַיָי:",
        "מִתְנַבָּן שְׁקַר וּמַלְפַן כַּדְבִין אָמְרִין אֲמַר יְיָ וַיָי לָא שַׁלְחִינוּן וּמַחְצְפִין דְתִתְקַייָם מִלַתְהוֹן:",
        "הֲלָא נְבוּאָן דִשְׁקַר אִתְנַבֵּיתוּן וּקְסַם כַּדְבִין אֲמַרְתּוּן וְאָמְרִין אֲמַר יְיָ וּמִן קֳדָם יְיָ לָא אִתְמַלָל:",
        "בְּכֵן כִּדְנַן יְיָ אֱלֹהִים חֲלַף דְאִתְנַבֵּיתוּן שְׁקַר וַאֲלַפְתּוּן כַּדְבִין בְּכֵן הָא אֲנָא שְׁלַח רוּגְזִי עֲלֵיכוֹן אֲמַר יְיָ אֱלֹהִים:",
        "וּתְהֵי מְחַת גְבוּרְתִּי עַל נְבִיֵי שִׁקְרָא דְמִתְנַבֵּן שְׁקַר וּמַלְפִין כַּדִיבִין בְּרַז טַב דְגָנִיז לְעַמִי לָא יְהוֹן וּבִכְתַב חַיֵי עַלְמָא דִכְתִיב לְצַדִיקֵי בֵּית יִשְׂרָאֵל לָא יִתְכַּתְבוּן וּלְאַרְעָא דְיִשְׂרָאֵל לָא יַעֲלוּן וְתִידְעוּן אֲרֵי אֲנָא יְיָ אֱלֹהִים:",
        "חֲלַף דְאִתְנַבִּיאוּ שְׁקַר וַחֲלַף דְאַטְעִיאוּ יַת עַמִי לְמֵימָר שְׁלָמָא וְלֵית שְׁלָם וְאִינוּן דָמָן לִדְבָנֵי מְחִיצָא וְשָׁעֵיָע לֵיהּ טִין פַּטִיר דְלָא תֲבָן:",
        "אֱמַר לִדְבָנֵי מְחִיצָא וְשָׁעֵיָא לֵיהּ טִין פַּטִיר דְלָא תֶבֶן נָפִיל הוּא כְּעַן יְהֵי מְטַר מַגְבַּר וְיַת אַבְנֵי אֶלְגָבִישׁ יַחְתָן וְרוּחַ עַלְעוֹלִין תְּבַזַע:",
        "וְהָא נְפַל כָּתְלָא הֲלָא יִתְאֲמַר לְכוֹן אָן שִׁיעָא דְשַׁעְתּוּן:",
        "בְּכֵן כִּדְנַן אֲמַר יְיָ אֱלֹהִים וְאַיְתֵי מְלַךְ דְתַקִיף בְּרוּחַ עַלְעוֹלִין בַּחֲמָתִי וְעַמְמִין קְטוֹלִין כִמְטַר מַגְבַּר בְּרוּגְזִי יֵיתוּן וּמַלְכְּוָן דַחֲסִינִין כְּאַבְנֵי אֶלְגָבִישׁ בִּרְגַז לְשֵׁיצָאָה:",
        "וְאַפְגַר יַת קַרְתָּא דְאִתְנַבֵּיתוּן בָּהּ נְבוּאַן דִשְׁקַר וְאֶרְמִינָהּ לְאַרְעָא וְיִתְגְלוּן אוּשָׁהָא וְתַפֵּל וְתִשְׁתֵּיצוּן בְּגַוָהּ וְתֵידְעוּן אֲרֵי אֲנָא יְיָ:",
        "וְיָחוּל רוּגְזִי בְּקַרְתָּא וּבִנְבִיֵי שִׁקְרָא דְאִתְנַבִּיאוּ בָּהּ נְבוּאַן דִשְׁקַר וְיִתְאַמַר לְכוֹן לֵית קַרְתָּא וְלֵית נְבִיֵי שִׁקְרָא:",
        "נְבִיֵי שִׁקְרָא דְיִשְׂרָאֵל דְמִתְנַבֵּין עַל יְרוּשְׁלֵם וּמַטְעִין לָהּ בְּאוּלְפַן שְׁלָם וְלֵית שְׁלָם אֲמַר יְיָ אֱלֹהִים:",
        "וְאַתְּ בַּר אָדָם קַבֵּיל נְבוּאָה עַל בְּנַת עַמָךְ דְמִתְנַבָּן כִּרְעוּת לִבְּהוֹן וְאִתְנַבֵּי עֲלֵיהֶן:",
        "וְתֵימַר כִּדְנַן יְיָ אֱלֹהִים וַי עֲלֵיהוֹן עַל דִמְחַטְטָן רְקִיעֵי חֲשׁוֹךְ עַל כָּל מַרְפְּקִי יָדִין וְעָבְדִן פַּת כּוּמָרִין עַל רֵישׁ כָּל קוֹמָה לְאַבָּדָא נַפְשָׁן הַנְפָשׁוֹת עַמִי אַתֵּן יָכְלָן לְאַבָּדָא וּלְקַיָמָא הֲלָא נַפְשָׁתְכֵן דִילְכֵן הֲלָא יְכַלְתֵּין לְקַיָמָא:",
        "וְאָחַלְתֵּין רְעוּתִי בְּעַמִי בְּשַׁעֲלֵי סְעָרִן וּבִמְנוּסִין דִלְחֵים לַאֲמָתָא נַפְשָׁן דְלָא חֲזֵי לְהֵין דִימוּתוּן לָא אַתֵּן מְמִיתָן וּלְקַיָמָא נַפְשָׁן דְלָא חֲזֵי לְהֵין לְקַיָמָא דְתִתְקַיְמָן לָא אַתֵּין מְקַיְמָן בְּכַדָבוּתְכֵין לְעַמִי שָׁמְעֵי כַדְבִין:",
        "בְּכֵן כִּדְנַן אֲמַר יְיָ אֱלֹהִים הָא אֲנָא שְׁלַח רוּגְזִי עַל רְקִיעַי חֲשִׁיכִין דְאַתִּין מַטְעֲיָן לְמֵימַר בְּהוֹן אֲנַחְנָא מְחַרְשָׁן יַת נַפְשָׁן לְאַבָּדָא וְאַפְסֵיק יַתְהֵין מֵעָל דַרְעֵיכוֹן וַאֲשֵׁיזֵיב יַת נַפְשָׁתָא דְאַתּוּן מְחַרְשָׁן יַת נַפְשֵׁיהֵן לְאַבָּדוּתָהָא:",
        "וְאַפְסֵיק יַת פַּת כּוּמָרֵיכוֹן וַאֲשֵׁיזֵיב יַת עַמִי מִיֶדְכוֹן וְלָא יִתְמַסְרוּן עוֹד בְּיֶדְכוֹן לְאִשְׁתֵּיצָאָה וְתִידְעוּן אֲרֵי אֲנָא יְיָ:",
        "חֲלַף דְאַכְהֵיתֵן לֵב זַכַּאי לִמֶהֱוֵי שְׁקַר וּמִן קֳדָם מֵימְרִי לָא אִתְבְּהִי וּלְתַקָפָא יְדֵי רַשִׁיעָא בְּדִיל דְלָא לְמֵיתָב מֵאוֹרְחֵיהּ בִּישְׁתָא לְקַיָמוּתֵיהּ:",
        "בְּכֵן שְׁקַר לָא תִתְנַבְּאוּן וְאוּלְפַן לָא תֵילְפוּן עוֹד וַאֲשֵׁיזִיב יַת עַמִי מִיֶדְכוֹן וְתִידְעוּן אֲרֵי אֲנָא יְיָ:"
      ],
      [
        "אֲמַר נְבִיָא אֲתוֹ לְוָתִי גַבְרִין מִסָבֵי יִשְׂרָאֵל וִיתִיבוּ קֳדָמַי:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם גַבְרַיָא הָאִלֵין אַסִיקוּ פּוּלְחַן טַעֲוַתְהוֹן עַל לִבְּהוֹן וְתַקְלַת חוֹבֵיהוֹן יְהָבוּ לָקֳבֵיל אַפֵּיהוֹן הֲאִשְׁתְּאִילָא יִשְׁתְּאַל בְּמֵימְרִי לְהוֹן:",
        "בְּכֵן אִתְנַבֵּי לְהוֹן וְתֵימַר לְהוֹן כִּדְנַן אֲמַר יְיָ אֱלֹהִים גְבַר גְבַר מִבֵּית יִשְׂרָאֵל דִי יַסֵיק פּוּלְחַן טַעֲוְתֵיהּ עַל לִבֵּיהּ וְתַקְלַת חוֹבֵיהּ יְשַׁוֵי לָקֳבֵיל אַפּוֹהִי וְיֵיתֵי לְוַת נְבִיָא אֲנָא יְיָ מִשְׁתְּאֵיל לֵיהּ בְּמֵימְרִי דְאָתֵי לְמִתְבַּע אוּלְפַן מַן קֳדָמַי אַף עַל גַב דְמִתְעָרֵב בִּסְגִי פּוּלְחַן טַעֲוָתֵיהּ:",
        "בְּדִיל לְקָרָבָא יַת בֵּית יִשְׂרָאֵל לְמִתַּן תִּיוּבְתָּא בְּלִבְּהוֹן דִסְטוֹ מִבָּתַר פּוּלְחָנִי וְאִסְתָּאָבוּ בְּפוּלְחַן טַעֲוָתְהוֹן כּוּלְהוֹן:",
        "בְּכֵן אֲמַר לְבֵית יִשְׂרָאֵל כִּדְנַן אֲמַר יְיָ אֱלֹהִים תוּבוּ לְפוּלְחָנִי וְאַעְדוּ מִנְכוֹן פּוּלְחַן טַעֲוָתְכוֹן וְיַת כָּל חוֹבֵי פּוּלְחַן טַעֲוַת תּוֹעֲבַתְכוֹן אַרְחִיקוּ מִקְבֵיל אַפֵּיכוֹן:",
        "אֲרֵי גְבַר גְבַר מִבֵית יִשְׂרָאֵל וּמִן גִיוֹרַיָא דְיִתְגַיְרוּן בְּיִשְׂרָאֵל וְיִסְטֵי מִבָּתַר פּוּלְחָנִי וְיַסֵיק פּוּלְחַן טַעֲוָתֵהּ עַל לִבֵּיהּ וְתַקְלַת חוֹבוֹהִי יְשַׁוֵי לָקֳבֵיל אֲפּוֹהִי וְיֵיתֵי לְוַת נְבִיָא לְמִשְׁאַל לֵיהּ בְּמֵימְרִי אֲנָא יְיָ מִשְׁתְּאֵיל לֵיהּ בְּמֵימְרִי:",
        "וְאֶתֵּן רוּגְזִי בְּגַבְרָא הַהוּא וַאֲשַׁוִינֵיהּ לְאָת וּלְמַתְלִין וֶאֱשֵׁיצִינֵיהּ מִגוֹ עַמִי וְתִידְעוּן אֲרֵי אֲנָא יְיָ:",
        "וּנְבִיָא אֲרֵי יִטְעֵי וִימַלֵיל פִּתְגָמָא אֲנָא יְיָ אַטְעֵיתִי יַת נְבִיָא הַהוּא וַאֲרֵים יַת מְחַת גְבוּרְתִּי עֲלוֹהִי וֶאֱשֵׁיצִינֵיהּ מִגוֹ עַמִי יִשְׂרָאֵל:",
        "וִיקַבְּלוּן חוֹבֵיהוֹן כְּחוֹב דְאָתֵי לְמֵילַף וְלָא אַלֵיף כְּחוֹב נְבִיֵי שִׁקְרָא יְהֵי:",
        "בְּדִיל דְלָא יִטְעוּן עוֹד בֵּית יִשְׂרָאֵל מִבָּתַר פּוּלְחָנִי וְלָא יִסְתַּאֲבוּן עוֹד בְּכָל מֵירְדֵיהוֹן וִיהוֹן קֳדָמַי לְעַם וַאֲנָא אֶהֱוֵי לְהוֹן לֵאלָהָא אֲמַר יְיָ אֱלֹהִים:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אַרְעָא אֲרֵי תֵיחוֹב קֳדָמַי לְשַׁקָרָא שְׁקַר וַאֲרֵים מְחַת גְבוּרְתִּי עֲלָהּ וְאֶתְבַּר בָּהּ סְעֵיד מֵיכְלָא וְאֶשְׁלַח בָּהּ כַּפְנָא וֶאֱשֵׁיצֵי מִנָהּ אֱנָשָׁא וּבְעִירָא:",
        "וִיהוֹן תְּלָתָא גַבְרַיָא הָאִלֵין בְּגַוָהּ נֹחַ דָנִיאֵל וְאִיוֹב אִינוּן בִּזְכוּתְהוֹן יְשֵׁיזְבוּן נַפְשְׁהוֹן אֲמַר יְיָ אֱלֹהִים:",
        "אִילוּ חַיְתָא בִישְׁתָא אַעְבֵּיד בְּאַרְעָא וְתִתְכְּלִינָהּ וּתְהֵי לְצָדוּ מִבְּלִי עָדֵי מִן קֳדָם חַיְתָא:",
        "תְּלָתָא גַבְרַיָא הָאִילֵן בְּגַוָהּ קַיָם אֲנָא אֲמַר יְיָ אֱלֹהִים אִם בְּנִין וְאִם בְּנָן יְשֵׁיזְבוּן יִשְׁתֵּיזְבוּן וְאַרְעָא תְּהֵי לְצָדוּ:",
        "אוֹ דְקַטְלִין בְּחַרְבָּא אַיְיתֵי עַל אַרְעָא הַהִיא וְאֵימַר דְקַטְלִין בְּחַרְבָּא יֶעְדוּן בְּאַרְעָא וֶאֱשֵׁיצֵי מִנָהּ אֱנָשָׁא וּבְעִירָא:",
        "וּתְלָתָא גַבְרַיָא הָאִילֵן בְּגַוָהּ קַיָם אֲנָא אֲמַר יְיָ אֱלֹהִים לָא יְשֵׁיזְבוּן בְּנִין וּבְנָן אֱלָהֵין אִינוּן בִּלְחוֹדֵיהוֹן יִשְׁתֵּיזְבוּן:",
        "אוֹ מוֹתָא אֲשַׁלַח עַל אַרְעָא הַהִיא וְאֶשְׁפּוֹךְ חֵימְתִי עֲלָה בִּקְטוֹל לְשֵׁיצָאָה מִנָהּ אֱנָשָׁא וּבְעִירָא:",
        "וְנֹחַ דָנִיאֵל וְאִיוֹב בְּגַוָהּ וְקַיָם אֲנָא אֲמַר יְיָ אֱלֹהִים אִם בַּר אִם בְּרַתָּא יְשֵׁיזְבוּן אִינוּן בִּזְכוּתְהוֹן יְשֵׁיזְבוּן נַפְשְׁהוֹן:",
        "אֲרֵי כִּדְנַן אֲמַר יְיָ אֱלֹהִים אַף אֲרֵי אַרְבַּע פּוּרְעָנִין בִּישָׁן חַרְבָּא וְכַפְנָא וְחַיְתָא בִּישְׁתָא וּמוֹתָא שְׁלָחֵית עַל יְרוּשְׁלֵם לְשֵׁיצָאָה מִנָה אֱנָשָׁא וּבְעִירָא:",
        "וְהָא אִשְׁתָּאֲרַת בָּהּ שֵׁיזֵיבְתָּא דְמִתַּפְקִין בְּנִין וּבְנָן אִינוּן נַפְקִין לְוַתְכוֹן וְתֶחֱזוּן יַת אוֹרְחֵיהוֹן וְיַת עוֹבָדֵיהוֹן וְתִתְנַחֲמוּן עַל בִּישְׁתָא דְאַיְתֵיתִי עַל יְרוּשְׁלֵם יַת כָּל דְאַיְתֵיתִי עֲלָהּ:",
        "וִינַחֲמוּן יַתְכוֹן אֲרֵי תֶחֱזוּן יַת אוֹרְחֵיהוֹן וְיַת עוֹבְדֵיהוֹן וְתֵידְעוּן אֲרֵי לָא לְמַגֵן עֲבָדֵית יַת כָּל דַעֲבַדֵית בָּהּ אֲמַר יְיָ אֱלֹהִים:"
      ],
      [
        "וַהֲוָה פִּתְגָם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם מַה שְׁנָא אִילַן גוּפְנָא מִכָּל אִילָנָא שַׁבֶּשְׁתָּא דַהֲוַת בְּאָעֵי חוּרְשָׁא:",
        "הֲיִסְבוּן מִנֵיהּ אָעָא לְמֶעְבַּד עֲבִידָא אִם יִסְבוּן מִנֵיהּ סִיכָתָא לְמִתְלֵי בָּהּ כָּל מָאן:",
        "הָא לְאֶשְׁתָּא אִתְמְסַר לְאִשְׁתֵּיצָאָה יַת תְּרֵין סִטְרוֹהִי אָכְלָא אַשִׁתָּא וְגַוֵיהּ חַר הַיִכְשַׁר לַעֲבִידָא:",
        "הָא כַּד הֲוָה שְׁלִים לָא כְשַׁר לַעֲבִידָא אַף אֱלָהֵין דְאֶשְׁתָּא אֲכַלְתֵּיהּ וְחַד הֲיִכְשַׁר עוֹד לַעֲבִידָא:",
        "בְּכֵן כִּדְנַן אֲמַר יְיָ אֱלֹהִים כְּמָא דְאִילָן גוּפְנָא בַּאֲעֵי חוּרְשָׁא דִמְסַרְתֵּיהּ לְאֶשְׁתָּא לְאִשְׁתֵּיצָאָהּ כֵּן מְסָרֵית יַת יַתְבֵי יְרוּשְׁלֵם:",
        "וְאֶתֵּן יַת פּוּרְעֲנוּתִי בְּהוֹן עַל פִּתְגָמַי אוֹרַיְתָא דִיהִיבִין מִגוֹ אֶשְׁתָּא עֲבַרוּ וְעַמְמַיָא דִתְקִיפִין כְּאֶשְׁתָּא יְשֵׁיצִינוּן וְתִידְעוּן אֲרֵי אֲנָא יְיָ כַּד יָחוּל רוּגְזִי בְּהוֹן:",
        "וְאֶתֵּן יַת אַרְעָא לְצָדוּ חֲלַף דִשְׁקָרוּ שְׁקַר אֲמַר יְיָ אֱלֹהִים:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם חוֹכַת יַת יַתְבֵי יְרוּשְׁלֵם וְחַוֵי לְהוֹן יַת תּוֹעֲבָתְהוֹן:",
        "וְתֵימַר כִּדְנַן אֲמַר יְיָ אֱלֹהִים לְיָתְבֵי יְרוּשְׁלֵם תּוֹתְבַתְכוֹן וְיַלְדוּתְכוֹן מֵאַרְעָא כְּנַעֲנָאֵי תַּמָן אִתְגְלֵיתִי עַל אַבְרָהָם אֲבוּכוֹן בֵּין בִּתְרַיָא וְאוֹדַעְתֵּיהּ דְאַתּוּן נַחֲתִין לְמִצְרַיִם בִּדְרַע מְרוֹמָם אֲנָא פָּרֵק יַתְכוֹן וּבִזְכוּת אֲבָהָתְכוֹן אֲנָא מְתָרֵיךְ מִן קֳדָמֵיכוֹן יַת אֱמוֹרָאֵי וּמְשֵׁיצַי יַת חִתָּאֵי:",
        "וְאַף כַּד נְחָתוּ אֲבָהַתְכוֹן לְמִצְרַיִם תּוֹתָבִין בְּאַרְעָא דְלָא דִילְהוֹן מְשַׁעְבְּדִין וּמְעַנַן לְהוֹן הֲוַת כְּנִשְׁתָּא דְיִשְׂרָאֵל דַמְיָא לְוַלְדָא דִי רְטִישׁ עַל אַפֵּי בָרָא דְלָא אִתְפְּסַק שׁוֹרֵיהּ וּבְמַיָא לָא אִשְׁתְּטִיף לְאִתְנַקָאָה וּבִמְלַח לָא אִתְמְלַח וּבְאִיסוּרִין לָא אִתְאֲסָר:",
        "לָא חָסַת עֲלֵיכוֹן עֵינָא דְפַרְעֹה לְמֶעֱבַד לְכוֹן טָבָא חֲדָא לְרָחָמָא עֲלֵיכוֹן וּגְזַר עֲלֵיכוֹן גְזֵרַת גְמִירָא לְמִרְמֵי דְכוּרֵיכוֹן בְּנַהֲרָא לְאַבָּדָא יַתְכוֹן בְּעִדַן דַהֲוֵיתוּן בְּמִצְרַיִם:",
        "וְעַל דָכְרָן קְיָם אֲבָהַתְכוֹן קֳדָמֵי אִתְגְלֵיתִי לְמִפְרַקְכוֹן אֲרֵי גְלֵי קֳדָמֵי אֲרֵי אַתּוּן מְעַנַן בְּשִׁעְבּוּדְכוֹן וַאֲמָרִית לְכוֹן בִּדְמָא דְמָהוּלִתָּא אָחוֹס עֲלֵיכוֹן וַאֲמַרֵית לְכוֹן בְּדַם פִּסְחָא אֶפְרוֹק יַתְכוֹן:",
        "רִבְבַת כְּצִימְחֵי חַקְלָא יְהַבְתִּיכוֹן וּסְגֵיתוּן וּתְקֵיפְתּוּן וַהֲוֵיתוּן לְזַרְעִין וּלְשִׁבְטִין וּכְעוֹבָדֵי אֲבָהַתְכוֹן תַּקָנַיָא עִידַן פּוּרְקַן כְּנִישַׁתְכוֹן מְטָא אֲרֵי אַתּוּן מְשַׁעְבְּדִין וּמְעַנָן:",
        "וְאִתְגְלֵיתִי עַל מֹשֶׁה בְּאַסְנָא אֲרֵי גְלֵי קֳדָמָי אֲרֵי מְטָא זְמַן פּוּרְקָנֵיכוֹן וְאַגְנֵית בְּמֵימְרִי עֲלֵיכוֹן וְאַעֲדֵיתִי חוֹבֵיכוֹן וְקַיֵמִית בְּמֵימְרִי לְמִפְרַק יַתְכוֹן כְּמָא דְקַיֵמֵית לַאֲבָהָתְכוֹן אֲמַר יְיָ אֱלֹהִים לְמֶהֱוֵיכוֹן עַם מְשַׁמֵשׁ קֳדָמַי:",
        "וּפָרִיקִית יַתְכוֹן מִשִׁעְבּוּד מִצְרָאֵי וְאַעְדֵיתִי תְּקוֹף מַרְוָתָא מִנְכוֹן וְדַבְּרֵית יַתְכוֹן בְּחֵירוּתָא:",
        "וְאַלְבִּישֵׁית יַתְכוֹן לְבוּשֵׁי צִיוּרִין מֵחָמְדַת סָנְאֵיכוֹן וִיהָבֵית מְסַן דִיקַר בְּרַגְלֵיכוֹן וְקַדְשֵׁית מִנְכוֹן כַּהֲנַיָא לְמֶהֱוֵי מְשַׁמְשִׁין קֳדָמַי בְּמִצְנְפָן דְבוּץ וְיַת כַּהֲנָא רַבָּא בִּלְבוּשֵׁי צִבְעוֹנִין:",
        "וְתַקְנֵית יַתְכוֹן תִּקוּן פִּתְגָמֵי אוֹרַיְתָא כְּתִיבִין עַל תְּרֵין לוּחֵי אַבְנַיָא וִיהִיבִין עַל יְדֵי מֹשֶׁה וּבִקְדוּשַׁת שְׁמִי רַבָּא קַדִישֵׁית יַתְכוֹן:",
        "וִיהָבֵית אֲרוֹן קְיָמִי בֵּינֵיכוֹן וַעֲנַן יְקָרִי מַטַל עֲלַוֵיכוֹן וּמַלְאַךְ שְׁלִיחַ מִן קֳדָמַי מְדַבֵּר בְּרֵישֵׁיכוֹן:",
        "וִיהָבֵית מַשְׁכְּנִי בֵּינֵיכוֹן מְתַקֵן בִּדְהַב וּכְסַף וִירִיעַת בּוּץ וְצִבְעוֹנִין וְצִיוּרִין וּמַנָא דְטַב כְּסוּלְתָא וְכִדְבַשׁ וְכִמְשַׁח אוֹכְלֵית יַתְכוֹן וַעֲתַרְתּוּן וּתְקֵיפְתּוּן לַחֲדָא וְאִצְלַחְתּוּן וּשְׁלֵיטְתּוּן בְּכָל מַלְכְּוָתָא:",
        "וּנְפַק לָךְ שׁוּם כְּנִשְׁתָּא דְיִשְׂרָאֵל בֵּינֵי עַמְמַיָא בְּשׁוּפְרַיִךְ אֲרֵי גְמִיר הוּא יְקָרִי דְשַׁוֵיתִי עָלַיִךְ אֲמַר יְיָ אֱלֹהִים:",
        "וְאִתְרְחֵיצְתְּ בְּשׁוּפְרֵיךְ וּטְעֵית עַל שְׁמִיךְ וְאִתְחַבַּרְתְּ לִיךְ לְמִפְלַח לְטַעֲוָתָא עִם כָּל דְעָדֵי וְלָא כְשַׁר לִיךְ לְמֶעְבַּד כֵּן:",
        "וּנְסֵיבְתְּ מַלְבּוּשַׁיִךְ וַעֲבִידְתְּ לִיךְ בָּמָן מְחַפְיָן פַּת כּוֹמְרִין וּטְעֵית עֲלֵיהוֹן לָא כִּדְכָשַׁר וְלָא כִדְחֲזֵי:",
        "וּנְסֵיבְתְּ מָנַי תוּשְׁבַּחְתִּיךְ מִדַהֲבֵי וּמִכַּסְפִּי דִי יְהָבֵית לִיךְ וַעֲבֵידְתְּ לִיךְ צַלְמֵי דְכוּרָא וּטְעֵית בְּהוֹן:",
        "וּנְסֵיבְתְּ יַת לְבוּשֵׁי צִיוּרַיִךְ וּכִסִיתִינוּן וּמִשְׁחִי וּקְטוֹרֶת בּוּסְמֵי שַׁוִית קֳדָמֵיהוֹן:",
        "וְטוּבִי דִיהָבִית לִיךְ סוּלְתָּא וּמְשַׁח וּדְבַשׁ אוֹכֵילְתִּיךְ יְהַבְתִּינוּן קֳדָמֵיהוֹן קוּרְבָּנִין לְפוּלְחַן הֲלָא הֲוָאָה כָּל אִלֵין אֲמַר יְיָ אֱלֹהִים:",
        "אֵיכָא אַסְגֵית לְאַרְגָזָא קֳדָמַי כְּנִשְׁתָּא דְיִשְׂרָאֵל דִי דַבַּרְתְּ יַת בְּנַךְ וְיַת בְּנָתָךְ דַעֲתִידִין לְמִפַּק מִנְהוֹן תּוּלְדַת קוּדְשָׁא קָדָמַי וּנְכֵיסְתִּינוּן לְהֵין קוּרְבָּנִין לְפוּלְחַן הַזְעֵירָא הֲוַת בְּעֵינָךְ טַעֲוָתִיךְ:",
        "וּנְכֵיסְתְּ יַת בְּנַיָא וִיהַבְתִּינוּן בְּאַעֲבָרָא יַתְהוֹן לְהֵין:",
        "וְיַת כָּל חוֹבֵי תוֹעֲבוֹתַיִךְ וְטַעֲוָתַיִךְ לָא אִדְכַּרְתְּ יַת יוֹמִין דְמִלְקַדְמִין כַּד הֲוִית מְטַלְטָלָא וּשְׁבִיקָא מִתְעַנְיָא בְּשִׁעְבּוּדַיִךְ הֲוֵית:",
        "מַה יְהֵי בְסוֹפַיִךְ עַל כָּל בִּישְׁתִּיךְ נְבִיָא אֲמַר יַהּ וַי לִיךְ עַל דְחַבְתְּ וַי לִיךְ עַל דְלָא תַבְתְּ אֲמַר יְיָ אֱלֹהִים:",
        "וּבְנֵית לִיךְ אֱגוֹרִין וַעֵבַדְתְּ לִיךְ רָמָן בְּכָל רְחוֹב:",
        "בְּרֵישׁ כָּל פָּרָשׁוּת אוֹרַח בְּנִית רָמָתַיִךְ וְאָחֵילְתְּ יַת קְדוּשְׁתִּיךְ וְאִיתְחַבַּרְתְּ לִיךְ לְמִפְלַח לְטַעֲוָתָיִךְ עִם כָּל דְעָדֵי וְאַסְגֵית יַת טַעֲוָתָיִךְ:",
        "וּטְעֵית בָּתַר בְּנֵי מִצְרַיִם קְרִיבַיִךְ מְסַרְבְּלֵי בְּסַר וְאַסְגֵית יַת טַעֲוָתַיִךְ לְאַרְגָזָא קֳדָמַי:",
        "וְהָא אֲרֵימִית יַת מְחַת גְבוּרְתִּי עֲלָךְ וּמְנָעֵית טוּבִיךְ וְאֶמְסְרִינִיךְ בְּיַד בַּעֲלֵי דְבָבִיךְ כַּפְרָנֵי פְּלִשְׁתָּאֵי דְאִלוּ שַׁלְחֵית לְוַתְהוֹן נְבִיַי אִתְכְּנָעוּ וְאַתְּ לָא תַּבְתְּ מֵאוֹרְחִיךְ דְעֵיצַת חֶטְאִין:",
        "וּטְעֵית בָּתַר בְּנֵי אַתּוּר מִדְלָא יְדַעַתְּ אוֹרַיְתָא וּטְעֵית בְּהוֹן וְאַף לָא יְדַעַתְּ תְּיוּבְתָּא:",
        "וְאַסְגֵית יַת טַעֲוָתַיִךְ לְאִתְחַבָּרָא לְעַמָא דִכְנַעַן לִמְהַךְ בְּנִימוּסֵי כַּסְדָאֵי וְאַף בְּדָא לָא יְדַעַתְּ אוֹרַיְתָא:",
        "מָה תַקִיף הֲוָה רֶשַׁע לִבֵּךְ אֲמַר יְיָ אֱלֹהִים בְּמֶעְבְּדִיךְ יַת כָּל אִילֵן בְּעוֹבָדֵי אִיתְּתָא נַפְקַת בְּרָא דְשַׁלִיט לָהּ בְּנַפְשָׁהּ:",
        "בְמִבְנָךְ אֱגוֹרָךְ בְּרֵישׁ כָּל פָּרָשׁוּת אוֹרַח וְרָמָתֵךְ עֲבַדְתְּ בְּכָל רְחוֹב וְלָא הֲוֵית כְּנַפְקַת בָּרָא דְמִתְהַנְיָא בְּאַגְרָא:",
        "כְּנִשְׁתָא דְיִשְׂרָאֵל דַמְיָא לְאִתְּתָא דִרְחִימָא עַל בַּעְלָהּ וּמְזַנְיָא עֲלוֹהִי שָׁבְקַת יַת בַּעְלָהּ וּטְעַת בָּתַר נוּכְרָאִין:",
        "לְכָל נַפְקַת בָּרָא יֶהֱבִין אֲגַר וְאַתְּ אַהֲנִית יַת אַגְרִיךְ לְכָל רְחִימָךְ וּשְׁחֵידְתְּ יַתְהוֹן לְמֵיתֵי עֲלָךְ מִסְחוֹר סְחוֹר בְּטַעֲוָתַיִךְ:",
        "וַהֲוָה בִּיךְ שְׁנוּ כְנִשְׁתָּא דְיִשְׂרָאֵל מִן מְדִינָתָא בְּטַעֲוָתַיִךְ וּבַתְרִיךְ לָא הֲוַת דְטָעִית כְּוָתִיךְ וּבְמִתְּנִיךְ אֲגַר וְאֲגַר לָא אִתְיְהַב לִיךְ וַהֲוֵית לִשְׁנוּ:",
        "בְּכֵן דְעוֹבְדָהָא כְּנַפְקַת בָּרָא כְּנִשְׁתָּא דְיִשְׂרָאֵל קַבִּילוּ פִּתְגָמָא דַיָי:",
        "כִּדְנַן אֲמַר יְיָ אֱלֹהִים חֲלַף דְאַגְלִיאַת בַּהֲתָתֵיךְ וְאִיתְחֲזִית קָלוֹנִיךְ בִּדְטָעִית בָּתַר רְחִימַיִךְ וְיַת כָּל חוֹבֵי פּוּלְחַן טַעֲוַת תּוֹעֲבָתַיִךְ וּבְחוֹבַת דַם בְּנֵךְ דִנְכֵיסְתְּ לְהֵין:",
        "בְּכֵן הָא אֲנָא מַכְנִישׁ יַת כָּל רְחִימֵיךְ דְאִתְרְעֵית לְמִטְעֵי בַתְרֵיהוֹן וְיַת כָּל דִרְחֵימְתְּ עִם כָּל דִשְׂנֵית וְאַכְנֵישׁ יַתְהוֹן עֲלָךְ מִסְחוֹר סְחוֹר וַאֲגַלֵי בַּהֲתָתַיִךְ לְהוֹן וְיֶחֱזוּן יַת כָּל קְלוֹנָיִךְ:",
        "וְאִתְפְּרַע מִנִיךְ פּוּרְעֲנּוּת גָיְפָן וְאַשְׁדִת דַם וְאֶמְסְרִינָךְ לִקְטוֹל בִּרְגַז וּבְחֵימָה:",
        "וְאֶמְסַר יָתִיךְ בִּידֵיהוֹן וִיפַגְרוּן שׁוּרֵיךְ וְיִתַרְעוּן רָמָתַיִךְ וְיִשְׁלְחוּן יָתִיךְ לְבוּשֵׁי יְקָרִיךְ וְיִסְבּוּן מָנַי תוּשְׁבַּחְתִּיךְ וְיִשְׁבְקוּנִיךְ מְטַלְטָלָא וּשְׁבִיקָא:",
        "וְיִסְקוּן עֲלָךְ מַשִׁרְיָן וְיִרְגְמוּן יָתִיךְ בְּאַבְנֵי קְלַע וְיִבְזְעוּנִיךְ בְּסַיְפֵהוֹן:",
        "וְיוֹקְדוּן בָּתָּךְ בְּנוּרָא וְיַעְבְּדוּן בִּיךְ פּוּרְעֲנוּת דִינִין לְעֵינֵי מְדִינָן סַגִיאָן וְאֶבְטְלִינִיךְ מִלְמֶהֱוֵי כְּנַפְקַת בָּרָא וְאַף אֲגַר לָא תִתְּנִין עוֹד:",
        "וַאֲנִיחַ חֵמְתִי בִיךְ וְתַעְדֵי קִנְאָתִי מִנִיךְ וַאֲסִיף וְלָא יְהֵי רוּגְזִי עוֹד:",
        "חֲלַף דְלָא אִידְכַּרְתְּ יַת יוֹמֵי דְמִלְקָדְמִין וַהֲוֵית מַרְגְזָא קֳדָמַי בְּכָל אִלֵין וְאַף אֲנָא פּוּרְעֲנוּת אוֹרְחָתִיךְ בְּרֵישׁ יְהָבֵית אֲמַר יְיָ אֱלֹהִים לָא עֲבַדְתְּ לִיךְ עֵיצָה לְמֵיתַב מִן כָּל תּוֹעֲבָתָיִךְ:",
        "הָא כָּל דְמָתֵיל עֲלָךְ יִמְתוֹל לְמֵימָר כְּעוֹבָדֵי אִמָא כֵּן בְּרַתָּא:",
        "לְמָה הֲוֵית בְּרַתָּא לְאַרְעָא דִכְנַעַן לְמֶעֱבַּד כְּעוֹבָדֵי עַמָא דְאִיתְרַבּוּ אֲבָהָן עִם בְּנִין וַאֲחָתָא לִסְדוֹם וַעֲמוֹרָה דְאִישְׁתֵּיצֵי עִמְהוֹן אַבָהָן עִם בְּנִין הֲלָא אִמְכוֹן שָׂרָה בֵּינֵי חִתָּאֵי הֲוַת וְלָא עַבְדַת כְּעוֹבָדֵיהוֹן וַאֲבוּכוֹן אַבְרָהָם בֵּינֵי אֱמוֹרָאֵי וְלָא הֲלֵיךְ בְּעֵיצַתְהוֹן:",
        "וַאֲחָתִיךְ רַבְּתָא שׁוֹמְרוֹן הִיא וְכַפְרָנָהָא דְיָתְבָא עַל שְׂמָאלִיךְ וַאֲחָתִיךְ דִזְעֵירָא מִנִיךְ דְיַתְבָא מִימִינִיךְ סְדוֹם וְכַפְרָנָהָא:",
        "וְאִלוּ בְּאוֹרְחָתְהוֹן הֲלֵיכְתְּ וּכְתוֹעֲבָתְהוֹן עֲבַדְתְּ חֲסוֹךְ הֲוָה חוֹבִיךְ אֱלָהֵין דְאַסְגֵית לְחַבָּלָא מִנְהוֹן בְּכָל אוֹרְחָתָיִךְ:",
        "קַיָם אֲנָא אֲמַר יְיָ אֱלֹהִים אִם עַבְדַת סְדוֹם אֲחָתִיךְ הִיא וְכַפְרָנָהָא כְּמָא דַעֲבַדְתְּ אַתְּ וְכַפְרָנָיִךְ:",
        "הָא דֵין הֲוָה חוֹב סְדוֹם אֲחָתִיךְ גַאוְתָנִין סָבְעִין לַחֲמָא וּשְׁלֵיוָא וּשְׁדוּכַיָא הֲוָה לָהּ וּלְכַפְרָנָהָא וְיַד מִסְכֵּן וַחֲשׁוֹךְ לָא אַתְקֵיפַת:",
        "וְאִתְרַבְרְבָא וַעֲבָדָא תּוֹעֵיבָא קֳדָמַי וְאַגְלֵיתִי יַתְהֵין כְּמָא דִגְלֵי קֳדָמַי:",
        "וְשׁוֹמְרוֹן כְּפַלְגוּת חוֹבַיִךְ לָא חָבַת וְאַסְגֵית יַת תּוֹעֲבוֹתַיִךְ מִנְהוֹן וְזַכֵּית יַת אֲחָתַיִךְ בְּכָל תּוֹעֲבָתַיִךְ דַעֲבַדְתְּ:",
        "אַף אַתְּ קַבִּילִי אִתְכְּנָעוּתִיךְ דִי בְעֵית לַאֲחַתִיךְ בְּחוֹבַיִךְ דְאַתְעֵיבְתְּ מִנְהֵין וְזַכְיָן מִנִיךְ וְאַף אַתְּ בַּהֲתִי וְקַבִּילִי אִתְכְּנָעוּתִיךְ בִּדְזַכֵּית אַחֲוָתַיִךְ:",
        "וְאָתִיב יַת עַמְהֶן לְהֶן יַת עַמָא דִסְדוֹם וְכַפְרָנָהָא וְיַת עַמָא דְשׁוֹמְרוֹן וְכַפְרָנָהָא וְאָתֵיב גָלוּת עַמִיךְ בֵּינֵיהוֹן:",
        "בְּדִיל דִתְקַבְּלִין אִתְכְּנָעוּתִיךְ וְתִתְכַּנְעִין מִכָּל דַעְבַדְתְּ בְּנַחֲמוֹתַיִךְ יַתְהֶן:",
        "וַאֲחָתַיִךְ סְדוֹם וְכַפְרָנָהָא יְתוּבָן לְאַוְלְהֶן וְשֹׁמְרוֹן וְכַפְרָנָהָא יְתוּבוּן לְאַוְלְהֶן וְאַתְּ וְכַפְרָנָךְ תְּתוּבוּן לְאַוְלְכֶן:",
        "וְלָא הֲוַת סְדוֹם אֲחָתִיךְ לְאוּלְפַן בְּפוּמִיךְ בְּיוֹם אִתְרַבְרְבוּתִיךְ:",
        "עַד לָא תִתְגְלֵי בִישְׁתִּיךְ כְּעִדַן דַחֲסִידוּ כַּפְרָנֵי אֲרָם וְכָל סָחְרָנָהָא כַּפְרָנֵי פְּלִשְׁתָּאֵי דְבָזוּ יָתִיךְ מִסְחוֹר סְחוֹר:",
        "יַת חוֹבֵי עֵיצַת חֶטְאָךְ וְיַת פּוּלְחַן תּוֹעֲבָתַיִךְ אַתְּ קַבֵּילְתִּנוּן אֲמַר יְיָ:",
        "אֲרֵי כִּדְנַן אֲמַר יְיָ אֱלֹהִים וְאִתְפְּרַע מִנִיךְ כְּמָא דַעֲבַדְתְּ דִבְסַרְתְּ עַל מוֹמֵי לְאַשְׁנָאָה קְיָם:",
        "וְדָכֵירְנָא אֲנָא יַת קְיָמִי דְעִמָךְ בְּיוֹמֵי קֳדָם וַאֲקֵים לָךְ קְיַם עֲלָם:",
        "וְתִדְכְּרִין יַת אוֹרְחָתַיִךְ וְתִתְכַּנְעוּן בְּקָרְבוּתִיךְ יַת מְדִינָן דְרַבְרְבָן מִנִיךְ עִם דְעַדְקָן מִנִיךְ וּמְסָרֵית יַתְהוֹן לִיךְ לְאִשְׁתְּמָעָא וְאַתְּ לָא עֲבַדְתְּ יַת אוֹרַיְתָא:",
        "וַאֲקֵים אֲנָא יַת קְיָמִי עִמָךְ וְתִידְעוּן אֲרֵי אֲנָא יְיָ:",
        "בְּדִיל דְתִדְכְּרִין וְתִבְהֲתִין וְלָא יְהֵי לִיךְ עוֹד לְאִתְרַבְרְבָא בְּמִלֵי פּוּמִיךְ מִן קֳדָם אִתְכְּנָעוּתִיךְ כַּד אֶשְׁבּוֹק לִיךְ לְכָל דַעֲבַדְתְּ אֲמַר יְיָ אֱלֹהִים:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימַר:",
        "בַּר אָדָם חוּד חִידְתָּא וּמְתַל מַתְלָא עַל בֵּית יִשְׂרָאֵל:",
        "וְתֵימַר כִּדְנַן אֲמַר יְיָ אֱלֹהִים נִשְׁרָא רַבָּא רַב גַפִּין אֲרִיךְ אֵיבְרָן חָפֵי כַנְפִין דִילֵהּ צִיוּרִין אֲתָא לְלִבְנָן וּנְסֵיב יַת עוֹבַרְתָּא דְאַרְזָא רָמָא:",
        "יַת רֵישׁ שַׁבִּשְׁתֵּהּ נְסִיב וְאוֹבְלֵיהּ לְאַרְעָא דְבָטְלָא מִפּוּלְחָנָא בְאַרְעָא דִכְנַעַן וְעַד לָא יַעֲלוּן לָהּ בֵּית יִשְׂרָאֵל בְּקִרְיַת תַּגָרִין שַׁוְיֵיהּ:",
        "וּנְסִיב מִזַרְעָא דְאַרְעָא וְיַהֲבֵיהּ בַּחֲקַל טַב לְמִזְרַע נִצְבַהּ עַל מַיִין סַגִיאִין גְפַּן נִצְבָא שַׁוְיֵיהּ:",
        "וּצְמַח וַהֲוָה לְגֶפֶן תַּקִיף מַכִּיךְ בְּקוֹמָא לְכַפָפָא עוֹבַרְתֵּהּ לֵיהּ וְשָׁרָשׁוֹהִי תְּחוֹתוֹהִי יְהוֹן וַהֲוָה לְגֶפֶן וַעֲבַד שַׁבְקִין וּשְׁלַח עוֹבָרָן:",
        "וַהֲוָה נִשְׁרָא חַד רַבָּא רַב גַפִּין וַחֲפֵי כַנְפִין וְהָא גוּפְנָא הָדָא כַּפַּת שָׁרְשׁוֹהִי עֲלוֹהִי וְעוֹבַרְתֵּהּ שְׁלָחַת לֵיהּ לְאַשְׁקָאָה יָתָהּ מֵעוּגְיַת נִצְבָתָהּ:",
        "בַּחֲקַל טַב עֲלֵי מַיִין סַגִיאִין הִיא שְׁתִילָה לְמֶעְבַר עֲנַף וּלְמִטְעַן פֵּרִין לְמֶהֱוֵי לְגֶפֶן תַקִיף:",
        "אֲמַר כִּדְנַן יְיָ אֱלֹהִים תִּצְלַח הֲלָא יַת שָׁרְשׁוֹהִי יַפְסֵיק וְיַת אִבָּהּ יַקְטֵיף וְיִבְשׁוּן כָּל טַרְפֵי צִמְחָהּ יִתְּרוֹן וְלָא בְמַשִׁרְיָן סַגִיאִין וּבְעַם סַגִי יֵיתוּן לְמֶעְקַר יָתָהּ מִשׁוֹרְשָׁהָא:",
        "וְהָא שְׁתִילָא הֲתִצְלַח הֲלָא כְּמִיקְרַב בָּה רוּחַ קִידוּמָא תִיבַשׁ מֵיבַשׁ עַל עוּגְיַת נִצְבְתָהּ תִּיבָשׁ:",
        "וַהֲוָה פִּתְגָם נְבוּאָה מִן קֳדָם יְיָ עִמִי לְמֵימָר:",
        "אֱמַר כְּעַן לְעַמָא סַרְבָנָא הֲלָא יְדַעְתּוּן מָה אִלֵין אֱמַר הָא אָתָא מַלְכָּא דְבָבֶל לִירוּשְׁלֵם וּדְבַר יַת מַלְכָּהּ וְיַת רַבְרְבָהָא וְאוֹבִיל יַתְהוֹן לְוָתֵה לְבָבֶל:",
        "וּדְבַר מִזַרְעָא דְמַלְכוּתָא וּגְזַר עִמֵהּ קְיַם וְאָעֵיל יָתֵהּ בְּמוֹמֵי וְיַת רַבְרְבֵי אַרְעָא דְבַר:",
        "לְמֶהֱוֵי מַלְכוּ חַלָשָׁא בְּדִיל דְלָא לְאִתְרַבְרְבָא לְמִטַר יַת קְיָמַהּ לְמִפְלְחֵהּ:",
        "וּמְרַד בֵּיהּ לְשַׁלָחָא אִזְגַדוֹהִי לְמִצְרַיִם לְמִתַּן לֵיהּ סוּסְוָן וְעַם סַגִי הֲיִצְלַח הֲיִשְׁתֵּיזִיב דְעָבֵיד אִילֵין וּמְשַׁנֵי קַיֵם הֲיִשְׁתֵּיזֵיב:",
        "קַיֵם אֲנָא אֲמַר יְיָ אֱלֹהִים אִם לָא בְּאַתְרָא דְמַלְכָּא דְאַמְלִיךְ יָתֵיהּ דִבְסַר עַל מוֹמָתֵהּ וּדְאַשְׁנֵי יַת קְיָמֵיהּ עִמֵיהּ בְּגוֹ בָבֶל יְמוּת:",
        "וְלָא בְּמַשִׁרְיָן סַגִיאִין וּבְעַם סַגִי יַעְבֵד עִמֵהּ פַרְעֹה קְרָבָא בְּמִצְבַּר מְלֵיתָא וּבְמִבְנֵי כַרְקוֹם לְשֵׁיצָאָה מְדִינַן סַגִיאִין:",
        "וּבְסַר עַל מוֹמֵי לְאַשְׁנָאָה קְיַם וְהָא אַמְטֵי יְדֵיהּ לְפַרְעֹה וְכָל אִלֵין עֲבַד לָא יִשְׁתֵּיזֵיב:",
        "בְּכֵן כִּדְנַן אֲמַר יְיָ אֱלֹהִים קַיָם אֲנָא אִם לָא מוֹמָתִי דִבְסַר וּקְיָמִי דְשַׁנִי וְאֶתֵּן פּוּרְעֲנוּת אוֹרְחֵהּ בְּרֵישֵׁהּ:",
        "וְאֶפְרוֹס עֲלוֹהִי מְצֻדָתִי וְיִתְאַחַד בִּסְרִגְתִּי וְאַגְלִינֵהּ לְבָבֶל וְאִתְפְּרַע מִנֵיהּ תַּמָן שִׁקְרַהּ דִשְׁקַר קֳדָמַי:",
        "וְיַת כָּל גַבְּרוֹהִי בְּכָל מַשִׁרְיָתֵיהּ בְּחַרְבָּא יִתְקַטְלוּן וּדְיִשְׁתָּאֲרוּן לְכָל רוּחַ יִתְבַּדְרוּן וְתֵידְעוּן אֲרֵי אֲנָא יְיָ גְזָרֵית בְּמֵימְרִי:",
        "כִּדְנַן אֲמַר יְיָ אֱלֹהִים וַאֲקָרֵיב אֲנָא מִמַלְכוּתָא דְבֵית דָוִד דִמְתִיל כְּאַרְזָא רָמָה וַאֲקַיְמִינֵהּ מִבְּנֵי בְנוֹהִי יָנִיק וַאֲרַבֵּי וַאֲקַיְמִינֵיהּ בְּמֵימְרִי בְּטוּר רָם וּמְנַטֵל:",
        "בְּטוּר קוּדְשָׁא דְיִשְׂרָאֵל אֲקַיְמִינֵיהּ וְיַכְנֵישׁ מַשִׁרְיָן וְיַעְבֵיד סוּמְכְוָן וִיהֵי לְמֶלֶךְ תַּקִיף וְיִסְתַּמְכוּן עֲלוֹהִי כָּל צַדִיקַיָא וְכָל עִנְוְתָנַיָא בִּטְלַל מַלְכוּתֵיהּ יִשְׁרוּן:",
        "וְיֵדְעוּן כָּל מַלְכֵי עַמְמַיָא אֲרֵי אֲנָא יְיָ אַמְאִיכֵית מַלְכוּת דַהֲוַת תַּקִיפָא וְתַקִיפַת מַלְכוּת דַהֲוַת חַלָשָׁא אַמְאִיכֵית מַלְכוּת עַמְמַיָא דַהֲוַת תַּקִיפָא כְּאָעָא רָטִיב וּתְקִיפִית מַלְכוּת בֵּית יִשְׂרָאֵל דַהֲוַת חַלָשָׁא כְּאָעָא יַבִּישׁ אֲנָא יְיָ גְזָרִית בְּמֵימְרִי וַאֲקַיֵם:"
      ],
      [
        "וַהֲוָה פִתְגַם נְבוּאָה מִן קֳדָם יְיָ עִמִי לְמֵימָר:",
        "מָה לְכוֹן דְאַתּוּן מַתְלִין יַת מַתְלָא הָדֵין עַל אַרְעָא דְיִשְׂרָאֵל לְמֵימָר אֲבָהָתָא חָטָן וּבְנַיָא לְקָן:",
        "קַיָם אֲנָא אֲמַר יְיָ אֱלֹהִים אִם יְהֵי לְכוֹן עוֹד מְתֵיל מַתְלָא הָדֵין בְּיִשְׂרָאֵל:",
        "הָא כָּל נַפְשְׁתָא דִילִי אִינוּן כִּנְפַשׁ אַבָּא וְכִנְפַשׁ בְּרָא קֳדָמַי אִינוּן אֱנַשׁ דְיֶחְטֵי הוּא יְמוּת:",
        "וּגְבַר אֲרֵי יְהֵי זַכַּאי וְיַעְבֵיד דִין דִקְשׁוֹט וְזָכוּ:",
        "בְּטוּרַיָא לָא פְלַח לְטַעֲוָתָא וְעֵינוֹהִי לָא זְקַף לְפוּלְחַן טַעֲוַת בֵּיהּ יִשְׂרָאֵל וְיַת אִתַּת חַבְרֵיהּ לָא סְאֵיב וּלְוַת אִתָּא מְסָאֲבָא לָא עָל:",
        "וֶאֱנַשׁ לָא אוֹנֵי מַשְׁכּוֹן דְחוֹבְתָא אֲתֵיב גְזֵילָא לָא גְזַל מִלְחַמְמֵיהּ לְכָפְנָא יְהֵב וְעַרְטִילָאָה כַּסֵי מִכְּסוּתֵיהּ:",
        "בְּחִבּוּלְיָא לָא יְהַב וְרִבִּיתָא לָא נְסִיב מִשִׁקְרָא אֲתֵיב יְדֵהּ דִין דִקְשׁוֹט עֲבֵיד בֵּין גְבַר לִגְבַר:",
        "בִּקְיָמַי הַלִיךְ וְדִינַי נְטַר לְמֶעְבַּד קְשׁוֹט צַדִיקָא הוּא מֵיחָא יֵחֵי אֲמַר יְיָ אֱלֹהִים:",
        "וְאוֹלֵיד בַּר רַשִׁיעָא אָשֵׁיד דַם וְיַעְבֵּיד לַאֲחוּהִי מַחֲדָא מֵאִלֵין:",
        "וְהוּא יַת כָּל אִלֵין לָא עֲבַד אֱלָהֵין בְּטוּרַיָא פְּלַח לְטַעֲוָתָא וְיַת אִתַּת חַבְרֵיהּ סָאֵיב:",
        "מִסְכֵּן וְחָשִׁיךְ אוֹנִי גְזֵילָא גְזַל מַשְׁכּוֹנָא לָא אֲתֵיב וּלְפוּלְחַן טַעֲוָתָא זְקַף עֵינוֹהִי תּוֹעֵיבָא עָבַד:",
        "בְּחִבּוּלְיָא יְהַב וְרִבִּיתָא נְסִיב הֲאִתְקַיֵם לָא יִתְקַיֵם יַת כָּל תּוֹעֲבָתָּא הָאִלֵין עֲבַד מֵימַת יְמוּת חוֹבַת קְטוֹלֵהּ בֵּיהּ תְּהֵי:",
        "וְהָא אוֹלִיד בַּר וַחֲזָא יַת כָּל חוֹבֵי אֲבוֹהִי דִעֲבָד וַחֲזָא וְלָא עָבַד כְּוַתְהוֹן:",
        "עַל טוּרַיָא לָא פְלַח לְטַעֲוָתָא וְעֵינוֹהִי לָא זְקַף לְפוּלְחַן טַעֲוַת בֵּית יִשְׂרָאֵל וְיַת אִתַּת חַבְרֵיהּ לָא סָאֵיב:",
        "וֶאֱנַשׁ לָא אוֹנִי מַשְׁכּוֹנָא לָא נְסִיב וּגְזֵלָה לָא גְזַל מִלַחְמֵיהּ לְכָפְנָא יְהַב וְעַרְטִילָאָה כַסֵי מִכְּסוּתֵהּ:",
        "מִמַסְכֵּנָא לָא אֲתֵיב יְדֵהּ חִבּוּלְיָא וְרִבִּיתָא לָא נְסִיב דִינִי עֲבִיד בִּקְיָמֵי הֲלִיךְ הוּא לָא יְמוּת בְּחוֹבֵי אֲבוּהִי מֵיחָא יְחֵי:",
        "אֲבוּהִי אֲרֵי עֲשַׁק עִשְׁקָא גְזַל גְזֵלָא לְחַד מֵאֲחוֹהִי וּדְלָא תַקִין עָבֵד בְּגוֹ עַמֵיהּ וְהָא מִית בְּחוֹבֵיהּ:",
        "וְתֵימְרוּן מָא דֵין לָא לָקֵי בְרָא בְּחוֹבֵי אַבָּא וּבְרָא דִין וּקְשׁוֹט וּזְכוּ עָבַד יַת כָּל קְיָמֵי נְטַר וַעֲבַד יַתְהוֹן מֵיחָא יְחֵי:",
        "אֱנַשׁ דְיֵחוֹב הוּא יְמוּת בְּרָא לָא לָקֵי בְּחוֹבֵי אַבָּא וְאַבָּא לָא לָקֵי בְּחוֹבֵי בְרָא זְכוּת זַכָּאָה בֵּיהּ יִתְקַיֵם וְחוֹבַת חַיָבָא עֲלוֹהִי תְהֵא:",
        "וְרַשִׁיעָה אֲרֵי יְתוּב מִכָּל חוֹבוֹהִי דַעֲבַד וְיִטַר יַת כָּל קְיְמַי וְיַעֲבֵיד דִין דִקְשׁוֹט וּזְכוּ מֵיחָא יְחֵי לָא יְמוּת:",
        "כָּל חוֹבוֹהִי דַעֲבַד לָא יִדְכְּרוּן לֵיהּ בִּזְכוּתֵהּ דַעֲבַד יִתְקַיֵם:",
        "הַמִרְעָא רָעֵינָא בְּמוֹתֵיהּ דְרַשִׁיעָא אֲמַר יְיָ אֱלֹהִים הֲלָא כַּד יְתוּב מֵאוֹרְחֵיהּ וְיִתְקַיֵם:",
        "וְכַד יְתוּב זַכָּאָה מִזְכוּתֵהּ וְיַעְבֵּיד שְׁקַר כְּכֹל תּוֹעֲבָתָא דִי עֲבַד רַשִׁיעָא יַעְבֵּיד דְאִתְקַיֵם כָּל זְכוּתֵיהּ דַעֲבַד לָא יִדְכְּרוּן בְּשִׁקְרֵיהּ דִשְׁקַר וּבְחוֹבוֹהִי דִי חַב בְּהוֹן יְמוּת:",
        "וַאֲמַרְתּוּן לָא מַפְרְשַׁן לָנָא אוֹרְחַת טוּבָא דַייָ שְׁמָעוּ כְעַן בֵּית יִשְׂרָאֵל הֲאוֹרְחַת טוּבִי לָא מַפְרְשַׁן לְכוֹן הֲלָא אוֹרְחָתְכוֹן דִילְכוֹן לָא תַקְנָן:",
        "וְכַד יְתוּב זַכָּאָה מִזְכוּתֵהּ וְיַעְבֵּיד שְׁקַר וִימוּת עֲלֵיהוֹן בְּשִׁקְרֵיהּ דִי עֲבַד יְמוּת:",
        "וְכַד יְתוּב רַשִׁיעָא מֵחוֹבוֹהִי דִי עֲבַד וְיַעְבֵּיד דִין דִקְשׁוֹט וּזְכוּ הִיא יַת נַפְשֵׁהּ יְקַיֵם:",
        "וַחֲזָא וְתַב מִכָּל חוֹבוֹהִי דִי עֲבַד מֵיחָא יְחֵי לָא יְמוּת:",
        "וַאֲמָרוּ בֵּית יִשְׂרָאֵל לָא מַפְרְשָׁן לָנָא אוֹרְחַת טוּבָא דַייָ הֲאוֹרְחַת טוּבִי לָא מַפְרְשַׁן לְכוֹן בֵּית יִשְׂרָאֵל הֲלָא אוֹרְחַתְכוֹן דִילְכוֹן לָא תַקְנָן:",
        "בְּכֵן אֱנָשׁ כְּאוֹרְחָתֵיהּ אֶתְפְּרַע מִנְכוֹן בֵּית יִשְׂרָאֵל אֲמַר יְיָ אֱלֹהִים תּוּבוּ לְפוּלְחָנִי וְאַעְדוּ מִנְכוֹן פּוּלְחַן טַעֲוָתָא וְלָא יְהֵי לְכוֹן לְתִקְלַת חוֹבִין:",
        "אַרְחִיקוּ מִנְכוֹן יַת כָּל חוֹבֵיכוֹן דְחַבְתּוֹן בְּהוֹן וֶעֱבִידוּ לְכוֹן לֵב דָחֵיל וְרוּחַ דַחֲלָא וְלָמָה תְמוּתוּן בֵּית יִשְׂרָאֵל:",
        "אֲרֵי לָא רָעֵינָא בְמוֹתָא דְחַיָב לִמְמָת אֲמַר יְיָ אֱלֹהִים תּוּבוּ לְפוּלְחָנִי וְאִתְקַיְמוּ:"
      ],
      [
        "וְאַתְּ טוּל אִלְיָא עַל רַבְרְבֵי יִשְׂרָאֵל:",
        "וְתֵימַר מַה כְּנִשְׁתָּא דְיִשְׂרָאֵל דַהֲוַת דַמְיָא לְלַיְתָא בֵּינֵי מַלְכַיָא רַבָּא בֵּינֵי שִׁלְטוֹנַיָא רַבִּיאַת בְּנָהָא:",
        "וְרַבִּיאַת חַד מִבְּנָהָא מַלְכָּא הֲוָה וַאֲלִיף לְמִקְטַל קְטוֹל אֱנָשָׁא קְטַל:",
        "וּשְׁמָעוּ עֲלוֹהִי עַמְמַיָא בִּסְרִיגַתְהוֹן אִתְאֲחַד וְאַיְתִיאוּהוּ בְּשַׁלְשְׁלָן לְאַרְעָא דְמִצְרָיִם:",
        "וַחֲזַת אֲרֵי פְּסַק אֲבַד סִבּוּרָה וְרַבִּיאַת חַד מִבְּנָהָא מַלְכָּא שַׁוְיָתֵיהּ:",
        "וְהַלֵיךְ בְּגוֹ מַלְכַיָא מַלְכָּא הֲוָה וַאֲלֵיף לְמִקְטַל קְטוֹל אֱנָשָׁא קְטָל:",
        "וְאַצְדֵי בִּרְנְיָתֵיהּ וְקִרִוֵיהוֹן אַחְרִיב וּצְדִיאַת אַרְעָא וּמְלוֹאָהּ מִקָל אִתְרְגֻשְׁתֵּהּ:",
        "וְאִתְכְּנִישׁוּ עֲלוֹהִי עַמְמַיָא סְחוֹר סְחוֹר מִמְדִינָתָא וּפְרָסוּ עֲלוֹהִי מְצָדַתְהוֹן בִּסְרִיגַתְהוֹן אִתְאַחַד:",
        "וְיַהֲבוּהִי בְּקוֹלָרִין בְּשִׁלְשְׁלָן וְאַיְתִיאוּהוּ לְוַת מַלְכָּא דְבָבֶל אַיְתִיאוּהוּ בִּמְצַדְיָא בְּדִיל דְלָא יִשְׁתְּמַע קָלֵיהּ עַד עַל טוּרֵי יִשְׂרָאֵל:",
        "כְּנִשְׁתָּא דְיִשְׂרָאֵל בְּמַעְבְּדָה אוֹרַיְתָא דַמְיָא כְגוּפַן דִשְׁתִילָא עַל מַבּוּעַ דְמַיָן דְנוֹפָהּ שַׁפִּיר וְסוֹכָהּ מַטְלָן הִיא שְׁתִילָה עַל מַיִין סַגִיאִין:",
        "וַהֲווֹ בָּהּ שִׁכלְטוֹנִין תַּקִיפִין וּמַלְכִין דְגִבָּרִין לְשַׁעְבְּדָא מַלְכוּ וְרָאֵים בְּתוּקְפֵיהּ עַל מַלְכוּתֵיהּ וְאִתְנְצַח בְּסוּמְכְוָתֵיהּ בִּסְגֵי גִבָּרוֹהִי:",
        "וְאִתְעַקְרַת בִּתְקוֹף מֵאַרְעָא בֵּית שְׁכִנְתָּא לְאַרְעָא אוֹחֲרֵי אִתְגְלִיאַת וּמְלַךְ דְתַקִיף כְּרוּחַ קִידוּמָא קְטֵיל עַמָהּ אִטַלְטָלוּ וּגְלוֹ שִׁלְטוֹנֵי תוּקְפָא וְעַמְמַיָא דְתַקִיפִין כְּאֶשְׁתָּא שֵׁיצִיאִינוּן:",
        "וּכְעַן דַמְיָא לְגוּפַן דִשְׁתִילָא בִּמַדְבְּרָא בְּאַרְעָא צַדְיָא וַחֲרֵיבָא:",
        "וַאֲתוֹ עַמְמַיָא דְתַקִיפִין כְּאֶשְׁתָּא מֵחוֹבֵי זְדוֹנָהּ עַמָהּ קְטִילוּ וְלָא הֲווֹ בָהּ שִׁלְטוֹנִין תַּקִיפִין מַלְכִין דְגִבָּרִין לְשַׁעְבָּדָא מַלְכוּ אֲמַר נְבִיָא אִלְיָא הִיא נְבוּאֲתָא וּתְהֵי לְאִלְיָא:"
      ],
      [
        "וַהֲוָה בְשַׁתָּא שְׁבִיעֲתָא בְּחַמְשָׁא בְּעַסְרָא לְיַרְחָא אֲמַר נְבִיָא אֲתוֹ גַבְרִין מִסָבֵי יִשְׂרָאֵל לְמִתְבַּע אוּלְפַן מִן קֳדָם יְיָ וִיתִיבוּ קֳדָמַי:",
        "וַהֲוָה פִתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אִתְנַבֵּי לְסָבֵי יִשְׂרָאֵל וְתֵימַר לְהוֹן כִּדְנַן אֲמַר יְיָ אֱלֹהִים הַלְמִתְבַּע אוּלְפַן מִן קֳדָמַי אַתּוּן אָתָן קַיָם אֲנָא אִם אֶשְׁתְּאֵיל לְכוֹן בְּמֵימְרִי אֲמַר יְיָ אֱלֹהִים:",
        "הֲתוֹכַח יַתְהוֹן הֲתוֹכַח בַּר אָדָם יַת תּוֹעֲבַת אֲבָהַתְהוֹן הוֹדָעִינוּן:",
        "וְתֵימַר לְהוֹן כִּדְנַן אֲמַר יְיָ אֱלֹהִים בְּיוֹמָא דְאִתְרְעֵיתִי בְיִשְׂרָאֵל וְקַיְמֵית לְהוֹן בְּמֵימְרִי לְזַרְעָא דְבֵית יַעֲקֹב וְאִתְגְלֵיתִי לְמִפְרַקְהוֹן בְּאַרְעָא דְמִצְרַיִם וְקַיְמֵית בְּמֵימְרִי לְהוֹן לְמֵימָר אֲנָא יְיָ אֱלָֹהָכוֹן:",
        "בְּיוֹמָא הַהוּא קַיְמִית לְהוֹן בְּמֵימְרִי לְאַפָּקוּתְהוֹן מֵאַרְעָא דְמִצְרַיִם לְאַרְעָא דִיהָבֵית לְהוֹן עַבְדָא חֲלַב וּדְבָשׁ תּוּשְׁבְּחָא הִיא לְכָל מְדִינָתָא:",
        "וַאֲמָרֵית לְהוֹן גְבַר יַת שִׁקוּצוֹהִי אַרְחִיקוּ מִקֳבֵיל עֵינוֹהִי וּבְפוּלְחַן טַעֲוַת מִצְרָאֵי לָא תִּסְתַּאֲבוּן אֲנָא יְיָ אֱלָהָכוֹן:",
        "וְסָרִיבוּ עַל מֵימְרִי וְלָא אָבוּ לְקַבָּלָא לִנְבִיֵי גְבַר יַת שִׁקוּצֵי עֵינֵיהוֹן לָא אַרְחִיקוּ וְיַת פּוּלְחַן טַעֲוַת מִצְרָאֵי לָא שְׁבָקוּ וַאֲמָרֵית לְמִשְׁפַּךְ חֵימְתִי עֲלֵיהוֹן דְיָחוּל רוּגְזִי בְּהוֹן בְּגוֹ אַרְעָא דְמִצְרָיִם:",
        "וַעֲבָדֵית בְּדִיל שְׁמִי בְּדִיל דְלָא יִתְחַל לְעֵינֵי עַמְמַיָא דִי אִינוּן בֵּינֵיהוֹן דְאִתְגְלֵיתִי לְמִפְרַקְהוֹן לְעֵינֵיהוֹן לְאַפָּקוּתְהוֹן מֵאַרְעָא דְמִצְרָיִם:",
        "וְאַפֵּיקְתִּינוּן מֵאַרְעָא דְמִצְרָיִם וְאָעֵלְתִּינוּן לְמַדְבְּרָא:",
        "וִיהָבֵית לְהוֹן יַת קְיָמַי וְיַת דִינַי הוֹדְעֵית יַתְהוֹן דְאִם יַעְבֵּיד יַתְהוֹן אֱנָשָׁא וִיחֵי בְהוֹן בְּחַיֵי עַלְמָא:",
        "וְאַף יַת יוֹמֵי שַׁבַּיָא דִילִי יְהָבֵית לְהוֹן לְמֶהֱוֵי לְאָת בֵּין מֵימְרִי וּבֵינֵיהוֹן לְמֵדַע אֲרֵי אֲנָא יְיָ מְקַדְשֵׁיהוֹן:",
        "וְסָרִיבוּ עַל מֵימְרִי בֵּית יִשְׂרָאֵל בְּמַדְבְּרָא בִּקְיָמַי לָא הֲלִיכוּ וְיַת דִינַי קָצוּ דְאִם יַעְבֵּיד יַתְהוֹן אֱנָשָׁא וְיֵיחֵי בְהוֹן חַיֵי עַלְמָא וְיַת יוֹמֵי שַׁבַּיָא דִילִי אֲחִילוּ לַחֲדָא וַאֲמָרֵית לְמִשְׁפַּךְ חֲמָתִי עֲלֵיהוֹן בְּמַדְבְּרָא לְשֵׁיצָיוּתְהוֹן:",
        "וַעֲבָדֵית בְּדִיל שְׁמִי בְּדִיל דְלָא יִתְחַל לְעֵינֵי עַמְמַיָא דְאַפֵיקְתִּינוּן לְעֵינֵיהוֹן:",
        "וְאַף אֲנָא קַיְמֵת בְּמֵימְרִי לְהוֹן בְּמַדְבְּרָא בְּדִיל דְלָא לְאָעֲלָא יַתְהוֹן לְאַרְעָא דִי יְהָבֵית עָבְדָא חֲלַב וּדְבַשׁ תּוּשְׁבְּחָא הִיא לְכָל מְדִינָתָא:",
        "חֲלַף דִי בְדִינַי קָצוּ וְיַת קְיָמַי לָא הַלִיכוּ בְּהוֹן וְיַת יוֹמֵי שַׁבַּיָא דִילִי אֲחִילוּ אֲרֵי בָתַר פוּלְחַן טַעֲוָתְהוֹן לִבְּהוֹן טָעֵי:",
        "וְחָס מֵימְרִי עֲלֵיהוֹן מִלְחַבְּלוּתְהוֹן וְלָא עֲבָדִית עִמְהוֹן גְמִירָא בְּמַדְבְּרָא:",
        "וַאֲמָרֵית לִבְנֵיהוֹן בְּמַדְבְּרָא בִּגְזֵירַת אֲבָהַתְכוֹן לָא תְהָכוּן וְיַת נִימוּסֵיהוֹן לָא תִטְרוּן וּבְפוּלְחַן טַעֲוָתְהוֹן לָא תִסְתַּאֲבוּן:",
        "אֲנָא יְיָ אֱלָהָכוֹן בִּקְיָמֵי הֲלִיכוּ וְיַת דִינֵי טָרוּ וַעֲבִידוּ יַתְהוֹן:",
        "וְיַת יוֹמֵי שַׁבַּיָא דִילִי קַדִישׁוּ וִיהוֹן לְאָת בֵּין מֵימְרִי וּבֵינֵיכוֹן לְמֵידַע אֲרֵי אֲנָא יְיָ אֱלָהָכוֹן:",
        "וְסָרִיבוּ עַל מֵימְרִי בְּנַיָא בִּקְיָמַי לָא הֲלִיכוּ וְיַת דִינַי לָא נְטָרוּ לְמֶעְבַּד יַתְהוֹן דְאִם יַעְבֵּיד יַתְהוֹן אֱנָשָׁא וִיחֵי בְהוֹן בְחַיֵי עַלְמָא יַת יוֹמֵי שַׁבַּיָא דִילִי אֲחִילוּ וַאֲמָרֵית לְמִשְׁפַּךְ חֵימְתִי עֲלֵיהוֹן דְיָחוּל רוּגְזִי בְהוֹן בְּמַדְבְּרָא:",
        "וַאֲתֵיב יַת מְחַת גְבוּרְתִּי וַעֲבָדֵית בְּדִיל שְׁמִי בְּדִיל דְלָא יִתְחַל לְעֵינֵי עַמְמַיָא דְאַפְקֵית יַתְהוֹן לְעֵינֵיהוֹן:",
        "אַף אֲנָא קַיְמֵית בְּמֵימְרִי לְהוֹן בְּמַדְבְּרָא לְאַגְלָאָה יַתְהוֹן לְבֵינֵי עַמְמַיָא וּלְבַדָרָא יַתְהוֹן בִּמְדִינָתָא:",
        "חֲלַף דְדִינֵי לָא עֲבָדוּ וּבִקְיָמַי קָצוּ וְיַת יוֹמֵי שַׁבַּיָא דִילִי אֲחִילוּ וּבָתַר טַעֲוַת אֲבָהַתְהוֹן הֲוָאָה עֵינֵיהוֹן:",
        "וְאַף אֲנָא מִדְמָרְדוּ בְמֵימְרֵי וְלָא אָבוּ לְקַבָּלָא לִנְבִיאַי אַרְחֵיקְתִּינוּן וּמְסַרְתִּינוּן בְּיַד שַׂנְאֵיהוֹן וּבָתַר יִצְרֵיהוֹן טִפְּשָׁא אֲזָלוּ וַעֲבָדוּ גְזֵירָן דְלָא תַקְנָן וְנִימוּסִין דְלָא אִתְקַיֵמְתּוּן בְּהוֹן:",
        "וְסָאִיבֵית יַתְהוֹן בְּמַתְּנָתְהוֹן בְּאַעֲבְּרָא כָּל פְּתַח וַלְדָא בְדִיל דְאַצְדִינוּן בְּדִיל דְיֵדְעוּן דִי אֲנָא יְיָ:",
        "בְּכֵן אִתְנַבֵּי לְבֵית יִשְׂרָאֵל בַּר אָדָם וְתֵימַר לְהוֹן כִּדְנַן אֲמַר יְיָ אֱלֹהִים עוֹד דָא אַרְגִיזוּ קָדְמַי אֲבָהָתְכוֹן בִּדְשַׁקָרוּ בְּמֵימְרִי שְׁקַר:",
        "וְאָעֵילְתִּינוּן לְאַרְעָא דְקַיֵמִית בְּמֵימְרִי לְמִתַּן יָתָהּ לְהוֹן וַחֲזוֹ כָּל רָמָא מְנַטְלָא וְכָל אִילַן עַבּוּף וּנְכִיסוּ תַמָן אַרְגָזָא קוּרְבָּנֵיהוֹן וְשַׁוִיאוּ תַמָן פּוּלְחַן דִבְחֵיהוֹן וּנְסִיכוּ תַמָן יַת נִכְסֵיהוֹן:",
        "וַאֲמָרֵית לְהוֹן מָא בָמָתָא דְאַתּוּן אָתָן לְאִשְׁתְּטָאָה תַמָן וְאִתְקְרִי שְׁמָהּ בָּמָתָא עַד יוֹמָא הָדֵין:",
        "בְּכֵן אֲמַר לְבֵית יִשְׂרָאֵל כִּדְנַן אֲמַר יְיָ אֱלֹהִים הַבְּאוֹרַח אֲבָהַתְכוֹן אַתּוּן מִסְתַּאֲבִין וּבָתַר שִׁקוּצֵיהוֹן אַתּוּן טָעָן:",
        "וּבְמַטַל מַתְּנָתֵיכוֹן בְּאַעֲבָרָא בְּנֵיכוֹן בְּנוּרָא אַתּוּן מִסְתַּאֲבִין לְכָל פּוּלְחַן טַעֲוָתְכוֹן עַד יוֹמָא דֵין וַאֲנָא אֶשְׁתָּאֵיל לְכוֹן בְּמֵימְרִי בֵּית יִשְׂרָאֵל קַיָם אֲנָא אֲמַר יְיָ אֱלֹהִים אִם אֶשְׁתְּאֵין לְכוֹן בְּמֵימְרִי:",
        "וּדְאַתּוּן מְהַרְהֲרִין וְדִסְלִיקַת עַל לִבְּכוֹן קֳדָמַי גַלְיָן דְאַתּוּן אָמְרִין נְהֵי כְעַמְמַיָא כְּזַרְעֲיַת מְדִינָתָא לְשַׁמְשָׁא אָעָא וְאַבְנָא:",
        "קַיָם אֲנָא אֲמַר יְיָ אֱלֹהִים אִם לָא בְּיַד תַּקִיפָא וּבְדַרְעָא מְרוֹמָם וּבִרְגַז שְׁפִיךְ אֶמְלוֹךְ עֲלֵיכוֹן:",
        "וְאַפֵּיק יַתְכוֹן מִבֵּינֵי עַמְמַיָא וְאַכְנֵישׁ יַתְכוֹן מִן מְדִינָתָא דְאִתְבַּדַרְתּוּן בְּהוֹן בְּיַד תַּקִיפָא וּבְדַרְעָא מְרוֹמָם וּבִרְגַז שְׁפִיךְ:",
        "וְאָעֵיל יַתְכוֹן לְמִדְבַּר עַמְמַיָא וְאִתְפְּרַע מִנְכוֹן תַּמָן אַפִּין בְּאַפִּין:",
        "כְּמָא דְאִתְפְּרָעֵית מִן אֲבָהַתְכוֹן בְּמַדְבְּרָא אַרְעָא דְמִצְרָיִם כֵּן אִתְפְּרַע מִנְכוֹן אֲמַר יְיָ אֱלֹהִים:",
        "וַאֲנִיחַ עֲלֵיכוֹן גְזֵירַת דִינִי וְאָעֵיל יַתְכוֹן בְּמַסוֹרֶת קַיָמָא:",
        "וְאַפְרִישׁ מִנְכוֹן דִי מְרָדוּ וְדִי שַׁקָרוּ בְמֵימְרִי מֵאַרְעָא תוֹתְבוּתְהוֹן אַפֵיק יַתְהוֹן וּלְאַרְעָא דְיִשְׂרָאֵל לָא יַעֲלוּן וְתֵידְעוּן אֲרֵי אֲנָא יְיָ:",
        "וְאַתּוּן בֵּית יִשְׂרָאֵל כִּדְנַן אֲמַר יְיָ אֱלֹהִים גְבַר פּוּלְחַן טַעֲוָתֵהּ אֱזִילוּ פְלָחוּ וּבָתַר דְתַבְתּוּן לֵיתֵיכוֹן צָבָן לְקַבָּלָא לְמֵימְרִי וְיַת שְׁמָא דְקוּדְשִׁי לָא תַחֲלוּן עוֹד בְּמַתְּנָתֵכוֹן וּבְטַעֲוָתְכוֹן:",
        "אֲרֵי בְטוּר קוּדְשִׁי בְּטוּר קוּדְשָׁא דְיִשְׂרָאֵל אֲמַר יְיָ אֱלֹהִים תַּמָן יִפְלְחוּן קֳדָמַי כָּל בֵּית יִשְׂרָאֵל כּוּלְהוֹן בְּאַרְעָא חַיַיָא תַּמָן יִתְקַבֵּל קוּרְבָּנֵיהוֹן בִּפְרִיעַ וְתַמָן אֶתְבַּע יַת אַפְרָשׁוּתְכוֹן וְיַת רֵישׁ אַצְוָתְכוֹן בְּכָל קוּדְשֵׁיכוֹן:",
        "קוּרְבַּן לְרַעֲוָא יִתְקַבֵּל קוּרְבַּנְכוֹן בִּפְרִיעַ כַּד אַפֵּיק יַתְכוֹן מִבֵּינֵי עַמְמַיָא וְאַכְנֵישׁ יַתְכוֹן מִן מְדִינָתָא דְאִתְבַּדַרְתּוּן בְּהָן וְאֶתְקַדֵשׁ בְּכוֹן לְעֵינֵי עַמְמַיָא:",
        "וְתֵידְעוּן אֲרֵי אֲנָא יְיָ כַּד אָעֵיל יַתְכוֹן לְאַרְעָא דְיִשְׂרָאֵל דִי קַיֵמִית בְּמֵימְרִי לְמִתַּן יָתָהּ לַאֲבָהָתְכוֹן:",
        "וְתִדְכְּרוּן תַּמָן יַת אוֹרְחָתְכוֹן וְיַת כָּל עוֹבָדֵיכוֹן דְאִסְתַּאַבְתּוּן בְּהוֹן וְתִידַנְקוּן וּתְהוֹן חָזָן בְּכָל בִּישַׁתְכוֹן דַעֲבַדְתּוּן:",
        "וְתֵידְעוּן אֲרֵי אֲנָא יְיָ כַּד אַעְבֵּיד עִמְכוֹן בְּדִיל שְׁמִי לָא כְאוֹרְחָתְכוֹן בִּישְׁתָא וּכְעוֹבָדֵיכוֹן מְחַבְּלַיָא בֵּית יִשְׂרָאֵל אֲמַר יְיָ אֱלֹהִים:"
      ],
      [
        "וַהֲוָה פִּתְגָם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם קַבֵּיל נְבוּאָה לְאוֹרַח דָרוֹמָא וְאַלֵיף עַל דָרוֹמָא וְאִתְנְבֵּי עַל חוּרְשָׁא דַחֲקַל דָרוֹמָא:",
        "וְתֵימַר לְחוּרְשָׁא דְדָרוֹמָא קַבֵּיל פִּתְגָמָא דַייָ כִּדְנַן אֲמַר יְיָ אֱלֹהִים הָא אֲנָא מַדְלִיק בָּךְ אֶשְׁתָּא וְתִקְטֵיל בָּךְ כָּל אִילַן יַבִּישׁ לָא תִטְפֵי לְשַׁלְהוֹבִיתָא דִמְשֵׁיצְיָא וְיִתְרַשְׁמוּן בָּהּ כָּל אַפַּיָא מִדְרוֹם לְצִפּוּנָא:",
        "וְיֶחֱזוּן כָּל בְּנֵי בִסְרָא אֲרֵי אֲנָא יְיָ אַדְלִיקְתָּהּ לָא תִטְפֵי:",
        "וַאֲמָרֵית קַבֵּיל בָּעוּתִי יְיָ אֱלֹהִים הָא אִינוּן אָמְרִין לִי הֲלָא מַמְתֵיל מַתְלִין הוּא:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם קַבֵיל נְבוּאָה עַל יְרוּשְׁלֵם וְאַלֵיף עַל מַקְדְשִׁין וְאִתְנַבֵּי עַל אַרְעָא דְיִשְׂרָאֵל:",
        "וְתֵימַר לְאַרְעָא דְיִשְׂרָאֵל כִּדְנַן אֲמַר יְיָ הָא אֲנָא שְׁלַח רוּגְזִי עֲלָךְ וְאַפֵּיק חַרְבִּי מִלִדְנָהּ וְאַגְלֵי מִנִיךְ זַכָּאָךְ בְּדִיל לְשֵׁיצָאָה חַיָבָךְ:",
        "חֲלַף דְאַגְלֵי מִנִיךְ זַכָּאָךְ בְּדִיל לְשֵׁיצָאָה חַיָבָךְ בְּכֵן תִּפּוֹק חַרְבִּי מִלִדְנָהּ עַל כָּל בִּסְרָא מִדָרוֹם לְצִפּוּנָא:",
        "וְיֵדְעוּן כָּל בְּנֵי בִּסְרָא אֲרֵי אֲנָא יְיָ אַפְקֵית חַרְבִּי מִלִדְנָהּ לָא תְתוֹב עוֹד:",
        "וְאַתְּ בַּר אָדָם אִתְאַנַח בְּזִיעַ חַרְצִין וּבְמֶרֶר תִּתְאַנַח לְעֵינֵיהוֹן:",
        "וִיהֵי אֲרֵי יֵמְרוּן לָךְ עַל מָה אַתְּ מִתְאַנַח וְתֵימַר עַל בְּסוֹרְתָא אֲרֵי אַתְיָא וְיִתְמְסֵי כָּל לֵב וְיִתְרַשְׁלָן כָּל יְדֵין וְתֶעֱמֵי כָל רוּחַ וְכָל רְכוּבַיָא יִתְאַשְׁדָן מַיָא הָא אַתְיָא וְתִתְקַיֵם אֲמַר יְיָ אֱלֹהִים:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אִתְנַבֵּי וְתֵימַר כִּדְנַן אֲמַר יְיָ אֱלֹהִים אֲמַר חַרְבָּא דְמַלְכָּא דְבָבֶל תִּקְטוֹל וְחַרְבָּא דִבְנֵי עַמוֹן תִּתְּנֵי וּתְשֵׁיצֵי:",
        "בְּדִיל לְמִקְטַל קְטוֹל אִשְׁתְּלִיפַת בְּדִיל לְמֶעְבַּד פּוּרְעֲנוּת אִשְׁתַּנִינַת עַל דְחָדִיאוּ שִׁבְטָא דְבֵית יְהוּדָה וּבִנְיָמִין לְשִׁבְטֵי יִשְׂרָאֵל כַּד גְלוֹ עַל דִפְלָחוּ לְטַעֲוָתָא וְתָבוּ אִינוּן לְמִטְעֵי בָּתַר צַלְמֵי אָעַיָא:",
        "וִיהַב פּוּרְעֲנוּתְהוֹן לְאִתְמַסְרָא בְּיַד מַלְכָּא דְבָבֶל הִיא מְחַת חַרְבָּא תְּהֵי פּוּרְעֲנוּתְהוֹן לְמִמְסַר יַתְהוֹן בְּיַד קָטוֹלִין:",
        "צְוַח וְאַיְלֵיל בַּר אָדָם אֲרֵי הִיא הֲוַת בְּעַמִי הִיא וְכָל רַבְרְבֵי יִשְׂרָאֵל קְטוֹלֵי חַרְבָּא אִתְכַּנְשׁוּ וְאָתוּ עַל עַמִי מִסְחוֹר סְחוֹר בְּכֵן טְפַח עַל יַרְכָא:",
        "אֲרֵי אִתְנַבִּיאוּ עֲלֵיהוֹן נְבִיָא וְלָא תָבוּ וּמָה יְהֵי בְסוֹפֵיהוֹן אֱמַר וְאַף שִׁבְטָא דְבֵית יְהוּדָה וּבִנְיָמִין מִגְלָא יַגְלוּן וּבְעוֹבְדֵיהוֹן בִּישַׁיָא לָא יִתְקַיְמוּן אֲמַר יְיָ אֱלֹהִים:",
        "וְאַתְּ בַּר אָדָם אִתְנַבֵּי וּטְפַח יַד עַל יַד וְתִתְכְּפֵיל חַרְבָא תְלִיתָאָה חֲרַב קְטוֹלִין הִיא חֲרָב פּוּרְעֲנוּת קְטוֹלָא רַבָּא דִמְזִיעָא לְהוֹן:",
        "בְּדִיל לְמִתְבַּר לִבְּהוֹן וּלְאַסְגָאָה מַתְקַלְהוֹן עַל כָּל קִרְוֵיהוֹן מַנִיתִי קָטְלֵי חַרְבָּא וֵי חַרְבָּא אִשְׁתְּלִיפַת לְמִקְטֵל אִשְׁתְּנִינִת לְשֵׁיצָאָה:",
        "אִשְׁתְּלִיפִי וּקְטִילִי מִדָרוֹמָא וְשֵׁיצֵי מִן צִפוּנָא לְאָן אַפָּךְ מְזַמְנִין:",
        "וְאַף אֲנָא אַיְתֵי פּוּרְעֲנוּת עַל פּוּרְעֲנוּת וַאֲנִיחַ חֵימְתִי אֲנָא יְיָ גְזַרֵית בְּמֵימְרִי:",
        "וַהֲוָה פִּתְגָם נְבוּאָה מִן קֳדָם יְיָ עִמִי לְמֵימָר:",
        "וְאַתְּ בַּר אָדָם אַתְקִין לָךְ תַּרְתֵּין אוֹרְחָן דְיֵיתוּן בְּהוֹן קְטוֹלֵי חַרְבָּא דְמַלְכָּא דְבָבֶל מִמְדִינְתָא הֲדָא יִפְקוּן תַּרְוֵיהוֹן וְאַתְרָא אַתְקִין בְּרֵישׁ פְּרָשׁוּת אוֹרַח קַרְתָּא אַתְרָא אַתְקֵין:",
        "אוֹרְחָא אַתְקֵין דְיֵיתוּן בָּהּ קְטוֹלֵי חַרְבָּא מֵרַבַּת בְּנֵי עַמוֹן וְעַל דְבֵית יְהוּדָה דִי נְפַקוּ מִירוּשְׁלֵם לְמֵיתַב בְּקִרְוִין כְּרִיכָן:",
        "אֲרֵי קָם מַלְכָּא דְבָבֶל עַל אֵם פְּרָשׁוּת אוֹרַח בְּרֵישׁ תַּרְתֵּין אוֹרַח לְמִקְסָם קָסֶם קְשַׁת בְּגִרְרַיָא שָׁאַל בְּצַלְמְנַיָא חֲזָא בְּכַבְדָא:",
        "בִימִינֵיהּ הֲוָה קִסְמָא נָפִיל לִמְהַךְ לִירוּשְׁלֵם לְמַנְאָה אָפְרוּרְוָן לְפַתָּרָא תַרְעִין דְיַעֲלוּן בְּהוֹן קָטוֹלִין לַאֲרָמָא קַל בְּאַצְוָחַת קַרְנָא לְמַנְאָה אָפְרוּרְוָן עַל תַּרְעֵן לְמִצְבַּר מִלַיְתָא וּלְמִבְנֵי כַרְקוֹם:",
        "וַהֲוָה לְהוֹן קִסוּמֵיהוֹן כַּדִיבִין בְּעֵינֵיהוֹן נַחֲשִׁין דַהֲוָה מְנַחַשׁ לְהוֹן וְאִינוּן לָא יָדְעִין דְאַרְבְּעִין וּתְשַׁע זַמְנִין הֲוָה כְמַן וּמִתְּתֵיב עַל פִּתְגָמָא עַד דְתֵיתֵי לֵיהּ שַׁעְתָּא דְיִתְמַסְרוּן בִּידֵיהּ:",
        "בְּכֵן כִּדְנַן אֲמַר יְיָ אֱלֹהִים חֲלַף דְאַדְכַּרְתּוּן חוֹבֵיכוֹן בְּאִתְגְלָאָה מְרָדֵיכוֹן לְאִתְחֲזָאָה חֶטְאֵיכוֹן בְּכֹל עוֹבָדֵיכוֹן חֲלַף דְאַדְכַּרְתּוּן בְּיַד מַלְכָּא דְבָבֶל תִּתְמַסְרוּן:",
        "וְאַתְּ חַיָב קְטָלָא רַשִׁיעָא רַבָּא דְיִשְׂרָאֵל דִמְטָא יוֹם תַּבְרֵיהּ עִדַן תּוּשְׁלְמַת חוֹבוֹהִי:",
        "כִּדְנַן אֲמַר יְיָ אֱלֹהִים אַעְדֵי מִצְנָפְתָּא מִשְׁרָיָה כַּהֲנָא רַבָּא וַאֲבַטֵיל כִּתְרָא מִצִדְקִיָה מַלְכָּא אֲמַר דֵין וְדֵין בְּאַתְרֵיהּ לָא יִתְקַיֵם מִגְלָא יִגְלוֹן גְדַלְיָה בַּר אֲחִיקָם דְלָא הֲוָה דִילֵיהּ יִסְבִינָהּ וְצִדְקִיָה דְדִילֵיהּ הִיא תַּעְדֵי מִנֵיהּ:",
        "חוֹבֵיהוֹן דְחָבוּ כְּחוֹבֵיהוֹן אֶתְפְּרַע מִנְהוֹן אַף לְדֵין לָא יִתְקַיֵם לֵיהּ עַד דְאַיְתֵי עֲלוֹהִי פּוֹרְעֲנוּת יִשְׁמָעֵאל בַּר נְתַנְיָה וְאֶמְסְרִינֵיהּ בִּידֵיהּ:",
        "וְאַתְּ בַּר אָדָם אִתְנַבֵּי וְתֵימַר כִּדְנַן אֲמַר יְיָ אֱלֹהִים עַל בְּנֵי עַמוֹן וְעַל חִסוּדֵיהוֹן וְתֵימַר חַרְבָּא חַרְבָּא אִשְׁתַּלְפַת לְמִקְטַל אִשְׁתַּנִינַת לְשֵׁיצָאָה בְּדִיל לְמֶהֱוֵי לָהּ צַחְצוּחִין:",
        "בְּאִתְנַבָּאָה לָךְ שְׁקַר בְּאַלְפָא לָךְ כִּדְבָן לְמִמְסַר יַת צַוְרָךְ כְּצַוְרֵי קְטִילֵי רַשִׁיעַיָא דִמְטָא יוֹם תְּבִירְהוֹן עִדַן סְעוּרַן בִּישַׁתְהוֹן:",
        "אֲתִיב חַרְבָּא לִנְדָנָהּ בְּאַתְרָא דְאִתְבְּרֵיתוּן בַּאֲרַע תּוֹתָבוּתְכוֹן אֶתְפְּרַע מִנְכוֹן:",
        "וְאֶשְׁפּוֹךְ עֲלָךְ חֵימָתִי בְּאֵשַׁת פּוּרְעֲנוּתִי אַתְקֵיף עֲלָךְ וְאֶמְסְרִינָךְ בְּיַד גִבָּרִין רַשִׁיעִין דְאוֹמָנִין לְחַבָּלָא:",
        "לְעַמָמַיָא דְתַקִיפִין כְּאֶשְׁתָּא תִּתְמָסְרוּן לְאִשְׁתֵּיצָאָה חוֹבַת קְטוֹלָךְ תְּהֵי בְגוֹ אַרְעָא לָא יֵעוּל דָכְרָנִיךְ אֲרֵי אֲנָא יְיָ גְזֵרִית בְּמֵימְרִי:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "וְאַתְּ בַּר אָדָם הֲתוֹכַח הֲתוֹכַח יַת קַרְתָּא דְאִשְׁדֵי דַם זַכַּאי בְּגַוָהּ וְחַוֵי לָהּ יַת כָּל תּוֹעֲבָתָהָא:",
        "וְתֵימַר כִּדְנַן אֲמַר יְיָ אֱלֹהִים קַרְתָּא דְאַשְׁדֵי דַם זַכַּאי בְּגַוָהּ מְטָא עִדַן תַּבְרָהּ וּדְפָלְחִין לְטַעֲוָתָא בְגַוָהּ בְּדִיל לְסַאֲבוּתָא:",
        "בְּחוֹבַת דַם זַכַּאי דִאַשַׁדְתְּ חַבְתְּ וּבְּפוּלְחָן טַעֲוָתֵךְ דִפְלַחְתְּ אִסְתַּאַבְתְּ וְקָרֵיב יוֹם תַּבְרִיךְ וּמְטָא עִדַן בִּישְׁתִּיךְ עַל כֵּן יְהַבְתִּיךְ חִסוּדִין לְעַמְמַיָא וּלְעֵיב לְכָל מִדִינָתָא:",
        "דְקָרִיבִין וְדִרְחִיקִין מִנִיךְ יִתְלַעֲבוּן בִּיךְ סוֹאֲבַת שְׁמָא דְסַגִיאִין אִתְרְגוּשְׁתָּהָא:",
        "הָא רַבְרְבֵי יִשְׂרָאֵל גְבַר לְתוּקְפֵיהּ הֲווֹ בִיךְ בְּדִיל לְמִשְׁפַּךְ דַם זַכַּאי:",
        "אַבָּא וְאִמָא אָקִילוּ בָךְ לְגִיוֹרָא אֲנִיסוּ אוֹנְסָא בְּגַוִיךְ יַתְמִין וְאַרְמְלָן אוֹנִיאוּ בִיךְ:",
        "עַל קוּדְשֵׁי בִּסַרְתְּ וְיַת יוֹמֵי שַׁבַּיָא דִילִי אָחֵילְתְּ:",
        "גַבְרֵי אָכְלֵי קוּרְצָא הֲיוֹ בִיךְ בְּדִיל לְמִשְׁפַּךְ דַם זַכַּאי וּבְטוּרַיָא פְלָחוּ בִיךְ לְטַעֲוָתָא אֲרֵי עֵיצַת חֶטְאִין עֲבָדוּ בְגַוִיךְ:",
        "עֶרְיַת אַבָּא גַלִיאוּ בִּיךְ אִתָּא טוּמְאָה עֵנִיאוּ בִיךְ:",
        "וּגְבַר יַת אִתַּת חַבְרֵיהּ עֲבַד תּוֹעֵיבָא וּגְבַר יַת כַּלָתֵיהּ סָאֵיב בְּעֵיצַת חֶטְאִין וּגְבַר יַת אֲחָתֵיהּ בַת אֲבוּהִי עַנֵי בִיךְ:",
        "שׁוֹחֲדָא קַבִּילוּ בִיךְ בְּדִיל לְמִשְׁפַּךְ דַם זַכַּאי חִבּוּלְיָא וְרִבִּיתָא נְסֵיבְתְּ וְאַהֲנֵית רְחִימָךְ בְּאוּנְסָא וּפּוּלְחָנִי שְׁבַקְתְּ אֲמַר יְיָ אֱלֹהִים:",
        "וְהָא אַיְתֵיתִי פּוּרְעֲנוּתִי עֲלָךְ בְּחוֹבֵי מָמוֹן אוֹנְסִיךְ דַאֲנַסְתְּ וְעַל דַם זַכַּאי דְאִשְׁתְּפִיךְ בְּגַוִיךְ:",
        "הֲיִתְקַף לִבִּיךְ אִם יִתְחַסְנָן יְדֵיךְ לְיוֹמַיָא דַאֲנָא עֲתִיד לְמֶעְבַד עִמָךְ אֲנָא יְיָ גְזָרֵית בְּמֵימְרִי וַאֲקַיֵם:",
        "וְאַגְלֵי יָתִיךְ לְבֵינֵי עַמְמַיָא וְאַבַדְרִינָךְ בִּמְדִינָתָא וַאֲסִיף סְאוֹבְתִּיךְ מִנֵיךְ:",
        "וְאֶתְקַדֵשׁ בִּיךְ לְעֵינֵי עַמְמַיָא וְתֵידְעוּן אֲרֵי אֲנָא יְיָ:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם הֲווֹ קֳדָמַי בֵּית יִשְׂרָאֵל לִפְסוּלָא כּוּלְהוֹן כְּמָא דִמְעָרַב נְחַשׁ וּבְעִיץ וּבַרְזֶל וַאֲבַר בְּגוֹ כוּרָא לִפְּסוֹלַת כַּסְפָּא הֲווֹ:",
        "בְּכֵן כִּדְנַן אֲמַר יְיָ אֱלֹהִים חֲלַף דַהֲוֵיתוּן כּוּלְכוֹן לִפְסוּלָא בְּכֵן הָא אֲנָא כָנֵישׁ יַתְכוֹן לְגוֹ יְרוּשְׁלֵם:",
        "כְּמַכְנֵשׁ כְּסַף וּנְחַשׁ וּבַרְזְלָא וַאֲבַר וּבְעִיץ לְגוֹ כוּרָא לְאַתְקָפָא עֲלוֹהִי נוּרָא לְאַמְסָיוּתֵיהּ כֵּן אַכְנֵשׁ בְּרוּגְזִי וּבְחֵימְתִי וְאָסֵיף וֶאֱשֵׁיצֵי יַתְכוֹן:",
        "וְאַכְנֵישׁ יַתְכוֹן וְאַתְקֵיף עֲלֵיכוֹן בְּאֶשְׁתָּא פּוּרְעֲנוּתִי וְתִתְמְסוּן בְגַוָהּ:",
        "כְּאִתְמְסָאָה כְסַף בְּגוֹ כוּרָא כֵּן תִּתְמְסוּן בְּגַוָהּ וְתִידְעוּן אֲרֵי אֲנָא יְיָ שְׁפִיכֵית חֵימְתִי עֲלֵיכוֹן:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אֲמַר לָהּ אַתְּ אַרְעָא דְיִשְׂרָאֵל אַרְעָא לָא מִדַכְיָא הִיא וְלָא אִתְעֲבִידוּ בָּהּ עוֹבָדִין טָבִין דְיִגְנוּן עֲלָהּ בְּיוֹם לְוָט:",
        "סִיעַת סַפְרָהָא בְּגַוָהּ כְּאַרְיְוָן נָהֲמִין לְמִקְטַל קְטוֹל אֱנָשָׁא קְטָלוּ עוֹתֵר וִיקָר נְסִיבוּ אַרְמַלְתָּהָא אַסְגִיאוּ בְּגַוָהּ:",
        "כַּהֲנָהָא חָטְפִין בְּאוֹרַיְתִי וּמַפְסִין קֳדָשַׁי בֵּין קוּדְשָׁא לְחוֹלָא לָא אַפְרִישׁוּ וּבֵין מְסַאֲבָא לְדַכְיָא לָא הוֹדִיעוּ וּמִיוֹמֵי שַׁבַּיָא דִילִי כְבָשׁוּ עֵינֵיהוֹן וְחַלַת רְעוּתִי בֵּינֵיהוֹן:",
        "רַבְרְבָהָא בְגַוָהּ כַדִיבִין חָטְפֵי חֲטוֹף לְמִשְׁפַּךְ דַם זַכַּאי לַאֲבָדָא נַפְשָׁן בְּדִיל לְקַבָּלָא מָמוֹן דִשְׁקַר:",
        "וּנְבִיֵי שִׁקְרָא דִי בְגַוָה דָמָן לִדְבָנֵי מְחִיצָא וְשָׁעֵיעַ לֵיהּ טִין פַטִיר דְלָא תֶּבֶן מִתְנַבַּן שְׁקַר וּמַלְפִין לְהוֹן כַּדְבִין אָמְרִין כִּדְנַן אֲמַר יְיָ אֱלֹהִים וּמִן קֳדָם יְיָ לָא אִתְמַלָל:",
        "עַמָא דְאַרְעָא עֲשָׁקוּ עוּשְׁקָא וּגְזָלוּ גְזֵלָה וּמִסְכֵּן וַחֲשִׁיךְ אוֹנִיאוּ וּלְגִיוֹרָא אֵנָסוּ בְּלָא כִדְחֲזֵי:",
        "וְאֶתְבַּע מִנְהוֹן קֳדָמַי גְבַר דְלֵיהּ עוֹבָדִין טָבִין דִיקוּם בְּתִרְעֲתָא קֳדָמַי וְיִבְעֵי רַחֲמִין עַל עַמָא דְאַרְעָא בְּדִיל דְלָא לְחַבָּלוּתָא וְלָא אַשְׁכְּחֵית:",
        "וּשְׁפִיכֵית עֲלֵיהוֹן חֵימְתִי בְּאֶשַׁת פּוּרְעָנוּתִי שֵׁיצִיתִינוּן פּוּרְעֲנוּת אוֹרְחֵיהוֹן בְּרֵישֵׁיהוֹן יְהָבֵית אֲמַר יְיָ אֱלֹהִים:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אִתְנַבֵּי עַל תַּרְתֵּין מְדִינָן דְאִינוּן כְּתַרְתִּין נְשִׁין דִי בְנַת אִמָא חֲדָא הֲוָאָה:",
        "וְטַעֲאָה בְמִצְרַיִם בָּתַר פּוּלְחַן טַעֲוָתְהוֹן טִעֲאָה תַּמָן פַּלְחָא לְטַעֲוָתָא וְתַמָן קִלְקְלָא עוֹבְדֵיהֶן:",
        "וּשְׁמָהָתְהֶן אָהֳלָה רַבְּתָא וְאָהָלִיבָה אֲחָתָהּ וַהֲוָאָה מְשַׁמְשָׁן קָדָמַי וְאַצְלְחָא בִּבְנִין וּבְנָן וּשְׁמָהָתְהֶן שׁוֹמְרוֹן אָהֳלָה וִירוּשְׁלֵם אָהֳלִיבָה:",
        "וּטְעַת אָהֳלָה מִבָּתַר פוּלְחָנִי וְאִתְרְעִיאַת לְמִטְעֵי בָתַר רְחִימָהָא בָּתַר בְּנֵי אַתּוּר קָרִיבָהָא:",
        "לְבוּשֵׁי גְמִיר שִׁלְטוֹנִין וְטוּרָנִין עוּלֵימֵי חֶמְדָתָא כּוּלְהוֹן פָּרָשִׁין רָכְבֵי סוּסְוָן:",
        "וְאִתְרְעִיאַת לְמִטְעֵי בַתְרֵיהוֹן עוּלֵימֵי בְנֵי אַתּוּר כוּלְהוֹן וּבְכָל דְאִתְרְעִיאַת בְּכָל פּוּלְחַן טַעֲוָתְהוֹן אִסְתַּאֲבָת:",
        "וְיַת פּוּלְחַן טַעֲוָתָא דַהֲוָה עִמָהּ מִמִצְרַיִם לָא שַׁבְקַת אֲרֵי יָתָהּ אַפְלָחוּ לְטַעֲוָתָהּ וְאִינוּן אַלִפוּהָא עוֹבָדִין בִּישִׁין וּשְׁפָכוּ טַעֲוָתְהוֹן עֲלָהּ:",
        "בְּכֵן מְסַרְתִיהָא בְּיַד רְחִימָהָא בְּיַד בְּנֵי אַתּוּוּן דְאִתְרְעִיאַת לְמִטְעֵי בַתְרֵיהוֹן:",
        "אִינוּן גַלִיאוּ קְלָנָהּ בְּנָהָא וּבְנָתָהָא שְׁבוֹ וְעַמָהּ בְּחַרְבָּא קְטִילוּ וַהֲוַת שׁוּם לִמְדִינָתָא וּפוּרְעֲנוּת דִינִין עֲבָדוּ בְּגַוָהּ:",
        "וַחֲזַת אֲחָתָהּ אָהֳלִיבָה וְחַבִּילַת רְחִימְתָּא מִנָהּ וְיַת טַעֲוָתָהָא מִטַעֲוַת אֲחָתָהּ:",
        "בָּתַר בְּנֵי אַתּוּר אִתְרְעִיאַת לְמִטְעֵי שִׁלְטוֹנִין וְטוּרְנִין קָרִיבִין לְבוּשֵׁי גְמַר וּפָרָשִׁין רָכְבֵי סוּסְוָן עוּלֵימֵי חֶמְדָתָא כּוּלְהוֹן:",
        "וּגְלֵי קֳדָמֵי אֲרֵי אִסְתַּאֲבַת אוֹרְחָא חֲדָא שַׁוִי לְתַרְתֵּיהֶן:",
        "וְאוֹסִיפַת עַל טַעֲוָתָהּ וַחֲזַת גַבְרִין מְצַיְרִין עַל כָּתְלָא צַלְמֵי כַסְדָאֵי מְצַיְרִין בְּסַמְמָנַיָא:",
        "אֲסִירִין זַרְזִין בְּחַרְצֵיהוֹן מָחֲתִין קוּלְסִין בְּרֵישֵׁיהוֹן חֵיזוּ גִבָּרִין כּוּלְהוֹן דְמוּת בְּנֵי בָבֶל מְדִינַת כַּסְדָאֵי אֲרַע יַלְדוּתְהוֹן:",
        "וְאִתְרְעִיאַת לְמִיטְעֵי בַתְרֵיהוֹן בָּתַר חֵיזוּ עֵינָהָא וּשְׁלָחַת אִזְגַדִין לְוַתְהוֹן לִמְדִינַת אֲרַע כַּסְדָאֵי:",
        "וַאֲתוֹ לְוָתָהּ בְּנֵי בָבֶל לְמֶעְבַּד רַחֲמוּ וְסָאִיבוּ יָתָהּ בְּטַעֲוָתְהוֹן וְאִסְתַּאֲבַת בְּהוֹן עַד דְקָצַת נַפְשָׁהּ בְּהוֹן:",
        "וְאִתְגְלִיאַת בַּהֲתָתָהּ וְאִתְחַזֵי קְלָנָהּ וְרַחֵיק מֵימְרִי יָתָהּ כְּמָא דְרָחֵיק מֵימְרִי יַת אֲחָתָהּ:",
        "וְאַסְגִיאַת יַת טַעֲוָתָהּ לְאַדְכָּרָא יַת יוֹמִין דְמִלְקָדְמִין דִטְעַת בְּהוֹן כַּד הֲוַת בְּאַרְעָא דְמִצְרַיִם:",
        "וְאִתְרְעִיאַת לְמֶהֱוֵי שְׁמוֹטָא לְהוֹן דִבְסַר חֲמָרִין בִּסְרֵיהוֹן וְצַחֲנַת סוּסְוָן צַחֲנַתְהוֹן:",
        "וְאַדְכַּרְתְּ יַת חוֹבֵי עֲצַת חֶטְאָךְ דְמִלְקַדְמִין בְּמַעְבְּדִיךְ מִמִצְרַיִם רְחִימוּ בְּדִיל חֶטְאֵי יַנְקוּתִיךְ:",
        "בְּכֵן אָהֳלִיבָה כִּדְנַן אֲמַר יְיָ אֱלֹהִים הָא אֲנָא מַיְתֵי בִּגְלֵי יַת רְחִימָךְ עֲלָךְ יַת דְקָצַת נַפְשִׁיךְ בְּהוֹן וְאַיְתִינוּן עֲלָךְ מִסְחוֹר סְחוֹר:",
        "בְּנֵי בָבֶל וְכָל כַּסְדָאֵי פְּקוּדָאֵי וְשׁוֹעָאֵי וְקוֹעָאֵי כָּל בְּנֵי אַתּוּר עִמְהוֹן עוּלֵימֵי חֶמְדָתָא שִׁלְטוֹנִין וְטוּרָנִין כּוּלְהוֹן גִבָּרִין מְזַמְנִין רָכְבֵי סוּסְוָן כּוּלְהוֹן:",
        "וְיֵיתוּן עֲלָךְ בְּמָאנֵי זְיָנָא בִּרְתִיכִין וְגַלְגַלִין וּמַשִׁרְיַת עַמְמִין דִמְזַיְנִין בַּעֲגִילִין וְקוּלְסִין יְמַנוּן עֲלָךְ סְחוֹר סְחוֹר וְאֶתֵּן קֳדָמֵיהוֹן פּוּרְעֲנוּת דִינִין וְיִתְפְּרָעוּן מִנִיךְ בְּנִימוּסֵיהוֹן:",
        "וְאֶתֵּן פּוּרְעֲנוּתִי בִּיךְ וְיִתְפַּרְעוּן מִנִיךְ בִּרְגַז רַבְרְבַיִךְ וְיַקִירַיִךְ יִגְלוֹן וְעַמִיךְ בְּחַרְבָּא יִתְקַטְלוּן אִינוּן בְּנָךְ וּבְנָתָךְ יִשְׁבּוּן וּשְׁפַר אַרְעִיךְ יִתּוֹקַד בְּנוּרָא:",
        "וִישַׁלְחוּנִיךְ לְבוּשֵׁי יְקָרִיךְ וְיִסְבוּן מָאנֵי תוּשְׁבַּחְתִּיךְ:",
        "וַאֲבַטֵל חוֹבֵי עֲצַת חֶטְאָךְ מִנִיךְ וְיַת פּוּלְחַן טַעֲוָתִיךְ דַהֲוַת עִמִיךְ כַּד הֲוֵית בְּאַרְעָא דְמִצְרַיִם וְלָא תִזְקְפִין עַיְנָךְ לְהוֹן וְטַעֲוַת מִצְרָאֵי לָא תִדְכְּרִין עוֹד:",
        "אֲרֵי כִדְנַן אֲמַר יְיָ אֱלֹהִים הָא אֲנָא מָסַר לִיךְ בְּיַד דִסְנֵית בְּיַד דְקָצַת נַפְשִׁיךְ בְּהוֹן:",
        "וְיִתְפָּרְעוּן מִנִיךְ כִּדְבָבוּ וְיִסְבוּן יַת כָּל לֵיאוּתִיךְ וְיִשְׁבְּקוּנִיךְ מְטַלְטְלָא וּשְׁבִיקָא וְתִתְגְלֵי בַהֲתַת טְעוּתִיךְ וְחוֹבֵי עֵיצַת חֶטְאָךְ וּזְדוֹנִיךְ:",
        "חוֹבַיִךְ גְרָמוּ אִלֵין לִיךְ בִדְטָעֵית בָּתַר עַמְמַיָא וְאִסְתְּאַבְתְּ בְּפוּלְחַן טַעֲוָתְהוֹן:",
        "בְּאוֹרַח אֲחָתִיךְ הַלֵיכְתְּ וְאֶתֵּן כָּס פּוּרְעֲנוּתָהּ בִידִיךְ:",
        "כִּדְנַן אֲמַר יְיָ אֱלֹהִים כָּס פּוּרְעֲנוּת אֲחָתֵיךְ תִּשְׁתִּין תַּקִיפָא וַחֲסֵינְתָּא תְּהִין לְחוֹךְ וְלִלְעֵיב מִסְגֵי עָקָא דְתֵיתֵי עֲלָךְ:",
        "הָא כְרַוְיָא וְרַוָן תִּתְמְלִין כָּס צָדוּ וְאִישְׁתֵּמָמוּ כָּס פּוּרְעֲנוּת אֲחָתִיךְ שׁוֹמְרוֹן:",
        "וְתִשְׁתִּין יָתָהּ וְתִגְמְרִין וְיַת פוּרְעֲנוּתָהָא תְקַבְּלִין וּבִסְרִיךְ תִּתְלְשִׁין אֲרֵי אֲנָא גְזָרֵית בְּמֵימְרִי אֲמַר יְיָ אֱלֹהִים:",
        "בְּכֵן כִּדְנַן אֲמַר יְיָ אֱלֹהִים חֲלַף דִשְׁבַקְתָּ פּוּלְחָנִי וְאַרְחֵיקְתְּ דְחַלְתִּי מִקָבֵל עֵינָךְ וְאַף אַתְּ קַבִּילִי חוֹבֵי עֵיצַת חֶטְאִיךְ וְטַעֲוָתַיִךְ:",
        "וַאֲמַר יְיָ לִי בַּר אָדָם הֲתוֹכַח יַת אָהֳלָה וְיַת אָהֳלִיבָה וְחַוֵי לְהֶן יַת תּוֹעֶבָתְהָן:",
        "אֲרֵי זַנָאִין בְּהֶן וְדַם זַכַּאי אֲשָׁדוּ בִידֵיהֶן וּבָתַר פוּלְחַן טַעֲוַתְהֶן טְעוֹ וְאַף יַת בְּנֵיהֶן דַעֲתִידִין לְמִיפַּק מִנְהֶן תּוּלְדַת קוּדְשָׁא קֳדָמַי אַעֲבִירוּ לְהֵן לְפוּלְחַן:",
        "עוֹד אַרְגִיזוּ קֳדָמַי סָאִיבוּ יַת בֵּית מַקְדְשִׁי בְּיוֹמָא הַהוּא וְיַת יוֹמֵי שַׁבַּיָא דִילִי אָחִילוּ:",
        "וּבְמִכְסוּתְהֶן יַת בְּנֵיהוֹן לְפוּלְחַן טַעֲוַתְהוֹן וְעָלוּ לְבֵית מַקְדְשִׁי בְיוֹמָא הַהוּא לְאָחָלוּתֵיהּ וְהָא כְדֵין עֳבָדוּ בְּגוֹ בֵּית מַקְדְשֵׁי:",
        "וְאַף אֲרֵי שְׁלַחְתְּ לְגַבְרַיָא דְאָתָן מֵרָחִיק דְאִזְגַד שְׁלִיחַ לְוַתְהוֹן וְהָא אֲתוֹ לַאֲתַר דְזַמִינְתְּ אַתְקִינְתְּ שׁוּקִין וּמַנִית פַּלְטוֹרִין:",
        "וּרְמֵית דַרְגְשִׁין מַכִּיכִין דִיקַר וּפְתוֹרִין מְלַן כָּל טוּב סִדַרְתְּ קֳדָמֵיהוֹן וּקְטוֹרֶת בּוּסְמִי וּמִשְׁחִי שַׁוֵית עֲלֵיהוֹן:",
        "וְקַל אִתְרְגוּשְׁתְּהוֹן דִי שְׁלַן שְׁלֵיוָא בְהוֹן וְלִתְקוֹף גִבָּרִין מִסְגֵי אֱנָשָׁא אָתָן מִסְחוֹר סְחוֹר מִמַדְבְּרָא וִיהָבוּ שֵׁירִין עַל יְדֵיהוֹן וְכֶתֶר דְתוּשְׁבְּחָתָא עַל רֵישֵׁיהוֹן:",
        "וַאֲמָרֵית לִכְנִשְׁתָּא דְיִשְׂרָאֵל דִבְלִיעַת עַמָה בְּחוֹבִין כְּעַן תִּשְׁבוֹק מִטַעֲוָתָהּ וּתְתוּב לְפוּלְחָנִי וְלָא תָבָת:",
        "וְעָלוּ לְוָתָהּ כְּמָא דְעָלִין לְוַת אִיתְּתָא פּוּנְדְקִיתָא כֵּן עָלוּ לְאָהֳלָה וּלְאָהֳלִיבָה מְזִינְתָא דְעֵיצַתְהוֹן חֶטְאִין:",
        "וְגַבְרִין זַכָּאִין בְּקִבְלֵיהוֹן יִתְפָּרְעוּן מִנְהֶן פּוּרְעֲנוּת נַיָפִין וּפוּרְעֲנוּת אַשְׁדַת דַם אֲרֵי זַנְאִין בְּהֶן וְדַם זַכַּאִי אֲשָׁדוּ בִּידֵיהוֹן:",
        "כִּדְנַן אֲמַר יְיָ אֱלֹהִים אִיתְנַבֵּי דְיִסְקוּן עֲלֵיהוֹן מַשִׁרְיָן וְאֶמְסַר יַתְהוֹן לִתְבִיר וּלְבִזָא:",
        "וְיִרְגְמוּ יַתְהֶן בְּאַבְנֵי קָלַע מַשִׁרְיָן וְיִבְזְעוּן יַתְהֶן בְּסַיְפֵיהוֹן בְּנֵיהוֹן וּבְנָתְהוֹן יִקְטְלוּן וּבָתֵּיהוֹן יוֹקְדוּן בְּנוּרָא:",
        "וַאֲבַטֵיל חוֹבֵי עֵיצַת חֶטְאִין מִן אַרְעָא וְיִתְרַדְיָן כָּל מְדִינְתָא וְלָא יַעְבְּדָן כְּעֵיצַת חֲטָאֵיכוֹן:",
        "וְיִתְיַהֲבוּן חוֹבֵי עֵיצַת חֶטְאֵיכוֹן עֲלֵיכוֹן וְחֶטְאֵי פּוּלְחַן טַעֲוַתְכוֹן תְּקַבְּלָן וְתֵידְעוּן אֲרֵי אֲנָא יְיָ אֱלֹהִים:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי בְּשַׁתָּא תְשִׁיעֵיתָא בְּיַרְחָא עֲשִׂירָאָה בְּעַסְרָא לְיַרְחָא לְמֵימָר:",
        "בַּר אָדָם כְּתַב לָךְ יַת שׁוּם יוֹמָא יַת כְּרַן יוֹמָא הָדֵין סְמַךְ מַלְכָּא דְבָבֶל עַל יְרוּשְׁלֵם בִּכְרַן יוֹמָא הָדֵין:",
        "וְאִתְנַבֵּי לְעַמָא סַרְבָנָא נְבוּאָה וְתֵימַר לְהוֹן כִּדְנַן אֲמַר יְיָ אֱלֹהִים אִתְנַבֵּי דְיִסְקוּן מַשִׁרְיָן עַל קַרְתָּא הָדָא וְאַף יִתְיְהֵיב לָהּ אַרְכָא לְקַבָּלָא מְצִירָא:",
        "כְנוֹשׁ רַבִרְבָהָא לְגַוָהּ כָּל גְבַר עָבֵיד קְרָב מַשִׁרְיַת עַמְמִין מַלֵי יָתָהּ:",
        "מַלְכֵי עַמְמִין קָרִיב וְאַף טַקֵיס סוּמְכְוָתָהָא עִמְהוֹן אַבַּע זִמְנָהּ אַף יִתְרְמוֹן קְטִילָהָא בְּגַוָהּ:",
        "בְּכֵן כִּדְנַן אֲמַר יְיָ אֱלֹהִים וַי עַל קַרְתָּא דְאָשְׁדֵי דָם זַכַּאי בְּגַוָהּ דְהִיא כְדוּדָא דְזִיהוּמְתֵּיהּ בֵּיהּ וְזִיהוּמְתֵּיהּ לָא נַפְקַת מִנֵיהּ גָלוּ עַל גָלוּ אִתַּפֵּק עַמָא מִדְלָא יִתְעֲבֵיר בָּהּ תִּיוּבָא:",
        "אֲרֵי דַם זַכַּאי דְאִתְאַשַׁד בְּגַוָהּ בְּזֵידוּ וּבִדְרַע מְרוֹמָם שְׁפַכְתֵּיהּ לָא שְׁפַכְתֵּיהּ בְּשָׁלוּ לְמֶעְבַּד עֲלוֹהִי תְּיוּבָא:",
        "לְמֶעְבַד פּוּרְעֲנּוּת לְאִתְפְּרָעָא בִתְקוֹף גַלֵיתִי חוֹבֵיהוֹן עַל דַאֲשִׁידוּ דַם זַכַּאי בִּגְלֵי בְּדִיל דְלָא לְאִישְׁתַּבָּקָא:",
        "בְּכֵן כִדְנַן אֲמַר יְיָ אֱלֹהִים וַי עַל קַרְתָּא דְאֶשְׁדֵי דַם זַכַּאי בְּגַוָהּ אַף אֲנָא אַסְגֵי תְּבִירָהּ:",
        "אַסְגֵי מַלְכַיָא כְּנִישׁ מַשִׁרְיָתָא טַקֵיס סוּמְכְוָתָא וְזַמִין עֲלָהּ עָבְדֵי קְרָבָא וְגִבָּרָהָא יִשְׁתַּבְּשׁוּן:",
        "וְאַשְׁאַר אַרְעָא צַדְיָא בְּדִיל דְיִצְדוּן וִיסוּפוּן תַּרְעֵי קִרְוָהָא וְיִתְמְסוּן בְּגַוָהּ עָבְדֵי סְאוֹבְתָּהּ וִיסוּפוּן חוֹבָהָא:",
        "תִּסְקוֹפִין אִיתְמְלִיאַת וְלָא יִפְקוּן מִנָהּ עָבְדֵי בִישְׁתָּא בְּנוּרָא תִתּוֹקַד מִסַגִיוּת חוֹבָהָא:",
        "בִּדְאִסְתְּאַבְתְּ בַּעֲצַת חֶטְאִין חֲלַף דְדַכֵּיתִיךְ וְלָא דְכֵית מִסוֹאַבְתִּיךְ לָא תִדְכִּין עוֹד עַד דַאֲנִיחַ חֵמְתִי בִיךְ:",
        "אֲנָא יְיָ גְזַרֵית בְּמֵימְרִי אֶתְיָא וְתִתְקַיֵם לָא אֶמְנַע וְלָא אֲחוּס וְלָא אֶרְחַם כְּאוֹרְחָתַיִךְ בִּישְׁתָא וּכְעוֹבָדַיִךְ מְקַלְקְלַיָא אִתְפְּרַע מִנִיךְ אֲמַר יְיָ אֱלֹהִים:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם הָא אֲנָא נָסֵיב מִנָךְ יַת רִגְגָא דְעֵינָךְ בְּמוֹתָא וְלָא תִסְפַּד וְלָא תִבְכֵּי וְלָא תְשַׁגַר דִמְעִין:",
        "אִידְנַק שְׁתוֹק עַל מֵיתָךְ אֶבְלָא לָא תַעְבֵּיד טוֹטְפָתָךְ יֶהֱוְיָן עֲלָךְ וּמְסַנֵךְ תְּשַׁוֵי בְרִגְלָךְ וְלָא תִתְעַטֵיף עַל שָׂפָם וּלְחֵים אֶבְלִין לָא תֵיכוּל:",
        "וְאִתְנַבֵּיתִי לְעַמָא בְּצַפְרָא וּמִיתַת אִתְּתִי בְּרַמְשָׁא וַעֲבָדֵית בְּצַפְרָא כְמָא דְאִתְפַּקֵדִית:",
        "וַאֲמָרוּ לִי עַמָא הֲלָא תְחַוֵי לָנָא מָא אִילֵן לָנָא אֲרֵי אַתְּ עָבֵיד:",
        "וַאֲמָרֵית לְהוֹן פִּתְגַם נְבוּאָה מִן קֳדָם יְיָ הֲוָה עִמִי לְמֵימָר:",
        "אֲמַר לְבֵית יִשְׂרָאֵל כִּדְנַן אֲמַר יְיָ אֱלֹהִים הָא אֲנָא מַפִיס יַת בֵּית מִקְדָשִׁי יְקָר תּוּקְפְכוֹן רִגְנָא דְעֵינֵיכוֹן וְחִבּוּב נַפְשְׁכוֹן וּבְנֵיכוֹן וּבְנָתֵיכוֹן דִשְׁבַקְתּוּן בְּחַרְבָּא יִתְקַטְלוּן:",
        "וְתַעְבְּדוּן כְּמָא דַעֲבָדֵית עַל שָׂפָם לָא תִתְעַטְפוּן וּלְחֵים אֶבְלִין לָא תֵיכְלוּן:",
        "וְטוֹטְפָתְכוֹן בְּרֵישֵׁיכוֹן וּמַסְגֵיכוֹן בְּרִגְלֵיכוֹן לָא תִסְפְּדוּן וְלָא תִבְכּוּן וְתִתְמְסוּן בְּחוֹבֵיכוֹן וְתִתְנַהֲמוּן גְבַר לַאֲחוֹהִי:",
        "וִיהֵי יְחֶזְקֵאל לְכוֹן לְאָת כְּכֹל דִי עֲבַד תַּעְבְּדוּן בְּמֵיתָהּ וְתֵידְעוּן אֲרֵי אֲנָא יְיָ אֱלֹהִים:",
        "וְאַתְּ בַּר אָדָם הֲלָא בְּיוֹמָא דְאַעֲדִי מִנְהוֹן יַת בֵּית מִקְדָשֵׁיהוֹן יְקַר תּוּקְפֵהוֹן חֶדְוַת תּוּשְׁבַּחְתְּהוֹן יִתְנְסִיב מִנְהוֹן רִגְגָא דְעֵינֵיהוֹן וְחַבּוּב נַפְשְׁהוֹן דְטַב לְהוֹן מִבְּנֵיהוֹן וּמִבְנָתֵיהוֹן:",
        "בְּיוֹמָא הַהוּא יֵיתֵי מְשֵׁיזְבָא לְוָתָךְ לְאַשְׁמְעוּתָךְ בְּסוֹרָא:",
        "בְּיוֹמָא הַהוּא יִתְפְּתַח פּוּמָךְ בְּמֵיתֵי מְשֵׁיזְבָא וְתִתְנַבֵּי וְלָא תִשְׁתּוֹק עוֹד וּתְהֵי לְהוֹן לְאָת וְתֵידְעוּן אֲרֵי אֲנָא יְיָ:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם קַבֵּיל נְבוּאָה עַל בְּנֵי עַמוֹן וְתִתְנַבֵּי עֲלֵיהוֹן:",
        "וְתֵימַר לִבְנֵי עַמוֹן קַבִּילוּ פִּתְגָמָא דַייָ אֱלֹהִים כִּדְנַן אֲמַר יְיָ אֱלֹהִים חֲלַף דַאֲמַרְתָּא חֶדְוָא עַל מַקְדְשִׁי אֲרֵי אִתְחַל וְעַל אַרְעָא דְיִשְׂרָאֵל אֲרֵי צְדִיאַת וְעַל דְבֵית יְהוּדָה אֲרֵי הַלִיכוּ בְגָלוּתָא:",
        "בְּכֵן הָא אֲנָא מְסַר לִיךְ לִבְנֵי מַדִינְחָא לִירוּתָא וְיִתְבוּן בִּרְנְיָתֵיהוֹן בִּיךְ מַשְׁכְּנֵיהוֹן אִינוּן יֵיכְלוּן טוּב אַרְעִיךְ וְאִינוּן יִבְזוּן נִכְסָךְ:",
        "וְאֶתֵּן יַת רַבָּה לִמְדוֹר גַמְלִין וְיַת בְּנֵי עַמוֹן לְבֵית מַשְׁרֵי עֶדְרִין דְעָן וְתֵידְעוּן אֲרֵי אֲנָא יְיָ:",
        "אֲרֵי כִדְנַן אֲמַר יְיָ אֱלֹהִים חֲלַף דִטְפַחְתָּא בִידָךְ וּרְפַסְתָּא בְרִגְלָךְ וַחֲדִיתָא בְּכָל צִפּוּחַ נְפַשׁ עַל אַרְעָא דְיִשְׂרָאֵל:",
        "בְּכֵן הָא אֲנָא מְרִים יַת מְחַת גְבוּרְתִּי עֲלָךְ וְאֶתְּנִנָךְ לְבִיז לְעַמְמַיָא וְאֱשֵׁיצִינָךְ מִבֵּינֵי עַמְמַיָא וְאַבְּדִנָךְ מִן מְדִינָתָא אַצְדִנָךְ וְתֵידַע אֲרֵי אֲנָא יְיָ:",
        "כִּדְנַן אֲמַר יְיָ אֱלֹהִים חֲלַף דַאֲמַרוּ מוֹאֲבָאֵי וְשֵׂעִיר מַה שְׁנוֹ מִכָּל עַמְמַיָא דְבֵית יְהוּדָה:",
        "בְּכֵן הָא אֲנָא תָבַר יַת תְּקוֹף מוֹאָב מִקִרְוֵיהוֹן מִכְּרַכֵּיהוֹן עַד פַּצִיחֵיהוֹן חֶדְוַת אַרְעֲהוֹן בֵּית יְשִׁימוֹת בַּעַל מְעוֹן וְקִרְיָתָיִם:",
        "לִבְנֵי קֶדֶם עַל בְּנֵי עַמוֹן וְאֶמְסְרִינָהּ לִירוּתָא בְּדִיל דְלָא יְהֵי דָכְרָי בְּנֵי עַמוֹן בְּעַמְמַיָא:",
        "וּבְמוֹאָב אַעְבֵּיד פּוּרְעֲנוּת דִינִין וְיֵדְעוּן אֲרֵי אֲנָא יְיָ:",
        "כִּדְנַן אֲמַר יְיָ אֱלֹהִים חֲלַף דַעֲבַדוּ אֱדוֹמָאֵי בִּתְקוֹף פּוּרְעֲנוּת לְבֵית יְהוּדָה וְחָבוּ חוֹבָא וְאִתְפְּרָעוּ מִנְהוֹן:",
        "בְּכֵן כִּדְנַן אֲמַר יְיָ אֱלֹהִים וַאֲרֵים מְחַת גְבוּרְתִּי עַל אֱדוֹם וֶאֱשֵׁיצֵי מִנָהּ אֱנָשָׁא וּבְעִירָא וְאֶתְּנִינָהּ חוּרְבָא מִדָרוֹמָא וְיַתְבֵי דְדָן בְּחַרְבָּא יִתְקַטְלוּן:",
        "וְאֶתֵּן יַת פּוּרְעֲנוּתִי בֶּאֱדוֹם בְּיַד עַמִי יִשְׂרָאֵל וְיִתְמַסְרוּן וְיִתְפְּרָעוּן מִן אֱדוֹם כְּרוּגְזִי וּכְחֵימְתִי וְיֵדְעוּן יַת פּוּרְעֲנוּתִי אֲמַר יְיָ אֱלֹהִים:",
        "כִּדְנַן אֲמַר יְיָ אֱלֹהִים חֲלַף דַעֲבָדוּ פְּלִשְׁתָּאֵי בִּדְבָבוּ וְיִתְפְּרָעוּן פּוּרְעֲנוּת בְּצִפּוּחַ נְפַשׁ בְּדִיל לְחַבְּלָא דְבָבוּת עֲלָם:",
        "בְּכֵן כִּדְנַן אֲמַר יְיָ אֱלֹהִים הָא אֲנָא מְרִים יַת מְחַת גְבוּרְתִּי עַל פְּלִשְׁתָּאֵי וֶאֱשֵׁיצֵי יַת עַמָא דְחַיָבִין לְאִשְׁתֵּיצָאָה וְאוֹבִיד יַת שְׁאַר סְפַר יַמָא:",
        "וְאַעְבֵּיד בְּהוֹן פּוּרְעֲנוּן רַבְרְבָן בִּתְקוֹף רְגָז וְיֵדְעוּן אֲרֵי אֲנָא יְיָ בִּדְאֶתֵּן יַת פּוּרְעֲנוּתִי בְּהוֹן:"
      ],
      [
        "וַהֲוָה בַּחֲדָא עַסְרֵי שְׁנִין בְּחַד לְיַרְחָא הֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם חֲלַף דַאֲמָרֵית צוֹר עַל יְרוּשְׁלֵם חֶדְוָא אִתְבְּרַת דַהֲוָה מְסַפְּקָא סְחוֹרָה לְכָל עַמְמַיָא אִסְתְּחָרַת לְמֵיתֵי לְוָתִי דַהֲוַת מַלְיָא חֲרוּבָת:",
        "בְּכֵן כִּדְנַן אֲמַר יְיָ אֱלֹהִים הָא אֲנָא שָׁלַח רוּגְזִי עֲלָךְ צוֹר וְאֶסַק עֲלָךְ מַשִׁרְיַת עַמְמִין סַגִיאִין כְּמֵיסַק יַמָא בְּאִתְרְגוּשַׁת גַלוֹהִי:",
        "וִיחַבְּלוּן שׁוּרֵי צוֹר וִיפַגְרוּן מִגְדְלָהָא וְאַעְקַר עֲפְרָהּ מִנָהּ וְאֶתֵּן יָתָהּ לִשְׁעִיעוֹת כֵּיף גְלֵי:",
        "מִשְׁטַח צַיָדִין תְּהֵי בְּגוֹ יַמָא אֲרֵי אֲנָא גְזָרֵית בְּמֵימְרִי אֲמַר יְיָ אֱלֹהִים וּתְהֵי לְבִזָא לְעַמְמַיָא:",
        "וְיַתְבֵי כַּפְרָנָהָא דִי בְּחַקְלָא בְּחַרְבָּא יִתְקַטְלוּן וְיֵדְעוּן אֲרֵי אֲנָא יְיָ:",
        "אֲרֵי כִדְנַן אֲמַר יְיָ אֱלֹהִים הָא אֲנָא מַיְתִי עַל צוֹר נְבוּכַדְרֶאצַר מַלְכָּא דְבָבֶל מִצִפּוּנָא מְלַךְ מַלְכַיָא בְּסוּסְוָן וּבִרְתִיכִין וּבְפָרָשִׁין וּמַשִׁרְיָן וְעַם סַגִי:",
        "יַתְבֵי כַפְרָנָךְ דִי בְחַקְלָא בְּחַרְבָּא יִקְטֵיל וְיִבְנֵי עֲלָךְ כַּרְקוֹם וְיִצְבוֹר עֲלָךְ מִלֵיתָא וְיָקִים עֲלָךְ דִי מְזַיְנִין בִּתְרֵסִין:",
        "וּמְחַת פָּגוֹזוֹהִי יֵהַב בְּשׁוּרָךְ וּמִגְדְלָךְ יְתָרַע בְּאַבְנֵי בַרְזְלֵיהּ:",
        "מֵרִפְסַת סוּסְוָתֵיהּ יַחֲפִינָךְ אַבְקֵיהוֹן מִקַל פָּרָשִׁין וְגַלְגְלִין וּרְתִיכִין יְזוּעוּן שׁוּרָךְ בְּמֵיעֲלוֹהִי בְּתַרְעָךְ כְּמָא דְעָלִין בְּקַרְתָּא דִמְתַּרְעָא מִשׁוּר:",
        "בְּפַרְסַת סוּסְוָתֵיהּ יְרוּשׁ יַת כָּל שׁוּקָךְ עַמִיךְ בְּחַרְבָּא יִקְטֵיל וְקָמַת תּוּקְפִיךְ לְאַרְעָא יְמַגֵר:",
        "וְיִבְזוּן נִכְסָךְ וְיִשְׁבּוּן סְחוֹרְתִּיךְ וִיפַגְרוּן שׁוּרָךְ וּבָתֵּי חֶמְדָתֵךְ יִתְרְעוּן וַאֲבָנֵיךְ וְאָעָךְ וְעַפְרָךְ בְּגוֹ יַמָא יְשַׁווּן:",
        "וַאֲבַטֵיל אִתְרְגוּשַׁת זְמִרָיִךְ וְקַל נָגוּן כִּנְרַיִךְ לָא יִשְׁתְּמַע עוֹד:",
        "וְאֶתְּנִינָךְ לִשְׁעִיעוּת כֵּיף גְלֵי מִשְׁטַח צַיָדִין תְּהֵי לָא תִתְבְּנֵי עוֹד אֲרֵי אֲנָא יְיָ גְזָרֵית בְּמֵימְרִי אֲמַר יְיָ אֱלֹהִים:",
        "כִּדְנַן אֲמַר יְיָ אֱלֹהִים לְצוֹר הֲלָא מִקַל מַפְּלַת קְטִילָךְ בְּנִיהוּם מְטַעֲנֵי חֶרֶב כַּד יִתְרְמוּן קְטִילִין בְּגַוִיךְ יְזוּעוּן פַּרְוְרַיָא:",
        "וְיֶחֱתוּן מֵעַל כּוּרְסְוָתֵיהוֹן כָּל רַבְרְבֵי יַמָא וְיַעְדוּן יַת מְעִילֵיהוֹן וְיַת לְבוּשֵׁי צִיוּרֵיהוֹן יַשְׁלְחוּן זְיַע יִלְבְּשׁוּן עַל אַרְעָא יַתְבוּן וִיזוּעוּן מִן קֳדָם תְּבִירֵיהוֹן וְיִצְדוּן עֲלָךְ:",
        "וְיִטְלוּן עֲלָךְ אִלְיָא וְיֵימְרוּן לָךְ אֵיכְדֵין אַבַדְתְּ דַהֲוֵית יָתְבָא בְּגוֹ יַמַיָא קַרְתָּא מִשֻׁבַּחְתָּא דַהֲוֵית יָתָבָא בִּתְקוֹף יַמָא הִיא וְיָתְבָהָא אִיכְדֵין אִתְמַסְרוּ לִתְבַר כָּל יָתְבָהָא:",
        "כְּעַן יְזוּעוּן פַּרְוְרַיָא בְּיוֹם מַפְּלַת קְטִילָךְ וְיִתְבָּהֲלוּן נַגְוָתָא דִי בְיַמָא בְּמִפַּק גָלוּתִיךְ:",
        "אֲרֵי כִּדְנַן אֲמַר יְיָ אֱלֹהִים כַּד אֶתֵּן יָתִיךְ קִרְיָא חֶרְבָא כְּקִרְוִין דְלָא אִתּוֹתַבָא בְּאַסָקוּתִי עֲלָךְ מְשִׁרְיַת עַמְמִין דְסַגִיאִין כְּמֵי תְהוֹמָא וְיַחֲפוּנָךְ עַמְמִין סַגִיאִין:",
        "וְאַחֲתִנִיךְ עִם נָחֲתֵי נוֹב בֵּית אַבְדָנָא לְוַת עַמָא דִמְעַלְמָא וְאַצְדִנִיךְ בְּאַרְעָא אַרְעִיתָא בְּחֶרְבָתָא דִמְעַלְמָא עִם נַחֲתֵי גוֹב בֵּית אָבְדָנָא בְּדִיל דְלָא תִּתְיַתְבִין וְאֶתֵּן חֶדְוָא בְּאַרְעָא דְיִשְׂרָאֵל:",
        "כִּדְלָא הֲוֵית אֶתְּנִנָךְ וְכֵן תְּהֵי וְתִתְבְּעִין וְלָא תִשְׁכְּחִין עוֹד לַעֲלָם אֲמַר יְיָ אֱלֹהִים:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "וְאַתְּ בַּר אָדָם טוֹל עַל צוֹר אִלְיָא:",
        "וְתֵימַר לְצוֹר דְיַתְבָא עַל מִגְרַשׁ מָחוֹזֵי יַמָא מְסַפְּקָא סְחוֹרָא לְעַמְמַיָא לְנַגְוָן סַגִיאִין כִּדְנַן אֲמַר יְיָ אֱלֹהִים צוֹר אַתְּ אֲמַרְתְּ אֲנָא מְשַׁכְלְלָא בְּשׁוּפְרִי:",
        "בְּגוֹ יֵמַיָא תְּחוּמַיִךְ אַרְדִיכְלַיִךְ שַׁכְלִילוּ בִּנְיָנַיִךְ:",
        "בִּירְוָן מִשְׂנִיר בְּנוֹ לִיךְ יַת כָּל נִשְׁרֵךְ אַרְזִין מִלִבְנָן נְסִיבוּ לְמֶעְבַּד תּוֹרְנִין עֲלָךְ:",
        "בְּלוּטִין מִמַתְנָן עֲבַדוּ מְשׁוֹטֵי סְפִינָךְ תְּרוֹמֵי תַרְעָךְ דַפִּין דְאֶשְׁכְּרוֹעִין מְכַבְשִׁין בְּשֵׁן דְפִיל בֵּית חוֹפָאָה לְאִתְיָטְרוּן מִמְדִינַת אַפּוּלְיָא:",
        "בּוּץ וְצִיוּרִין מִמְצְרַיִם הֲוָה פְּרָסִיךְ לְמֶהֱוֵי לִיךְ לְאָת תִּכְלָא וְאַרְגְוָנָא מִמְדִינַת אִיטַלְיָא הֲוַת כְּסוּתִיךְ:",
        "יַתְבֵי צִידוֹן וְאַרְוַד הֲווֹ שַׁיְטִין וּמַיְתָן סְחוֹרָא לְגַוִיךְ חַכִּימַיִךְ צוֹר הֲווֹ בִיךְ אִינוּן פַּרְנָסֵיךְ:",
        "סָבֵי גְבַל וְחַכִּימָהָא הֲווֹ בִיךְ מַתְקְפֵי צוֹרְבִיךְ כָּל נַחֲתֵי יַמָא וְסַפָנֵיהוֹן הֲווֹ שָׁיְטִין וְמַיְתָן סְחוֹרָא לְגַוִיךְ:",
        "פַּרְסָאֵי וְלוּדָאֵי וּפוּטְאֵי הֲווֹ בְמַשְׁרִיתֵיךְ גַבְרֵי עָבְדֵי קְרָבִיךְ עֲגִילִין וְקוּלְסִין תְּלוֹ בִּיךְ אִינוּן אַסְגִיאוּ זִיוֵיךְ:",
        "בְּנֵי אַרְוַד וְכָל מַשִׁרְיָתִיךְ עַל שׁוּרָךְ סְחוֹר סְחוֹר וְאַף קַפּוּטְקָאֵי בְּמִגְדָלֵיךְ הֲווֹ שִׁלְטֵיהוֹן תְּלוֹ עַל שׁוּרֵךְ סְחוֹר סְחוֹר אִינוּן שַׁכְלִילוּ שׁוּפְּרִיךְ:",
        "מִן יַמָא מַיְתָן סְחוֹרָא לְגַוִיךְ מִסְגֵי כָּל עוֹתַר בִּכְסַף בַּרְזֶל עֲבַץ וַאֲבַד יְהָבוּ בְּבֵית גִנְזַיִךְ:",
        "יָוָן תּוּבָל וּמֶשֶׁךְ אִינוּן תַּגָרֵיךְ בְּנַפְשָׁא דֶאֱנָשָׁא וּמַנֵי נְחָשָׁא מַיְתָן סְחוֹרָא לְגַוִיךְ:",
        "מִמְדִינַת גַרְמַמְיָא סוּסְוָן וּפָרָשִׁין וְכוּדְנְוָן מַיְתָן סְחוֹרָא לְגַוִיךְ:",
        "בְּנֵי דְדָן תַּגְרָךְ יַתְבֵי נַגְוָן סַגִיאָן מַיְתָן סְחוֹרָא לְגַוִיךְ בְּקַרְנִין דְיָעְלִין וְשֵׁן דְפִיל וְטַוְסִין אֲתִיבוּ קוּרְבָּנִיךְ:",
        "מִן אֲרָם מַיְתָן סְחוֹרָא לְגַוִיךְ מִסָגִי עוּתְרִיךְ בִּתַכְרִיכִין דְאַרְגְוָן וּרְקָם וּבוּץ צִיוּרִין וְאַבְנִין טָבִין וּמַרְגָלִין יְהָבוּ בְּבֵית גִנְזָיִךְ:",
        "יְהוּדָה וְאַרְעָא דְיִשְׂרָאֵל אִינוּן תַּגָרֵיךְ בְּהִטֵי רִיחוּשׁ וְקוֹלְיָא וּדְבַשׁ וּמְשַׁח וּשְׁעֵיף יְהָבוּ בַּחֲנּוּתָיִךְ:",
        "מִן דַמֶשֶׂק מַיְתָן סְחוֹרָה לְגַוִיךְ בִּסְגֵי עוֹתְרִין מִסְגֵי כָּל עוֹתַר בַּחֲמַר חֵילַת מְבַשֵׁל וַעֲמַר מֵילַת כְּבֵינָא:",
        "וְדָן וְיָוָן בְּשִׁירִין סְחוֹרְתִּיךְ מַיְתָן בְּעַרְקִין דְבַרְזֶל קִדָה וּקְנֵה בֹּשֶׁם בַּחֲנוּתַיִךְ יְהָבוּ:",
        "מִן דְדָן מַיְתַן סְחוֹרָא לְגַוִיךְ בִּלְבוּשׁ דִיקָר לִרְתִיכִין:",
        "עֲרַב וְכָל רַבְרְבֵי נְבָט אִינוּן תַּגָרֵיךְ בְּתוֹרִין וְדִכְרִין וְגַדְיָן בְּהוֹן הֲוַת סְחוֹרְתִּיךְ:",
        "תַּגָרֵי שְׁבָא וְרַעֲמָה אִינוּן תַּגָרַיִךְ בְּרֵישׁ כָּל בּוּסְמִין וּבְכָל אַבְנִין טָבָן וְדַהֲבָא יְהָבוּ בְּבֵית גִנְזָיִךְ:",
        "חַרְוָן וּנְצִיבִין וְהַדְיֵב תַּגְרֵי שְׁבָא מְדִינַן אַתּוּר וּמָדַי אִינוּן תַּגָרֵיךְ:",
        "אִינוּן תַּגָרֵיךְ בִּגְמַר מִינֵי כָּל תּוּשְׁבַּחְתָא בְגוֹזְזִין דְתִכְלָא וְכוּשְׁפִין דְאַרְזָא בְּאִימְלִין דִי זָהְרָיִתָא דְמָחֲתִין בְּקוֹמְטְרִין חֲפַן גִלְדִין מְאַסְרִין בְּאַטוּנִין דִי בוּצָא חֲתִימִין בְּעִזְקַת גְלַף עֱבִידַת יַמָא מָחֲתִין בְּמִגְדָלֵי אָעֵי הֲדַסִין בְּהוֹן הֲוַת סְחוֹרְתִּיךְ:",
        "בִּסְפִינֵי יַמָא הֲווֹ שַׁיְטִין וּמַיְתָן סְחוֹרָא לְגַוִיךְ וַעֲתַרְתְּ וּתְקֵיפְתְּ לַחֲדָא בְּגוֹ יַמַיָא:",
        "בְּמַיִין סַגִיאִין עָלוּ עֲלָךְ וּבָזוּ יָתִיךְ מֶלֶךְ דְתַקִיף כְּרוּחַ קִדוּמָא תַּבְרִיךְ בְּגוֹ יַמַיָא:",
        "עוֹתְרִיךְ וְנִכְסַיִךְ סְחוֹרְתִּיךְ סַפָּנַיִךְ וּפַרְנָסָיִךְ מַתְקְפֵי צוֹרְכִיךְ וּמַיְתָן סְחוֹרַת חֶנְוָתַיִךְ וְכָל גַבְרֵי עָבְדֵי קְרָבִיךְ דִי בִיךְ וְכָל מַשִׁרְיָתִיךְ דִי בְגַוִיךְ יִתְרְמוּן בְּגוֹ יַמַיָא בְּיוֹם מַפְּלַת קְטִילַיִךְ:",
        "לְקַל צַוְחַת פַּרְנָסַיִךְ יְזוּעוּן פַּרְוָרַיָא:",
        "וְיִחֲתוּן מִסְפִינֵיהוֹן כָּל אָחֲדֵי מָשׁוֹט סַפָנִין כָּל פַּרְנָסֵי יַמָא עַל אַרְעָא יְקוּמוּן:",
        "וְיִשְׁמְעוּן עֲלָךְ בְּקָלֵיהוֹן וְיִצְוָחוּן בְּמֶרֶר וְיַסְקִין עַפְרָא עַל רֵישֵׁיהוֹן בְּקִיטְמָא יְהוֹן חֲפִיפִין:",
        "וְיִמְרְטוּן עֲלָךְ מְרַט וְיֵיסְרוּן סַקִין וְיִבְכּוּן עֲלָךְ בִּמְרִיר נְפַשׁ וְיַעְבְּדוּן מִסְפַּד מְרִיר:",
        "וְיִטְלוּן עֲלָךְ בְּעִינוּיֵהוֹן אִילְיָא וְיֵלִילוּן עֲלָךְ מַן כְּצוֹר לֵית דְדָמֵי לָהּ בְּגוֹ יַמַיָא:",
        "בְּמִפַּק סְחוֹרְתִּיךְ מִבֵּינֵי עַמְמַיָא שַׂבַעְתְּ עַמְמִין סַגִיאִין בִּסְגֵי עוֹתְרִיךְ וְנִכְסַיִךְ אַעַתַּרְתְּ מַלְכֵי אַרְעָא:",
        "כְּעַן אִתְּבָרַת דַהֲוַת מְסַפְּקָא סְחוֹרָא לְעַמְמַיָא בְּעוֹמְקֵי יַמָא סְחוֹרְתִּיךְ וְכָל מַשִׁרְיָתִיךְ בְּגַוִיךְ נְפָלוּ:",
        "כָּל יַתְבֵי נַגְוָתָא צְדִיאוּ עֲלָךְ וּמַלְכֵיהוֹן זָעוּ זִיעַ אִתְרְשִׁימוּ אַפֵּיהוֹן:",
        "תַּגָרִין בְּעַמְמַיָא צְדִיאוּ עָלַיִךְ כִּדְלָא הֲוֵית אֶתְּנִינִיךְ וְכֵן תְּהֵין עַד עַלְמָא:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אֱמַר לְמַלְכָּא דְצוֹר כִּדְנַן אֲמַר לִיבָּךְ וַאֲמַרְתְּ דַחֲלָא אֲנָא יְיָ אֱלֹהִים חֲלַף דְרָאֵים מוֹתַב תַּקִיפִין יְתִיבֵית בְּגוֹ יַמַיָא וְאַתְּ אֱנָשָׁא וְלֵית בָּךְ צְרוֹךְ וַחֲשַׁבְתָּא בְלִיבָּךְ דְאַתְּ דַחֲלָא:",
        "הָא חַכִּים אַתְּ מִדָנִיאֵל וְכָל רָז לָא יִתְכַּסָא מִנָךְ:",
        "בְּחוּכְמְתָךְ וּבְסִכְלְתָנוּתָךְ קְנִיתָא לָךְ נִכְסִין וּכְנִשְׁתָּא דַהֲבָא וְכַסְפָּא בְּאוֹצְרָךְ:",
        "בִּסְגִי חוֹכְמְתָךְ וּבִסְחוֹרָתָךְ סַגִיאָה מַשִׁרְיָתָךְ וְרָאֵים לִבָּךְ בְמַשִׁרְיָתָךְ:",
        "בְּכֵן כִּדְנַן אֲמַר יְיָ אֱלֹהִים חֲלַף דַחֲשַׁבְתָּא בְּלִבָּךְ דְאַתְּ דַחֲלָא:",
        "בְּכֵן הָא אֲנָא מַיְתֵי עֲלָךְ נוּכְרָאִין תַּקִיפֵי עַמְמַיָא וְיִשְׁלְפוּן סַיְפֵיהוֹן עַל תִּקוּן חוּכְמְתָךְ וִיחַבְּלוּן זִיו אֵימָתָךְ:",
        "לְחַבָּלָא יַחְתוּנָךְ וּתְמוּת מְמַת מְטַעֲנֵי חַרְבָּא בְּגוֹ יַמַיָא:",
        "הֲמֵימַר תֵּימַר דַחֲלָא אֲנָא קֳדָם דְקַטְלָךְ וְאַתְּ אֱנָשָׁא וְלֵית בָּךְ צְרוֹךְ בְּיַד מְחַבְּלָךְ:",
        "מְמַת רַשִׁיעִין תְּמוּת בְּיַד נוּכְרָאִין אֲרֵי אֲנָא גְזַרֵית בְּמֵימְרִי אֲמַר יְיָ אֱלֹהִים:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם טוֹל אִילְיָא עַל מַלְכָּא דְצוֹר וְתֵימַר לֵיהּ כִּדְנַן אֲמַר יְיָ אֱלֹהִים אַתְּ דָמֵי לְמָנָא דְצוּרְתָא דִי מְתַקֵן בְּחוּכְמְתָא וּמְשֻׁכְלַל בְּשׁוּפְרֵיהּ:",
        "בִּסְגִי טָבְוָן וְתַפְנוּקִין אַתְּ מִתְפְּנַק כְּאִילוּ בְּעֵדֶן גִנְתָא דַייָ אַתְּ שָׁרַי כָּל עֻתְרָא גֵיוְתָא וִיקָרָא מִתְיַהַב לָךְ כָּל אַבְנִין טָבִין מְסַרְדָן עַל לְבוּשָׁךְ סַמְקָן יַרְקָן וְסִבְהֲלוֹם כְּרוּם יַמָא וּבוּרְלָא וּפַנְתֵּירִין שִׁבְזֵיז אִזְמַררְגְדִין וּבַרְקָן מְשַׁקְעִן בִּדְהַב כָּל אִלֵין עֲבִידַת תִּקוּנְךְ בְּכֵן רָאֵים לִבָּךְ בְּרַם לָא אִסְתַּכַּלְתְּ בְּפִגְרָךְ דְאִתְעֲבִיד חֲלָלִין וּנְקָבִין דְאִינוּן צוֹרְכָן דְלָא אֶפְשַׁר לָךְ דְתִתְקַיֵים בְּלָא בְּהוֹן מִיוֹמָא דְאִתְבְּרֵיתָא עִמָךְ מְתַקְנִין:",
        "אַתְּ מְלַךְ מְרַבָּא לְמָלְכוּ וִיהֵבִית לָךְ רְבוּתָא וְאַתְּ עַל טוּר קוּדְשָׁא דַייָ בְּסַרְתָּא וּבְעַמָא קַדִישָׁא סְבַרְתָּא לְמִשְׁלַט:",
        "שְׁלִים אַתְּ בְּאוֹרְחָךְ מִיוֹמָא דְאִתְבְּרֵיתָא עַד דְאִשְׁתַּכַּח שְׁקַר בִּיךְ:",
        "בִּסְגִיאוּת סְחוֹרְתָּךְ אִתְמְלִיאוּ אוֹצְרָךְ חֲטוֹף וְחַבְתָּא וַאֲפִסִינָךְ עַל דִבְסַרְתָּ עַל טוּר קוּדְשָׁא דַייָ וְאַבְּדִינָךְ מַלְכָּא דְרַבְּתָנָא עַל דִי סְבַרְתָּא לְמִשְׁלַט בְּעַמָא קַדִישָׁא:",
        "רָאֵים לִבָּךְ בְּתוּקְפָךְ אִתְחַבַּלְתָּ בְּחוּכְמְתָךְ עַל זִיו אֵימְתָךְ עַל אַרְעָא רְטַשְׁתָּךְ אַזְהָרָא לְמַלְכַיָא יְהַבְתִּיךְ לְאִסְתַכְּלָא בָךְ:",
        "מִסְגֵי חוֹבָךְ בִּשְׁקַר סְחוֹרְתָּךְ אָפֵיסְתָּא מַקְדְשָׁךְ וְאַיְתֵי עַמְמַיָא דְתַקִיפִין כְּאֶשְׁתָּא מֵחוֹבֵי זְדוֹנָךְ אִינוּן יְשֵׁיצוּנָךְ וְאֶתְּנִינָךְ כִּקְטַם עַל אַרְעָא לְעֵינֵי כָּל חָזָךְ:",
        "כָּל דְיָדְעָךְ בְּעַמְמַיָא צְדִיאוּ עֲלָךְ כִּדְלָא הֲוֵית אֶתְנִינָךְ וְכֵן תְּהֵי עַד עָלְמָא:",
        "וַהֲוָה פִתְגָם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם קַבֵּיל נְבוּאָה עַל צִידוֹן וְאִתְנַבֵּי עֲלָה:",
        "וְתֵימַר כִּדְנָן אֲמַר יְיָ אֱלֹהִים הָא אֲנָא שְׁלַח רוּגְזִי עֲלָךְ צִידוֹן וְאִתְיַקַר בְּנַיִיךְ וְיֵדְעוּן אֲרֵי אֲנָא יְיָ כַּד אַעְבֵּיד בִּיךְ פּוּרְעֲנוּת דִינִין וְאֶתְקַדֵשׁ בָּהּ:",
        "וַאֲשַׁלַח בָּהּ מוֹתָא וּקְטָלָא בְשׁוּקָהָא כַּד יִתְרְמוּן קְטִילִין בְּגַוָהּ בְּאַיְתָיוּתִי עֲלָהּ דְקָטְלִין בְּחַרְבָּא מִסְחוֹר סְחוֹר וְיֵדְעוּן אֲרֵי אֲנָא יְיָ:",
        "וְלָא יְהֵי עוֹד לְבֵית יִשְׂרָאֵל מְלַךְ מַבְאִישׁ וְשִׁלְטוֹן מָעֵיק מִכָּל סָחֳרָנֵיהוֹן דְבָזְזִין יַתְהוֹן וְיֵדְעוּן אֲרֵי אֲנָא יְיָ אֱלֹהִים:",
        "כִּדְנַן אֲמַר יְיָ אֱלֹהִים כַּד אַכְנַשׁ יַת בֵּית יִשְׂרָאֵל מִבֵּינֵי עַמְמַיָא דְאִתְבַּדַרוּ לְתַמָן וְאִתְקַדֵשׁ בְּהוֹן לְעֵינֵי עַמְמַיָא וִיתוּבוּן עַל אַרְעֲהוֹן דִיהֲבִית לְעַבְדִי לְיַעֲקֹב:",
        "וִיתוּבוּן עֲלָהּ לְרוֹחֲצָן וְיִבְנוּן בָּתִּין וְיִצְבוּן כַּרְמִין וְיֵתְבוּן לְרוֹחֲצָן כַּד אַעְבֵיד פּוּרְעֲנוּת דִינִין מִכֹּל דְבָּזְזִין יַתְהוֹן מִסָחְרָנֵיהוֹן וְיֵדְעוּן אֲרֵי אֲנָא יְיָ אֱלָהָהוֹן:"
      ],
      [
        "בְּשַׁתָּא עֲשִׂירְיֵתָא בַּעֲשִׂירָאָה בִּתְרֵי עֲסַר לְיַרְחָא הֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם קַבֵּיל נְבוּאָה עַל פַּרְעֹה מַלְכָּא דְמִצְרָיִם וְאִתְנַבֵּי עֲלוֹהִי וְעַל מִצְרָאֵי כּוּלְהוֹן:",
        "אִתְנַבֵּי וְתֵימַר כִּדְנַן אֲמַר יְיָ אֱלֹהִים הָא אֲנָא שְׁלַח רוּגְזִי עֲלָךְ פַּרְעֹה מַלְכָּא דְמִצְרָיִם דְאַתְּ דָמֵי לְתַנִינָא רַבָּא דִי שָׁרֵי בְּגוֹ נַהַרְוָתֵיהּ דִי אֲמַר דִילִי מַלְכוּתָא וַאֲנָא כְבִישִׁית:",
        "וְאֶתֵּן שִׁירִין בְּלִיסָתָךְ וְאֶקְטוֹל שִׁלְטוֹנֵי תוּקְפָךְ עִם גִבָּרָךְ וַאֲבַטְלִינָךְ מִמַלְכוּתָךְ וְיַת כָּל שִׁלְטוֹנֵי תוּקְפָךְ עִם גִבָּרָךְ יִתְקַטְלוּן:",
        "וַאֲרַטְשִׁינָךְ לְמָדְבְּרָא יָתָךְ וְיַת כָּל שִׁלְטוֹנֵי תוּקְפָךְ עַל אַפַּי חַקְלָא תִּתְרְמֵי נְבֵילְתָּךְ לָא תִתְכְּנֵישׁ וְלָא תִתְקְבַר לְחַיַת אַרְעָא וּלְעוֹפָא דִשְׁמַיָא מְסַרְתָּךְ לְאִשְׁתֵּיצָאָה:",
        "וְיֵדְעוּן כָּל יַתְבֵי מִצְרַיִם אֲרֵי אֲנָא יְיָ חֲלַף דַהֲווֹ סְמַךְ קַנְיָא רְעִיעָא לְבֵית יִשְׂרָאֵל:",
        "בְּאִתְכְּנָיוּתְהוֹן בָּךְ בְּיַד מְלַךְ תַּקִיף תִּתְמְסַר וְיֵיבַד בֵּית רוֹחֲצָנֵיהוֹן וּבְאִיסְתְּמָכוּתְהוֹן עֲלָךְ תִּתְּבַר וְלָא תְהֵי לְהוֹן לְבֵית סוּמְכְוָן:",
        "בְּכֵן כִּדְנַן אֲמַר יְיָ אֱלֹהִים הָא אֲנָא מַיְתֵי עֲלָךְ דְקַטְלִין בְּחַרְבָּא וֶאֱשֵׁיצֵי מִנָךְ אֱנָשָׁא וּבְעִירָא:",
        "וּתְהֵי אַרְעָא דְמִצְרָיִם לְאִישְׁתְּמָמוּ וְחוּרְבָּא וְיֵדְעוּן אֲרֵי אֲנָא יְיָ חֲלַף דַאֲמַר מַלְכוּתָא דִילִי וַאֲנָא כַבְּשֵׁית:",
        "בְּכֵן הָא אֲנָא שְׁלַח רוּגְזִי עֲלָךְ וְעַל מַלְכְּוָתָךְ וְאֶתֵּן יַת אַרְעָא דְמִצְרַיִם לְחוֹרֶב צָדוּ וּשְׁמָמוּ מִמִגְדַל סְוֵנָה וְעַד תְּחוּם כּוּשׁ:",
        "לָא תֶעְבַּר בָּהּ רִגְלָא דִי אֱנָשָׁא וְרִגְלָא דִי בְעִירָא לָא תֶעְבַּר בָהּ וְלָא תִתְיַתֵּב אַרְבְּעִין שְׁנִין:",
        "וְאֶתֵּן יַת אַרְעָא דְמִצְרַיִם לְצָדוּ בְּגוֹ מְדִינָן צַדְיָן וְקִרְוָהָא בְּגוֹ קִרְוִין דַהֲוָאָה חֶרְבָּן יֶהֶוְיָן לְצָדוּ אַרְבְּעִין שְׁנִין וְאַגְלֵי יַת מִצְרָאֵי לְבֵינֵי עַמְמַיָא וֶאֱבַדְרִינוּן בִּמְדִינָתָא:",
        "אֲרֵי כִדְנַן אֲמַר יְיָ אֱלֹהִים מִסוֹף אַרְבְּעִין שְׁנִין אַכְנֵישׁ יַת מִצְרָאֵי מִבֵּינֵי עַמְמַיָא דְאִתְבַּדָרוּ לְתַמָן:",
        "וְאֶתֵּיב יַת גָלוּת מִצְרַיִם וְאָתֵיב יַתְהוֹן לְאַרְעָא פַּתְרוֹס עַל אַרְעָא תּוֹתְבוּתְהוֹן וִיהוֹן תַּמָן מָלְכוּ חֲלָשָׁא:",
        "מִן מַלְכְּוָתָא תְּהֵי חֲלָשָׁא וְלָא תִתְרַבְרֵב עוֹד עַל עַמְמַיָא וְאַזְעִירִינוּן בְּדִיל דְלָא יִפְלְחוּן בְּעַמְמַיָא:",
        "וְלָא יְהוֹן עוֹד לְבֵית יִשְׂרָאֵל לְאִתְרַחָצָא עֲלֵיהוֹן לְאַדְכְּרָא חוֹבִין בְּאַפְנָיוּתְהוֹן בַּתְרֵיהוֹן וְיֵדְעוּן אֲרֵי אֲנָא יְיָ אֱלֹהִים:",
        "וַהֲוָה בְּעַסְרִין וּשְׁבַע שְׁנִין בְּקַדְמָאָה בְּחַד לְיַרְחָא הֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם נְבוּכַדְרֶאצַר מַלְכָּא דְבָבֶל אַפְלַח יַת מַשִׁרְיָתֵיהּ פּוּלְחַן רַב עַל כָּל סְעַר רֵישׁ נַתֵּר וְכָל כְתַף אִתְמְרַט וַאֲגָר לָא הֲוָה לֵיהּ וּלְמַשִׁרְיָתֵיהּ מִצוֹר עַל פּוּלְחָנָא דְאַפְלַח עֲלָהּ:",
        "בְּכֵן כִּדְנַן אֲמַר יְיָ אֱלֹהִים הָא אֲנָא יָהֵיב לִנְבוּכַדְרֶאצַר מַלְכָּא דְבָבֶל יַת אַרְעָא דְמִצְרָיִם וְיִשְׁבֵּי אִתְרְגוּשְׁתָּהּ וְיִבּוֹז בִּזָהּ וְיַעְדֵי עֲדָאָהּ וּתְהֵי אֲגַר לְמַשִׁרְיָתֵיהּ:",
        "אַגְרֵיהּ דְאַפְלַח בֵּיהּ יְהָבֵית לֵיהּ יַת אַרְעָא דְמִצְרָיִם דְחָבוּ קֳדָמָי לְאִתְפְּרַע מִנְהוֹן אֲמַר יְיָ אֱלֹהִים:",
        "בְּיוֹמָא הַהוּא אַיְתֵי פוּרְקַן לְבֵית יִשְׂרָאֵל וְלָךְ אֶתֵּן מִפְתַּח פּוּמָא בִּנְבוּאָה בֵינֵיהוֹן וְיֵדְעוּן אֲרֵי אֲנָא יְיָ:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אִתְנַבֵּי וְתֵימַר כִּדְנַן אֲמַר יְיָ אֱלֹהִים אַיְלִילוּ וַאֲמָרוּ וַי מִן קֳדָם יוֹמָא:",
        "אֲרֵי קָרִיב יוֹמָא וְקָרִיב יוֹמָא דַעֲתִיד לְמֵיתֵי מִן קֳדָם יְיָ יוֹם עַנַן זִיעַ תְּבַר עַמְמַיָא יְהֵי:",
        "וְתָחוֹל חַרְבָּא בְּמִצְרַיִם וִיהֵי זִיעַ בְּכוּשׁ כַּד יִתְרְמוּן קְטִילִין בְּמִצְרַיִם וְיִשְׁבּוּן אִתְרְגוּשְׁתָּהּ וְיִתְפַּגְרוּן אוּשְׁוָתָהָא:",
        "כּוּשָׁאֵי וּפוּטָאֵי וְלוּדָאֵי וְכָל סוּמְכָוָתָא וְכוּב וּבְנֵי אַרְעָא קְיָמָא עִמְהוֹן בְּחַרְבָּא יִתְקַטְלוּן:",
        "כִּדְנַן אֲמַר יְיָ וְיִתְקַטְלוּן סַעֲדֵי מִצְרַיִם וְיִבַטֵל יְקַר תּוּקְפָהּ מִמִגְדוֹל סְוָנֵה בְּחַרְבָּא יִתְקַטְלוּן בָּהּ אֲמַר יְיָ אֱלֹהִים:",
        "וְיִצְדוּן בְּגוֹ מְדִינָן דְצַדְיָן וְקִרְווֹהִי בְּגוֹ קִרְוֵין דַהֲוָאָה חָרְבָן יֶהֱוְיָן:",
        "וְיֵדְעוּן אֲרֵי אֲנָא יְיָ בִּדְאֶתֵּן עַמְמַיָא דְתַקִיפִין כְּאֶשְׁתָּא עַל מִצְרַיִם וְיִתְּבְרוּן כָּל סְעִידָהָא:",
        "בְּעִדָנָא הַהִיא יִפְקוּן אִזְגַדִין מִן קֳדָמַי בְּלִגְיוֹנִין לַאֲזָעָא כּוּשׁ דְשַׁרְיָא לְרוֹחֲצָן וִיהֵי זִיעָא בְּהוֹן כְּיוֹם מִצְרַיִם אֲרֵי הָא אַתְיָא:",
        "כִּדְנַן אֲמַר יְיָ אֱלֹהִים וַאֲבַטֵיל יַת אִתְרְגוּשַׁת מִצְרַיִם בְּיַד נְבוּכַדְרֶאצַר מַלְכָּא דְבָבֶל:",
        "הוּא וְעַמֵיהּ עִמֵיהּ תְּקִיפֵי עַמְמַיָא אֶתֵּן לְחַבָּלָא אַרְעָא וְיִשְׁלְפוּן סַיְפֵיהוֹן עַל מִצְרַיִם וְיִמְלוֹן יַת אַרְעָא קְטִילִין:",
        "וְאֶתֵּן נַהֲרֵיהוֹן יַבֶּשְׁתָּא וְאֶמְסַר יַת אַרְעָא בְּיַד מַבְאֲשִׁין וְאַצְדֵי אַרְעָא וּמְלָהָא בְּיַד רְשִׁיעִין אֲנָא יְיָ גְזָרִית בְּמֵימְרִי:",
        "כִּדְנַן אֲמַר יְיָ אֱלֹהִים וְאַבֵיד דְפָלְחִין לְטַעֲוָתָא וֶאֱשֵׁיצֵי דְפָלְחִין לְצַלְמָנַיָא מִמָפֵס וּמַלְכָּא מֵאַרְעָא דְמִצְרַיִם דַחֲלָא בְּמִצְרַיִם:",
        "וְאַצְדֵי יַת פַּתְרוֹס וְאַיְתֵי עַמָא דְתַקִיפִין כְּאֶשְׁתָּא עַל טָאנֵיס וְאַעְבֵּיד פּוּרְעֲנוּת דִינִין בְּאַלַכְסַנְדַרְיָא:",
        "וְאֶשְׁפּוֹךְ חֵימְתִי עַל סִין תְּקוֹף מִצְרַיִם וֶאֱשֵׁיצֵי יַת אִתְרְגוּשַׁת אֲלַכְסַנְדַרְיָא:",
        "וְאַיְתֵי עַמְמַיָא דְתַקִיפִין כְּאֶשְׁתָּא בְּמִצְרַיִם מִזַע תְּזוּעַ סִין וַאֲלַכְסַנְדַרְיָא תְּהֵי מְתַרְעָא מִשׁוּר וּמָפֵיס בַּעֲלֵי דְבָבוּ יִקְפוּנָהּ יוֹם יוֹם:",
        "עוּלֵימֵי אָוֶן וּפִיבֶסֶת בְּחַרְבָּא יִתְקַטְלוּן וּפָלְחֵיהוֹן בְּשִׁבְיָא יָהֲכוּן:",
        "וְעַל תַּחְפַּנְחֵס אַיְתֵי חֲשׁוֹךְ בִּימָם כַּד אֶתְבַּר תַּמָן יַת תְּקוֹף מִצְרַיִם וִיבַטֵל בָּהּ יְקַר תּוּקְפָהּ מְלַךְ בְּמַשִׁרְיָתֵיהּ יַחְפִּינָהּ כַּעֲנָנָא דְסָלֵיק וְחָפֵי יַת אַרְעָא וְיַתְבֵי כַפְרָנָהָא בְּשִׁבְיָא יָהֲכוּן:",
        "וְאַעְבֵּד פּוּרְעֲנוּת דִינִין בְּמִצְרַיִם וְיֵדְעוּן אֲרֵי אֲנָא יְיָ:",
        "וַהֲוָה בַּחֲדָא עַשְׂרֵי שְׁנִין בְּקַדְמָאָה בְּשַׁבְעָא לְיַרְחָא הֲוָה פִתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם יַת תְּקִיף פַּרְעֹה מַלְכָּא דְמִצְרַיִם תַּבְרֵית וְהָא לָא מִתַּקְפָא לְאִתַּסָאָה לְמִתַּן עֵיצָה לְמֶחְכַּם לְאִתַּקָפָא לְמֵיחַד מַלְכּוּ:",
        "בְּכֵן כִּדְנַן אֲמַר יְיָ אֱלֹהִים הָא אֲנָא שְׁלַח רוּגְזִי עַל פַּרְעֹה מַלְכָּא דְמִצְרַיִם וְאֶתְּבַר יַת סַעֲדוֹהִי וְיַת שִׁלְטוֹנוֹהִי תַקִיפַיָא דִבְהוֹן הוּא תְבַר יַת מַלְכְּוָתָא וְאֶרְמֵי יַת תּוּקְפָא מִנֵיהּ:",
        "וְאַגְלֵי יַת מִצְרָאֵי בֵּינֵי עַמְמַיָא וַאֲבַדְרִינוּן בִּמְדִינָתָא:",
        "וְאַתְקֵיף יַת מַלְכוּת מַלְכָּא דְבָבֶל וְאֶתֵּן יַת תּוּקְפִי בִּידֵיהּ וְאֶתְּבַר יַת תְּקוֹף פַּרְעֹה וְיִנְהֵם נְהוֹם מְטַעֲנֵי חֶרֶב קֳדָמוֹהִי:",
        "וְאַתְקֵיף יַת מַלְכוּת מַלְכָּא דְבָבֶל וּמַלְכוּת פַּרְעֹה תִּבְטֵל וְיֵדְעוּן אֲרֵי אֲנָא יְיָ כַּד אֶתֵּן תּוּקְפִי בְּיַד מַלְכָּא דְבָבֶל וְיִתְפְּרַע פּוּרְעֲנוּת מִן אַרְעָא דְמִצְרָיִם:",
        "וְאַגְלֵי יַת מִצְרָאֵי לְבֵינֵי עַמְמַיָא וֶאֱבַדַר יַתְהוֹן בִּמְדִינָתָא וְיֵדְעוּן אֲרֵי אֲנָא יְיָ:"
      ],
      [
        "וַהֲוָה בַּחֲדָא עַסְרָא שְׁנִין בִּתְלִיתָאָה בְּחַד לְיַרְחָא הֲוָה פִּתְגָם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אֲמַר לְפַרְעֹה מַלְכָּא דְמִצְרַיִם וּלְאִתְרְגוּשְׁתֵּהּ לְמָן דְמִיתָא בְּתוּקְפָךְ:",
        "הָא אַתּוּרָאָה דַמְיָא לְאַרְזָא בְּלִבְנָן דְנוֹפֵיהּ שַׁפִּיר וְסוֹכֵיהּ מַטְלָן וְרָם בְקוֹמָה וְעַל נַגְדִין שָׁלַח שָׁרְשׁוֹהִי:",
        "בְּעַמְמַיָא סַגִי בְּסוּמְכְוָתָא תַּקִיף יַת מַלְכַיָא שַׁעְבֵּיד לִתְחוֹת מַלְכוּתֵיהּ וְיַת שִׁלְטוֹנוֹהִי מָנֵי עַל כָּל מְדִינַת אַרְעָא:",
        "עַל כֵּן רָאִים בְּתוּקְפֵיהּ מִכָּל מַלְכֵי אַרְעָא וּסְגִיאַת מַשִׁרְיָתֵיהּ וְאִתְנַצְחוּ סוּמְכְוָתֵיהּ עַל עַמְמִין סַגִיאִין בְּאִתְנַצְחוּתֵהּ:",
        "בְּמַשִׁרְיָתֵיהּ כְּבֵישׁ כָּל כְּרַכִּין תַּקִיפִין וּתְחוֹת שִׁלְטוֹנוֹהִי שַׁעְבֵּיד כָּל מְדִינַת אַרְעָא וּבִטְלַל מַלְכוּתֵיהּ יְתִיבוּ כָּל עַמְמִין סַגִיאִין:",
        "וְאִתְנְצַח בְּסוּמְכְוָתֵיהּ בִּסְגֵי גִבָּרוֹהִי אֲרֵי הֲוַת אֵימְתֵיהּ עַל עַמְמִין סַגִיאִין:",
        "מַלְכִין תַּקִיפִין לָא אִתְנְצָחוּ לְקִבְלֵהּ בִּתְקוֹף גְבוּרָא דַהֲוַת עִמֵהּ מִן קֳדָם יְיָ שִׁלְטוֹנִין לָא קָמוּ קֳדָם מַשִׁרְיָתֵיהּ וְגִבָּרִין לָא יָכִילוּ כְּסִימְכְוָתֵיהּ בִּתְקוֹף גְבוּרָא דַהֲוַת עִמֵיהּ מִן קֳדָם יְיָ לָא דָמֵיהּ לֵיהּ בְּתוּקְפֵיהּ:",
        "שַׁפִּיר עֲבִידְתֵּיהּ בִּסְגֵי גִבָּרוֹהִי וְזָעוּ מִן קֳדָמוֹהִי כָּל מַלְכֵי קֶדֶם בִּתְקוֹף גְבוּרָא דַהֲוַת עִמֵהּ מִן קֳדָם יְיָ:",
        "בְּכֵן כִּדְנַן אֲמַר יְיָ אֱלֹהִים חֲלַף דְרָמְתָּא בְּקוֹמָה וִיהַב מַרְוָתֵיהּ עַל מַלְכְּוָתָא וְרָאֵים לִבֵּיהּ בְּתוּקְפֵיהּ:",
        "וְאֶמְסְרִינֵיהּ בְּיַד תַּקִיף עַמְמַיָא אִתְפְּרַע מִנֵיהּ בְּחוֹבֵיהּ תָּרֵיכְתֵּיהּ:",
        "וְשֵׁיצָיוֹהִי נוּכְרָאִין תַּקִיפֵי עַמְמַיָא וְרַטְשׁוּהִי עַל טוּרַיָא וּבְכָל חֵילַיָא נָפְלָא מַשִׁרְיָתֵיהּ וְאִתְבַּדָרוּ סוּמְכְוָתֵיהּ בְּכָל פַּצִידֵי אַרְעָא וּנְחָתוּ מִטְלַל מַלְכוּתֵיהּ כָּל עַמְמֵי אַרְעָא וְרַטְשׁוֹהִי:",
        "עַל מַפָּלַת קְטִילוֹהִי שְׁרוֹ כָּל עוֹפָא דִשְׁמַיָא וְעַל פִּגְרֵי מַשִׁירְיָתֵיהּ נָחָא כָּל חַיַת בָּרָא:",
        "בְּדִיל דְלָא יְרָאמוּן בְּתוּקְפֵיהוֹן כָּל מַלְכֵי קֶדֶם וְלָא יִתְּנוּן יַת מַרְוַתְהוֹן עַל מַלְכְּוָתָא וְלָא יִתְרַבְרְבוּן לְהוֹן בְּתוּקְפֵיהוֹן כָּל עַבְדֵי מַלְכוּ אֲרֵי כּוּלְהוֹן אִתְמְסָרוּ לְמוֹתָא לְאַרְעָא אַרְעִיתָא בְּגוֹ בְנֵי אֱנָשָׁא עִם נָחֲתֵי גוֹב בֵּית אַבְדָנָא:",
        "כִּדְנַן אֲמַר יְיָ אֱלֹהִים בְּיוֹם אַחְתוֹתִי יָתֵיהּ לִשְׁאוֹל אִתְאַבָּלוּ עֲלוֹהִי חֲפַת עָקָא יַת עַלְמָא וְחָרוֹבָא מְדִינָתָא וְזָעוּ עַמְמִין סַגִיאִין וַחֲשׁוֹכוּ עֲלוֹהִי אַפֵּי מַלְכַיָא וְכָל מַלְכֵי עַמְמַיָא עֲלוֹהִי טְפָחוּ כַתְפָא:",
        "מִקַל מַפַּלְתֵּיהּ אַזְעִית עַמְמַיָא בְּאַחֲתוֹתִי יָתֵיהּ לִשְׁאוֹל עִם נַחֲתֵי גוֹב בֵּית אַבְדָנָא וְאִתְנֵחֲמוּ בְּאַרְעָא אַרְעִיתָא כָּל מַלְכֵי קֶדֶם שִׁלְטוֹנִין וְעַתִּירֵי נִכְסַיָא כָּל עַבְדֵי מַלְכוּ:",
        "אַף אִינוּן עִמֵיהּ אִתְחָתוּ לִשְׁאוֹל עִם קְטִילֵי חַרְבָּא וְשִׁלְטוֹנוֹהִי אִתְּבָרוּ מַתְקִיפֵיהוֹן בְּגוֹ מַלְכוּתָא:",
        "לְמַן דַמְיֵתָא כְּדֵין בִּיקַר וּבִרְבוּ בְּמַלְכֵי קֶדֶם וְתִתְּחַת עִם מַלְכֵי קֶדֶם לְאַרְעָא אַרְעִיתָא בְּגוֹ חַיָבַיָא תִשְׁכַּב עִם קְטִילֵי חַרְבָּא הוּא פַרְעֹה וְכָל אִתְרְגוּשְׁתֵּיהּ אֲמַר יְיָ אֱלֹהִים:"
      ],
      [
        "וַהֲוָה בְּתַרְתָּא עַסְרֵי שְׁנִין בִּתְרֵי עֲסַר יַרְחִין בְּחַד לְיַרְחָא הֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם טוֹל אִלְיָא עַל פַּרְעֹה מַלְכָּא דְמִצְרַיִם וְתֵימַר לֵיהּ תַּקִיף בְּעַמְמַיָא הֲוֵיתָא וְאַתְּ כְּתַנִינָא בְּיַמַיָא וְאַגַחְתָּא בְּמַשְׁרִיתָךְ וַאֲזַעְתָּא עַמְמַיָא בְּסוּמְכְוָתָךְ וְאַחֲרֵיבְתָּא מְדִינַתְהוֹן:",
        "כִּדְנַן אֲמַר יְיָ אֱלֹהִים וְאַפְרֵס עֲלָךְ יַת מְצַדְתִּי בִּקְהַל עַמְמִין סַגִיאִין וְתִתְאַחַד בִּסְרִיגְתִּי:",
        "וַאֲרַטְשִׁינָךְ בְּאַרְעָא עַל אַפֵּי בָּרָא אֶרְמֵי נְבֵילְתָּךְ וְאַשְׁרֵי עֲלָךְ כָּל עוֹפָא דִשְׁמַיָא וְאַסְבַּע מִנָךְ חַיַת כָּל אַרְעָא:",
        "וְאֶתֵּן יַת בְּסַר קְטִילָךְ עַל טוּרַיָא וְיִתְמְלוּן חֵילַיָא פִגְרֵי מַשִׁרְיָתָךְ:",
        "וַאֲרַוֵי אַרְעָא דַהַנְיָתָא מִדָמָךְ עַל טוּרַיָא וּפַצִידַיָא יִתְמְלוּן מִנָךְ:",
        "וְתַחֲפִינָךְ עָקָא בְּאַכְהָיוּתִי יַת זִיו יְקַר מַלְכוּתָךְ מִן שְׁמַיָא יִזְעֲרוּן עִם מַשִׁרְיָתָךְ דַהֲווֹ סַגִיאִין כְּכוֹבְיַיָא מְלַךְ בְּמַשִׁרְיָתֵיהּ יַחֲפִינָךְ בַּעֲנָנָא דְסָלֵיק וְחָפֵי יַת שִׁמְשָׁא וּכְסִהֲרָא בִּימָמָא לָא מַזְהַר נְהוֹרֵיהּ:",
        "כָּל שְׁבִילֵי אוֹרְחָתִיךְ דִמְתַקְנִין וּנְטִירָן בְּגַוִיךְ הָא כִּמְנַהֲרֵי זַהֲרַיָא בִשְׁמַיָא אֲקַלְקְלִינוּן עֲלָךְ וְתַחֲפֵי עָקָא כְּקִבְלָא יַת אַרְעָךְ אֲמַר יְיָ אֱלֹהִים:",
        "וַאֲזִיעַ לֵב עַמְמִין סַגִיאִין בְּאַיְתָיוּתִי תְבִירֵי קְרָבָךְ לְבֵינֵי עַמְמַיָא לִמְדִינָן דְלָא יְדַעְתִּינוּן:",
        "וְאַצְדֵי עֲלָךְ עַמְמִין סַגִיאִין וּמַלְכֵיהוֹן יִתְמְהוֹן עֲלָךְ תֵּימָה בְּאַיְתָיוּתִי עֲלָךְ דְקַטְלִין בְּחַרְבָּא וְאִינּוּן חָזָן וְיזוּעוּן מִן קֳדָם תְּבִרְהוֹן גְבַר לְנַפְשֵׁיהּ בְּיוֹם מַפְּלַת קְטִילָךְ:",
        "אֲרֵי כִּדְנַן אֲמַר יְיָ אֱלֹהִים קְטוֹלֵי חַרְבָּא מַלְכָּא דְבָבֶל יֵיתוּן עֲלָךְ:",
        "בְּחַרְבָּא דְגִבָּרַיָא אֲמַגֵר מַשִׁרְיָתָךְ תַּקִיפֵי עַמְמַיָא כּוּלְהוֹן וְיִבְזוּן יַת תְּקוֹף מִצְרַיִם וְתִשְׁתֵּיצֵי כָּל אִתְרְגוּשְׁתָּהָא:",
        "וְאוֹבֵיד יַת כָּל בְּעִירָהּ מֵעַל מַיִין סַגִיאִין וְלָא תְזוּעוּנוּן רַגְלֵי דֶאֱנָשָׁא עוֹד וּפַרְסַת בְּעִירָא לָא תְזוּעוּנוּן:",
        "בְּכֵן אַשְׁקֵיט לְעַמְמַיָא וּמַלְכֵיהוֹן בְּנִיחַ אֲדַבֵּר אֲמַר יְיָ אֱלֹהִים:",
        "כַּד אֶתֵּן יַת אַרְעָא דְמִצְרַיִם צָדוּ וְתִצְדֵי אַרְעָא וּמְלָאָהּ בְּאַיְתָיוּתִי מְחָא עַל כָּל דְיַתְבִין בָּהּ וְיֵדְעוּן אֲרֵי אֲנָא יְיָ:",
        "אֲמַר נְבִיָא אִלְיָא הִיא נְבוּאֲתָה וּתְהֵי לְאִלְיָא כַּפְרָנֵי עַמְמַיָא יֵלְלוּן יָתָהּ עַל מִצְרַיִם וְעַל כָּל אִתְרְגוּשְׁתָּהּ יֵלִילוּן יָתָהּ אֲמַר יְיָ אֱלֹהִים:",
        "וַהֲוָה בְּתַרְתָּא עַסְרֵי שְׁנִין בְּחַמְשָׁא עֲסַר לְיַרְחָא הֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אִתְנַבֵּי עַל אִתְרְגוּשַׁת מִצְרַיִם וְתַחְתָה לָהּ וּלְכַפְרָנֵי עַמְמַיָא תַקִיפַיָא אִתְנַבֵּי דְיִתְמַסְרוּן לְאַרְעָא אַרְעִיתָא עִם נַחֲתֵי גוֹב בֵית אַבְדָנָא:",
        "מִמַן אַתְּ גִבַּר חוּת וּשְׁכִיב עִם חַיָבַיָא:",
        "בְּגוֹ קְטִילֵי חַרְבָּא יִתְרְמוּן לָהּ לְחַרְבָּא יִתְמַסְרוּן לְשֵׁיצָאָה יַתְהוֹן וְיַת כָּל אִתְרְגוּשַׁתְהוֹן:",
        "יְמַלְלוּן עִמֵיהּ תַּקִיפֵּי גִבָּרַיָא מִגוֹ שְׁאוֹל עִם סַעֲדוֹהִי נְחִיתוּ שְׁכִיבוּ חַיָבַיָא קְטִילֵי חַרְבָּא:",
        "תַּמָן אַתּוּר וְכָל מַשִׁרְיָתֵהּ סָחֲרָנוּתְהוֹן קִבְרֵיהוֹן כּוּלְהוֹן קְטִילִין דְאִתְקְטָלוּ בְּחַרְבָּא:",
        "דְאִתְמְסָרוּ לִקְבוּרָא בִּסְיָפֵי גוֹב בֵּית אַבְדָנָא וַהֲוַת מַשִׁרְיָתְהוֹן סָחֲרָנוּתְהוֹן קְבוּרָתְהוֹן כּוּלְהוֹן קְטִילַיָא דְאִתְקְטִילוּ בְּחַרְבָּא דְאִתְמְסִירוּ לִתְּבַר עַל דְשַׁלִיטוּ בְּאַרְעָא דְיִשְׂרָאֵל:",
        "תַּמָן עֵילָם וְכָל אִתְרְגוּשְׁתָּהּ סָחֲרָנוּתְהוֹן קִבְרֵיהוֹן כּוּלְהוֹן קְטִילַיָא דְאִתְקְטָלוּ בְחַרְבָּא דְאִתְּחָתוּ חַיָבַיָא לְאַרְעָא אַרְעִיתָא דְאִתְמְסִירוּ לִתְּבַר עַל דִשְׁלִיטָא בְּאַרְעָא דְיִשְׂרָאֵל וְקַבִּילוּ אִתְכְּנָעוּתְהוֹן עִם נַחֲתֵי גוֹב בֵּית אַבְדָנָא:",
        "בְּגוֹ קְטִילַיָא אִתְמַנָא בֵּית מִשְׁכַּבְהוֹן לְהוֹן בְּכָל אִתְרְגוּשַׁתְהוֹן סָחֲרָנוּתְהוֹן קִבְרֵיהוֹן כּוּלְהוֹן חַיָבַיָא קְטִילֵי חַרְבָּא דְאִתְמְסָרוּ לִתְּבַר עַל דְשַׁלִיטוּ בְּאַרְעָא דְיִשְׂרָאֵל וְקַבִּילוּ אִתְכְּנָעוּתְהוֹן עִם נַחֲתֵי גוֹב בֵּית אַבְדָנָא בְּגוֹ קְטִילַיָא אִתְמְסִירוּ:",
        "תַּמָן מֶשֶׁךְ תּוּבָל וְכָל מַשִׁרְיָתְהוֹן סָחֲרָנֵיהוֹן קְבוּרָתְהוֹן כּוּלְהוֹן חַיָבַיָא קְטִילֵי חַרְבָּא דְאִתְמְסָרוּ לִתְּבַר עַל דְשַׁלִיטוּ בְּאַרְעָא דְיִשְׂרָאֵל:",
        "וְלָא יִשְׁכְּבוּן עִם גִבָּרַיָא דְאִתְקְטָלוּ מֵחַיָבַיָא דְאִתְּחָתוּ לִשְׁאוֹל בְּמָנֵי קְרָבֵיהוֹן וִיחָבוּ יַת סַיְפֵיהוֹן תְּחוֹת רֵישֵׁיהוֹן וַהֲווֹ חוֹבֵיהוֹן עַל גָרְמֵיהוֹן אֲרֵי אִתְמְסִירוּ לִתְּבַר גִבָּרַיָא עַל דְשַׁלִיטוּ בְּאַרְעָא דְיִשְׂרָאֵל:",
        "וְאַתְּ בְּגוֹ חַיָבַיָא תִּתְּבַר וְתִשְׁכּוּב עִם קְטִילֵי חַרְבָּא:",
        "תַּמָן אֱדוֹם מַלְכָהָא וְכָל רַבְרְבָהָא דְאִתְמְסִירוּ בִּגְבוּרָתְהוֹן עִם קְטִילֵי חַרְבָּא אִינוּן עִם חַיָבַיָא יִשְׁכְּבוּן וְעִם נַחֲתֵי גוּב בֵּית אַבְדָנָא:",
        "תַּמָן רַבְרְבֵי צִפּוּנָא כּוּלְהוֹן וְכָל צִידוֹנָאֵי דְאִתְּחָתוּ עִם קָטִילַיָא בְּאִתְבָּרוּתְהוֹן מִגְבוּרַתְהוֹן בָּהֲתִין וּשְׁכִיבוּ חַיָבַיָא עִם קְטִילֵי חַרְבָּא וְקַבִּילוּ אִתְכְּנָעוּתְהוֹן עִם נַחְתֵי גוּב בֵּית אַבְדָנָא:",
        "יַתְהוֹן יֶחֱזֵי פַּרְעֹה וְיִתְנְחֵם עַל כָּל אִתְרְגוּשְׁתֵּהּ קְטִילֵי חַרְבָּא פַּרְעֹה וְכָל מַשִׁרְיָתֵיהּ אֲמַר יְיָ אֱלֹהִים:",
        "אֲרֵי אִתְמְסִירוּ לִתְּבַר גִבָּרַיָא עַל דְשַׁלִיטוּ בְאַרְעָא וּשְׁכִיבוּ בְּגוֹ חַיָבַיָא עִם קְטִילֵי חַרְבָּא דְפַרְעֹה וְכָל אִתְרְגוּשְׁתֵּיהּ אֲמַר יְיָ אֱלֹהִים:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אִתְנַבֵּי לִבְנֵי עַמָךְ וְתֵימַר לְהוֹן אַרְעָא אֲרֵי אַיְתֵי עֲלָהּ דְקַטְלִין בְּחַרְבָּא וְיִדְבְּרוּן עַמָא דְאַרְעָא גַבְרָא חַד מִבֵּינֵיהוֹן וִימַנוּן יָתֵיהּ לְהוֹן לְאַזְהָרָא:",
        "וְיֶחֱזֵי יַת דְקַטְלִין בִּחַרְבָּא אַתְיָן עַל אַרְעָא וְיִתְקַע בְּשׁוֹפְרָא וְיַזְהַר יַת עַמָא:",
        "וְיִשְׁמַע דִי שְׁמַע יַת קַל שׁוֹפָרָא וְלָא אִזְדְהַר וַאֲתוֹ קָטוֹלֵי חַרְבָּא וְדַבְּרוֹהִי חוֹבַת קְטוֹלֵיהּ בְּרֵישֵׁיהּ יְהֵי:",
        "יַת קַל שׁוֹפָרֵיהּ שְׁמַע וְלָא אִזְדְהַר חוֹבַת קָטוֹלֵי בֵּיהּ תְּהֵי וְהוּא אִזְדְהַר נַפְשֵׁיהּ שֵׁיזֵיב:",
        "וּמַזְהֲרָנָא אֲרֵי יֶחֱזֵי יַת דְקַטְלִין בְּחַרְבָּא אָתָן וְלָא תְקַע בְּשׁוֹפָרָא וְעַמָא לָא אִזְדְהַר וַאֲתוֹ קָטוֹלֵי חַרְבָּא וְדַבָּרוּ מִנְהוֹן נַפְשָׁא הוּא בְּחוֹבֵיהּ אִידְכַּר וּדְמֵהּ מִיַד אַזְהֲרָנָא אֶתְבַּע:",
        "וְאַתְּ בַּר אָדָם מַלֵיף מַנִיתָךְ לְבֵית יִשְׂרָאֵל וּתְקַבֵּיל מִמֵימְרִי פִתְגַם וְתַזְהֵר יַתְהוֹן מִלְמֶחֱטֵי קֳדָמַי:",
        "בִּדְאֲמָרֵית לְרַשִׁיעָא רַשִׁיעָא מְמָת תְּמוּת וְלָא מַלֵילְתָּא לְאַזְהָרָה רַשִׁיעָא מֵאוֹרְחֵיהּ הוּא רַשִׁיעָא בְּחוֹבֵהּ יְמוּת וּדְמֵיהּ מִן יְדָךְ אֶתְבַּע:",
        "וְאַתְּ אֲרֵי אַזְהַרְתָּ רַשִׁיעָא מֵאוֹרְחֵהּ לְמֵיתַב מִנָהּ וְלָא תַב מֵאוֹרְחֵיהּ הוּא בְּחוֹבֵיהּ יְמוּת וְאַתְּ נַפְשָׁךְ שֵׁיזֵיבְתָּא:",
        "וְאַתְּ בַּר אָדָם אֱמַר לְבֵית יִשְׂרָאֵל כֵּן אֲמַרְתּוּן לְמֵימָר אֲרֵי חוֹבָנָא וְחַטָאנָא עֲלָנָא מִתְיַהֲבִין וּבְהוֹן אֲנַחְנָא מִתְמְסִין וְאֵיכְדֵין נְחֵי:",
        "אֱמַר לְהוֹן קַיָם אֲנָא אֲמַר יְיָ אֱלֹהִים אִם רָעֵינָא בְּמִית רַשִׁיעָא אֱלָהֵין כַּד יְתוּב רַשִׁיעָא מֵאוֹרְחֵיהּ וְיֵחִי תּוּבוּ מֵאוֹרְחַתְכוֹן בִּישָׁתָא וְלָמָה תְמוּתוּן בֵּית יִשְׂרָאֵל:",
        "וְאַתְּ בַּר אָדָם אֱמַר לִבְנֵי עַמָךְ זְכוּת זַכָּאָה לָא תְשֵׁיזְבִינֵיהּ בְּיוֹמָא דְחוֹבְתֵּהּ וְחוֹבַת חַיָבָא לָא יִתְקַל בָּהּ בְּיוֹמָא דִיתוּב מֵחוֹבֵיהּ וְצַדִיקָא לָא יֵכוּל לְאִתְקַיְמָא בֵיהּ בְּיוֹמָא דְחוֹבְתֵּיהּ:",
        "בִּדְאֲמָרֵית לְזַכָּאָה מֵיחָא יְחֵי וְהוּא יִתְרְחִיץ עַל זְכוּתֵיהּ וַעֲבַד שְׁקַר כָּל זָכוּתֵיהּ לָא יִדְכְּרַן וּבְשִׁקְרֵיהּ דַעֲבֵד בֵּיהּ יְמוּת:",
        "וּבִדְאֲמָרֵית לְרַשִׁיעָא מְמַת תְּמוּת וִיתוּב מֵחוֹבוֹהִי וְיַעְבֵיד דִין דִקְשׁוֹט וּזְכוּ:",
        "מַשְׁכּוֹנָא יְתִיב רַשִׁיעָא גְזֵילָא שַׁלֵים בִּגְזֵירַת חַיַיָא הֲלֵיךְ בְּדִיל דְלָא לְמֶעְבַּד שְׁקַר מֵיחָא יְחֵי וְלָא יְמוּת:",
        "כָּל חוֹבוֹהִי דְחַב לָא יִדְכְרַן לֵיהּ דִין דִקְשׁוֹט וּזְכוּ עֲבַד מֵיחָא יְחֵי:",
        "וְיֵימְרוּן בְּנֵי עַמָךְ לָא מְפָרְשָׁן לָנָא אוֹרְחַת טוּבָא דַייָ וְאִינוּן אוֹרְחַתְהוֹן דִילְהוֹן לָא תִקְנָן:",
        "כַּד יְתוּב זַכָּאָה מִזַכְוָתֵהּ וְיַעְבֵּיד שְׁקַר וִימוּת בְּהוֹן:",
        "וְכַד יְתוּב רַשִׁיעָא מֵחוֹבוֹהִי וְיַעְבֵּיד דִין דִקְשׁוֹט וּזְכוּ עֲלֵיהוֹן הוּא יִתְקַיָם:",
        "וַאֲמַרְתּוּן לָא מְפָרְשָׁן לָנָא אוֹרְחַת טוּבָא דַייָ אֱנַשׁ כְּאוֹרְחֵהּ אֶתְפְּרַע מִנְכוֹן בֵּית יִשְׂרָאֵל:",
        "וַהֲוָה בְּתַרְתֵּי עַסְרֵי שְׁנִין בַּעֲשִׂירָאָה בְּחַמְשָׁא לְיַרְחָא לְגָלוּתָנָא אֲתָא לְוָתִי מְשֵׁיזְבָא מִירוּשְׁלֵם לְמֵימָר אִתְּרַעַת קַרְתָּא:",
        "וּנְבוּאָה מִן קֳדָם יְיָ הֲוַת עִמִי בְּרַמְשָׁא קֳדָם מֵיתֵי מְשֵׁיזְבָא וּפְתַח יַת פּוּמִי עַד מֵיתֵי לְוָתִי בְצַפְרָא וְאֶפְתַּח פּוּמִי וְלָא שַׁתְקֵית עוֹד:",
        "וַהֲוָה פִּתְגָם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם יָתְבֵי חוּרְבָתָא הָאִילֵן עַל אַרְעָא דְיִשְׂרָאֵל אָמְרִין לְמֵימָר חַד הֲוָה אַבְרָהָם בְּעַלְמָא וִירֵית יַת אַרְעָא וַאֲנַחְנָא סַגִיאִין לָנָא יְהִיבָא אַרְעָא לְמֵירְתָהּ:",
        "בְּכֵן אֲמַר לְהוֹן כִּדְנַן אֲמַר יְיָ אֱלֹהִים עַל דַם זַכַּאי אַתּוּן אָכְלִין וְעֵינֵיכוֹן אַתּוּן זָקְפִין לְפוּלְחַן טַעֲוַתְכוֹן וְדַם זַכַּאי אַתּוּן אֶשְׁדִין וְאַרְעָא אַתּוּן מְדַמָן לְמֵירְתָהּ:",
        "וְאִתְעַתַּדְתּוּן עַל תּוּקְפֵיכוֹן עֲבַדְתּוּן תּוֹעֵיבָא וּגְבַר יַת אִתַּת חַבְרֵיהּ סְאֵיבְתּוּן וְאַרְעָא אַתּוּן מְדַמָן לְמֵירְתָהּ:",
        "כִּדְנַן תֵּימַר לְהוֹן כִּדְנַן אֲמַר יְיָ אֱלֹהִים קַיָם אֲנָא אִם לָא דִי בְּחָרְבָא בְּחַרְבָּא יִתְקַטְלוּן וְדִי עַל אַפֵּי בָּרָא לְחַיְתָא מְסַרְתֵּיהּ לְשֵׁיצָיוּתְהוֹן וְדִי בִּמְצָדְתָא וּבִמְעֲרָתָא בָּמוֹתָא יְמוּתוּן:",
        "וְאֶתֵּן יַת אַרְעָא לְצָדוּ וְאִשְׁתְּמָמוּ וְיִבְטַל יְקַר תּוּקְפָהּ וְיִצְדוּן טוּרֵי יִשְׂרָאֵל מִבְּלֵי עָדֵי:",
        "וְיֵדְעוּן אֲרֵי אֲנָא יְיָ בִּדְאֶתֵּן יַת אַרְעָא לְצָדוּ וְאִשְׁתְּמָמוּ עַל כָּל תּוֹעֲבָתְהוֹן דַעֲבָדוּ:",
        "וְאַתְּ בַּר אָדָם בְּנֵי עַמָךְ דְדָנָן בָּךְ בִּסְטַר כָּתְלַיָא וּבְתַרְעֵי בָתַּיָא וִימַלֵיל חַד עִם חַד גְבַר יַת אֲחוּהִי לְמֵימָר אֱתוּ דִנְפַק מִן קֳדָם יְיָ:",
        "וְיֵיתוּן עֲלָךְ כְּמֵיתֵי גַבְרִין תַּלְמִידִין וִיתִיבוּן קֳדָמָךְ עַמִי וְשָׁמְעִין יַת פִּתְגָמָךְ וְיַתְהוֹן לָא יַעְבְּדוּן אֲרֵי תּוּלְעָבָא בְּפוּמְהוֹן אִינוּן עָבְדִין בָּתַר מָמוֹן אוּנְסֵיהוֹן לִבְּהוֹן טָעֵי:",
        "וְהָא אַתְּ לְהוֹן כִּזְמַר אֲבּוּבִין דִבְּסִים קָלֵיהּ וּמוֹטַב לְנַגָנָא וְשָׁמְעִין יַת פִּתְגָמָךְ וּלְמֶעְבַּדְהוֹן לֵית אִינוּן צָבָן:",
        "וּבְמֵיתֵיךְ הָא אַתְיָא וְיֵדְעוּן אֲרֵי נְבִיָא הֲוָה בֵינֵיהוֹן:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם אִתְנַבֵּי עַל פַּרְנָסֵי יִשְׂרָאֵל אִתְנַבֵּי וְתֵימַר לְהוֹן לְפַרְנְסַיָא כִּדְנַן אֲמַר יְיָ אֱלֹהִים וַי עַל פַּרְנְסַיָא דְיִשְׂרָאֵל דַהֲווֹ מְפַרְנְסִין נַפְשֵׁיהוֹן הֲלָא לְפַרְנָסָא עַמָא אִתְמְנִיאוּ פַּרְנָסַיָא:",
        "יַת טוּבָא אַתִּין אָכְלִין וַעֲמַר נָקִי אַתּוּן לָבְשִׁין פַטִימַיָא אַתּוּן נָכְסִין לְעַמָא לֵיתֵיכוֹן מְפַרְנְסִין:",
        "יַת כְּאֵיבַיָא לָא תַקֵיפְתּוּן וְלִמְרִיעַיָא לָא אֲסֵיתוּן וְלִתְבִירַיָא לָא צְמַדְתּוּן וְיַת דְאִיטַלְטַלוּ לָא אֲתֵיבְתּוּן וְיַת דַאֲבַדוּ לָא בְעִיתוּן וּבְתוּקְפָא פְלַחְתּוּן בְּהוֹן וּבְקַשְׁיוּ:",
        "וְאִתְבַּדָרוּ מִבְּלִי פַרְנֵס וְאִתְמְסָרוּ לְאִשְׁתֵּיצָאָה לְכָל מַלְכְּוַת עַמְמַיָא וְאִיטַלְטָלוּ:",
        "טְעוֹ עַמִי בְּכָל טוּרַיָא וְעַל כָּל רָמָא מְנַטְלָא וְעַל כָּל אַפֵּי אַרְעָא אִתְבְּדָרוּ עַמִי וְלֵית דְתָבַע וְלֵית דְבָעֵי:",
        "בְּכֵן פַּרְנָסִין קַבִּילוּ יַת פִּתְגָמָא דַיָי:",
        "קַיָם אֲנָא אֲמַר יְיָ אֱלֹהִים אִם לָא חֲלַף דַהֲווֹ עַמִי לְבִזָא וְאִתְמְסַרוּ עַמִי לְאִשְׁתֵּיצָאָה לְכָל מַלְכְּוַת עַמְמַיָא מִבְּלִי פַּרְנָס וְלָא תְבָעוּ פַּרְנָסַיָא יַת עַמִי וּפַרְנִיסוּ פַּרְנָסַיָא יַת נַפְשֵׁיהוֹן וְיַת עַמִי לָא פַרְנִיסוּ:",
        "בְּכֵן פַּרְנָסַיָא רַשִׁיעַיָא תּוּבוּ לְאוֹרַיְתָא וַאֲנָא עֲתִיד לְרַחָמָא עֲלֵיכוֹן אֲצִיתוּ לְאוּלְפַן אוֹרַיְתָא וְקַבִּילוּ פִּתְגָמָא דַיָי:",
        "כִּדְנַן אֲמַר יְיָ אֱלֹהִים הָא אֲנָא שְׁלַח רוּגְזִי עַל פַּרְנָסַיָא וְאֶתְבַּע יַת עַמִי מִידֵיהוֹן וַאֲבַטְלִינוּן מִלְפַרְנָסָא עַמָא וְלָא יְפַרְנְסוּן עוֹד פַרְנָסַיָא נַפְּשֵׁיהוֹן וֶאֱשֵׁיזֵיב עַמִי מִידֵיהוֹן וְלָא יִתְמַסְרוּן בִּידֵיהוֹן לְאִשְׁתֵּיצָאָה:",
        "אֲרֵי כִּדְנַן אֲמַר יְיָ אֱלֹהִים הָא אֲנָא מִתְגְלִי וְאֶתְבַּע יַת עַמִי וַאֲבַקְרִינוּן:",
        "כְּמָא דִמְבַקֵר רָעֲיָא עֶדְרֵיהּ בְּיוֹמָא דַהֲוָה בְּגוֹ עָנֵיהּ וּמַפְרֵשׁ לְהוֹן כֵּן אֲבַקֵר יַת עַמִי וֶאֱשֵׁיזֵיב יַתְהוֹן מִכָּל אַתְרַיָא דְאִתְבַּדָרוּ לְתַמָן בְּיוֹם עֲנָנָא וַאֲמִטְתָא:",
        "וְאַפִיקִינוּן מִבֵּינֵי עַמְמַיָא וְאַכְנְשִׁינוּן מִן מְדִינָתָא וְאָעִילִינוּן לְאַרְעֲהוֹן וַאֲפַּרְנְסִינוּן עַל טוּרֵי יִשְׂרָאֵל בְּפַצִידַיָא וּבְכָל מוֹתְבֵי אַרְעָא:",
        "בְּפַרְנוּס טַב אֲפַרְנֵיס יַתְהוֹן וּבְטוּר קוּדְשָׁא דְיִשְׂרָאֵל יְהֵיבֵית מֵישְׁרֵיהוֹן תַּמָן יִשְׁרוּן בַּאֲתַר דְיָאֵי וּפַרְנוּס טַב יִתְפַּרְנְסוּן עַל טוּרֵי יִשְׂרָאֵל:",
        "אֲנָא אֲפַרְנֵס יַת עַמִי וַאֲנָא אַשְׁרִינוּן לְרוֹחֲצָן אֲמַר יְיָ אֱלֹהִים:",
        "יַת דַאֲבָּדוּ אֶתְבַּע וְיַת דְאִיטַלְטָלוּ אֲתִיב וְלִתְבִירַיָא אֶצְמוֹד וְלִמְרִיעַיָא אֱסוֹבַר וְיַת חֲטָאַיָא וְיַת חַיָבַיָא אֶשֵׁיצֵי וַאֲפַרְנֵיס עַמִי בְדִינָא:",
        "וְאַתּוּן עַמִי כִּדְנַן אֲמַר יְיָ אֱלֹהִים הָא אֲנָא דָאֵין בֵּין גְבַר לִגְבַר לַחֲטָאַיָא וּלְחַיָבַיָא:",
        "הַזְעֵיר לְכוֹן דְפַרְנוּס טַב אַתּוּן מִתְפַּרְנְסִין וּמוֹתַר פַּרְנוּסֵכוֹן דָיְשִׁין בְּרַגְלֵיכוֹן וּמִשְׁתֵּי מְתַקֵן אַתּוּן שָׁתָן וְיַת מוֹתְרָא בְּרַגְלֵיכוֹן אַתּוּן דָיְשִׁין:",
        "וְעַמִי מוֹתַר מֵיכַל שַׁמְשֵׁיכוֹן אָכְלִין וּמוֹתַר מַשְׁתֵּי שַׁמְשֵׁיכוֹן שָׁתָן:",
        "בְּכֵן כִּדְנַן אֲמַר יְיָ אֱלֹהִים לְהוֹן הָא אֲנָא מִתְגְלֵי וְאֵידוּן בֵּין גְבַר עַתִּיר וּבֵין גְבַר מִסְכֵּן:",
        "חֲלַף דְבִרְשַׁע וּבִדְרַע דְחֵיקְתּוּן וּבְתוּקְפָא תְבַרְתּוּן כָּל כְּאַיבַיָא עַד דְבַדַרְתּוּן יַתְהוֹן לְבֵינֵי מְדִינָתָא:",
        "וְאֶפְרוֹק לְעַמִי וְלָא יִתְמַסְרוּן עוֹד לְבִזָא וְאֵידוּן בֵּין גְבַר לִגְבַר:",
        "וְאָקֵים עֲלֵיהוֹן פַּרְנֵס חַד וִיפַרְנֵיס יַתְהוֹן וְהוּא יְהֵי לְהוֹן לְפַרְנֵס:",
        "וַאֲנָא יְיָ אֶהֱוֵי לְהוֹן לֵאלָהָא וְעַבְדִי דָוִד מַלְכָּא בֵינֵיהוֹן אֲנָא יְיָ גְזָרֵית בְּמֵימְרִי:",
        "וְאֶגְזַר לְהוֹן קְיָם שְׁלָם וַאֲבַטֵל חַיְתָא בִּישְׁתָא מִן אַרְעָא וִיתִיבוּן בְּמַדְבְּרָא לְרוֹחֲצָן וְיִתְעַתְּקוּן בִּרְחוּשָׁא:",
        "וְאַשְׁרֵי יַתְהוֹן סְחוֹר סְחוֹר לְבֵית מַקְדְשִׁי וִיהוֹן מְבוֹרְכָן וְאָחֵית לְהוֹן מְטַר בַּכִּיר בְּעִדָנֵיהּ מַטְרִין דְבָרְכָן יְהוֹן:",
        "וְיִתֵּן אִילַן חַקְלָא יַת אִבֵּיהּ וְאַרְעָא תִּתֵּן עֲלַלְתָּהּ וִיהוֹן עַל אַרְעֲהוֹן לְרוֹחֲצָן וְיֵדְעוּן אֲרֵי אֲנָא יְיָ כַּד אֶתְבַּר יַת נִיר תּוּקְפֵיהוֹן וְאֵשֵׁיזְבִינוּן מִיַד דִמְפַלְחִין בְּהוֹן:",
        "וְלָא יְהוֹן עוֹד בִּזָא לְעַמְמַיָא וּמַלְכְּוַת אַרְעָא לָא יְשֵׁיצִינוּן וְיַתְבוּן לְרוֹחֲצָן וְלֵית דְמָנִיד:",
        "וְאָקִים לְהוֹן נִצְבָא לְקַיָמָא וְלָא יְהוֹן עוֹד מְטַלְטְלֵי כַּפְנָא בְּאַרְעָא וְלָא יְקַבְּלוּן עוֹד אִתְכְּנָעוּת עַמְמַיָא:",
        "וְיֵדְעוּן אֲרֵי אֲנָא יְיָ אֱלָהָהוֹן מֵימְרִי בְּסַעֲדְהוֹן וְאִינוּן עַמִי בֵּית יִשְׂרָאֵל אֲמַר יְיָ אֱלֹהִים:",
        "וְאַתּוּן עַמִי עַם דְאִתְקְרֵי שְׁמִי עֲלֵיהוֹן בֵּית יִשְׂרָאֵל אַתּוּן אֲנָא אֱלָהָכוֹן אֲמַר יְיָ אֱלֹהִים:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם קַבֵּיל נְבוּאָה עַל טוּרָא דְשֵׂעִיר וְתִתְנַבֵּי עֲלוֹהִי:",
        "וְתֵימַר לֵיהּ כִּדְנַן אֲמַר יְיָ אֱלֹהִים הָא אֲנָא שְׁלַח רוּגְזִי עֲלָךְ טוּרָא דְשֵׂעִיר וַאֲרִים מְחַת גְבוּרְתִּי עֲלָךְ וְאֶתְּנִינָךְ לְצָדוּ וְאִשְׁתְּמָמוּ:",
        "קִרְוָךְ חוּרְבָא אַשְׁוֵי וְאַתְּ לְצָדוּ תְהֵי וְתֵידַע אֲרֵי אֲנָא יְיָ:",
        "חֲלַף דַהֲוַת לָךְ דְבָבוּת עֲלָם וְתַבֵּיבְתָּא יַת בְּנֵי יִשְׂרָאֵל עַל יְדֵי קָטוֹלֵי חַרְבָּא בְּעִדַן תְּבִירְהוֹן בְּעִדַן תּוּשְׁלְמַת חוֹבֵיהוֹן:",
        "בְּכֵן קַיָם אֲנָא אֲמַר יְיָ אֱלֹהִים אֲרֵי לִקְטוֹל אַעְבְּדִינָךְ וּדְקַטְלִין בְּחַרְבָּא יִרְדְפוּנָךְ אִם לָא דְמָא יִרְדְפוּנָךְ:",
        "וְאֶתֵּן יַת טוּרָא דְשֵׂעִיר לְצָדוּ וּלְאִשְׁתְּמָמוּ וֶאֱשֵׁיצֵי מִנֵיהּ דְעָדֵי וּדְתָאֵיב:",
        "וַאֲמַלֵי יַת טוּרוֹהִי קְטִילוֹהִי רָמָתֹהִי וְחֵילוֹהִי וְכָל פַּצִידוֹהִי קְטִילֵי חַרְבָּא יִתְרְמוּן בְּהוֹן:",
        "צְדוּ עֲלַם אֶתְּנִינַךְ וְקִרְוָךְ לָא יִתְיַתְבָן וְתֵידְעוּן אֲרֵי אֲנָא יְיָ:",
        "חֲלַף דַאֲמַרְתְּ יַת תְּרֵין עַמְמִין וְיַת מְדִינָן דִילִי אִינוּן וְאֵירְתִינּוּן וְקָדָם יְיָ גַלְיָן מַחְשְׁבַת לִבָּא:",
        "בְּכֵן קַיָם אֲנָא אֲמַר יְיָ אֱלֹהִים וְאַעְבֵּד כְּרוּגְזָךְ וּכְחֵמְיתָךְ וַעֲבַדְתָּא מִדְסְנֵיתָא לְהוֹן וְאִתְגְלֵי לְאֵיטָבָא לְהוֹן כַּד אִתְפְּרַע מִנָךְ:",
        "וְתֵידַע אֲרֵי אֲנָא יְיָ שָׁמֵיעַ יַת כָּל אַרְגָזוּתָךְ דַאֲמַרְתְּ עַל טוּרֵי אַרְעָא דְיִשְׂרָאֵל לְמֵימָר צַדִיאַת לָנָא אִתְמְסִירוּ לְאִשְׁתֵּיצָאָה:",
        "וְאִתְרַבְרַבְתּוּן עֲלַי בְּמִלֵי פּוּמְכוֹן וְאַסְגֵיתוּן עֲלַי פִּתְגָמֵיכוֹן קֳדָמַי שְׁמִיעַ:",
        "כִּדְנַן אֲמַר יְיָ אֱלֹהִים כְּמֶחְדֵי כָּל אַרְעָא צָדוּ אַעְבֵיד לָךְ:",
        "כְּמָא דַחֲדֵיתָא עַל אַחֲסָנַת בֵּית יִשְׂרָאֵל דִצְדִיאַת אַרְעֲהוֹן כֵּן אַעְבֵיד לָךְ צָדוּ תְהֵי טוּרָא דְשֵׂעִיר וְכָל אֱדוֹם כּוּלָהּ וְיֵדְעוּן אֲרֵי אֲנָא יְיָ:"
      ],
      [
        "וְאַתְּ בַּר אָדָם אִתְנַבֵּי עַל טוּרֵי יִשְׂרָאֵל וְתֵימַר טוּרֵי יִשְׂרָאֵל קַבִּילוּ פִּתְגַם יְיָ:",
        "כִּדְנַן אֲמַר יְיָ אֱלֹהִים חֲלַף דִי אֲמַר סַנְאָה אֲלֵיכוֹן חֶדְוָא וּבָמַת עֲלָם לִירוּתָא הֲוַת לָנָא:",
        "בְּכֵן אִתְנַבֵּי וְתֵימַר כִּדְנַן אֲמַר יְיָ אֱלֹהִים חֲלַף דִי אִתְרַבְרְבוּ וַחֲלַף דַחֲשִׁיבוּ לְאַחֲרָבָא וּלְאַצְדָאָה יַתְכוֹן מִסְחוֹר סְחוֹר לְמֶהֱוֵיכוֹן יְרוּתָא לִשְׁאָרָא דְעַמְמַיָא וְאִתְאַמַרְתּוּן עַל שְׂפַת לִישָׁן וְרִנְנַת עָם:",
        "בְּכֵן טוּרֵי יִשְׂרָאֵל קַבִּילוּ פִּתְגָמָא דַייָ אֱלֹהִים כִּדְנַן אֲמַר יְיָ אֱלֹהִים לְטוּרַיָא וּלְרָמָתָא לְפַצִידַיָא וּלְחֵילַיָא וּלְחֶרְבָתָא צַדְיָתָא וּלְקִרְוַיָא שְׁבִיקָתָא דַהֲוָאָה לְחוֹךְ וּלְלָעָב לִשְׁאָרָא דְעַמְמַיָא דְמִסְחוֹר סְחוֹר:",
        "בְּכֵן כִּדְנַן אֲמַר יְיָ אֱלֹהִים אִם לָא בְּאֵשַׁת פּוּרְעֲנוּתִי גְזָרֵית בְּמֵימְרִי עַל שְׁאֵרָא דְעַמְמַיָא וְעַל אֱדוֹמָאֵי כוּלְהוֹן דִיהַבוּ יַת אַרְעָא בֵּית שְׁכִנְתִּי לְהוֹן לִירוּתָא בְּחֶדְוַת כָּל לֵב בְּצִפּוּחַ נְפַשׁ בְּדִיל לְתָרְכוּתָהּ לְמִבְזָה:",
        "בְּכֵן אִתְנַבַּי עַל אַרְעָא דְיִשְׂרָאֵל וְתֵימַר לְטוּרַיָא וּלְרָמָתָא לְפַצִידַיָא וּלְחֵילַיָא כִּדְנַן אֲמַר יְיָ אֱלֹהִים הָא אֲנָא בְרוּגְזִי וּבְחֵימְתִי גְזָרֵית בְּמֵימְרִי חֲלַף דְאִתְכְּנָעוּת עַמְמַיָא קַבֵּילְתּוּן:",
        "בְּכֵן כִּדְנַן אֲמַר יְיָ אֱלֹהִים אֲנָא קַיְמֵית בְּמֵימְרִי אִם לָא עַמְמַיָא דִי בָזוּ יַתְכוֹן מִסְחוֹר סְחוֹר אִינוּן אִתְכְּנָעוּתְהוֹן יְקַבְּלוּן:",
        "וְאַתּוּן טוּרֵי יִשְׂרָאֵל אִבְּכוֹן תִּצְלְחוּן וּפִרְיֵכוֹן תִּתְעֲנוּן לְעַמִי יִשְׂרָאֵל אֲרֵי קָרִיב יוֹם פּוּרְקָנִי לְמֵיתֵי:",
        "אֲרֵי הָא אֲנָא מִתְגְלֵי עֲלֵיכוֹן וְאִתְפְּנִי בְמֵימְרִי לְאֵיטָבָא לְכוֹן וְתִתְפַּלְחוּן וְתִזְדָרְעוּן:",
        "וְאַסְגֵי עֲלֵיכוֹן אֱנָשָׁא כָּל בֵּית יִשְׂרָאֵל כּוּלְהוֹן וְיִתְיַתְבָן קִרְוַיָא וְחֶרְבָתָא יִתְבַּנְיָן:",
        "וְאַסְגֵי עֲלֵיכוֹן אֱנָשָׁא וּבְעִירָא וְיִסְגוּן וְיִפְשׁוּן וְאָתֵיב יַתְכוֹן כִּדְמִלְקָדְמִין וְאוֹטֵיב לְכוֹן כִּדְמִן אַוְלָא וְתִידְעוּן אֲרֵי אֲנָא יְיָ:",
        "וְאַסְגֵי עֲלֵיכוֹן אֱנָשָׁא יַת עַמִי יִשְׂרָאֵל וְיַחְסְנוּנָךְ וּתְהֵי לְהוֹן לְאַחְסָנָא וְלָא תוֹסִיף עוֹד לְתַכְּלוּתְהוֹן:",
        "כִּדְנַן אֲמַר יְיָ אֱלֹהִים חֲלַף דְאָמְרִין לְכוֹן מְקַטֶלֶת אֱנָשָׁא אַתְּ וּמְתַכֶּלֶת עַמִיךְ הֲוֵית:",
        "בְּכֵן אֱנָשָׁא לָא תִתְקַטְלִין עוֹד וְעַמִיךְ לָא תִתְכְּלִין עוֹד אֲמַר יְיָ אֱלֹהִים:",
        "וְלָא אֶשְׁמַע לִיךְ עוֹד אִתְכְּנָעוּת עַמְמַיָא וְחִסוּדֵי עַמְמַיָא לָא תְקַבְּלִין עוֹד וְעַמֵיךְ לָא תִתְכְּלִין עוֹד אֲמַר יְיָ אֱלֹהִים:",
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימָר:",
        "בַּר אָדָם בֵּית יִשְׂרָאֵל יָתְבִין עַל אַרְעֲהוֹן וּסְאִיבוּ יָתָהּ בְּאוֹרְחָתְהוֹן וּבְעוֹבָדֵיהוֹן כְּסוֹאֲבַת אִתְּתָא טוּמְאָה הֲוַת אוֹרְחַתְהוֹן קֳדָמָי:",
        "וּשְׁפִיכַת חֵימְתִי עֲלֵיהוֹן עַל דָם זַכַּאי דַאֲשַׁדוּ עַל אַרְעָא וּבְפוּלְחַן טַעֲוָתְהוֹן סַאֲבוּהָ:",
        "וְאַגְלֵיתִי יַתְהוֹן לְבֵינֵי עַמְמַיָא וְאִתְבַּדָרוּ בִּמְדִינָתָא כְּאוֹרְחָתְהוֹן בִּישְׁתָא וּכְעוֹבָדֵיהוֹן מְקַלְקְלַיָא אִתְפְּרָעֵית מִנְהוֹן:",
        "וַעֲלוּ לְבֵינֵי עַמְמַיָא דְאִתְגְלִיאוּ לְתַמָן עַל דַאֲחִילוּ יַת שְׁמָא דְקוּדְשִׁי בִּדְאָמְרִין לְהוֹן אִם עַמֵיהּ דַייָ אִלֵין וְאֵיכְדֵין מֵאַרְעָא בֵּית שְׁכִינְתֵּיהּ גְלוֹ:",
        "וְחָסֵית עַל שְׁמָא דְקוּדְשִׁי דְאָחִילוּהִי בֵּית יִשְׂרָאֵל בֵּינַי עַמְמַיָא דְאִתְגְלִיאוּ לְתַמָן:",
        "בְּכֵן אֲמַר לְבֵית יִשְׂרָאֵל כִּדְנַן אֲמַר יְיָ אֱלֹהִים לָא בְּדִילְכוֹן אֲנָא עָבֵיד בֵּית יִשְׂרָאֵל אֱלָהֵין עַל שְׁמָא דְקוּדְשִׁי דְאָחֵילְתּוּן בֵּינֵי עַמְמַיָא דְאִתְגְלִיתוּן לְתַמָן:",
        "וַאֲקַדֵישׁ יַת שְׁמִי רַבָּא דְאִתְחַל בֵּינֵי עַמְמַיָא דְאַחֵילְתּוּן בֵּינֵיהוֹן וְיֵדְעוּן עַמְמַיָא אֲרֵי אֲנָא יְיָ אֲמַר יְיָ אֱלֹהִים כַּד אֶתְקַדֵשׁ בְּכוֹן לְעֵינֵיהוֹן:",
        "וַאֲקָרֵיב יַתְכוֹן מִבֵּינֵי עַמְמַיָא וְאַכְנֵישׁ יַתְכוֹן מִכָל מְדִינָתָא וְאָעֵיל יַתְכוֹן לְאַרְעֲכוֹן:",
        "וְאֶשְׁבּוֹק לְחוֹבֵיכוֹן כְּמָא דְמִדַכָּן בְּמֵי אַדְיוּתָא וּבִקְטָם תּוֹרָתָא דְחַטָאתָא וְתִדַכּוּן מִכָל סַאֲבָתְכוֹן וּמִכָּל טַעֲוָתְכוֹן אֲדַכֵּי יַתְכוֹן:",
        "וְאֶתֵּן לְכוֹן לֵב דָחֵיל וְרוּחַ דְחִילָא אֶתֵּן בְּמֵיעֵיכוֹן וְאֶתְבַּר יַת לִבָּא דְרַשִׁיעָא דְהוּא תַקִיף כְּאַבְנָא מִבִּסְרֵיכוֹן וְאֶתֵּן לְכוֹן לֵב דָחִיל קֳדָמַי לְמֶעְבַּד רְעוּתִי:",
        "וְיַת רוּחַ קוּדְשִׁי אֶתֵּן בְּמֵיעֵיכוֹן וְאַעְבֵּיד יַת דִי בִּקְיָמַי תָּהֲכוּן וְדִינֵי תִטְרוּן וְתַעְבְּדוּן:",
        "וְתֵיתְבוּן בְּאַרְעָא דִיהָבֵית לַאֲבָהַתְכוֹן וּתְהוֹן קֳדָמַי לְעַם וַאֲנָא אֱהֶוֵי לְכוֹן לֵאלָהָא:",
        "וְאֶפְרוֹק יַתְכוֹן מִכָּל סוֹאֲבָתְכוֹן וַאֲבָרֵךְ יַת עִבּוּרָא וְאַסְגֵי יָתֵיהּ וְלָא אֶתֵּן עֲלֵיכוֹן כַּפָנָא:",
        "וְאַסְגֵי יַת פֵּרֵי אִילָנָא וְעַלְלַת דַקְלָא בְּדִיל דְלָא תְקַבְּלוּן עוֹד חִסוּדֵי כַפְנָא בֵּינֵי עַמְמַיָא:",
        "וְתִדְכְּרוּן יַת אוֹרְחֵיכוֹן בִּישָׁתָא וְעוֹבָדֵיכוֹן דְלָא תַקְנִין וּתְדַנְקוּן וּתְהוֹן חָזָן עַל חוֹבֵיכוֹן וְעַל תּוֹעֲבָתֵיכוֹן:",
        "לָא בְדִילְכוֹן אֲנָא עֲבֵיד אֲמַר יְיָ אֱלֹהִים יִתְיְדַע לְכוֹן בְּהִיתוּ וְאִתְכְּנִיעוּ מֵאוֹרְחָתְכוֹן בֵּית יִשְׂרָאֵל:",
        "כִּדְנַן אֲמַר יְיָ אֱלֹהִים בְּיוֹמָא דַאֲדַכֵּי יַתְכוֹן מִכָּל חוֹבֵיכוֹן וְאָתִיב יַת קִרְוַיָא וְיִתְבַּנְיָן חוּרְבָתָא:",
        "וְאַרְעָא דַהֲוָת צַדְיָא תִּתְפְלַח חֲלַף דַהֲוַת צָדוּ לְעֵינַי כָּל דְעָדֵי:",
        "וְיֵמְרוּן אַרְעָא דְנַן דְיִשְׂרָאֵל דַהֲוַת צַדְיָא תָּבַת לְמֶהֱוֵי כְּגִינְתָא דְעֵדֶן וְקִרְוַיָא חֶרְבָתָא וְצַדְיָתָא וּמְפַגְרָתָא כְּרִיכִין תַּקִיפִין יְתִיבוּ:",
        "וְיֵדְעוּן עַמְמַיָא דִי יִשְׁתָּאֲרוּן סָחֳרָנֵיכוֹן אֲרֵי אֲנָא יְיָ בָּנִיתִי מְפַגְרָתָא קַיְמֵית צַדְיָתָא אֲנָא יְיָ גְזָרֵית בְּמֵימְרִי וַאֲקַיֵם:",
        "כִּדְנַן אֲמַר יְיָ אֱלֹהִים עוֹד דָא אֶשְׁתְּאֵיל לְכוֹן בְּמֵימְרִי לְבֵית יִשְׂרָאֵל לְמֶעֱבַּד לְהוֹן אַסְגִינוּן בֶּאֱנָשָׁא וְאַצְלְחִינוּן בִּבְעִירָא:",
        "כְּעַמָא קַדִישָׁא כְּעַמָא דִמְדַכָּן וְאָתָן לִירוּשְׁלֵם בִּזְמַן מוֹעֲדֵי פִּסְחָא כֵּן יֶהֱוְיָן קִרְוַיָא אַרְעָא דְיִשְׂרָאֵל דַהֲוָאָה חֲרֵיבָן יְהוֹן מַלְיָן אֱנֶשָׁא דְעַמָא בֵּית יִשְׂרָאֵל וְיֵדְעוּן אֲרֵי אֲנָא יְיָ:"
      ],
      [
        "שָׁרַת עֲלַי רוּחַ נְבוּאָה מִן קֳדָם יְיָ וְאַפְקַנִי בְּרוּחַ נְבוּאָה דִי שְׁרַת עֲלַי מִן קֳדָם יְיָ וְאַשְׁרַנִי בְּגוֹ בִקְעֲתָא וְהִיא מַלְיָא גַרְמֵי אֱנָשָׁא:",
        "וְאַעְבְּרַנִי עֲלֵיהוֹן סְחוֹר סְחוֹר וְהָא סַגִיאָן לַחֲדָא עַל אַפֵּי בִקְעֲתָא וְהָא יְבֵישִׁין לַחֲדָא:",
        "וַאֲמַר לִי בַּר אָדָם הֲיֵחוּן גַרְמַיָא הָאִלֵין וַאֲמָרֵית יְיָ אֱלֹהִים אַתְּ גְלֵי קֳדָמָךְ:",
        "וַאֲמַר לִי אִתְנַבֵּי עַל גַרְמַיָא הָאִלֵין וְתֵימַר לְהוֹן גַרְמַיָא יְבֵישַׁיָא קַבִּילוּ פִּתְגָמָא דַיָי:",
        "כִּדְנַן אֲמַר יְיָ אֱלֹהִים לְגַרְמַיָא הָאִלֵין הָא אֲנָא מָעֵיל בְּכוֹן רוּחָא וְתֵיחוּן:",
        "וְאֶתֵּן עֲלֵיכוֹן גִידִין וְאַסֵיק עֲלֵיכוֹן בִּסְרָא וְאֶקְרוֹם עֲלֵיכוֹן מַשְׁכָא וְאֶתֵּן בְּכוֹן רוּחָא וְתֵיחוּן וְתֵידְעוּן אֲרֵי אֲנָא יְיָ:",
        "וְאִתְנַבֵּיתִי כְּמָא דְאִתְפַּקְדֵית וַהֲוָה קַל בְּאִתְנַבָּיוּתִי וְהָא זִיעוּ וּקְרִיבוּ גַרְמַיָא גַרְמָא לְוַת חַבְרֵיהּ:",
        "וַחֲזֵית וְהָא עֲלֵיהוֹן גִידִין וּבִסְרָא סְלֵיק וּקְרֵם עֲלֵיהוֹן מַשְׁכָא מִלְעֵילָא וְרוּחָא לֵית בְּהוֹן:",
        "וַאֲמַר לִי אִתְנַבֵּי עַל רוּחָא אִתְנַבֵּי בַר אָדָם וְתֵימַר לְרוּחָא כִּדְנַן אֲמַר יְיָ אֱלֹהִים מֵאַרְבַּע רוּחַיָא אַתְיָא רוּחָא וְעוּלִי בִקְטִילַיָא הָאִלֵין וְיַחוּן:",
        "וְאִתְנַבֵּיתִי כְּמָא דִי פַּקְדַנִי וְעָלַת בְּהוֹן רוּחָא וְיִחְיוּ וְקָמוּ עַל רִגְלֵיהוֹן מַשִׁרְיָן סַגִיאָן לַחֲדָא לַחֲדָא:",
        "וַאֲמַר לִי בַּר אָדָם גַרְמַיָא הָאִלֵין כָּל בֵּית יִשְׂרָאֵל אִינוּן הָא אִינוּן אָמְרִין יָבִישׁוּ גַרְמָנָא פְּסַק סַבְרָנָא אֲבַדְנָא לָנָא:",
        "בְּכֵן אִתְנַבֵּי וְתֵימַר לְהוֹן כִּדְנַן אֲמַר יְיָ אֱלֹהִים הָא אֲנָא פְּתָחֵית יַת קִבְרֵיכוֹן וְאֶסַק יַתְכוֹן מִקִבְרֵיכוֹן עַמִי וְאָעֵיל יַתְכוֹן לְאַרְעָא דְיִשְׂרָאֵל:",
        "וְתֵידְעוּן אֲרֵי אֲנָא יְיָ כַּד אֶפְתַּח יַת קִבְרֵיכוֹן וְכַד אַסֵיק יַתְכוֹן מִגוֹ קִבְרֵיכוֹן עַמִי:",
        "וְאֶתֵּן רוּחִי בְכוֹן וְתֵיחוּן וְאַשְׁרֵי יַתְכוֹן עַל אַרְעֲכוֹן וְתֵידְעוּן אֲרֵי אֲנָא יְיָ גְזָרִית בְּמֵימְרִי וַאֲקַיֵם אֲמַר יְיָ:",
        "וַהֲוָה פִתְגָם נְבוּאָה מִן קֳדָם יְיָ עִמִי לְמֵימָר:",
        "וְאַתְּ בַּר אָדָם סַב לָךְ לוּחָא חֲדָא וּכְתוֹב עֲלוֹהִי לְשִׁבְטָא דִיהוּדָה וְלִבְנֵי יִשְׂרָאֵל אַחֵיהוֹן וְסַב לוּחָא חֲדָא וּכְתוֹב עֲלוֹהִי לְשִׁבְטָא דְיוֹסֵף דִי הוּא שִׁבְטָא דְאֶפְרַיִם וְכָל בֵּית יִשְׂרָאֵל אֲחֵיהוֹן:",
        "וְתַקְרֵיב יַתְהוֹן חַד לְוַת חַד לָךְ לְלוּחָא חַד וִיהוֹן לְחוֹד בִּידָךְ:",
        "וְכַד יֵימְרוּן לָךְ בְּנֵי עַמָךְ לְמֵימָר הֲלָא תְחַוֵי לָנָא מָה אִלֵין לָךְ:",
        "אִתְנַבֵּי לְהוֹן כִּדְנַן אֲמַר יְיָ אֱלֹהִים הָא אֲנָא מְקָרִיב יַת שִׁבְטָא דְיוֹסֵף דִי הוּא שִׁבְטָא דְאֶפְרַיִם וְשִׁבְטֵי יִשְׂרָאֵל אֲחֵיהוֹן וַאֲחַבֵּיר יַתְהוֹן עֲלוֹהִי יַת שִׁבְטָא דִיהוּדָה וְאַעְבְּדִינוּן לְעַמָא חַד וִיהוֹן חַד קֳדָמָי:",
        "וִיהוֹן לוּחַיָא דִי תִכְתּוֹב עֲלֵיהוֹן בִּידָךְ לְעֵינֵיהוֹן:",
        "וְאִתְנַבֵּי לְהוֹן כִּדְנַן אֲמַר יְיָ אֱלֹהִים הָא אֲנָא מְקָרֵיב יַת בְּנֵי יִשְׂרָאֵל מִבֵּינֵי עַמְמַיָא דְאִתְגְלִיאוּ לְתַמָן וְאֶכְנוֹשׁ יַתְהוֹן מִסְחוֹר סְחוֹר וְאָעֵיל יַתְהוֹן לְאַרְעֲהוֹן:",
        "וְאַעְבֵּיד יַתְהוֹן לְעַמָא חָד בְּאַרְעָא בְּטוּר קוּדְשָׁא דְיִשְׂרָאֵל דְיִשְׂרָאֵל וּמַלְכָּא חַד יְהֵי לְכוּלְהוֹן לְמֶהֱוֵי מַלְכָּא וְלָא יְהוֹן עוֹד לִתְרֵין עַמְמִין וְלָא יִתְפַּלְגוּן עוֹד לְתַרְתֵּין מַלְכְּוָן עוֹד:",
        "וְלָא יִסְתָּאֲבוּן עוֹד בְּמַעֲוָתְהוֹן וּבְשִׁקוּצֵיהוֹן וּבְכָל מֵירְדֵיהוֹן וְאֶפְרוֹק יַתְהוֹן מִכָּל מוֹתְבָנֵיהוֹן דְחָבוּ קֳדָמַי בְּהוֹן וְאַדְכֵּי יַתְהוֹן וִיהוֹן קֳדָמַי לְעַם וַאֲנָא אֶהֱוֵי לְהוֹן לֵאלָהָא:",
        "וְעַבְדִי דָוִד מַלְכָּא עֲלֵיהוֹן וּפַרְנָס חַד יְהֵי לְכוּלְהוֹן וּבְדִינַי יְהָכוּן וּקְיָמַי יִטְרוּן וְיַעְבְּדוּן יַתְהוֹן:",
        "וִיתִיבוּן עַל אַרְעָא דִיהָבִית לְעַבְדִי לְיַעֲקֹב דִיתִיבוּ בָהּ אֲבָהַתְכוֹן וְיַתְבוּן עֲלָהּ אִינוּן וּבְנֵיהוֹן וּבְנֵי בְנֵיהוֹן עַד עַלְמָא וְדָוִד עַבְדִי מַלְכָּא לְהוֹן לַעֲלָם:",
        "וְאֶגְזַר לְהוֹן קְיַם שְׁלָם קְיַם עֲלַם יְהֵי עִמְהוֹן וֶאֱבָרְכִינוּן וְאַסְגֵי יַתְהוֹן וְאֶתֵּן יַת מַקְדְשִׁי בֵּינֵיהוֹן לַעֲלָם:",
        "וְאַשְׁרֵי שְׁכִינְתִּי בֵּינֵיהוֹן וְאֶהֱוֵי לְהוֹן לֵאלָהָא וְאִינוּן יְהוֹן קֳדָמַי לְעָם:",
        "וְיֵדְעוּן עַמְמַיָא אֲרֵי אֲנָא יְיָ מְקַדֵשׁ יַת יִשְׂרָאֵל בְּמֶהֱוֵי מַקְדְשִׁי בֵּינֵיהוֹן לְעַלָם:"
      ],
      [
        "וַהֲוָה פִּתְגַם נְבוּאָה מִן קֳדָם יְיָ עִמִי לְמֵימַר:",
        "בַּר אָדָם קַבֵּיל נְבוּאָה עַל גוֹג אַרְעָא מָגוֹג רַב רֵישׁ מֶשֶׁךְ וְתֻבָל וְאִתְנַבֵּי עֲלוֹהִי:",
        "וְתֵימַר כִּדְנַן אֲמַר יְיָ אֱלֹהִים הָא אֲנָא שְׁלַח רוּגְזִי עֲלָךְ גוֹג רַב רֵישׁ מֶשֶׁךְ וְתֻבָל:",
        "וַאֲשַׁדְלִינָךְ וְאֶתֵּן שֵׁירִין עַל לִיסָתָךְ וְאַפֵּיק יָתָךְ וְיַת כָּל מַשְׁרִיָתָךְ סוּסְוָן וּפָרָשִׁין לְבוּשֵׁי גְמִיר כּוּלְהוֹן מַשִׁרְיָן סַגִיאָן דִי מְזַיְנִין בַּעֲגִילִין וּתְרֵיסִין אָחֳדֵי סַיְפִין כּוּלְהוֹן:",
        "פַּרְסָאֵי כּוּשְׁאֵי וּפוּטָאֵי עִמְהוֹן כּוּלְהוֹן מְזַיְנִין בַּעֲגִילִין וְקוּלְסִין:",
        "גוֹמֶר וְכָל מַשִׁרְיָתָהָא מְדִינַת גַרְמַמְיָא סְיָפֵי צִפּוּנָא וְיַת כָּל מַשִׁרְיָתְהוֹן עַמְמִין סַגִיאִין דִי עִמָךְ:",
        "אִזְדַרַז וְאַתְקֵין לָךְ אַתְּ וְכָל מַשִׁרְיָתָךְ דְאִתְכְּנִישׁוּ עֲלָךְ וּתְהֵי לְהוֹן לְמַטָרָא:",
        "מִיוֹמִין סַגִיאִין תְּמַנִי מַשִׁרְיָתָךְ בְּסוֹף שְׁנַיָא תְהַךְ עַל אַרְעָא דְתָבוּ עֲלָה מְקַטְלֵי חַרְבָּא דְאִתְכְּנָשׁוּ מֵעַמְמִין סַגִיאִין עַל טוּרֵי אַרְעָא דְיִשְׂרָאֵל דַהֲווֹ לְחָרְבָא תְּדִירָא וְאִינוּן מִבֵּינֵי עַמְמַיָא אִתְגְלִיאוּ וִיתִיבוּ לְרוֹחֲצָן כּוּלְהוֹן:",
        "וְתִסַק בְּאִתְרְגוּשְׁתָּא תֵּיתֵי כַּעֲנָנָא דְסָלֵיק וְחָפֵי יַת אַרְעָא תְּהֵי אַתְּ וְכָל מַשִׁרְיָתָךְ וְעַמְמִין סַגִיאִין דִי עִמָךְ:",
        "כִּדְנַן אֲמַר יְיָ אֱלֹהִים וִיהֵי בְּעִדָנָא הַהִיא יִסְקוּן הִרְהוּרִין עַל לִבָּךְ וּתְחַשֵׁב מַחְשְׁבָן בִּישָׁן:",
        "וְתֵימַר אֶסַק עַל אַרְעָא דְיָתְבָא שְׁלֵיוָא בְּקִרְוֵי פִצְחַיָא אֱהַךְ עַל עַמָא דְשָׁקְטִין וְשָׁרָן לְרוֹחֲצָן כּוּלְהוֹן יָתְבִין בְּלָא שׁוּרָא וְעָבְרִין וְדָשִׁין לֵית לְהוֹן:",
        "לְמִבַּז בִּזָא וּלְמֶעְדֵי עֲדָאָה לְכַנָשָׁא מַשִׁרְיָתָךְ עַל חָרְבָתָא דְאִתְיַתְבָא וְעַל עַמָא דְאִתְכַּנְשׁוּ מִבֵּינֵי עַמְמַיָא דְאִצְלָחוּ בְּנִכְסִין וְקִנְיָנִין יָתְבִין עַל תּוּקְפָא דְאַרְעָא:",
        "שְׁבָא וּדְדָן וְתַגְרֵי יַמָא וְכָל מַלְכָּהָא יֵימְרוּן לָךְ הַלְמִבַּז בִּזָא אַתְּ אָתֵי הַלְמֶעֱדֵי עָדָאָה כְּנִישַׁת מַשִׁרְיָתָךְ לְמִיסַב כְּסַף וּדְהַב לְמַשְׁבֵי נִכְסִין וְקִנְיָנִין לְמֶעְדֵי עֲדִי סַגִי:",
        "בְּכֵן אִתְנַבֵי בַּר אָדָם וְתֵימַר לְגוֹג כִּדְנַן אֲמַר יְיָ אֱלֹהִים הֲלָא בְּעִדָנָא הַהִיא כַּד יַתְבוּן עַמִי יִשְׂרָאֵל לְרוֹחֲצָן תֵּידַע פוּרְעֲנוּת גְבוּרְתִּי:",
        "וְתֵיתֵי מֵאַתְרָךְ מִסְיָפֵי צִפּוּנָא אַתְּ וְעַמְמִין סַגִיאִין דִי עִמָךְ רוֹכְבֵי סוּסְוָן כּוּלְהוֹן מַשִׁרְיָן סַגִיאִין וְעַם סַגִי:",
        "וְתִיסַק עַל עַמִי יִשְׂרָאֵל כַּעֲנָנָא דְסָלֵיק וְחָפֵי יַת אַרְעָא בְּסוֹף יוֹמַיָא תְּהֵי וְאַיְתִינָךְ עַל אַרְעָא בֵּית שְׁכִנְתִּי בְּדִיל דְיִדְעוּן עַמְמַיָא פּוּרְעֲנוּת גְבוּרְתִּי כַּד אִתְקַדֵשׁ בָּךְ דִיהוֹן חָזָן בְּפוּרְעֲנוּתָךְ גוֹג:",
        "כִּדְנַן אֲמַר יְיָ אֱלֹהִים הַאַתְּ הוּא דְמַלֵלִית בְּיוֹמֵי קֶדֶם בְּיַד עַבְדֵי נְבִיֵי יִשְׂרָאֵל דְאִתְנַבִיאוּ בְּיוֹמַיָא הָאִינוּן מִלְקַדְמַת דְנָא שָׁנִין סַגִיאִין לְאַיְתָאָה יָתָךְ עֲלֵיהוֹן:",
        "וִיהֵי בְּעִדָנָא הַהִיא בְּיוֹם מֵיתֵי גוֹג עַל אַרְעָא דְיִשְׂרָאֵל אֲמַר יְיָ אֱלֹהִים יַדְלִיק רוּגְזִי וְחֵימְתִי:",
        "וּבְאִתְגְלָאָה פּוּרְעֲנוּתִי בְמִדְלַק אֶשַׁת רוּגְזִי גְזָרֵית בְמֵימְרִי אִם לָא בְּיוֹמָא הַהוּא יְהֵי זִיעַ סַגִי עַל אַרְעָא דְיִשְׂרָאֵל:",
        "וִיזוּעוּן מִן קֳדָמַי נוּנֵי יַמָא וְעוֹפָא דִשְׁמַיָא וְחַיַת בָּרָא וְכָל רִחֲשָׁא דְרָחֵישׁ עַל אַרְעָא וְכָל אֱנָשָׁא דִי עַל אַפֵּי אַרְעָא וְיִתְפַּגְרוּן טוּרַיָא וְיִתְתַּלְשׁוּן מִגְדָלַיָא וְכָל שׁוּר רָם לְאַרְעָא יִתְחַמָר:",
        "וַאֲזַמְנִינֵיהּ לְמִפַּל בְּחַרְבָּא עַל טוּרֵי יִשְׂרָאֵל עַמִי אֲמַר יְיָ אֱלֹהִים חֶרֶב גְבַר בַּאֲחוּהִי תְהֵי:",
        "וְאֶתְפְּרַע מִנֵיהּ בְּמוֹתָא וּבִקְטָלָא וּמְטַר מִגְבַּר וְאַבְנֵי אֶלְגָבִישׁ אֶשְׁתָּא וְגוּפְרִיתָא אֶמְטַר עֲלוֹהִי וְעַל מַשִׁרְיָתֵיהּ וְעַל עַמְמִין סַגִיאִין דִי עִמֵיהּ:",
        "וְאִתְרַבֵּי וְאִתְקַדֵשׁ וַאֲגַלֵי גְבוּרְתִּי לְעֵינֵי עַמְמִין סַגִיאִין וְיֵדְעוּן אֲרֵי אֲנָא יְיָ:"
      ],
      [
        "וְאַתְּ בַר אָדָם אִתְנַבֵּי עַל גוֹג וְתֵימַר כִּדְנַן אֲמַר יְיָ אֱלֹהִים הָא אֲנָא שְׁלַח רוּגְזִי עֲלָךְ גוֹג רַב רֵישׁ מֶשֶׁךְ וְתֻבָל:",
        "וַאֲשַׁדְלִינָךְ וְאַטְעִינָךְ וְאַסְקִינָךְ מִסְיָפֵי צִפּוּנָא וְאַיְתִינָךְ עַל טוּרֵי יִשְׂרָאֵל:",
        "וְאֶרְמֵי קַשְׁתָּךְ מִיַד סְמָאלָךְ וְגִרְרָךְ מִיַד יְמִינָה אֲמַגֵיר:",
        "עַל טוּרֵי אַרְעָא דְיִשְׂרָאֵל תִּתְרְמֵי נְבֶלְתַּךְ אַתְּ וְכָל מַשִׁרְיָתָךְ וְעַמְמִין דִי עִמָךְ לְעוֹפָא צִפָּר כָּל דִי פָרַח וּלְחַיַת בָּרָא מְסַרְתָּךְ לְאִשְׁתֵּיצָאָה:",
        "עַל אַפֵּי בְּרָא תִּתְרְמֵי נְבֵילְתָּךְ אֲרֵי אֲנָא גְזָרֵית בְּמֵימְרִי אֲמַר יְיָ אֱלֹהִים:",
        "וְאַדְלֵיק אֶשְׁתָּא בְמָגוֹג וּבְיָתְבֵי נַגְוָתָא דְשָׁרָן לְרוֹחֲצָן וְיֵדְעוּן אֲרֵי אֲנָא יְיָ:",
        "וְיַת שְׁמָא דְקוּדְשִׁי אֲגַלֵי בְּגוֹ עַמִי יִשְׂרָאֵל וְלָא אָחֵיל יַת שְׁמָא דְקוּדְשִׁי עוֹד וְיֵדְעוּן עַמְמַיָא אֲרֵי אֲנָא יְיָ קַדִישָׁא אַשְׁרֵיתִי שְׁכִנְתִּי בְּיִשְׂרָאֵל:",
        "הָא אַתְיָא וְתִתְקַיֵם אֲמַר יְיָ אֱלֹהִים הוּא יוֹמָא דִי גְזָרֵית בְּמֵימְרִי:",
        "וְיִפְקוּן יַתְבֵי קִרְוֵי אַרְעָא דְיִשְׂרָאֵל וִיהוֹן שַׁגְרִין וּמִסְתּוֹבָרִין בְּמָנֵי זְיָנֵי בַעֲגָלִין וּתְרֵיסִין בְּקַשְׁתָּן וּבְגִירְרִין וּבְעָאֵי מוּרְנִין וְרוֹמְחִין וְיַדְלְקוּן בְּהוֹן נוּרָא שְׁבַע שְׁנִין:",
        "וְלָא יִסְבוּן אָעִין מִן חַקְלָא וְלָא יְקַצוּן מִן חוּרְשָׁא אֲרֵי בְמִנֵי זְיָנָא יִדְלְקוּן נוּרָא וְיִבְזוּן יַת בְּזָזֵיהוֹן וְיַעְדוּ יַת עֲדֵיהוֹן אֲמַר יְיָ אֱלֹהִים:",
        "וִיהֵי בְּעִדָנָא הַהוּא אֶתֵּן לְגוֹג אֲתַר כָּשַׁר לְבֵית קְבוּרָא בְּיִשְׂרָאֵל בְּחֵילְתָּא מְגִיזָתָא מַדְנַח יַם גִינוֹסַר וְסָמְכָא הִיא לִתְּרֵין טוּרַיָא וְיִקְבְּרוּן תַּמָן יַת גוֹג וְיַת כָּל אִתְרְגוּשְׁתֵּיהּ וְיִקְרוֹן חֵילַת אִתְרְגוּשַׁת גוֹג:",
        "וְיִקְבְּרוּנוּן בֵּית יִשְׂרָאֵל בְּדִיל לְדַכָּאָה יַת אַרְעָא שִׁבְעָה יַרְחִין:",
        "וְיִקְבְּרוּן כָּל עַמָא דְאַרְעָא וִיהֵי לְהוֹן לְשׁוּם יוֹם אִתְיַקְרוּתִי אֲמַר יְיָ אֱלֹהִים:",
        "וְגַבְרִין יְמַנוּן תְּדִירָא לְמֶהֱוֵי עָדָן בְּאַרְעָא מְקַבְּרִין עַם דְעָדָן יַת דִי אִשְׁתְּאָרוּ עַל אַפֵּי אַרְעָא לְדַכָּיוּתָהּ מִסוֹף שַׁבְעָא יַרְחִין יִשְׁרוּן לְמִבְדָק:",
        "וְעָדֵי אוֹרְחָא דְעָדָן בְּאַרְעָא דִי אִם יֶחֱזֵי גַרְמָא דֶאֱנָשָׁא וְיִבְנֵי לְוָתֵיהּ צִיוּנָא עַד דְיִקְבְּרוּן יָתֵיהּ דִי מְקַבְּרִין בְּחֵילַת אִתְרְגוּשַׁת גוֹג:",
        "וְאַף לְתַמָן יִתְרְמוּן קְטִילֵי רוֹמָא קַרְתָּא דְסַגִיאִין אִתְרְגוּשְׁתָּהָא גוֹג וִידַכּוּן אַרְעָא:",
        "וְאַתְּ בַּר אָדָם כִּדְנַן אֲמַר יְיָ אֱלֹהִים אֱמַר לְעוֹפָא צִפַּר כָּל דִי פְרַח וּלְכָל חַיַת בָּרָא אִתְכְּנִישׁוּ וֶאֱתוֹ אִתְקְרָבוּ מִסְחוֹר סְחוֹר עַל דִי קְטִילֵי דִי אֲנָא קָטֵיל לְכוֹן קְטוֹל סַגִי עַל טוּרֵי יִשְׂרָאֵל וְתֵיכְלוּן בִּסְרָא וְתִשְׁתּוּן דְמָא:",
        "בְּסַר גִבָּרִין תֵּיכְלוּן וְדַם רַבְרְבֵי אַרְעָא תִּשְׁתּוּן מַלְכִין שִׁלְטוֹנִין וְטוּרְנִין גִבָּרִין עַתִּירֵי נִכְסַיָא כּוּלְהוֹן:",
        "וְתֵיכְלוּן תַּרְבָּא לְמִסְבַּע וְתִשְׁתּוּן דְמָא מִבְּסַר קְטִילִין דִי אֲנָא קָטֵיל לְכוֹן:",
        "וְתִסְבְּעוּן עַל טוּרֵי יִשְׂרָאֵל סוּסְוָן וּרְתִיכִין גִבָּרִין וְכָל גַבְרֵי עָבְדֵי קְרָבָא אֲמַר יְיָ אֱלֹהִים:",
        "וְאֶתֵּן יַת יְקָרִי בְּעַמְמַיָא וְיֶחֱזוּן כָּל עַמְמַיָא יַת פּוּרְעֲנוּתִי דַעֲבָדַת וְיַת גְבוּרְתִּי דְשַׁוֵיתִי בְהוֹן:",
        "וְיֵדְעוּן בֵּית יִשְׂרָאֵל אֲרֵי אֲנָא יְיָ אֱלָהָהוֹן מִן יוֹמָא הַהוּא וּלְהָלָא:",
        "וְיֵדְעוּן עַמְמַיָא אֲרֵי בְּחוֹבֵיהוֹן גְלוֹ בֵית יִשְׂרָאֵל עַל דְשַׁקָרוּ בְמֵימְרִי וְסַלִיקֵית שְׁכִנְתִּי מִנְהוֹן וּמְסַרְתִּינוּן בְּיַד סָנְאֵיהוֹן וְאִתְקַטָלוּ בְחַרְבָּא כּוּלְהוֹן:",
        "כְּסוֹאֲבָתְהוֹן וּכְמֵירְדֵיהוֹן אִתְפְּרָעֵית מִנְהוֹן וְסַלְקֵית שְׁכִנְתִּי מִנְהוֹן:",
        "בְּכֵן כִּדְנַן אֲמַר יְיָ אֱלֹהִים כְּעַן אֲתֵיב יַת גָלוּת יַעֲקֹב וְאֶרְחַם כָּל בֵּית יִשְׂרָאֵל וְאֶתְפְּרַע פּוּרְעֲנוּת גְבוּרְתִּי מִן עַמְמַיָא עַל דְאָחִילוּ יַת שְׁמָא דְקוּדְשִׁי:",
        "וִיקַבְּלוּן יַת אִתְכְּנָעוּתְהוֹן וְיַת כָּל שִׁקְרֵיהוֹן דְשַׁקָרוּ בְּמֵימְרִי בְּמֵיתַבְהוֹן עַל אַרְעֲהוֹן לְרוֹחֲצָן וְלֵית דְמָנִיד:",
        "כַּד אֲתִיב יַתְהוֹן מִבֵּינֵי עַמְמַיָא וְאַכְנֵישׁ יַתְהוֹן מִן מְדִינְתָא בַּעֲלֵי דְבָבֵיכוֹן וְאִתְקַדַשׁ בְּהוֹן לְעֵינֵי עַמְמִין סַגִיאִין:",
        "וְיֵדְעוּן אֲרֵי אֲנָא יְיָ אֱלָהָהוֹן וְעַל דְחָבוּ קֳדָמַי אַגְלֵיתִי יַתְהוֹן לְבֵינֵי עַמְמַיָא וּכְדוֹ דְתָבוּ כְּנִשְׁתִּינוּן לְאַרְעֲהוֹן וְלָא אַשְׁאַר עוֹד מִנְהוֹן תַּמָן:",
        "וְלָא אֲסַלֵק עוֹד שְׁכִנְתִּי מִנְהוֹן דִשְׁפִיכֵית יַת רוּחַ קוּדְשִׁי עַל בֵּית יִשְׂרָאֵל אֲמַר יְיָ אֱלֹהִים:"
      ],
      [
        "בְּעַשְׂרִין וַחֲמֵשׁ שְׁנִין לְגָלוּתָנָא בְּרֵישָׁא דְשַׁתָּא בְּעַשְׂרָא לְיַרְחָא בְּאַרְבַּע עַסְרֵי שְׁנִין בָּתַר דְאִתְּרָעַת קַרְתָּא בִּכְרַן יוֹמָא הָדֵין שְׁרַת עָלַי רוּחַ נְבוּאָה מִן קֳדָם יְיָ וְאָעֵיל יָתִי לְתַמָן:",
        "בְּרוּחַ נְבוּאָה דִשְׁרַת עֲלֵי מִן קֳדָם אָעֵלַנִי לְאַרְעָא דְיִשְׂרָאֵל וְאַשְׁרַיַנִי עַל טוּר רָם לַחֲדָא וַעֲלוֹהִי כְּבִנְיָן קַרְתָּא מִדָרוֹמָא:",
        "וְאָעֵיל יָתִי לְתַמָן וְהָא גַבְרָא חֶזְוֵיהּ כַּחֲזוּ נְחָשָׁא וְחוּט דְכִיתְנָא בִּידֵיהּ וּקְנֵי מְשַׁחְתָּא וְהָא קָאֵים בְּתַרְעָא:",
        "וּמַלֵיל עִמִי גַבְרָא בַּר אָדָם חֲזֵי בְעֵינָךְ וּבְאוּדְנָךְ שְׁמַע וְשַׁוֵי לִבָּךְ לְכָל דִי אֲנָא מַחֲזֵי יָתָךְ אֲרֵי בְּדִיל לְאַחְזָיוּתָךְ אִתּוֹתַבְתָא הַלִכָא חַוֵי יַת כָּל דְאַתְּ חָזֵי לְבֵית יִשְׂרָאֵל:",
        "וְהָא שׁוּרָא מִבָּרָא לְבֵיתָא סְחוֹר סְחוֹר וּבְיַד גַבְרָא קְנֵי מְשַׁחְתָּא דְחַד מִנְהוֹן שִׁית אַמִין בְּאַמְתָא דְהִיא אַמָה וּפְשַׁךְ וּמְשַׁח יַת פּוּתְיָא דְבִנְיָנָא קַנְיָא חַד וְרוּמָא קַנְיָא חַד:",
        "וְעַל לְתַרְעָא דִפְתִיחַ לְאוֹרַח מַדִינְחָא וּסְלִיק בְּדַרְגוֹהִי וּמְשַׁח יַת סִפָּא דְתַרְעָא קַנְיָא חַד פוּתְיָא וְיַת סִפָּא חַד קַנְיָא חַד פּוּתְיָא:",
        "וּתְוָא קַנְיָא חַד אוּרְכָּא וְקַנְיָא חַד פּוּתְיָא וּבֵין תְּוַיָא כָּתְלָא חֲמֵשׁ אַמִין וְסִפָּא דְתַרְעָא מִקֳבֵיל אוּלַמָא דְתַרְעָא מִלְגָיו קַנְיָא חָד:",
        "וּמְשַׁח יַת אוּלַמָא דְתַרְעָא מִלְגָיו קַנְיָא חָד:",
        "וּמְשַׁח יֵת אוּלַמָא דְתַרְעָא תַּמְנֵי אַמִין וְאֵלוֹהִי תַּרְתֵּין אַמִין וְאוּלָמָא דְתַרְעָא מִלְגָיו:",
        "וְתָוֵי תַרְעָא בְּאוֹרַח מַדִינְחָא תְּלָתָא מִכָּא וּתְלָתָא מִכָּא מְשַׁחְתָּא חֲדָא לִתְלָתֵיהוֹן וּמְשַׁחְתָּא חֲדָא לְאֵילַיָא מִכָּא וּמִכָּא:",
        "וּמְשַׁח יַת פּוּתְיָא דְמַעֲלָנָא דְתַרְעָא עֲסַר אַמִין אוּרְכָּא דְתַרְעָא תְּלַת עַסְרֵי אַמִין:",
        "וּתְחוּמָא דִי קֳדָם תְּוַיָא אַמְתָא חֲדָא וְאַמְתָא חֲדָא תְחוּמָא מִכָּא וּתְוָא שִׁית אַמִין מִכָּא וְשִׁית אַמִין מִכָּא:",
        "וּמְשַׁח יַת תַּרְעָא מֵאִיגַר תְּוָא לְאִיגְרֵיהּ פּוּתְיָא עַסְרִין וַחֲמֵשׁ אַמִין תְּרַע לֶקֳבֵיל תְּרַע:",
        "וַעֲבַד יַת אֵלַיָא שִׁתִּין אַמִין רוּמְהוֹן וְעַל אֵילָא דְדַרְתָּא דְתַרְעָא סְחוֹר סְחוֹר:",
        "וְקָדָם תַּרְעָא מְצִיעָאָה דִי קֳדָם אוּלַמָא דְתַרְעָא גַוָאָה חַמְשִׁין אַמִין:",
        "וְכַיִין סְתִּימָן לְתָוַיָא וּלְאֵילֵיהֶן מִגָיו לְתַרְעָא סְחוֹר סְחוֹר וְכֵן לְאוּלַמַיָא וְכַוִין סְחוֹר סְחוֹר לְגָיו וְעַל אֵילָא כּוֹתַרְתָּא:",
        "וְאָעֲלַנִי לְדַרְתָּא בָּרַיְתָא וְהָא לִשְׁכָּן וְרִצְפְּתָא עֲבֵיד לְדַרְתָּא סְחוֹר סְחוֹר תְּלָתִין לִשְׁכָּן עַל רִצְפְּתָא:",
        "וְרִצְפְּתָא לְעֶבְרָא דְתַרְעַיָא לָקֳבֵיל אוּדְכָּא דְתַּרְעַיָא רִצְפָּתָא אַרְעִיתָא:",
        "וּמְשַׁח פּוּתְיָא מִן קֳדָם תַּרְעָא מִצִיעֲאָה דִקְדָם דַרְתָּא גַוְיָתָא מִבָּרָא מְאָה אַמִין לְמַדִינְחָא וּלְצִפּוּנָא:",
        "וְתַרְעָא דְפְתִיחַ לְאוֹרַח צִפּוּנָא לְדַרְתָּא בָּרַיְתָא מְשַׁח אוּרְכֵּיהּ וּפוּתְיֵהּ:",
        "וְתָווֹהִי תְלָתָא מִכָּא וּתְלָתָא מִכָּא וְאֵילוֹהִי וְאוּלַמוֹהִי הֲוָת כְּמִשְׁחַת תַּרְעָא קַדְמָאָה חַמְשִׁין אַמִין אוּרְכֵּיהּ וּפוּתְיָא עַסְרִין וַחֲמֵשׁ אַמִין:",
        "וְכַווֹהִי וְאוּלַמוֹהִי וְכוּתַרְתֵּיהּ כְּמִשְׁחַת תַּרְעָא דִפְתִיחַ לְאוֹרַח מַדִינְחָא וּבְדַרְגִין שַׁבְעָה סַלְקִין בֵּיהּ וְאוּלַמוֹהִי קֳדָמֵיהוֹן:",
        "וְתַרְעָא לְדַרְתָּא גַוַיְתָא לָקֳבֵיל תַּרְעָא דִפְתִיחַ לְצִפּוּנָא וּלְמַדִינְחָא וּמְשַׁח מִתְּרַע לִתְרַע מְאָה אַמִין:",
        "וְאוֹבִילֵנִי בְּאוֹרַח דָרוֹמָא וְהָא תַרְעָא חַד פְּתִיחַ לְאוֹרַח דָרוֹמָא וּמְשַׁח אֵילוֹהִי וְאוּלֵמוֹהִי כִּמְשַׁחְתָּא הָאִלֵין:",
        "וְכַוֵין לֵיהּ וּלְאוּלַמוֹהִי סְחוֹר סְחוֹר כְּכַוַיָא הָאִלֵין חַמְשִׁין אַמִין אוֹרְכָּא וּפוּתְיָא עַסְרִין וַחֲמֵשׁ אַמִין:",
        "וְדַרְגִין שִׁבְעָא דַרְגוֹהִי וְאוּלַמוֹהִי קֳדָמֵיהוֹן וְכוּתְרָן לֵיהּ חֲדָא מִכָּא וַחֲדָא מִכָּא עַל אֵילוֹהִי:",
        "וְתַרְעָא דְדַרְתָּא גַוִיתָא בְּאוֹרַח דְרוֹמָא וּמְשַׁח מִתְּרַע לִתְרַע בְּאוֹרַח דָרוֹמָא מְאָה אַמִין:",
        "וְאָעֵילְנִי לְדַרְתָּא גַוַיְתָא בִּתְרַע דָרוֹמָא וּמְשַׁח יַת תְּרַע דָרוֹמָא כְּמִשְׁחֲתָא הָאִלֵין:",
        "וְתָווֹהִי וְאֵילוֹהִי וְאוּלֵמוֹהִי כִּמְשַׁחְתָּא הָאִלֵין וְכַוִין לֵיהּ וּלְאוּלֵמוֹהִי סְחוֹר סְחוֹר חַמְשִׁין אַמִין אוּרְכָּא וּפוּתְיָא עַסְרִין וַחֲמֵשׁ אַמִין:",
        "וְאוּלַמַיָא סְחוֹר סְחוֹר אוּרְכָּא עַסְרִין וַחֲמֵשׁ אַמִין וּפוּתְיָא חֲמֵשׁ אַמִין:",
        "וְאוּלַמוֹהִי לְדַרְתָּא בַּרַיְתָא וְכוּתְרָן עַל אֵילוֹהִי וְדַרְגָן תְּמַנְיָא דַרְגוֹהִי:",
        "וְאָעֲלַנִי לְדַרְתָּא גַוַיְתָא בְּאוֹרַח מַדִינְחָא וּמְשַׁח יַת תַּרְעָא כְּמִשְׁחָתָא הָאִלֵין:",
        "וְתָווֹהִי וְאֵילוֹהִי וְאוּלֵמוֹהִי כְּמִשְׁחָתָא הָאִילֵן וְכַוִין לֵיהּ וּלְאוּלַמוֹהִי סְחוֹר סְחוֹר אוֹרְכָּא חַמְשִׁין אַמִין וּפוּתְיָא עַסְרִין וַחֲמֵשׁ אַמִין:",
        "וְאוּלַמוֹהִי לְדַרְתָּא בַּרַיְתָא וְכוֹתְרָן עַל אֵילוֹהִי מִכָּא וּמִכָּא וּתְמַנְיָא דַרְגִין דַרְגוֹהִי:",
        "וְאָעֲלַנִי לִתְרַע צִפּוּנָא וּמְשַׁח כְּמִשְׁחָתָא הָאִלֵין:",
        "תָּווֹהִי אֵילוֹהִי וְאוּלַמוֹהִי וְכַוִין לֵיהּ סְחוֹר סְחוֹר אוּרְכָּא חַמְשִׁין אַמִין וּפוּתְיָא עַסְרִין וַחֲמֵשׁ אַמִין:",
        "וְאֵילוֹהִי לְדַרְתָּא בַּרַיְתָא וְכוֹתְרִין עַל אֵילוֹהִי מִכָּא וּמִכָּא וּתְמַנְיָא דַרְגִין דַרְגוֹהִי:",
        "וְלִשְׁכָּתָא וּפִתְחָא בְּאֵילַיָא דְתַרְעַיָא תַּמָן מְתַקְנִין יַת עֲלָתָא:",
        "וּבְאוּלַמָא דְתַרְעָא תְּרֵין פָּתוֹרִין מִכָּא וּתְרֵין פָּתוֹרִין מִכָּא לְמִכַּס עֲלֵיהוֹן עֲלָתָא וְחַטָאתָא וְאַשָׁמָא:",
        "וּלְעֶבְרָא דְמִבָּרָא לְמַסְקָנָא בְּמַעֲלָנָא דִתְרַע צִפּוּנָא תְּרֵין פְּתוֹרִין וּלְעֶבְרָא אוֹחֲרָנָא דִלְאוּלַמָא דְתַרְעָא תְּרֵין פְּתוֹרִין:",
        "אַרְבְּעָא פְּתוֹרִין מִכָּא וְאַרְבָּעָה פְּתוֹרִין מִכָּא לְעֶבְרָא דְתַרְעָא תְמַנְיָא פָּתוֹרִין בֵּינֵיהוֹן נִכְסִין:",
        "וְאַרְבְּעָא פָּתוֹרִין לַעֲלָתָא בְּאַבְנֵי גָזִית אוּרְכָּא אַמְתָא חֲדָא וּפַלְגָא וּפוּתְיָא אַמְתָא חֲדָא וּפַלְגָא וְרוּמֵיהּ אַמְתָא חֲדָא עֲלֵיהוֹן וְיַחֲתוּן יַת מָנַיָא דְיִכְסוּן יַת עֲלָתָה בְּהוֹן וְנִכְסַת קוּדְשַׁיָא:",
        "וְעָנְקְלִין נַפְקִין פְּשַׁח חָד קְבִיעִין בְּעַמוּדֵי בֵּית מַטְבְּחַיָא מִגָיו לְאוּלַמַיָא סְחוֹר סְחוֹר וְעַל פָּתוֹרַיָא בְּשַׂר קוּרְבְּנַיָא:",
        "וּמִבָּרָא לְתַרְעָא גַוָאָה לִשְׁכַּת לֵיוָאֵי בְּדַרְתָּא גַוַיְתָא דִי לְעִבַּר תְּרַע צִפּוּנָא וְאַפֵּיהוֹן לְאוֹרַח דָרוֹמָא חַד לְעִיבַּר תְּרַע מַדִינְחָא אַפֵּי אוֹרַח צִפּוֹנָא:",
        "וּמַלֵיל עִמִי דָא לִשְׁכְּתָא דִפְתִיחָא לְאוֹרַח דָרוֹמָא לְכַהֲנַיָא נָטְרֵי מַטְרַת בֵּיתָא:",
        "וְלִשְׁכְּתָא דִפְתִיחַ לְאוֹרַח צִפּוּנָא לְכַהֲנַיָא נַטְרֵי מַטְרַת מַדְבְּחָא אִינוּן בְּנֵי צָדוֹק דְקָרְבִין מִבְּנֵי לֵוִי לְפוּלְחָנָא דַייָ לְשַׁמָשָׁא קֳדָמוֹהִי:",
        "וּמְשַׁח יַת דַרְתָּא אוּרְכָּא מְאָה אַמִין וּפוּתְיָא מְאָה אַמִין מְרֻבַּע וּמַדְבְּחָא דִי קֳדָם בֵּיתָא:",
        "וְאָעֲלַנִי לְאוּלַמָא דְבֵיתָא וּמְשַׁח אֵילָא דְאוּלַמָא חֲמֵשׁ אַמִין מִכָּא וַחֲמֵשׁ אַמִין מִכָּא וּפוּתְיָא דְתַרְעָא תְּלַת אַמִין מִכָּא וּתְלַת אַמִין מִכָּא:",
        "אוּרְכָּא דְאוּלַמָא עַסְרִין אַמִין וּבְדַרְגִין דְסַלְקִין לֵיהּ וְעַמוּדַיָא עַל אֵילַיָא חַד מִכָּא וְחַד מִכָּא:"
      ],
      [
        "וְאַעֲלַנִי לְהֵיכָלָא וּמְשַׁח יַת אֵילֵיָא שִׁית אַמִין פּוּתְיָא מִכָּא וְשִׁית אַמִין פּוּתְיָא מִכָּא פּוּתְיָא דְמַשְׁכְּנָא:",
        "וּפוּתְיָא דְתַרְעָא עֲסַר אַמִין וְכִתְפֵי תַרְעָא חֲמֵשׁ אַמִין מִכָּא וַחֲמֵשׁ אַמִין מִכָּא וּמְשַׁח אוּרְכֵּיהּ אַרְבְּעִין אַמִין וּפוּתְיָא עַסְרִין אַמִין:",
        "וְעַל לְגָיו וּמְשַׁח אֵילָא דְתַרְעָא תַּרְתֵּין אַמִין וְתַרְעָא שִׁית אַמִין וּפוּתְיָא דְתַרְעָא שְׁבַע אַמִין:",
        "וּמְשַׁח יַת אוּרְכֵּיהּ עַסְרִין אַמִין וּפוּתְיָא עַסְרִין אַמִין דִי קֳדָם הֵיכָלָא וַאֲמַר לִי דֵין בֵּית קוֹדֶשׁ קוּדְשַׁיָא:",
        "וּמְשַׁח כּוֹתְלָא דְבֵיתָא שִׁית אַמִין וּפוּתְיָא דִמְחִיצְתָּא אַרְבַּע אַמִין סְחוֹר סְחוֹר מַקַף לְבֵיתָא סְחוֹר סְחוֹר:",
        "וּמְחִיצַיָא מְחִיצָא עַל מְחִיצָא תְּלָתִין וּתְלַת חֲדָא עַסְרֵי בְּסִידְרָא קְבִיעִין בְּכִתְלָא דְמִגָיו לִמְחִיצָא סְחוֹר סְחוֹר לְמֶהֱוֵי רֵישֵׁי שַׁרְיָתָא נָיְחִין עַל זִיזָא וְלָא יֶהֶוְיָן שַׁרְיָתָא מְעַבְּרָן בְּכָתְלֵי בֵּיתָא:",
        "וּפּוּתְיָא מְסִבָּתָא וְסַלְקָא לְעֵלָא לְעֵלָא מִן מְחִיצַיָא אֲרֵי מַקְפָא בֵיתָא לְסַלָקָא לְעֵלָא לְעֵלָא סְחוֹר סְחוֹר לְגָיו עַל כֵּן פָּתֵי בֵיתָא מִלְעֲלָא וְכֵן בִּמְסִבָּתָא סַלְקִין מִן אַרְעִיתָא לְעִלֵיתָא בְּאוֹרַח מְצִיעֲתָא:",
        "וַחֲזֵית לְבֵיתָא רוּמָא סְחוֹר סְחוֹר מְשַׁכְלְלָן מְחִיצַיָא מִשְׁחַת קָנַיָא שִׁית אַמִין רֶוַח:",
        "פּוּתְיָא דְכִתְלָא דִמְחִיצְתָּא דִלְבָרָא חֲמֵשׁ אַמִין וַאֲתַר שְׁבִיק בֵּית מְחִיצַיָא דִלְגָיו:",
        "וּבֵין לִשְׁכָּתָא פּוּתְיָא עַסְרִין אַמִין סְחוֹר סְחוֹר מַקִיף לְבֵיתָא סְחוֹר סְחוֹר:",
        "וְתַרְעָא דִמְחִיצְתָּא לַאֲתַר שְׁבִיק תַּרְעָא חַד פְּתִיחַ לְאוֹרַח צִפּוּנָא וְתַרְעָא חַד פְּתִיחַ לְדָרוֹמָא וּפּוּתְיָא דַאֲתַר שְׁבִיק חֲמֵשׁ אַמִין סְחוֹר סְחוֹר:",
        "וּבִנְיָנָא דִקֳדָם בְּצוּרְתָּא רוּחַ אוֹרַח מַעַרְבָא פּוּתְיָא שַׁבְעִין אַמִין וְכָתְלָא דְבִנְיָנָא חֲמֵשׁ אַמִין פּוּתְיָא סְחוֹר סְחוֹר וְאוּרְכֵּהּ תִּשְׁעִין אַמִין:",
        "וּמְשַׁח יַת בֵּיתָא אוּרְכָּא מְאָה אַמִין וּבְצוּרְתָא וּבִנְיָנָא וְכָתְלַיָא אוּרְכָּא מְאָה אַמִין:",
        "וּפוּתְיָא דִקֳדָם בֵּיתָא וּבְצוּרְתָא לְמַדִינְחָא מְאָה אַמִין:",
        "וּמְשַׁח אוּרְכָּא דְבִנְיָנָא דִקֳדָם בְּצוּרְתָא דְלַאֲחוֹרָאָה וְזִיוְיָתָהָא מִכָּא וּמִכָּא מְאָה אַמִין וְהֵיכְלָא גַוָאָה וְאוּלַמֵי דַרְתָּא:",
        "סִפַּיָא וְכַוִין סְתִּימָן וְעַתִּיקַיָא סְחוֹר סְחוֹר לִתְלָתֵיהוֹן לָקֳבֵיל סִפָּא דְחָפֵי נִיסְרִין דְאַרְזָא סְחוֹר סְחוֹר וְאַרְעָא עַד כַּוַיָא וְכַוִין סְתִימָן:",
        "עַד לְעֵלָא מִן תַּרְעָא וּמִן בֵּיתָא גַוְאָה וּלְבָרָא וְעַל כָּל כּוֹתְלָא סְחוֹר סְחוֹר מִלְגָיו וּמִלְבָרָא מִשְׁחָן:",
        "וּגְלִיף כְּרוּבִין וְכוֹתְרָן וְכוֹתַרְתָּא בֵּין כְּרוּבָא לִכְרוּבָא וּתְרֵין אַפִּין לִכְּרוּבָא:",
        "וְאַפֵּי אֱנָשָׁא עֲבִיד לְכוֹתַרְתָּא מִכָּא וְאַפֵּי אַרְיָא עֲבִיד לְכוֹתַרְתָּא מִכָּא גְלִיף עַל כָּל בֵּיתָא סְחוֹר סְחוֹר:",
        "מֵאַרְעָא עַד לְעֵלָא מִתַּרְעָא כְּרוּבִין וְכוּתְרָן גְלִיפָן וְכֵן לְכָתְלָא דְהֵיכָלָא:",
        "הֵיכָלָא דְסִפּוֹהִי מְרֻבָּעִין וְאַפֵי בֵית כִּפּוּרֵי חֶזְוֵיהּ כְּחֵיזוּ יְקָרֵהּ:",
        "לָקֳבֵל מַדְבְּחָא פְּתוֹרָא דְאָעָא תְּלַת אַמִין רוּמָה וְאוּרְכֵּהּ תַּרְתִּין אַמִין וְזִיוְיָן לֵיהּ וְאוּרְכֵּיהּ וְכָתְלוֹהִי דְאָעָא וּמַלֵיל עִמִי דֵין פָּתוֹרָא דִקֳדָם יְיָ:",
        "וְתַרְתֵּין דָשִׁין לְהֵיכָלָא וּלְבֵית כִּפּוֹרֵי:",
        "וְתַרְתֵּין דָשִׁין אִימְהָן לְדָשַׁיָא תַּרְתֵּין מַקְפָן דָשִׁין תַּרְתֵּין לְדָשָׁא חַד וְתַרְתֵּין דָשִׁין לְאוֹחֲרַנְתָּא:",
        "וּגְלִיף עֲלֵיהוֹן עַל דָשֵׁי הֵיכָלָא כְּרוּבִין וְכוֹתְרָן כְּמָא דִגְלִיף עַל כּוֹתְלַיָא וּסְקִיפָתָא דְאָעָא עַל אַפֵּי אוּלַמָא מִלְבָרָא:",
        "וְכַוִין סְתִימָן וְכוֹתַרְתָּא מִכָּא וּמִכָּא עַל כִּתְפֵי אוּלַמָא וּמְחִיצַת בֵּיתָא וּסְקוּפְתָא:"
      ],
      [
        "וְאַפְקַנִי לְדַרְתָּא בְּרַיְתָא בְּאוֹרַח תַּרְעָא דִפְתִיחַ לְאוֹרַח צִפּוּנָא וְאָעֲלַנִי לְלִשְׁכָּתָא דִקֳדָם בְּצוּרְתָּא וְדִקֳדָם בִנְיָנָא לְצִפּוּנָא:",
        "לָקֳבֵל אוּרְכָּא דְאַמִין מְאָה תַּרְעָא חַד דִפְתִיחַ לְצִפּוּנָא וּפוּתְיָא חַמְשִׁין אַמִין:",
        "לָקֳבֵל עַסְרִין דִלְדַרְתָּא גֵוַיְתָא וּקְבֵל דִלְצִפּוּנָא רִצְפָּתָא דִפְתִיחָא לְדַרְתָּא בְרַיְתָא זָוֵי לָקֳבֵל זָוֵי מְתַלְתִין:",
        "וְקָדָם לִשְׁכָּתָא מַהֲלַךְ עֲסַר אַמִין פּוּתְיָא לְגָיו אוֹרַח אַמְתָא חֲדָא וְתַרְעֵיהֶן פְּתִיחִין לְצִפּוּנָא:",
        "וְלִשְׁכָּתָא עִלְיָתָא דְחִיקָן אֲרֵי נְסִיבָן זֵיוַיָא מִנְהֵין מֵאַרְעֲיָתָא וּמִמְצִיעָתָא בִּנְיָנָא:",
        "אֲרֵי מִתַּלְתָּן אִינוּן וְלֵית לְהוֹן עַמוּדִין כְּעַמוּדֵי דָרָתָא עַל כֵּן דְחִיקָן מֵאַרְעֲיָתָא וּמִמְצִיעָתָא מֵאַרְעָא:",
        "וְכָתְלָא דִלְבָרָא לָקֳבֵל לִשְׁכָּתָא אוֹרַח דַרְתָּא בָרַיְתָא דִקֳדָם לִשְׁכָּתָא אוּרְכֵּהּ חַמְשִׁין אַמִין:",
        "אֲרֵי אוּרְכָּא דְלִשְׁכָּתָא דִלְדַרְתָּא בָרַיְתָא חַמְשִׁין אַמִין וְהַוְיָן עַל אַפֵּי הֵיכְלָא מְאָה אַמִין:",
        "וּמִלְרַע לְלִשְׁכָּתָא הָאִלֵין מַעֲלָנָא מִמַדִינְחָא דְעָלִין לְהֵין מִדַרְתָּא בָּרַיְתָא:",
        "בְּפוּתְיָא דְכָתְלָא דְדַרְתָּא בְּאוֹרַח מַדִינְחָא דִקֳדָם בְּצוּרְתָא וְדִקֳדָם בִּנְיָנָא לִשְׁכָּן:",
        "וְאוֹרַח קֳדָמֵיהוֹן כְּחֵיזוּ לִשְׁכְּתָא דִפְתִיחָן לְאוֹרַח צִפּוּנָא כְּאוּרְכֵּיהֶן כֵּן פּוּתְהֶן וְכָל מַפְקָנֵיהֶן וְכִדִחֲזֵי לְהֶן וּכְתַרְעֵיהֶן:",
        "וּכְתַרְעֵי לִשְׁכָּתָא דִפְתִיחַ לְאוֹרַח דָרוֹמָא תְּרַע בְּרֵישׁ אוֹרַח אוֹרַח קֳדָם דוּכַן לֵיוָאַי אוֹרַח מַדִינְחָא בְּמַעֲלָנָהָן:",
        "וַאֲמַר לִי לִשְׁכַּת צִפּוּנָא לִשְׁכַּת דְרוֹמָא דִקֳדָם בְּצוּרְתָּא אִינּוּן לִשְׁכָּת קוּדְשָׁא דְיֵכְלוּן תַּמָן כַּהֲנַיָא דְקָרִיבִין לְשַׁמָשָׁא קֳדָם יְיָ קוֹדֶשׁ קוּדְשַׁיָא תַּמָן יֵיחֲתוּן קוֹדֶשׁ קוּדְשַׁיָא וּמִנְחָתָא וְחַטָאתָא וַאֲשָׁמָא אֲרֵי אַתְרָא קַדִישׁ:",
        "בְּמֵיעַלְהוֹן כַּהֲנַיָא וְלָא יִפְקוּן מִקוּדְשָׁא לְדַרְתָּא בְרַיְתָא וְתַמָן יֵיחֲתוּן לְבוּשֵׁיהוֹן דִישַׁמְשׁוּן בְּהוֹן אֲרֵי קוּדְשָׁא אִינוּן וְיִלְבְּשׁוּן לְבוּשִׁין אוֹחֲרָנִין וְיִתְעַרְבוּן עִם עַמָא:",
        "וְשֵׁיצֵי יַת מִשְׁחַת בֵּיתָא גַוָאָה וְאַפְקַנִי בְּאוֹרַח תַּרְעָא דִפְתִיחַ לְאוֹרַח מַדִינְחָא וּמַשְׁחֵהּ סְחוֹר סְחוֹר:",
        "וּמְשַׁח רוּחַ קִידוּמָא בִּקְנֵי מִשְׁחֲתָא חֲמֵשׁ מְאָה קְנִין בִּקְנֵי מִשְׁחֲתָא סְחוֹר סְחוֹר:",
        "מְשַׁח רוּחַ צִפּוּנָא חֲמֵשׁ מְאָה קְנִין בִּקְנֵי מִשְׁחֲתָא סְחוֹר סְחוֹר:",
        "יַת רוּחַ דָרוֹמָא מְשַׁח חֲמֵשׁ מְאָה קָנִין בִּקְנֵי מִשְׁחֲתָא:",
        "אִסְתְּחַר לְרוּחַ מַעַרְבָא מְשַׁח חֲמֵשׁ מְאָה קְנִין בִּקְנֵי מִשְׁחֲתָא:",
        "לְאַרְבָּא רוּחַיָא מַשְׁחֵהּ שׁוּרָא לֵיהּ סְחוֹר סְחוֹר אוּרְכָּא חֲמֵשׁ מְאָה וּפוּתְיָא חֲמֵשׁ מְאָה לְאַפְרָשָׁא בֵּין קוּדְשָׁא לְחוֹלָא:"
      ],
      [
        "וְאוֹבִילַנִי לְתַרְעָא תַּרְעָא דִפְתִיחַ לְאוֹרַח מְדִינְחָא:",
        "וְהָא יְקָר אֱלָהָא דְיִשְׂרָאֵל אִתְגְלֵי מֵאוֹרַח מַדִינְחָא וְקַל מְבָרְכֵי שְׁמֵהּ כְּקַל מַיִין סַגִיאִין וְאַרְעָא נַהֲרַת מִזִיו יְקָרֵהּ:",
        "וּכְחֵיזוּ חֶזְוָא דַחֲזֵיתִי כְּחֶזְוָא דַחֲזֵיתִי בְּאִתְנַבְּיוּתִי לְחַבָּלָא יַת קַרְתָּא וְחֶזְוָא כְּחֵיזוּ דַחֲזִיתִי עַל נְהַר כְּבַר וְאִשְׁתַּטְחֵית עַל אַפָּי:",
        "וִיקָרָא דַייָ אִתְגְלֵי בְּבֵיתָא בְּאוֹרַח תַּרְעָא דִפְתִיחַ לְאוֹרַח מַדִינְחָא:",
        "וּנְטַלְתַּנִי רוּחָא וְאַעֲלַתְנִי לְדַרְתָּא גַוַיְתָא וְהָא אִתְמְלֵי יְקָרָא דַייָ בֵּיתָא:",
        "וּשְׁמָעֵית דִי מְמַלֵל עִמִי מִלְגָיו וְגַבְרָא הֲוָה קָאִים לְקִבְלִי:",
        "וַאֲמַר לִי בַּר אָדָם דֵין אֲתַר בֵּית כּוּרְסֵי יְקָרִי וְדֵין אֲתַר בֵּית אַשְׁרָיוּת שְׁכִנְתִּי דְאַשְׁרֵי שְׁכִנְתִּי תַמָן בְּגוֹ בְּנֵי יִשְׂרָאֵל לַעֲלָם וְלָא יִסְאֲבוּן עוֹד בֵּית יִשְׂרָאֵל שְׁמָא דְקוּדְשִׁי אִינוּן וּמַלְכֵיהוֹן בְּטַעֲוַתְהוֹן וּבְפִגְרֵי מַלְכֵיהוֹן בָּמוֹתֵיהוֹן:",
        "בְּמִתַּנְהוֹן סִפֵּיהוֹן לָקֳבֵיל סִפֵי בֵית מַקְדְשִׁי וּבִנְיָנֵיהוֹן בִּסְטַר עֲזָרָתִי וְכוֹתֶל בֵּית מַקְדָשִׁי בֵּין מֵימְרִי וּבֵינֵיהוֹן וּסְאִיבוּ יַת שְׁמָא דְקוּדְשִׁי בְּתוֹעֲבַתְהוֹן דַעֲבָדוּ וְשֵׁיצֵתִי יַתְהוֹן בְּרוּגְזִי:",
        "כְּעַן יְרַחֲקוּן יַת טַעֲוָתְהוֹן וּפִגְרֵי מַלְכֵיהוֹן מִלְמֶחֱטֵי קֳדָמַי וְאַשְׁרֵי שְׁכִנְתִּי בֵינֵיהוֹן לַעֲלָם:",
        "אַתְּ בַּר אָדָם חַוִי יַת בֵּית יִשְׂרָאֵל יַת בֵּיתָא וְיִתְכַּנְעוּן מֵחוֹבֵיהוֹן וְיִמְשְׁחוּן יַת טִקוּסֵיהּ:",
        "וְאִם יִתְכַּנָעוּן מִכָּל דַעֲבֵדוּ בְמֶחְזֵיהוֹן צוּרַת בֵּיתָא וְטִקוּסֵיהּ וּמַפְקָנוֹהִי וּמַעֲלָנוֹהִי וְכָל צוּרָתֵהּ וְיַת כָּל גְזֵירָתֵהּ וְכָל צוּרָתֵהּ וְכָל דַחֲזֵי לֵיהּ הוֹדַע יַתְהוֹן וּכְתוֹב לְעֵינֵיהוֹן וְיִטְרוּן יַת כָּל צוּרָתֵהּ וְיַת כָּל גְזֵירָתֵהּ וְיַעְבְּדוּן יַתְהוֹן:",
        "דָא אוֹרַיְתָא דְבֵיתָא עַל רֵישׁ טוּרָא כָּל תְּחוּמֵהּ סְחוֹר סְחוֹר קוֹדֶשׁ קוֹדְשַׁיָא הָא דָא אוֹרַיְתָא דְבֵיתָא:",
        "וְאִלֵין מִשְׁחַת מַדְבְּחָא בְּאַמַיָא בְּאַמְתָא דְהִיא אַמָה וּפְשַׁךְ וְתַשְׁוִיתָא אַמְתָא וְאַמְתָא פוּתְיָא וּגְדַנְפָא מַקַף לָהּ עַל סִפְתֵהּ סְחוֹר סְחוֹר זֵירְתָא חֲדָא וְדֵין טִקוּס מַדְבְּחָא:",
        "וּמִתַּשְׁוֵית אַרְעָא עַד מְסַתִמְתָא אַרְעִיתָא תַּרְתֵּין אַמִין וּפוּתְיָא אַמְתָא חֲדָא וּמִמְסַמְתָּא זְעֶרְתָּא עַד מְסַמְתָא רַבְּתָא אַרְבַּע אַמִין וּפוּתְיָא אַמְתָא:",
        "וּמַדְבְּחָא אַרְבַּע אַמִין וּמִמַדְבְּחָא וּלְעֵלָא קַרְנָתָא אַרְבַּע:",
        "וּמַדְבְּחָא תַּרְתָּא עַסְרֵי אוּרְכָּא בְּתַרְתָּא עַסְרֵי פּוּתְיָא מְרֻבַּע עַל אַרְבְּעָא סִיטְרוֹהִי:",
        "וּמִסַמְתָּא אַרְבַּע אַסְרֵי פוּתְיָא עַל אַרְבַּע סִיטְרָהָא וּגְדַנְפָא מַקַף לָהּ סְחוֹר סְחוֹר פַּלְגוּת אַמְתָא וְתַשְׁוִיתָא לָהּ אַמְתָא סְחוֹר סְחוֹר וְדַרְגָן דְסָלְקִין לָה מִתְפַּנָן לְמַדִינְחָא:",
        "וַאֲמַר לִי בַּר אָדָם כִּדְנַן אֲמַר יְיָ אֱלֹהִים אִלֵין גְזֵירַת מַדְבְּחָא בְּיוֹם אִיתְעַבְּדוּתֵהּ לְאַסָקָא עֲלוֹהִי עֲלָתָא וּלְמִזְרָק עֲלוֹהִי דָם נִכְסַת קוּדְשַׁיָא:",
        "וְתִתֵּן לְכַהֲנַיָא לֵיוָאֵי דִי אִינוּן מִזַרְעָא דְצָדוֹק דְקָרִיבִין לְפוּלְחָנִי אֲמַר יְיָ אֱלֹהִים לְשַׁמָשָׁא קֳדָמַי תּוֹר בַּר תּוֹרֵי לְחַטָאתָא:",
        "וְתִיסַב מִדְמֵיהּ וְתִתֵּן עַל אַרְבַּע קַרְנָתֵיהּ וְעַל אַרְבַּע זִוְיַת מְסַמְתָא וְעַל תְּחוּמָה סְחוֹר סְחוֹר וּתְדַכֵּי יָתֵיהּ וּתְכַפֵּר עֲלוֹהִי:",
        "וְתִסַב יַת תּוֹרָא דְחַטָאתָא וְיוֹקְדִינֵיהּ בַּאֲתַר דַחֲזִי לְבֵיתָא מִבָּרָא לְמַקְדְשָׁא:",
        "וּבְיוֹמָא תִנְיָנָא תַקְרִיב צְפִיר בַּר עִזַי שְׁלִים לְחַטָאתָא וְתִדְכֵּי יַת מַדְבְּחָא כְּמָא דְדַכִּיאוּ בְּתוֹרָא:",
        "בְּשֵׁיצָיוּתָךְ מִלְדַכָּאָה תַּקְרִיב תּוֹר בַּר תּוֹרֵי שְׁלִים וּדְכַר מִן עָנָא שְׁלִים:",
        "וְתִקְרְבִינוּן קֳדָם יְיָ וְיִתְּנוּן כַּהֲנַיָא עֲלֵיהוֹן מִילְחָא וְיִסְקוּן יַתְהוֹן עֲלָתָא קֳדָם יְיָ:",
        "שַׁבְעָא יוֹמִין תַּעֲבֵּיד צְפִירָא דְחַטָאתָא לְיוֹמָא וְתוֹר בַּר תּוֹרֵי וּדִכַר מִן עָנָא שְׁלֵימִין יַעַבְדוּן:",
        "שַׁבְעָה יוֹמִין יְכַפְּרוּן עַל מַדְבְּחָא וְיִדְכּוּן יָתֵיהּ וְיַקְרִיבוּן קוּרְבָּנֵיהּ:",
        "וְיִשְׁלְמוּן יַת יוֹמַיָא וִיהֵי בְּיוֹמָא תְמִינָאָה וּלְהָלָא יַעַבְדוּן כַּהֲנַיָא עַל מַדְבְּחָא יַת עַלְוָתְכוֹן וְיַת נִכְסַת קוּדְשֵׁיכוֹן וְיִתְקַבְּלוּן קוּרְבָּנֵיכוֹן בְּרַעֲוָא אֲמַר יְיָ אֱלֹהִים:"
      ],
      [
        "וַאָתֵיב יָתִי אוֹרַח תְּרַע מַקְדְשָׁא בָרָאָה דִפְתִיחַ לְמַדִינְחָא וְהוּא אָחִיד:",
        "וַאֲמַר יְיָ לִי תְּרַע הָדֵין אָחִיד יְהֵא וְלָא יִתְפְּתַח וֶאֱנַשׁ לָא יֵעוֹל בֵּיהּ אֲרֵי יְיָ אֱלָהָא דְיִשְׂרָאֵל אִתְגְלֵי עֲלוֹהִי וִיהֵי אָחִיד:",
        "לְרַבָּא יְהֵי רַבָּא הוּא יְתֵיב בֵּיהּ לְמֵיכַל לַחְמָא קֳדָם יְיָ מֵאוֹרַח אוּלֵמָא דְתַרְעָא יֵעוֹל וּמֵאוֹרְחֵיהּ יִפּוֹק:",
        "וְאָעֲלַנִי אוֹרַח תְּרַע צִפּוּנָא דִקֳדָם בֵּיתָא וַחֲזֵית וְהָא אִתְמְלֵי יְקָרָא דַייָ יַת בֵּית מַקְדְשָׁא דַייָ וְאִשְׁתַּטְחֵית עַל אַפָּי:",
        "וַאֲמַר לִי יְיָ בַּר אָדָם שַׁוִי לִבָּךְ וַחֲזֵי בְעֵינָךְ וּבְאוּדְנָךְ שְׁמַע יַת כָּל דַאֲנָא מְמַלֵיל עִמְךְ לְכָל גְזֵירַת בֵּית מַקְדְשָׁא דַייָ וּלְכָל דַחֲזֵי לֵיהּ וּתְשַׁוֵי לִבָּךְ לְמַעֲלָנֵי בֵיתָא בְכָל מַפְקָנַי מַקְדְשָׁא:",
        "וְתֵימַר לְעַמָא סַרְבָנָא לִדְבֵית יִשְׂרָאֵל כִּדְנַן אֲמַר יְיָ אֱלֹהִים סַגִי לְכוֹן מִכָּל תּוֹעֲבַתְכוֹן בֵּית יִשְׂרָאֵל:",
        "בְּאַיְתָיוּתְכוֹן בְּנֵי עַמְמַיָא רַשִׁיעֵי לִבָּא וְעַרְלֵי בִסְרָא לְמֶהֱוֵי בְּמַקְדְשִׁי לְאַפָסָא יַת עֲזָרָתִי בְּקָרִיבְכוֹן יַת קוּרְבָּנִי תְּרַב וְדַם נִכְסַת קוּדְשִׁין וְאַשְׁנִיאוּ קְיָמִי עַל כָּל תּוֹעֲבָתְכוֹן:",
        "וְלָא נְטַרְתּוּן מֵטְרַת קוּדְשִׁי וּמַנִיתוּן לְנַטְרֵי מַטְרַת מֵימְרִי בְמַקְדְשִׁי לְכוֹן:",
        "כִּדְנַן אֲמַר יְיָ אֱלֹהִים כָּל בַּר עַמְמִין רַשִׁיעֵי לִבָּא וְעַרְלֵי בִסְרָא לָא יַעֲלוּן לְמַקְדְשִׁי לְכָל בְּנֵי עַמְמַיָא דִי בְּגוֹ בְּנֵי יִשְׂרָאֵל:",
        "אֱלָהֵין לֵיוָאֵי דְאִתְרָחִיקוּ מִדְחַלְתִּי בְּמִטְעֵי יִשְׂרָאֵל דִטְעוֹ מִבְּתַר פּוּלְחָנִי בָּתַר טַעֲוָתְהוֹן וִיקַבְּלוּן חוֹבֵיהוֹן:",
        "וִיהוֹן בְּמַקְדְשִׁי מְשַׁמְשִׁין מְמַנָן עַל תַּרְעֵי בֵיתָא וּמְשַׁמְשִׁין יַת בֵּיתָא אִינוּן יִכְסוּן יַת עֲלָתָא וְיַת נִכְסַת קוּדְשַׁיָא דִי לְעַמָא וְאִינוּן יְקוּמוּן קֳדָמֵיהוֹן לְשַׁמָשׁוּתְהוֹן:",
        "חֲלַף דַהֲווֹ מְשַׁמְשִׁין יַתְהוֹן קֳדָם טַעֲוָתְהוֹן וַהֲווֹ לְבֵית יִשְׂרָאֵל לְתַקָלַת חוֹבִין עַל כֵּן קְיָמִית בְּמֵימְרִי עֲלֵיהוֹן אֲמַר יְיָ אֱלֹהִים וִיקַבְּלוּן חוֹבֵיהוֹן:",
        "וְלָא יִתְקַרְבוּן לְפוּלְחָנִי לְשַׁמָשָׁא קֳדָמַי וּלְמִקְרַב עַל כָּל קוּדְשֵׁי קוּדְשַׁיָא וְיִתְקַבְּלוּן אִתְכְּנָעוּתְהוֹן וְתוֹעֲבָתְהוֹן דִי עֲבָדוּ:",
        "וּמֵנִיתִי יַתְהוֹן נַטְרֵי מַטְרַת בֵּיתָא וּלְכֹל פּוּלְחָנֵי וּלְכֹל דְיִתְעֲבֵיד בֵּיהּ:",
        "וְכַהֲנַיָא לֵיוָאֵי בְּנֵי צָדוֹק דִי נְטַרוּ יַת מַטְרַת מַקְדְשִׁי בְּמִטְעֵי בְּנֵי יִשְׂרָאֵל מִבָּתַר פּוּלְחָנִי אִינוּן יִתְקַרְבוּן לְפוּלְחָנִי לְשַׁמָשָׁא קֳדָמַי וִישַׁמִשׁוּן עַל מַדְבְּחִי לְקָרָבָא קֳדָמַי תְּרַב וְדָם נִכְסַת קוּדְשִׁין אֲמַר יְיָ אֱלֹהִים:",
        "אִינוּן יַעֲלוּן לְמִקְדָשִׁי וְאִינוּן יִתְקָרְבוּן לְפָתוֹרִי לְחַם אַפַּיָא לְשִׁמְשָׁא קֳדָמַי וְיִטְרוּן יַת מַטְרַת מֵימְרִי:",
        "וִיהֵי בְּמֵיעַלְהוֹן לְתַרְעֵי דַרְתָּא גַוַיְתָא לְבוּשֵׁי בוּצָא יִלְבְּשׁוּ וְלָא יְהֵי עֲלֵיהוֹן כְּסוּת עֲמַר בְּשַׁמָשׁוּתְהוֹן בְּתַרְעֵי דַרְתָּא גַוַיְתָא וּלְגָיו:",
        "כּוֹבְעִין דְבוּץ יְהוֹן עַל רֵישֵׁיהוֹן וּמִכְנְסִין דְבוּץ יְהוֹן עַל חַרְצֵיהוֹן וְלָא יְזַרְזוּן עַל חַרְצֵיהוֹן אֱלָהֵין עַל לְבָבֵיהוֹן יֵיסָרוּן:",
        "וּבְמִיפַקְהוֹן מִדַרְתָּא דְקוּדְשָׁא לְדַרְתָּא בָרַיְתָא לְאִיתְעָרָבָא עִם עַמָא יִשְׁלְחוּן יַת לְבוּשֵׁיהוֹן דִי אִינוּן מְשַׁמְשִׁין בְּהוֹן וְיַחֲתוּן יַתְהוֹן בְּלִשְׁכַת קוּדְשָׁא וְיִלְבְּשׁוּן לְבוּשִׁין אוֹחֲרָנִין וְלָא יִתְעָרְבוּן עִם עַמָא בִּלְבוּשֵׁיהוֹן:",
        "וְרֵישֵׁיהוֹן לָא יְגִלְחוּן וּפֵירוּעַ לָא יִרְבּוּן סַפָּרָא יִסְפְּרוּן יַת שְׂעַר רֵישֵׁיהוֹן:",
        "וַחֲמַר לָא יִשְׁתּוּן כָּל כְּהַן בְּמֵיעַלְהוֹן לְדַרְתָּא גַוַיְתָא:",
        "וְאַרְמִלָא וּמְתָרְכָא לָא יִסְבוּן לְהוֹן לִנְשִׁין אֱלָהֵין בְּתוּלְתָּא מִזַרְעָא דְבֵית יִשְׂרָאֵל וְאַרְמַלְתָּא דִי תְהֵי אַרְמַלְתָּא שְׁאַר כַּהֲנַיָא יִסְבוּן:",
        "וְיַת עַמִי יֵלְפוּן בֵּין קוּדְשָׁא לְחוֹלָא וּבֵין מְסָאֲבָא לְדַכְיָא יְהוֹדְעוּנוּן:",
        "וְעַל פַלְגוּת דִינָא אִינוּן יְקוּמוּן לְמִידַן בְּדִינֵי רְעוּתִי יְדוּנוּן וְיַת אוֹרַיְתִי וְיַת קְיָמִי בְּכָל מוֹעֲדֵי יִשְׁרוּן וְיַת יוֹמֵי שַׁבַּיָא דִילִי יְקַדְשׁוּן:",
        "וְעַל מֵיתָא דֶאֱנָשָׁא לָא יֵעוֹל לְאִסְתָּאָבָא אֱלָהֵין לְאָב וּלְאֵם וּלְבָר וְלִבְרַת לְאָח וְלַאֲחָת דְלָא הֲוַת לִגְבַר יִסְתַּאֲבוּן:",
        "וּבָתַר דְכוּתֵיהּ שַׁבְעָא יוֹמִין יִמְנוּן לֵיהּ:",
        "וּבְיוֹם מֵיעֲלֵיהּ לְקוּדְשָׁא לְדַרְתָּא גַוַיְתָא לְשַׁמָשָׁא בְּקוּדְשָׁא יַקְרִיב חֲטָאתֵיהּ אֲמַר יְיָ אֱלֹהִים:",
        "וּתְהֵי לְהוֹן לְאַחֲסָנָא חוּלַק מוֹתַר קוּרְבָּנִי חוּלַקְהוֹן וְאַחְסָנָא לָא תִתְּנוּן לְהוֹן בְּיִשְׂרָאֵל מַתְּנַן דִיהֲבֵית לְהוֹן אִינוּן אַחֲסַנְתְּהוֹן:",
        "מִנְחֲתָא חֲטָאתָא וַאֲשָׁמָא אִינוּן יֵכְלוּנֵיהּ וְכָל חָרְמָא בְיִשְׂרָאֵל לְהוֹן יְהֵי:",
        "וְרֵישׁ כָּל בִּכּוּרֵי כּוֹלָא וְכָל אַפְרָשׁוּת כּוֹלָא מִכָּל אַפְרְשׁוּתֵיכוֹן לְכַהֲנַיָא יְהֵי וְרֵישׁ אַצְוָתְכוֹן תִּתְּנוּן לְכַהֲנָא לְאַשְׁרָאָה בִרְכְּתָא בְּבֵיתָךְ:",
        "כָּל נְבֵילָא וּתְבִירָא מִן עוֹפָא וּמִן בְּעִירָא לָא יֵיכְלוּן כַּהֲנַיָא:"
      ],
      [
        "וּבְפַלְגוּתְהוֹן יַת אַרְעָא בְאַחֲסָנָא תִּפְרְשׁוּן אַפְרָשׁוּתָא קֳדָם יְיָ קוּדְשָׁא מִן אַרְעָא אוּרְכָּא עַסְרִין וְחַמְשָׁא אַלְפִין אוּרְכָּא וּפוּתְיָא עַסְרָא אַלְפִין קוּדְשָׁא הוּא בְּכָל תְּחוּמָה סְחוֹר סְחוֹר:",
        "יְהֵי מִדֵין לְקוּדְשָׁא חֲמֵשׁ מְאָה בַּחֲמֵשׁ מְאָה מְרֻבַּע סְחוֹר סְחוֹר וְחַמְשִׁין אַמִין רוּחָא לֵיהּ סְחוֹר סְחוֹר:",
        "וּמִן מִשְׁחָתָא הָדָא תִּמְשַׁח אוּרְכָּא עַסְרִין וְחַמְשָׁא אַלְפִין וּפוּתְיָא עַסְרָא אַלְפִין וּבֵיהּ יְהֵי מִקְדְשָׁא קוֹדֶשׁ קוּדְשִׁין:",
        "קוּדְשָׁא מִן אַרְעָא הוּא לְכַהֲנַיָא דִי מְשַׁמְשִׁין בְּבֵית מַקְדְשָׁא דַייָ יְהֵי דְקָרִיבִין לְשַׁמָשָׁא קֳדָם יְיָ וִיהֵי לְהוֹן אֲתַר שְׁבִיק לְבֵיתָא וְכִבְשָׁא לְמַקְדְשָׁא:",
        "וְעַסְרִין וְחַמְשָׁא אַלְפִין אוּרְכָּא וְעַסְרָא אַלְפִין פּוּתְיָא וִיהֵי לְלֵיוָאֵי מְשַׁמְשֵׁי בֵיתָא לְהוֹן לְאַחֲסָנָא עַסְרִין לִשְׁכָּן:",
        "וְאַחֲסָנַת קַרְתָּא תִּתְּנוּן חַמְשָׁא אַלְפִין פּוּתְיָא וְאוּרְכָּא עַסְרִין וְחַמְשָׁא אַלְפִין לָקֳבֵיל אַפְרָשׁוּת קוּדְשָׁא לְכָל בֵּית יִשְׂרָאֵל יְהֵי:",
        "וּלְרַבָּא מִכָּא וּמִכָּא לְאַפְרָשׁוּת קוּדְשָׁא וּלְאַחְסָנַת קַרְתָּא לָקֳבֵיל אַפְרָשׁוּת קוּדְשָׁא וְלִקֳבֵיל אַחְסָנַת קַרְתָּא מֵרוּחַ מַעַרְבָא מַעַרְבָא וּמֵרוּחַ מַדִינְחָא מַדִינְחָא וְאוּרְכָּא לָקֳבֵיל חַד מִן חוּלְקַיָא מִתְּחוּם מֵעַרְבָא עַד תְּחוּם מַדִינְחָא:",
        "דָא אַרְעָא תְּהֵי לְרַבָּא לְאַחְסַנְתָּא בְּיִשְׂרָאֵל וְלָא יֵנִיסוּן עוֹד רַבְרְבֵי יַת עַמִי וְאַרְעָא יִתְּנוּן לְבֵית יִשְׂרָאֵל לְשִׁבְטֵיהוֹן:",
        "כִּדְנַן אֲמַר יְיָ אֱלֹהִים סַגִי לְכוֹן רַבְרְבֵי יִשְׂרָאֵל דַטְפָא וּבִזָא אַעְדוּ וְדִין דִקְשׁוֹט וּזְכוּ עֲבִידוּ סְלִיקוּ תִקְלַתְכוֹן מִגוֹ עַמִי אֲמַר יְיָ אֱלֹהִים:",
        "מוֹזְנִוָן דִקְשׁוֹט וּמְכִילַן דִקְשׁוֹט וּבָתִּין דִקְשׁוֹט יְהֵי לְכוֹן:",
        "מְכִלְתָּא וּבֵיתָא טִקוּס חַד יְהֵי לְכוֹן סְכוֹם תְּלַת סָאִין לְמִסַב מַעֲשַׂר כּוֹרָא בִּמְכִלְתָּא רַטִיבָא בֵּיתָא וַעֲשַׂר כּוֹרָא יַבִּישָׁא מְכִלְתָּא מִן כּוֹרָא יְהֵי טְקוּסֵיהּ:",
        "וְסַלְעָא עַסְרִין מָעִין תִּלְתּוּת מָנַיָא עַסְרִין סַלְעִין מָנֵי כַסְפָּא עַסְרִין וַחֲמֵשׁ סַלְעִין רִבְעוּת מָנַיָא חֲמֵשׁ עַסְרֵי סַלְעִין כּוּלְהוֹן שִׁתִּין מָנִין וּמָנֵי רַבָּא קוּדְשָׁא יְהֵי לְכוֹן:",
        "דָא אַפְרָשׁוּתָא דְתִפְרְשׁוּן חַד מָן שִׁתָּא בִמְכִלְתָּא מִכּוֹר חִטִין וְחַד מִן שִׁתָּא בִמְכִלְתָּא מִכּוֹר סַעֲרִין:",
        "וְדַחֲזֵי לְמִסַב מִן מִשְׁחָא בִּמְכִלְתָּא רַטִיבָא מֵעִישׂוּרָא בֵיתָא מִן כּוֹרָא חַד מִן עַסְרָא הַוְיָא בֵיתָא בְּכּוֹרָא אֲרֵי עֲסַר בַּתִּין כּוֹרָא:",
        "וְאִימַר חַד מִן עֲנָא מִן מָאתָן דַחֲזֵי לְמִסַת מִפַּטְמָא דְיִשְׂרָאֵל לְמִנְחֲתָא וְלַעֲלָתָא וּלְנִכְסַת קוּדְשַׁיָא לְכַפָּרָא עֲלֵיהוֹן אֲמַר יְיָ אֱלֹהִים:",
        "כָּל עַמָא דְאַרְעָא יְהוֹן עָבְדִין יַת אַפְרָשׁוּתָא הָדָא לְרַבָּא בְּיִשְׂרָאֵל:",
        "וְעַל רַבָּא יְהֵי עֲלָתָא וּמִנְחֲתָא וְנִסְכַיָא בְּחַגַיָא וּבְיַרְחַיָא וּבְשַׁבַּיָא וּבְכָל מוֹעֲדֵי בֵּית יִשְׂרָאֵל הוּא יַעֲבֵיד יַת חַטָאתָא וְיַת מִנְחָתָא וְיַת עֲלָתָא וְיַת נִכְסַת קוּדְשַׁיָא לְכַפָּרָא עַל בֵּית יִשְׂרָאֵל:",
        "כִּדְנַן אֲמַר יְיָ אֱלֹהִים בְּקַדְמָאָה בְּחַד לְיַרְחָא תִּסַב תּוֹר בַּר תּוֹרֵי שְׁלִים וְתִדְכֵּי יַת מַקְדְשָׁא:",
        "וְיִסַב כַּהֲנָא מִדְמָא דְחַטָאתָא וְיִתֵּן עַל סְקוֹפַת בֵּיתָא וְעַל אַרְבַּע זִוְיַת מְסַמָתָא לְמַדְבְּחָא וְעַל סְקוֹפַת תַּרְעָא דְדַרְתָּא גַוַיְתָא:",
        "וְכֵן תַּעְבֵיד בְּשַׁבְעָא בְּיַרְחָא מִגְבַר דְמִשְׁתְּלֵי וּמִטְפַשׁ וּתְכַפְּרוּן עַל בֵּיתָא:",
        "בְּנִיסָן בְּאַרְבְּעָא עַסְרָא יוֹמָא לְיַרְחָא יְהֵי לְכוֹן פִּסְחָא חַגָא שַׁבְעָא יוֹמִין פַּטִירַיָא יִתְאֲכֵיל:",
        "וְיַעְבֵּיד רַבָּא בְּיוֹמָא הַהוּא חִלוֹפוֹהִי וַחֲלַף כָּל עַמָא דְאַרְעָא תּוֹרָא דְחַטָאתָא:",
        "וְשַׁבְעָא יוֹמֵי דְחַגָא יַעְבֵּיד עֲלָתָא קֳדָם יְיָ שַׁבְעָא תוֹרִין וְשַׁבְעָא דִכְרִין שָׁלְמִין לְיוֹמָא שַׁבְעַת יוֹמִין וְחַטָאתָא צְפִיר בַּר עִזֵי לְיוֹמָא:",
        "וּמִנְחָתָא מְכִלְתָּא לְתוֹרָא וּמְכִלְתָּא לְדִכְרָא יַעְבֵּיד וּמִשְׁחָא מְלֵי הִינָא לִמְכִלְתָּא:",
        "בִּשְׁבִיעָאָה בְּחַמְשַׁת עַסְרָא יוֹמָא לְיַרְחָא בְּחַגָא יַעְבֵּיד כְּאִלֵין שִׁבְעָא יוֹמִין כְּאִלֵין שִׁבְעָא יוֹמִין כְּחַטָאתָא וְכַעֲלָתָא וּכְמִנְחָתָא וּכְמִשְׁחָא:"
      ],
      [
        "כִּדְנַן אֲמַר יְיָ אֱלֹהִים תַּרְעָא דְדָרְתָא גַוַיְתָא דִפְתִיחַ לְמַדִינְחָא יְהֵי אָחֵיד שִׁתָּא יוֹמֵי חוֹלָא וּבְיוֹמָא דְשַׁבְּתָא יְהֵי פְּתִיחַ וּבְיוֹמָא דְיַרְחָא יְהֵי פְּתִיחַ:",
        "וְיֵעוֹל רַבָּא בְּאוֹרַח אוּלַמָא דְתַרְעָא מִלְבָרָא וִיקוּם עַל סְקוּפַת תַּרְעָא וְיַעְבְּדוּן כַּהֲנַיָא יַת עֲלָתֵיהּ וְיַת נִכְסַת קוּדְשֵׁיהּ וְיִסְגוֹד עַל סְקוֹפַת תַּרְעָא וְיִפּוֹק וְתַרְעָא לָא יִתְאָחִיד עַד רַמְשָׁא:",
        "וְיִסְגְדוּן עַמָא דְאַרְעָא בְּמַעֲלָנָא דְתַרְעָא הַהוּא בְּשַׁבַּיָא וּבְיַרְחַיָא קֳדָם יְיָ:",
        "וַעֲלָתָא דִי יַקְרִיב רַבָּא קֳדָם יְיָ בְּיוֹמָא דְשַׁבְּתָא שִׁתָּא אִמְרִין שָׁלְמִין וּדְכַר שְׁלִים:",
        "וּמִנְחֲתָא מְכִלְתָּא לְדִיכְרָא וּלְאִימְרָא מִנְחָתָא מַדְבֵּק יְדֵיהּ וּמִשְׁחָא מְלוֹ הִינָא לִמְכִלְתָּא:",
        "וּבְיוֹמָא דְיַרְחָא תּוֹר בַּר תּוֹרֵי שְׁלִים וְשִׁתָּא אִימְרִין וּדְכַר שָׁלְמִין יְהוֹן:",
        "וּמְכִלְתָּא לְתוֹרָא וּמְכִלְתָּא לְדִיכְרָא יַעְבַּד מִנְחֲתָא וּלְאִמְרַיָא כְּמָא דְתַדְבֵּיק יְדֵיהּ וּמִשְׁחָא מְלוֹ הִינָא לִמְכִלְתָּא:",
        "וּבְמֵיעַל רַבָּא בְּאוֹרַח אוּלַמָא דְתַרְעָא יֵעוֹל וּבְאוֹרְחֵיהּ יִפּוֹק:",
        "וּבְמֵיעַל עַמָא דְאַרְעָא לְמִסְגַד קֳדָם יְיָ בְּמוֹעֲדַיָא דְעָלֵיל בְּאוֹרַח תְּרַע צִפּוּנָא לְמִסְגַד יִפּוֹק בְּאוֹרַח תְּרַע דָרוֹמָא וּדְיֵעוֹל בְּאוֹרַח תְּרַע דָרוֹמָא יִפּוֹק בְּאוֹרַח תְּרַע צִפּוּנָא לָא יְתוּב בְּאוֹרַח תְּרַע דִי עָל בֵּיהּ אֲרֵי לְקִבְלֵיהּ יִפּוֹק:",
        "וְרַבָּא בֵּינֵיהוֹן בְּמֵיעַלְהוֹן יֵיעוֹל וּבְמִפַקְהוֹן יִפְקוּן:",
        "וּבְחַגַיָא וּבְמוֹעֲדַיָא תְּהֵי מִנְחָתָא מְכִלְתָּא לְתוֹרָא וּמְכִלְתָּא לְדִיכְרָא וּלְאִימְרַיָא דְתַדְבֵּיק יְדֵיהּ וּמִשְׁחָא מְלֵי הִינָא לִמְכִלְתָּא:",
        "וַאֲרֵי יַעְבֵּיד רַבָּא נִדְבָתָא עֲלָתָא אוֹ נִכְסַת קוּדְשַׁיָא נִדְבְתָא קֳדָם יְיָ וְיִפְתַּח לֵיהּ יַת תַּרְעָא דִפְתִיחַ לְמַדִינְחָא וְיַעְבֵּיד יַת עֲלָתֵיהּ וְיַת נְכָסַת קוּדְשׁוֹהִי כְּמָא דִי עֲבַד בְּיוֹמָא דְשַׁבְּתָּא וְיִפּוֹק וְיֵחוּד יַת תַּרְעָא בָּתַר מַפְקֵיהּ:",
        "וְאִימַר בַּר שַׁתֵּיהּ שְׁלִים תַּעְבֵיד עֲלָתָא לְיוֹמָא קֳדָם יְיָ בִּצְפַר בִּצְפַר תַּעְבֵיד יָתֵיהּ:",
        "וּמִנְחָתָא תַעְבֵּיד עֲלוֹהִי בִּצְפַר בִּצְפַר חַד מִן שִׁתָּא בִּמְכִלְתָּא וּמִשְׁחָא תִּילְתוּת הִינָא לְעָרָבָא יַת סוּלְתָּא מִנְחָתָא קֳדָם יְיָ קְיַם עֲלַם תְּדִירָא:",
        "יַעְבְדוּן יַת אִימְרָא וְיַת מִנְחֲתָא וְיַת מִשְׁחָתָא בִּצְפַר בִּצְפַר עֲלָתָא תְּדִירָא:",
        "כִּדְנַן אֲמַר יְיָ אֱלֹהִים אֲרֵי יִתֵּן רַבָּא מַתְּנָא לְחַד מִבְּנוֹהִי אַחֲסַנְתֵּיהּ הִיא לִבְנוֹהִי תְהֵי אֲחִידַתְהוֹן הִיא בְּאַחֲסָנָא:",
        "וַאֲרֵי יִתֵּן מַתְּנָא מֵאַחֲסַנְתֵּיהּ לְחַד מֵעַבְדוֹהִי וּתְהֵי לֵיהּ עַד שַׁתָּא דְיוֹבֵלָא וּתְתֵיב לְרַבָּא בְּרַם אַחֲסַנְתֵּיהּ דִי בְנוֹהִי דִילְהוֹן תְּהֵי:",
        "וְלָא יִסַב רַבָּא מֵאַחֲסָנַת עַמָא לְמֵינַסְהוֹן מֵאַחֲסַנְתְּהוֹן מֵאַחֲסַנְתֵּיהּ יַחְסִין לִבְנוֹהִי בְּדִיל דְלָא יִתְבַּדְרוּן עַמִי גְבַר מֵאַחֲסַנְתֵּיהּ:",
        "וְאַעֲלַנִי בְּמַעֲלָנָא דִי לְעִבַּר תַּרְעָא לְלִשְׁכַת קוּדְשַׁיָא דְכַהֲנַיָא דִי פְתִיחַן צִפּוּנָא וְהָא תַמָן אַתְרָא בְסוֹפֵיהוֹן מַעַרְבָא:",
        "וַאֲמַר לִי דֵין אַתְרָא דִיבַשְׁלוּן תַּמָן כַּהֲנַיָא יַת אֲשָׁמָא וְיַת חֲטָאתָא דִי יֵיפוּן יַת מִנְחָתָא בְּדִיל דְלָא לְאַפָקָא לְדַרְתָּא בְּרַיְתָא לְאִתְעֲרָבָא עִם עַמָא:",
        "וְאַפְקַנִי לְדַרְתָּא בָרַיְתָא וְאַעְבְּרַנִי עַל אַרְבַּע זִוְיַת דַרְתָּא וְהָא דַרְתָּא בְּזִוְיַת דַרְתָּא:",
        "בְּאַרְבְּעָא זִוְיַת דַרְתָּא דָרָתָא מְקַטְרָן אַרְבְּעִין אוּרְכָּא וּתְלָתִין פּוּתְיָא מְשַׁחְתָּא חֲדָא לְאַרְבַּעְתְּהוֹן דְדַרְתָּא:",
        "וְנִדְבָּכִין עֲבִידִין לְהוֹן סְחוֹר לְאַרְבַּעְתְּהוֹן וַאֲתַר מְתַקֵן לְבַשָׁלָא עֲבִיד מִלְרַע לְנִדְבָּכַיָא סְחוֹר סְחוֹר:",
        "וַאֲמַר לִי דֵין אֲתַר מְתַקָן לְבַשָׁלַיָא דִיבַשְׁלוּן תַּמָן מְשַׁמְשֵׁי בֵיתָא יַת נִכְסַת קוּדְשַׁיָא דְעַמָא:"
      ],
      [
        "וַאֲתִיבַנִי לִתְרַע בֵּיתָא וְהָא מַיָא נַפְקִין מִתְּחוֹת סְקוֹפַת בֵּיתָא מִמַדִינְחָא אֲרֵי אַפֵּי בֵיתָא לְמַדִינְחָא וּמַיָא נָחֲתִין מִלְרַע מֵעַבַר סְקוֹפַת בֵּיתָא לְיַמִינָא מִדָרוֹם לְמַדְבְּחָא:",
        "וְאַפְקֵנִי בְּאוֹרַח תַּרְעָא צִפּוּנָא וְאַסְחֲרַנִי בְּאוֹרַח דִי לְבָרָא לְתַרְעָא בְּרָאָה אוֹרַח תַּרְעָא דִפְתִיחַ לְמַדִינְחָא וְהָא מַיָא נַפְקִין מִן עַבְרָא דְיַמִינָא:",
        "בְּמִפַּק גַבְרָא מִמַדִינְחָא וְחוּט דִמְשַׁחְתָּא בִידֵיהּ וּמְשַׁח אֶלֶף אַמִין בְּאַמְתָא וְאַעְבִּירַנִי בְמַיָא מֵי קַרְסוּלִין:",
        "וּמְשַׁח אַלְפָא וְאַעְבִירֵנִי בְמַיָא מֵי רְכוּבִין וּמְשַׁח אַלְפָא וְאַעְבִירַנִי מֵי חַרְצִין:",
        "וּמְשַׁח אַלְפָא נַחֲלָא דְלָא יְכֵילֵית לְמֶעְבַּר אֲרֵי תַקִיפוּ מַיָא מֵי סַחֲוָא נַחֲלָא דְלָא אֶפְשַׁר לְאִתְעֲבָּרָא:",
        "וַאֲמַר לִי הַחֲזֵיתָא בַּר אָדָם וְאוֹבִלַנִי וַאֲתִיבַנִי עַל כֵּיף נַחֲלָא:",
        "בְּמֵתְבִי וְהָא עַל כֵּיף נַחֲלָא אִילָן סַגִי לַחֲדָא מִכָּא וּמִכָּא:",
        "וַאֲמַר לִי מַיָא הָאִלֵין נַפְקִין בְּגָלִילָא מִמַדִינְחָא וְנָחֲתִין בְּמֵישְׁרָא וְעָלִין בְּיַמָא לְיַמָא רַבָּא מִתַּפְקִין וּמִתַּסָן מַיָא:",
        "וִיהֵי כָל נַפְשָׁא חַיְתָא דִי רִיחֲשָׁא לְכָל אֲתַר דִי עָלוּן לְתַמָן מֵי נַחֲלָא יְחוֹן וִיהוֹן נוּנַיָא סַגִי לַחֲדָא אֲרֵי עָלִין לְתַמָן מַיָא הָאִלֵין וּמִתַּסָן וּמִתְקַיְמִין לְכָל אֲתַר דִי יַעֲלוֹן לְתַמָן מֵי נַחֲלָא:",
        "וִיהֵי אֲתַר לְמֵיקָם עֲלוֹהִי צְיָדִין מֵעֵין גֶדִי וְעַד עֵין עֶגְלַיִם מִשְׁטַח לְצַיָדִין יְהוֹן לְמִינְהוֹן יְהוֹן נוּנֵיהוֹן כְּנוּנֵי יַמָא רַבָּא סַגִי לַחֲדָא:",
        "בִּצוֹהִי וּפַצִידוֹהִי לָא יִתַּסוּן לְמַחֲפּוֹרִין דִמְלַח יְהוֹן:",
        "וְעַל נַחֲלָא יִסַק אִילָן עַל כֵּיפֵיהּ מִכָּא וּמִכָּא כָּל אִילָן דְמֵיכַל לָא יִתְרוּן טַרְפוֹהִי וְלָא יִפְסוֹק אִבֵּיהּ יְרַח בִּירַח יְהֵי עָבֵיד פֵּירִין אֲרֵי מוֹהִי מִן מַקְדְשָׁא אִינוּן נַפְקִין וִיהוֹן אִבֵּיהּ לְמֵיכַל וְטַרְפוֹהִי לְאַסוּתָא:",
        "כִּדְנַן אֲמַר יְיָ אֱלֹהִים דֵין תְּחוּמָא דְתַחְסְנוּן יַת אַרְעָא לִתְרֵי עֲסַר שִׁבְטֵי יִשְׂרָאֵל יוֹסֵף יִתְקַבֵּל תְּרֵין חוּלְקִין:",
        "וְתַחְסְנוּן יָתָהּ גְבַר כַּאֲחוֹהִי דִי קַיְמֵית בְּמֵימְרִי לְמִתְּנָהּ לַאֲבָהַתְכוֹן וְתִתְפְּלֵיג אַרְעָא הָדָא לְכוֹן בְּאַחֲסָנָא:",
        "וְדֵין תְּחוּם אַרְעָא לְרוּחַ צִפּוּנָא מִן יַמָא רַבָּא אוֹרַח חֶתְלוֹן לְמַעֲלָנָא דִצְדָד:",
        "חֲמָת בְּרוֹתָא סִבְרַיִם דִי בֵּין תְּחוּם דַמֶשֶׂק וּבֵין תְּחוּם חֲמָת בְּרֵכַת עַגְבָאֵי דִי עַל תְּחוּם חַוְרָן:",
        "וִיהֵי תְחוּמָא מִן יַמָא חֲצַר עֵינוֹן תְּחוּם דַמֶשֶׂק וְצִפּוּנָא צִפּוּנָא וּתְחוּם חֲמָת וְיַת רוּחַ צִפּוּנָא:",
        "וְרוּחַ מַדִינְחָא מִבֵּין חַרְוָן וּמִבֵּין דַמֶשֶׂק וּמִבֵּין גִלְעָד וּמִבֵּין אַרְעָא דְיִשְׂרָאֵל יַרְדָנָא מִתְּחוּמָא דִי עַל יַמָא מַדִינְחָא תִּמְשְׁחוּן וְיַת רוּחָא קִדוּמָא:",
        "וְרוּחַ עִבַּר דָרוֹמָא מִירִיחוֹ עַד מֵי מַצוּת רְקָם אַחֲסָנָא לְיַמָא רַבָּא וְיַת רוּחַ דָרוֹמָא דְדָרוֹמָא:",
        "וְרוּחַ מֵעַרְבָא יַמָא רַבָּא מִתְּחוּמָא עַד מִקֳבֵיל מַעֲלָנָא דַחֲמָת דָא רוּחַ מַעֲרָבָא:",
        "וּתְפַלְגוּן יַת אַרְעָא הָדָא לְכוֹן לְשִׁבְטַיָא דְיִשְׂרָאֵל:",
        "וִיהֵי דְתִפְלְגוּן יָתָהּ בְּאַחֲסָנָא לְכוֹן וּלְגִיוֹרָא דִי יִתְגַיְרוּן בֵּינֵיכוֹן דְאוֹלִידוּ בְּנִין בֵּינֵיכוֹן וִיהוֹ לְכוֹן כְּיַצִיבָא בִּבְנֵי יִשְׂרָאֵל עִמְכוֹן יִפְלְגוּן בְּאַחֲסָנָא בְּגוֹ שִׁבְטֵי יִשְׂרָאֵל:",
        "וִיהֵי שִׁבְטָא דִי יִתְגַיֵר גִיוֹרָא בְגַוֵיהּ תַּמָן תִּתְּנוּן אַחֲסַנְתֵּיהּ אֲמַר יְיָ אֱלֹהִים:"
      ],
      [
        "וְאִלֵין שְׁמָהַת שִׁבְטַיָא מִסְיָפֵי צִפּוּנָא עַל תְּחוּם אוֹרַח חֶתְלוֹן מַעֲלָנָא דַחֲמָת חֲצַר עֵינָן תְּחוּם דַמֶשֶׂק צִפּוּנָא עַל תְּחוּם חֲמָת וִיהוֹן לֵיהּ רוּחַ קִידוּמָא מַעֲרָבָא דָן חָד:",
        "וְעַל תְּחוּם דָן מֵרוּחַ מַדִינְחָא עַד רוּחַ מַעֲרָבָא אָשֵׁר חָד:",
        "וְעַל תְּחוּם אָשֵׁר מֵרוּחַ מְדִינְחָא וְעַד רוּחַ מַעֲרָבָא נַפְתָּלִי חָד:",
        "וְעַל תְּחוּם נַפְתָּלִי מֵרוּחַ מַדִינְחָא עַד רוּחַ מַעֲרָבָא מְנַשֶׁה חָד:",
        "וְעַל תְּחוּם מְנַשֶׁה מֵרוּחַ מַדִינְחָא עַד רוּחַ מַעֲרָבָא אֶפְרַיִם חָד:",
        "וְעַל תְּחוּם אֶפְרַיִם מֵרוּחַ מַדִינְחָא וְעַד רוּחַ מַעֲרָבָא רְאוּבֵן חָד:",
        "וְעַל תְּחוּם רְאוּבֵן מֵרוּחַ מַדִינְחָא עַד רוּחַ מַעֲרָבָא יְהוּדָה חָד:",
        "וְעַל תְּחוּם יְהוּדָה מֵרוּחַ מַדִינְחָא עַד רוּחַ מַעֲרָבָא תְּהֵי אַפְרָשׁוּתָא דְתִפְרְשׁוּן עַסְרִין וַחֲמֵשׁ אַלְפִין פּוּתְיָא וְאוּרְכָּא כְּחַד מִן חוּלְקַיָא מֵרוּחַ מַדִינְחָא עַד רוּחַ מַעֲרָבָא וִיהֵי כֵיבַשׁ מַקְדְשָׁא בְגַוֵיהּ:",
        "אַפְרְשׁוּתָא דִי תִפְרְשׁוּן קֳדָם יְיָ אוּרְכָּא עַסְרִין וְחַמְשָׁא אַלְפִין וּפּוּתְיָא עַסְרָא אַלְפִין:",
        "וּלְאִלֵין תְּהֵי אַפְרָשׁוּת קוּדְשָׁא לְכַהֲנַיָא צִפּוּנָא עַסְרִין וְחַמְשָׁא אַלְפִין וּלְמַעֲרְבָא פּוּתְיָא עַסְרָא אַלְפִין וּלְמַדִינְחָא פּוּתְיָא עַסְרָא אַלְפִין וּלְדָרוֹמָא אוּרְכָּא עַסְרִין וְחַמְשָׁא אַלְפִין וִיהֵי כֵיבַשׁ מַקְדְשָׁא דַייָ בְּגַוֵיהּ:",
        "לְכַהֲנַיָא דְקַדִישִׁין מִבְּנֵי צָדוֹק דִנְטָרוּ מַטְרַת מֵימְרִי דְלָא טָעוּ בִּטְעוֹת בְנֵי יִשְׂרָאֵל כְּמָא דְטָעוּ לֵיוָאֵי:",
        "וּתְהֵי לְהוֹן אַפְרָשׁוּתָא מֵאַפְרָשׁוּת אַרְעָא קוֹדֶשׁ קוּדְשִׁין עַל תְּחוּם לֵיוָאֵי:",
        "וְלֵיוְאֵי לָקֳבֵיל תְּחוּם כַּהֲנַיָא עַסְרִין וְחַמְשָׁא אַלְפִין אוּרְכָּא וּפוּתְיָא עַסְרָא אַלְפִין כָּל אוּרְכָּא עַסְרִין וְחַמְשָׁא אַלְפִין וּפוּתְיָא עַסְרִין אַלְפִין:",
        "וְלָא יִזְבְּנוּן מִנֵיהּ וְלָא יַחֲלִיף וְלָא יַעֲבַר רֵישׁ אַרְעָא אֲרֵי קוּדְשָׁא קֳדָם יְיָ:",
        "וְחַמְשָׁא אַלְפִין דְאִשְׁתָּאֲרוּ בְּפוּתְיָא עַל אַפֵּי עַסְרִין וְחַמְשָׁא אַלְפִין חוֹלָא הוּא לְקַרְתָּא לְמוֹתַב וּלְרֶוַח וִיהֵי כֵיבַשׁ קַרְתָּא בְּגַוֵיהּ:",
        "וְאִלֵין מְשַׁחְתָּהָא לְרוּחַ צִפּוּנָא אַרְבַּע אַלְפִין וַחֲמֵשׁ מְאָה וּלְרוּחַ דָרוֹמָא אַרְבַּע אַלְפִין וַחֲמֵשׁ מְאָה וּלְרוּחַ מַדִינְחָא אַרְבַּע אַלְפִין וַחֲמֵשׁ מְאָה וּלְרוּחַ מַעֲרָבָא אַרְבַּע אַלְפִין וַחֲמֵשׁ מְאָה:",
        "וִיהֵי רְוָחָא לְקַרְתָּא לְצִפּוּנָא מָאתָן וְחַמְשִׁין וְדָרוֹמָא מָאתָן וְחַמְשִׁין וּמַדִינְחָא מָאתָן וְחַמְשִׁין וּמַעֲרָבָא מָאתָן וְחַמְשִׁין:",
        "וּדְאִשְׁתָּאַר בְּאוּרְכָּא לָקֳבֵיל אַפְרָשׁוּת קוּדְשָׁא עַסְרִין אַלְפִין לְמַדִינְחָא וְעַסְרָא אַלְפִין לְמַעֲרָבָא וִיהֵי לָקֳבֵיל אַפְרָשׁוּת קוּדְשָׁא וּתְהֵי עֲלַלְתֵּיהּ לְמֵיכַל לְדִמְפַלְחִין בְּקַרְתָּא:",
        "וְדִמְפַלַח בְּקַרְתָּא יַפְלִיחוּנֵיהּ מִכָּל שִׁבְטֵי יִשְׂרָאֵל:",
        "וְכָל אַפְרָשׁוּתָא עַסְרִין וְחַמְשָׁא אַלְפָא בְּעַסְרִין וְחַמְשָׁא אַלְפָא מְרַבַּע תִּפְרְשׁוּן יַת אַפְרָשׁוּת קוּדְשָׁא לְאַחֲסָנַת קַרְתָּא:",
        "וּדְאִשְׁתָּאַר לְרַבָּא מִכָּא וּמִכָּא לְאַפְרָשׁוּת קוּדְשָׁא וּלְאַחֲסָנַת קַרְתָּא לָקֳבֵיל חַמְשָׁא וְעַסְרִין אַלְפִין אַפְרָשׁוּתָא עַד תְּחוּם מַדִינְחָא וּמַעֲרָבָא לָקֳבֵיל עַסְרִין וְחַמְשָׁא אַלְפִין עַד תְּחוּם מַעֲרָבָא לָקֳבֵיל חַד מִן חוּלְקַיָא לְרַבָּא וּתְהֵי אַפְרָשׁוּת קוּדְשָׁא וְכֵיבַשׁ מַקְדַשׁ בֵּיתָא בְּגַוֵיהּ:",
        "וּמֵאַחֲסָנַת לֵיוָאֵי וּמֵאַחְסָנַת קַרְתָּא בִּמְצִיעִין דִלְרַבָּא יְהֵי בֵּין תְּחוּם יְהוּדָה וּבֵין תְּחוּם בִּנְיָמִן לְרַבָּא יְהֵי:",
        "וּשְׁאַר שִׁבְטַיָא מֵרוּחַ מַדִינְחָא וְעַד רוּחַ מַעֲרָבָא בִּנְיָמִן חָד:",
        "וְעַל תְּחוּם בִּנְיָמִן מֵרוּחַ מַדִינְחָא עַד רוּחַ מַעֲרָבָא שִׁמְעוֹן חָד:",
        "וְעַל תְּחוּם שִׁמְעוֹן מֵרוּחַ מַדִינְחָא וְעַד רוּחַ מַעֲרָבָא יִשָׂשׂכָר חָד:",
        "וְעַל תְּחוּם יִשָׂשׂכָר מֵרוּחַ מַדִינְחָא עַד רוּחַ מַעֲרָבָא זְבוּלֻן חָד:",
        "וְעַל תְּחוּם זְבוּלֻן מֵרוּחַ מַדִינְחָא עַד רוּחַ מַעֲרָבָא גָד חָד:",
        "וְעַל תְּחוּם גָד לְרוּחַ עִבַּר דָרוֹמָא וִיהֵי תְחוּם מִירִיחוֹ מֵי מַצוּת רְקָם אַחֲסָנָא לְיַמָא רַבָּא:",
        "דָא אַרְעָא דְתִפְלְגוּן לְאַחֲסָנָא לְשִׁבְטַיָא דְיִשְׂרָאֵל וְאִלֵין פַּלְגוּתְהוֹן אֲמַר אֱלֹהִים:",
        "וְאִלֵין מַפְקָנֵי קַרְתָּא מֵרוּחַ צִפּוּנָא אַרְבַּע אַלְפִין וַחֲמֵשׁ מְאָה מִשְׁחָא:",
        "וְתַרְעֵי קַרְתָּא עַל שְׁמָהַת שִׁבְטַיָא דְיִשְׂרָאֵל תַּרְעִין תְּלָתָא פְּתִיחִין לְצִפּוּנָא תְּרַע רְאוּבֵן חָד תְּרַע יְהוּדָה חָד תְּרַע לְוֵי חָד:",
        "וּלְרוּחַ מַדִינְחָא אַרְבְּעָה אַלְפִין וַחֲמֵשׁ מְאָה וְתַרְעִין תְּלָתָא תְּרַע יוֹסֵף חָד תְּרַע בִּנְיָמִן חָד תְּרַע דָן חָד:",
        "וּלְרוּחַ דָרוֹמָא אַרְבְּעָא אַלְפִין וַחֲמֵשׁ מְאָה מִשְׁחָן וְתַרְעִין תְּלָתָא תְּרַע שִׁמְעוֹן חָד תְּרַע יִשָׂשׂכָר חָד תְּרַע זְבוּלֻן חָד:",
        "וְרוּחַ מַעֲרָבָא אַרְבַּע אַלְפִין וַחֲמֵשׁ מְאָה תַּרְעֵיהוֹן תְּלָתָא תְּרַע גָד חָד תְּרַע אָשֵׁר חָד תְּרַע נַפְתָּלִי חָד:",
        "סְחוֹר סְחוֹר תַּמְנַת עֲסַר אַלְפִין וּשְׁמָא דְקַרְתָּא דְמִתְפָּרֵישׁ מִיוֹמָא דִי יִשְׁרֵי יְיָ שְׁכִנְתֵּיהּ תַּמָן:"
      ]
    ],
    "text": [
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [
        "And the word of prophecy from before the LORD was with me, saying:",
        "Mortal man, rebuke the residents of Jerusalem and show them their abominations.",
        "And say: Thus said the LORD God to the residents of Jerusalem: Your settlement and youth was from the land of the Canaanites; there I was revealed upon Abraham your father between the pieces, and I showed him that you would go down to Egypt, with a high hand I would liberate you, and by merit of your ancestors I would drive out from before you the Amorites and expelled the Hittites.",
        "But when your ancestors went down to Egypt, dwelling in a land not theirs, enslaved and afflicted was the congregation of Israel, like a child abandoned by the mouth of a pit, with uncut cord, unwashed in water for cleaning, and not rubbed with salt, nor swaddled in swaddling.",
        "The eye of Pharaoh had no mercy on you, not even doing one good thing to have compassion on you, and decreed against you a decree of annihilation, to throw your males into the river, to destroy you at the time you were in Egypt.",
        "And for the memory of the ancestral covenant before Me, I revealed Myself to liberate you, for it was revealed before Me that you were afflicted and enslaved, and I said to you, \"In the blood of the circumcision I will have mercy on you,\" and I said to you, \"In the blood of the paschal-sacrifice I will liberate you.\"",
        "Myriad like the plants of the field I made you, and you increased and strengthened, and became families and tribes, and by the upright works of your ancestors the time to liberate your congregation had arrived, for you were enslaved and afflicted.",
        "And I revealed myself to Moses in the bush, for it was revealed before Me that the time had come for your liberation, and I protected you by My word, and I removed your sins, and I swore by My word to liberate you, as I had sworn to your ancestors — said the LORD GOd — to be a people serving before Me.",
        "And I liberated you from Egyptian slavery and removed their strong dominion from you and led you in freedom.",
        "And I dressed you in embroidered garments from your enemies' treasure, and placed a shoe of glory on your feet, and sanctified from among you the priests to be serving before Me in a linen turban, and the high priest in colored garments.",
        "And I fixed before you the correct words of the Torah, written on two tables of stone, and I gave them by the hand of Moses, and in the sanctity of My great Name I sanctified you.",
        "And I gave you the ark of My covenant among you, and the could have My glory went over you, and an angel sent from before Me leading ahead of you.",
        "And I gave My tabernacle among you, affixed with gold and silver and linen and colored embroidered hangings, and manna as good as semolina and honey and oil I fed you, and I enriched you and strengthened you and made you prosper and have dominion over all kingdoms. ",
        "And your name went out, congregation of Israel, among the nations, in your beauty, for complete was My glory that I set upon you — said the LORD God.",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "",
        "Look - this was the debt of Sodom your sister: pride, plenty of bread, and ease and tranquility were hers and her villages, yet the hand of the poor and hungry she did not strengthen.",
        "And they claimed themselves superior, and did an abomination before Me, so I exiled them, just as has been revealed from before Me."
      ],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      [],
      []
    ],
    "book": "Targum Jonathan on Ezekiel",
    "chapters_fetched": 48,
    "complete": true
  },
  "downloaded_at": "2026-01-15T23:05:33.302381",
  "provider": "sefaria"
}